ਦੇਸ਼ ਭਰ ਵਿੱਚ ਕੋਵਿਡ- 19 ਟੀਕੇ ਨੂੰ ਰੋਲ ਆਊਟ ਕਰਨ ਦੇ ਉਦੇਸ਼ ਨਾਲ, ਕੇਂਦਰ ਸਰਕਾਰ ਨੇ ਸਾਰੇ ਰਾਜਾਂ ਅਤੇ ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਨੂੰ ਟੀਕੇ ਦੇ ਰੋਲ ਆਉਟ ਲਈ ਪ੍ਰਭਾਵੀ ਤਿਆਰੀ ਨੂੰ ਯਕੀਨੀ ਬਣਾਉਣ ਲਈ ਕਿਹਾ ਹੈ। ਕੇਂਦਰੀ ਸਿਹਤ ਸਕੱਤਰ ਸ਼੍ਰੀ ਰਾਜੇਸ਼ ਭੂਸ਼ਣ ਨੇ ਅੱਜ ਕੋਵਿਡ -19 ਟੀਕਾਕਰਨ ਲਈ ਸੈਸ਼ਨ ਸਾਈਟਾਂ ਤੇ ਤਿਆਰੀ ਦੀ ਸਮੀਖਿਆ ਲਈ ਵੀਡੀਓ ਕਾਨਫ਼੍ਰੇੰਸਿੰਗ ਰਾਹੀਂ ਸਾਰੇ ਹੀ ਰਾਜਾਂ /ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਦੇ ਪ੍ਰਿੰਸੀਪਲ ਸਕੱਤਰਾਂ (ਸਿਹਤ), ਐਨਐਚਐਮ ਐਮਡੀ'ਜ ਅਤੇ ਹੋਰ ਸਿਹਤ ਪ੍ਰਸ਼ਾਸਕਾਂ ਨਾਲ ਉੱਚ ਪੱਧਰੀ ਮੀਟਿੰਗ ਕੀਤੀ।

ਡਰਾਈ ਰਨ 2 ਜਨਵਰੀ 2021 (ਸ਼ਨੀਵਾਰ) ਨੂੰ ਸਾਰੇ ਰਾਜ ਅਤੇ ਕੇਂਦਰ ਸ਼ਾਸਤ ਪ੍ਰਦੇਸ਼ ਸਰਕਾਰਾਂ ਵੱਲੋਂ ਸੰਚਾਲਤ ਕੀਤਾ ਜਾਵੇਗਾ। ਗਤੀਵਿਧੀ ਨੂੰ ਸਾਰੇ ਹੀ ਰਾਜਾਂ ਦੀਆਂ ਰਾਜਧਾਨੀਆਂ ਵਿੱਚ ਘੱਟੋ ਘੱਟ 3 ਸ਼ੈਸ਼ਨ ਸਾਈਟਾਂ ਤੇ ਕਰਨ ਦੀ ਤਜਵੀਜ਼ ਹੈ; ਕੁਝ ਰਾਜਾਂ ਵਿੱਚ ਉਹ ਜ਼ਿਲ੍ਹੇ ਵੀ ਸ਼ਾਮਲ ਹੋਣਗੇ ਜੋ ਦੁਰਗਮ ਖੇਤਰ ਵਿੱਚ ਸਥਿਤ ਹਨ / ਲੌਜਿਸਟਿਕ ਸਹਾਇਤਾ ਕਮਜ਼ੋਰ ਹੈ ; ਮਹਾਰਾਸ਼ਟਰ ਅਤੇ ਕੇਰਲਾ ਵਿਚ ਰਾਜਧਾਨੀ ਸ਼ਹਿਰ ਤੋਂ ਇਲਾਵਾ ਹੋਰ ਵੱਡੇ ਸ਼ਹਿਰਾਂ ਵਿਚ ਵੀ ਡਰਾਈ ਰਨ ਸੰਚਾਲਤ ਕੀਤੇ ਜਾਣ ਦੀ ਸੰਭਾਵਨਾ ਹੈ।

