খুরুমজরি,

হে বিধাতা, দাও-দাও মোদের গৌরব দাও...গুরুদেবনা হায়রিবা মঙলান অসি মহৈরোইশিংগী তুংগী পুন্সিদা অফবা ওইনবগীদমক্তা মঙখিবনি।

ঙসি বিশ্ব-ভারতীগী চহি ১০০ শুবা নুমিৎ অসিদা ঐহাক্কুম্না লৈবাক পুম্বনসু শক্নাইরবা মহৈ-লোইশঙ অসিবু য়াইফ পাউজেল পীরি। হে বিধাতা, দাও-দাও মোদের গৌরব দাও...নোংচুপ বেঙ্গোলগী রাজ্যপাল শ্রী জগদীপ ধনখরজী, কেন্দ্রগী এজুকেসন মন্ত্রী শ্রী রমেশ পোখ্রিয়াল ‘নিশাঙ্ক’জী, ভাইস চান্সেল্লর প্রোফঃ বিদ্যুৎ চক্রবর্তীজী, প্রোফেসরশিং, রেজিস্ত্রার, বিশ্ব-ভারতীগী মহৈরোইশিং, এলম্নিশিং অমসুং মরুপ-মপাংশিং। বিশ্ব-ভারতী হায়রিবা য়ুনিবর্সিতী অসিনা চহি ১০০ মপুং ফারকপা অসি ভারতকী মীয়াম খুদিংগী য়াম্না চাউথোকচনিংঙাই ওইরবা নুমিৎ অমনি।

ঐহাক্কী ওইনসু মসি য়াম্না হরাওবা নুমিৎনি মরমদি ঙসিগী নুমিৎ অসিদা ঐহাক্না মফম অসিদা ইকায় খুম্না উৎপগী খুদোংচাবা ফংজরে।

মরুপশিং,

বিশ্ব-ভারতীগী চহি ১০০গী লম্বী অসি য়াম্না অখন্নবনি।

ভিস্বা-ভারতী অসি গুরুদেবনা ইমা ভারতকীদমক্তা খঞ্জবা, উজবা অমসুং মতম কুইনদগী হোৎনজরকপগী অশেংবা থৌওং অমনি। মফম অসি ভারতকীদমক্তা গুরুদেবনা মঙবীরম্বা মঙলান অদু মঙফাওনহন্নবগীদমক লৈবাক অসিদা লেপ্তনা থৌনা হাপ্পীরিবা মখল অমগী লাইনীংফম্নি। মালেমগী মফম খুদিংদা ফাওরবা শৈশকপা, শৈরেংবা, শৈরাংবা, লাইরিক ইবশিং, শেন্মিৎলোনগী অখঙ-অহৈশিং, সাইন্তিস্তশিংনচিংবা মমিং লৈরবা মীওই কয়া অমা পুথোকখ্রবা বিশ্ব-ভারতী অসিনা অনৌবা ভারত অমা শেম্বদা অচৌবা মতেং অমা পাংলি। মসিগী মহৈলোইশঙ অসিবু থাক অসিদা য়ৌহল্লকখিবা মীওই অসিদা ঐহাক্না ইকায় খুম্নবা উৎপগা লোয়ননা কোক নোঞ্জরি।

গুরুদেবনা খনলম্বগুম্না বিশ্বভারতী, শ্রীনিকেতন অমসুং শান্তিনিকেতন্না মহাক্কী পান্দমশিং অসি ফংহন্নবা ঙসিসু হোৎনরিবা অসিদা ঐহাক্না নুংঙাইজবা ফাওই।

বিশ্বভারতীনা খুঙ্গং কয়াদা চাউখৎপা পুরক্নবগীদমক্তা পাংথোক্লিবা থবকশিং অসিগীদমক্তা মীয়াম্না থাগৎনদুনা লাক্লিবনি।

অদোম্না ইং ২০১৫দা য়োগগী বিভাগ হৌদোকখিবা অদুসু মীয়াম্না য়াম্না পাম্নবা হেনগৎলক্লি।

মহৌশাগা লোয়ননা  মহৈ-মশিং তম্বীবগী থৌওং অসি অদোমগী য়ুনিবর্সিতীনা খুদম ওইদুনা লাক্লি।

ঐখোয়গী লৈবাক অসিনা ভিস্বা-ভারতীদগী থোক্লক্লিবা ৱারোল খুদিংবু মালেম শিনবা থুংনা শন্দোক্লি হায়বা খঙবা মতমদা নখোয়সু হরাওবা ফাওরমগনি। ভারত অসি ঙসিদি ইন্তর্নেস্নেল সোলার এলাইএন্সকী খুত্থাংদগী মালেমগী অকোইববু ঙাক-শেনবগী লমদা মাংজিন থাদুনা চৎলি। ভারত অসি ঙসিদি পেরিস এক্কোর্দকী মতুং ইন্না অকোইবগী পান্দম ফংনবা অচুম্বা লম্বীদা চৎলিবা অচৌবা লৈবাকশিংগী মরক্তা অমত্তা ঙাইরবা লৈবাক ওইরি।

মরুপশিং,

বিশ্বভারতী য়ুনিবর্সিতীগী ১০০শুবা কুমওন পাংথোক্লি, মসিদা ঐখোয়না মসিনা করম্বা থৌদোকশিং অমসুং ফিভমশিংদা য়ুম্ফম ওইরগা হৌদোকখিবনো হায়বা নীংশিংবগী তঙাই ফদবসু লৈ। মসিগী ফিভমশিং অসি ব্রিতিশকী মখাদা মীখা পোন্দুনা লৈরম্বা খক্তা নত্তে। মসিগী তুংদা চহি চা কয়াদগী খঙলক্লবা লৌশিং, চহি চা কয়াদগী চত্থরক্লিবা ইহৌশিংসু য়াওরি। ঐহাক্না ঙসি, নখোয়গুম্বা অখঙ-অহৈশিংগী মরক্তা ৱাফম অসি হৌদোক্লিবগী মরমদি হায়রিবা ফিভমশিং অসিগী মরমদা মমাংদা খন্নখিবা লৈত্রি, মীওই কয়া অমনসু খঙনদে। মসি নৈনবগী তঙাই ফদবা অসিগী মরমদি ভারতকী নিং-তম্বগী ইহৌ অমসুং বিশ্বভারতীগী মরক্তা হকথেংনবা মরী লৈবননি। 

মরুপশিং,

ঐখোয়না নিং-তম লালহৌগী ৱারী শাবা মতমদা ১৯-২০শুবা চহি চাগী ৱাখল্লোন অসি নীংশিংলকই। অদুবু ইহৌ অসিগী য়ুম্ফমদি শাংলবা মতমগী মমাংদা থাখ্রবনি হায়বসিসু অচুম্বনি। চহি-চা কয়াদগী হৌরক্লবা ইহৌশিংনা ভারতকী নিং-তম ইহৌদা মপাঙ্গল হাপ্লম্বনি

ভক্তি ইহৌনা ভারতকী নাৎকী অমসুং লাই-তিনগী ওইবা অপুনববু মপাঙ্গল কলহন্নবা থবক পাংথোকখি। ভক্তিগী য়ুগতা, হিন্দুস্তানগী মফম খুদিংমক, লমদম খুদিংমক, অৱাং-নোংপোক-খা-নোংচুপ, মাইকৈ খুদিংদা ঐখোয়গী লাইনীংবশিংনা, মশক নায়রবা মীওইশিংনা, অচার্য়না লৈবাক্কী নুংগী ওইবা ৱাখল্লোনশিংবু হিংহন্দুনা লৈহন্নবা হোৎনখি। ