প্রধান মন্ত্রী শ্রী নরেন্দ্র মোদীনা ঙসি ভিদিও কনফরেন্সিংগী খুত্থাংদা পি.এম. কিসান সম্মান নিধিগী মখাদা শেলগী তেংবাংগী মথক্কী ইনস্তোলমেন্ত কাইথখ্রে।

থৌরম অসিদা ৱা ঙাংলদুনা প্রধান মন্ত্রীনা হায়খি ঙসি বত্তন অমা নম্বদা লৈবাক অসিগী লৌমীগী ইমুং করোর ৯গী মথক্কী বেঙ্ক একাউন্তশিংদা হকথেংননা লুপা করোর ১৮০০০ হাপচিনখ্রে। মহাক্না মখা তারদুনা হায়খি স্কীম অসিনা হৌদোকখিবদগী হৌনা লৌমীশিংগী একাউন্তদা লুপা করোর লাখ ১গা লিশিং ১০গী মথক্তা য়ৌহনখ্রে।

ৱেস্ত বেঙ্গলগী লৌমী লাখ ৭০গী মথক্তনা কান্নবা অসি ফংবা ঙমখিদবদা প্রধান মন্ত্রীনা নুংঙাইতবা ফোঙদোকখি। মহাক্না হাব বেঙ্গলগী লৌমী লাখ ২৩ হেনবনা স্কীম অসিগী কান্নবা লৌনবা ওনলাইন্দা থারকখি। অদুবু রাজ্য সরকারনা মসিগী বেরিফিকেসনগী প্রোসেস অসি মতম শাংনা লেপখি। মহাক্না ৱেস্ত বেঙ্গলগী লৌমীশিংগীদমক্তা ৱা ঙাংদবা পার্তীশিংনা দিল্লীদা লাক্তুনা লৌমীশিংগী মরমদা ৱা ঙাংলি। মহাক্না হায় পার্তীশিং অসি হৌজিক এ.পি.এম.সি.-মন্দিশিং পাম্লি, অদুবু পার্তীশিং অসি হঞ্জিন-হঞ্জিন কাউরি মদুদি কেরেলাদা এ.পি.এম.সি.-মন্দিশিং লৈতে হায়বা অসি অমসুং হায়রিবা মীওইশিং অসিনা কেরেলাদা অমুক্তা ফাওবা য়ানিংদবা ফোঙদোকপা লৈখিদে।

প্রধান মন্ত্রীনা হায়খি সরকার অসিনা লৌমীশিংগী ইনপুৎতা চংবা শেল হন্থহন্নবা পান্দম থম্লি। মহাক্না সোইল হেল্থ কার্দশিং, য়ুরিয়া নীম কোতেদ ওইহনবা, সোলর পম্পশিং য়েন্থোকপগী স্কীম অসিগুম্বা লৌমীশিংগী ইনপুৎশিংদা চংবা শেল হন্থহনবদা মতেং পাংলিবা সরকারগী লৌমীগী য়াইফনবা থৌরাং খরা পনখি। মহাক্না মখা তারদুনা হায়খি সরকার অসিনা লৌমীশিংদা হেন্না ফবা ক্রোপ ইন্সুরেন্স কভর অমা ফংহল্লি। ঙসি লৌমী করোর কয়ানা পি.এম. ক্রোপ ইন্সুরেন্স স্কীমগী কান্নবা ফংলি।

প্রধান মন্ত্রীনা হায়খি সরকার অসিনা লৌমীশিংনা মখোয়গী মহৈ মরোংশিংগী মতিক চাবা মমল ফংহন্নবা হোৎনখি। মহাক্না হায় সরকার অসিনা মতম কুইনা পন্দুনা লৈরুরবা স্বামিনাথন কম্মিতি রিপোর্তকী রিকম্মেন্দেসনশিংগী মতুং ইন্না লৌমীশিংগীদমক্তা পুথোকপদা চংবা শেলগী শরুক অমগা মখাই অসি এন.এস.পি. ওইনা লেপখি। মহাক্না মখা তারদুনা হায় মহৈ মরোং মশিং কয়াগী ওইনা লৈরিবা এম.এস.পি. অসিসু হেনগৎহনখি।