ਕੋਵਿਡ-19 ਟੀਕੇ ਦੀ ਸ਼ੁਰੂਆਤ ਲਈ ਡਰਾਈ ਰਨ ਦਾ ਉਦੇਸ਼ ਖੇਤਰ ਦੇ ਵਾਤਾਵਰਣ ਵਿਚ ਕੋ-ਵਿਨ ਐਪਲੀਕੇਸ਼ਨ ਦੀ ਵਰਤੋਂ ਵਿਚ ਸੰਚਾਲਨ ਦੀ ਸੰਭਾਵਨਾ ਦਾ ਮੁਲਾਂਕਣ ਕਰਨਾ, ਯੋਜਨਾਬੰਦੀ ਅਤੇ ਲਾਗੂ ਕਰਨ ਦੇ ਵਿਚਕਾਰ ਸੰਬੰਧਾਂ ਦੀ ਜਾਂਚ ਕਰਨਾ ਅਤੇ ਚੁਣੌਤੀਆਂ ਦੀ ਪਛਾਣ ਕਰਨਾ ਅਤੇ ਵਾਸਤਵਿਕ ਤੌਰ ਤੇ ਲਾਗੂ ਕਰਨ ਤੋਂ ਪਹਿਲਾਂ ਅੱਗੇ ਵਧਣ ਵਾਲੇ ਰਸਤੇ ਦਾ ਮਾਰਗ ਦਰਸ਼ਨ ਕਰਨਾ ਹੈ। ਇਸ ਤੋਂ ਵੱਖ-ਵੱਖ ਪੱਧਰਾਂ 'ਤੇ ਪ੍ਰੋਗਰਾਮ ਪ੍ਰਬੰਧਕਾਂ ਨੂੰ ਵਿਸ਼ਵਾਸ ਦਿਵਾਉਣ ਦੀ ਵੀ ਉਮੀਦ ਕੀਤੀ ਜਾਂਦੀ ਹੈ।

ਟੀਕਾ ਲਗਵਾਉਣ ਦੀ ਯੋਜਨਾ ਮੰਤਰਾਲੇ ਦੁਆਰਾ 20 ਦਸੰਬਰ 2020 ਨੂੰ ਜਾਰੀ ਕੀਤੇ ਗਏ ਆਪ੍ਰੇਸ਼ਨਲ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਹੋਵੇਗੀ। ਤਿੰਨਾਂ ਸੈਸ਼ਨ ਸਾਈਟਾਂ ਲਈ, ਸਬੰਧਤ ਮੈਡੀਕਲ ਅਫਸਰ ਇੰਚਾਰਜ 25 ਟੈਸਟ ਲਾਭਪਾਤਰੀਆਂ (ਸਿਹਤ ਸੰਭਾਲ ਕਰਮਚਾਰੀਆਂ) ਦੀ ਪਛਾਣ ਕਰਨਗੇ। ਰਾਜਾਂ / ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਨੂੰ ਇਹ ਸੁਨਿਸ਼ਚਿਤ ਕਰਨ ਲਈ ਕਿਹਾ ਗਿਆ ਹੈ ਕਿ ਇਨ੍ਹਾਂ ਲਾਭਪਾਤਰੀਆਂ ਦਾ ਡਾਟਾ ਕੋ-ਵਿਨ ਵਿੱਚ ਅਪਲੋਡ ਕੀਤਾ ਜਾਵੇ। ਇਹ ਲਾਭਪਾਤਰੀ ਡਰਾਈ ਰਨ ਲਈ ਸੈਸ਼ਨ ਸਾਈਟ ਤੇ ਵੀ ਉਪਲਬਧ ਹੋਣਗੇ। ਰਾਜ ਅਤੇ ਕੇਂਦਰ ਸ਼ਾਸਤ ਪ੍ਰਦੇਸ਼ ਕੋ-ਵਿਨ ਐਪਲੀਕੇਸ਼ਨ 'ਤੇ ਬਣਾਈਆਂ ਜਾਣ ਵਾਲੀਆਂ ਸਹੂਲਤਾਂ ਅਤੇ ਉਪਭੋਗਤਾਵਾਂ ਨੂੰ ਹੈਲਥ ਕੇਅਰ ਵਰਕਰ (ਐਚਸੀਡਬਲਯੂ) ਲਾਭਪਾਤਰੀਆਂ ਦਾ ਡਾਟਾ ਅਪਲੋਡ ਕਰਨ ਸਮੇਤ ਟੀਕਾਕਰਨ ਤਿਆਰ ਕਰਨਗੇ।

ਰਾਜਾਂ / ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਨੂੰ ਕਿਹਾ ਗਿਆ ਹੈ ਕਿ ਉਹ ਥਾਂ ਦੀ ਕਾਫ਼ੀ ਮਾਤਰਾ, ਲੌਜਿਸਟਿਕਲ ਪ੍ਰਬੰਧ, ਇੰਟਰਨੈਟ ਸੰਪਰਕ, ਬਿਜਲੀ, ਸੁਰੱਖਿਆ ਆਦਿ ਲਈ ਸਾਰੀਆਂ ਪ੍ਰਸਤਾਵਿਤ ਥਾਵਾਂ ਦੀ ਸ਼ਰੀਰਕ ਤਸਦੀਕ ਨੂੰ ਯਕੀਨੀ ਬਣਾਉਣ; ਪ੍ਰਦਰਸ਼ਨ ਲਈ ਹਰੇਕ ਰਾਜ (ਰਾਜ ਦੀ ਰਾਜਧਾਨੀ ਵਿਖੇ) ਵਿਚ ਘੱਟੋ ਘੱਟ ਤਿੰਨ ਮਾਡਲਾਂ ਦੇ ਸੈਸ਼ਨ ਸਾਈਟਾਂ ਤਿਆਰ ਕਰਨ; ਇਹ ਸੁਨਿਸ਼ਚਿਤ ਕੀਤਾ ਜਾਵੇ ਕਿ ਮਾਡਲ ਸਾਈਟਾਂ ਦੀ ਜਾਗਰੂਕਤਾ ਪੈਦਾ ਕਰਨ ਦੀਆਂ ਗਤੀਵਿਧੀਆਂ ਲਈ ਬਾਹਰ ਕਾਫ਼ੀ ਜਗ੍ਹਾ ਦੇ ਨਾਲ ਇੱਕ "ਤਿੰਨ ਕਮਰਿਆਂ ਦੇ ਸੈਟ ਅਪ" ਵਿੱਚ ਅਲੱਗ ਪ੍ਰਵੇਸ਼ ਅਤੇ ਬਾਹਰ ਜਾਣ ਦਾ ਰਸਤਾ ਨਿਕਲਦਾ ਹੈ; ਇਹਨਾਂ ਸਾਈਟਾਂ ਤੇ ਸਾਰੀ ਆਈਈਸੀ ਸਮੱਗਰੀ ਪ੍ਰਦਰਸ਼ਤ ਕੀਤੀ ਜਾਵੇ; ਇਹ ਸੁਨਿਸ਼ਚਿਤ ਕੀਤਾ ਜਾਵੇ ਕਿ ਟੀਕਾਕਰਣ ਟੀਮਾਂ ਦੇ ਨਾਲ, ਸਾਰੇ ਪਹਿਲੂਆਂ ਦੀ ਪਛਾਣ ਕਰਨ ਅਤੇ ਸਿਖਲਾਈ ਦੇਣ ਲਈ, ਇਕ ਆਦਰਸ਼ ਵਾਤਾਵਰਣ ਵਿਚ ਪਛਾਣੀਆਂ ਗਈਆਂ ਥਾਵਾਂ 'ਤੇ ਸਾਰੇ ਐਸਓਪੀਜ਼ ਅਤੇ ਪ੍ਰੋਟੋਕੋਲ ਦਾ ਅਭਿਆਸ ਕੀਤਾ ਜਾ ਰਿਹਾ ਹੈ। ਡਰਾਈ ਰਨ ਰਾਜ ਅਤੇ ਕੇਂਦਰ ਸ਼ਾਸਤ ਪ੍ਰਦੇਸ਼ ਪ੍ਰਸ਼ਾਸਨ ਨੂੰ ਵੈਕਸੀਨ ਸਪਲਾਈ, ਸਟੋਰੇਜ ਅਤੇ ਕੋਲਡ ਚੇਨ ਮੈਨੇਜਮੈਂਟ ਸਮੇਤ ਲੌਜਿਸਟਿਕ ਦੇ ਪ੍ਰਬੰਧਨ ਵਿਚ ਵੀ ਲੈਸ ਕਰੇਗੀ।