প্রধান মন্ত্রীনা হায়খি সরকার অসিনা লৌমীশিংনা মখোয়গী মহৈ মরোং য়োনবা য়ানবা অনৌবা কৈথেলশিং হাংদোক্নবা পান্দম থম্লি। মহাক্না হায়খি সরকার অসিনা লৈবাক অসিগী এগ্রিকলচরেল মন্দি লিশিং অমগী মথক্তা ওনলাইনদা হাপচিনখ্রে। মসিগী মরক্তা লুপা করোর লাখ অমগী মথক্তা ললোন-ইতিক তৌবা ঙমখি। মহাক্না হায়খি সরকার অসিনা অপীকপা লৌমীশিংনা মখোয়না লমদম অদুদা পুন্না থবক তৌমিন্নবা মখোয়গী কাংলুপশিং শেম্নবা থবক পাইখৎখি। ঙসি লৈবাক অসিদা ফার্মরস প্রদ্যুসর ওর্গনাইজেসন – এফ.পি.ও. ১০০০ গী মথক্তাদা শেম্নবা কেম্পেন অমা চত্থরি, মখোয়দা শেলগী মতেংসু পীখি।

লৌমীশিংনা পক্কাগী য়ুম, অমাংশঙ অমসুং অরুবা থক্নবা ঈশিং ফংহনখি হায়না প্রধান মন্ত্রীনা ঙসি ফোঙদোকখি। মখোয়না লেম্না ফংবা ইলেক্ত্রিসিতী কন্নেক্সন, চাংথোং গ্যাসকী কন্নেক্সনদগী চাউনা কান্নবা ফংহনখি। আয়ুশমান ভারত স্কীমগী মখাদা লুপা লাখ ৫ ফাওবগী লেম্না লায়েংবা ফংবনা লৌমীশিংগী পুন্সিদা মায়োক্নবা অচৌবা সমস্যাশিং হন্থহনবা ঙমখি।

প্রধান মন্ত্রীনা হায় এগ্রিকলচরেল রিফোর্মশিং অসিগী খুত্থাংদা লৌমীশিংদা হেন্না ফাবা খুদোংচাবশিং ফংহনখি। মসিগী আইনশিং অসি লাক্লবা মতুংদা লৌমীশিংনা মখোয়না পুথোকচরিবা অদু মখোয়না পাম্বা মীশক্তা য়োনবা য়ারগনি। মখোয়না মমল মতিক চানা ফংবা মফমদা মখোয়না পুথোকচরিবা অদু য়োনবা য়ারগনি। মহাক্না হায়খি অনৌবা আইনশিং অসি লাক্লবা মতুংদা লৌমীশিংনা মখোয়না পুথোকচরিবা অদু এম.এস.পি.দা য়োনবা নত্ত্রগা কৈথেলদা য়োনবা নত্ত্রগা মপালদা থাদোকপা নত্ত্রগা ললোনবদা য়োনবা নত্ত্রগা অতোপ্পা রাজ্যদা য়োনবা নত্ত্রগা এফ.পি.ও.দা নত্ত্রগা বিসকিৎশিং, চিপশিং, জেম, অতোপ্পা কঞ্জুমরগী প্রদক্তশিংগী ভেল্যু চেনগী শরুক ওইবা য়ারগনি।

প্রধান মন্ত্রীনা হায়খি অতোপ্পা সেক্তরশিংদা ইনবেস্তমেন্ত অমসুং ইন্নোবেসমন তৌবা হেনগৎখ্রে, ইনকম হেনগৎখ্রে অমসুং সেক্তর অদুদা ইন্দিয়াগী ব্রান্দ থমখ্রে। মহাক্না হায়খি চপ মান্নবা ইকাই খুম্নবগা লোইননা হৌজিক্তি মালেমগী লৌউ-শিংউগী কৈথেলশিংদা ভারত মশাগী ব্রান্দ থম্বা মতম ওইরে।

প্রধান মন্ত্রীনা এগ্রিকলচরেল রিফোর্মশিং মপুং ফানা শৌগৎখিবা অমসুং তরাম্না ওকখিবা লৈবাক অসিদা লঐরিবা লৌমীশিংবু থাগৎপা ফোঙদোকখি অমদি মহাক্না মখোয়বু কৈদৌনুংদা থম্মোই শোকহল্লোই হায়না থাজবা পীখি। মহাক্না হায়খি মপুং ওইনা খুঙ্গংগী মফমশিংদগী মীয়াম্না হন্দক্তা অসাম, রাজস্থান, জম্মু অমসুং কাশ্মিরদা পাঙথোকখিবা লোকেল বোদীগী মীখলশিংদা শরুক য়াখি অমদি মখোয়না লৌমীশিংবু লান্না লমজিংলিবা পার্তীশিংবু য়াদে হায়বা উৎখি।

***