ਜਿਵੇਂ ਕਿ ਟੀਕਾ ਪ੍ਰਸ਼ਾਸ਼ਕ ਟੀਕਾਕਰਨ ਪ੍ਰਕਿਰਿਆ ਵਿਚ ਮਹੱਤਵਪੂਰਣ ਭੂਮਿਕਾ ਨਿਭਾਉਣਗੇ, ਸਿਖਲਾਈ ਦੇਣ ਵਾਲਿਆਂ ਅਤੇ ਉਨ੍ਹਾਂ ਨੂੰ ਜੋ ਟੀਕਾ ਲਗਵਾਉਣਗੇ, ਨੂੰ ਵੱਖ-ਵੱਖ ਰਾਜਾਂ ਵਿਚ ਸਿਖਲਾਈ ਦਿੱਤੀ ਗਈ ਹੈ। ਇਸ ਉਦੇਸ਼ ਲਈ ਲਗਭਗ 96,000 ਟੀਕੇ ਲਗਾਉਣ ਵਾਲੇ ਵਿਅਕਤੀਆਂ ਨੂੰ ਸਿਖਲਾਈ ਦਿੱਤੀ ਗਈ ਹੈ। 2,360 ਭਾਗੀਦਾਰਾਂ ਨੂੰ ਟ੍ਰੇਨਰਾਂ ਦੀ ਰਾਸ਼ਟਰੀ ਸਿਖਲਾਈ ਅਤੇ 719 ਜ਼ਿਲ੍ਹਿਆਂ ਵਿੱਚ ਜ਼ਿਲ੍ਹਾ ਪੱਧਰੀ ਸਿਖਲਾਈ ਦੌਰਾਨ 57,000 ਤੋਂ ਵੱਧ ਪ੍ਰਤੀਭਾਗੀਆਂ ਨੂੰ ਸਿਖਲਾਈ ਦਿੱਤੀ ਗਈ ਹੈ। ਰਾਜ ਕਿਸੇ ਵੀ ਟੀਕੇ / ਸਾੱਫਟਵੇਅਰ ਨਾਲ ਸਬੰਧਤ ਪੁੱਛਗਿੱਛ ਲਈ ਸਟੇਟ ਹੈਲਪਲਾਈਨ 104 (ਜੋ ਕਿ 1075 ਤੋਂ ਇਲਾਵਾ ਵਰਤੇ ਜਾਣਗੇ) ਨੂੰ ਅੱਗੇ ਵਧਾਇਆ ਜਾ ਰਿਹਾ ਹੈ। ਰਾਜ / ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਵਿੱਚ ਕਾਲ ਸੈਂਟਰ ਦੇ ਕਾਰਜਸਾਧਕਾਂ ਦਾ ਰੁਝਾਨ ਅਤੇ ਸਮਰੱਥਾ ਨਿਰਮਾਣ ਹੋਇਆ ਹੈ। ਰਾਜਾਂ ਨੂੰ ਵੀ ਸਿਹਤ ਮੰਤਰਾਲੇ ਵੱਲੋਂ ਜਾਰੀ ਕੀਤੇ ਗਏ ਅਕਸਰ ਪੁੱਛੇ ਜਾਂਦੇ ਪ੍ਰਸ਼ਨਾਂ ਦੀ ਵਰਤੋਂ ਕਿਸੇ ਵੀ ਅਜਿਹੀ ਪੁੱਛਗਿੱਛ ਦਾ ਹੱਲ ਦੱਸਣ ਲਈ ਉਤਸ਼ਾਹਤ ਕੀਤਾ ਗਿਆ ਸੀ।

ਡਰਾਈ ਰਨ ਦਾ ਇਕ ਹੋਰ ਮਹੱਤਵਪੂਰਨ ਧਿਆਨ ਟੀਕਾਕਰਣ (ਏਈਐਫਆਈ) ਤੋਂ ਬਾਅਦ ਹੋਣ ਵਾਲੀਆਂ ਕਿਸੇ ਵੀ ਤਰ੍ਹਾਂ ਦੀਆਂ ਸੰਭਾਵਿਤ ਪ੍ਰਤੀਕ੍ਰਿਆਵਾਂ ਦੇ ਪ੍ਰਬੰਧਨ 'ਤੇ ਕੇਂਦਰਤ ਰਹੇਗਾ। ਇਸ ਤੋਂ ਇਲਾਵਾ, ਬਿਮਾਰੀ ਦੇ ਸੰਚਾਰ ਨੂੰ ਰੋਕਣ ਲਈ ਸੈਸ਼ਨ ਸਾਈਟ 'ਤੇ ਇਨਫੈਕਸ਼ਨ ਕੰਟਰੋਲ ਦੇ ਅਭਿਆਸਾਂ ਦੀ ਪਾਲਣਾ ਅਤੇ ਪ੍ਰਬੰਧਨ ਕੀਤਾ ਜਾਵੇਗਾ। ਮੌਕ ਡਰਿੱਲ ਵਿਚ ਬਲਾਕ ਅਤੇ ਜ਼ਿਲ੍ਹਾ ਪੱਧਰਾਂ 'ਤੇ ਇਕੋ ਸਮੇਂ ਦੀ ਨਿਗਰਾਨੀ ਅਤੇ ਸਮੀਖਿਆ ਅਤੇ ਫੀਡਬੈਕ ਤਿਆਰ ਕਰਨਾ ਸ਼ਾਮਲ ਹੋਵੇਗਾ। ਸਟੇਟ ਟਾਸਕ ਫੋਰਸ ਫੀਡਬੈਕ ਦੀ ਸਮੀਖਿਆ ਕਰੇਗੀ ਅਤੇ ਕੇਂਦਰੀ ਸਿਹਤ ਮੰਤਰਾਲੇ ਨਾਲ ਇਸ ਨੂੰ ਸਾਂਝਾ ਕਰੇਗੀ।

ਰਾਜਾਂ / ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਨੂੰ ਸਾਰੇ ਸਬੰਧਤ ਹਿੱਸੇਦਾਰਾਂ ਨੂੰ ਭਰੋਸੇ ਵਿੱਚ ਲੈ ਕੇ ਅਤੇ ਨਵੀਨਤਾਕਾਰੀ ਰਣਨੀਤੀਆਂ ਰਾਹੀਂ 'ਜਨ-ਭਾਗੀਦਾਰੀ' ਵਿੱਚ ਕਮਿਉਨਿਟੀ ਦੇ ਰੁਝੇਵੇਂ ਨੂੰ ਵਧਾਉਂਦਿਆਂ ਸੰਚਾਰ ਚੁਣੌਤੀਆਂ ਦਾ ਹੱਲ ਕਰਨ ਲਈ ਵੀ ਕਿਹਾ ਗਿਆ ਹੈ।

ਕੇਂਦਰੀ ਸਿਹਤ ਮੰਤਰਾਲੇ ਵੱਲੋਂ ਵਿਸਥਾਰਤ ਚੈਕਲਿਸਟ ਤਿਆਰ ਕੀਤੀ ਗਈ ਹੈ ਅਤੇ ਰਾਜਾਂ / ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਨਾਲ ਡਰਾਈ ਰਨ ਵਿੱਚ ਸੇਧ ਦੇਣ ਲਈ ਇਸਨੂੰ ਉਨ੍ਹਾਂ ਨਾਲ ਸਾਂਝਾ ਵੀ ਕੀਤਾ ਗਿਆ ਹੈ।

ਡਰਾਈ ਰਨ ਦਾ ਪਹਿਲਾ ਗੇੜ ਆਂਧਰਾ ਪ੍ਰਦੇਸ਼, ਅਸਾਮ, ਗੁਜਰਾਤ, ਪੰਜਾਬ ਵਿੱਚ 28-29 ਦਸੰਬਰ 2020 ਨੂੰ ਹਰੇਕ ਦੇ ਦੋ ਜ਼ਿਲ੍ਹਿਆਂ ਵਿੱਚ ਕੀਤਾ ਗਿਆ ਜਿੱਥੇ 25 ਲਾਭਪਾਤਰੀਆਂ ਵਾਲੇ ਪੰਜ ਸੈਸ਼ਨ ਸਾਈਟਾਂ ਦੀ ਪਛਾਣ ਕੀਤੀ ਗਈ। ਇਸ ਡਰਾਈ ਰਨ ਦੌਰਾਨ ਕਾਰਜਸ਼ੀਲ ਪਹਿਲੂਆਂ ਵਿੱਚ ਕੋਈ ਪ੍ਰਮੁੱਖ ਮੁੱਦੇ ਨਹੀਂ ਵੇਖੇ ਗਏ। ਸਾਰੇ ਰਾਜਾਂ ਨੇ ਵੱਡੀ ਪੱਧਰ 'ਤੇ ਪ੍ਰੋਗਰਾਮ ਨੂੰ ਲਾਗੂ ਕਰਨ ਲਈ ਕਾਰਜਸ਼ੀਲ ਦਿਸ਼ਾ ਨਿਰਦੇਸ਼ਾਂ ਅਤੇ ਆਈਟੀ ਪਲੇਟਫਾਰਮ' ਤੇ ਭਰੋਸਾ ਜਤਾਇਆ।

ਸ੍ਰੀਮਤੀ ਵੰਦਨਾ ਗੁਰਨਾਨੀ, ਏਐਸ ਅਤੇ ਐਮਡੀ (ਐਨਐਚਐਮ), ਡਾ ਮਨੋਹਰ ਅਗਨਾਨੀ,ਵਧੀਕ ਸਕੱਤਰ (ਐਚ), ਸ਼੍ਰੀ ਲਵ ਅਗਰਵਾਲ, ਸੰਯੁਕਤ ਸਕੱਤਰ ਅਤੇ ਹੋਰ ਸੀਨੀਅਰ ਅਧਿਕਾਰੀ ਇਸ ਮੀਟਿੰਗ ਵਿੱਚ ਮੌਜੂਦ ਸਨ।

---------------------------------

ਐਮਵੀ / ਐਸਜੇ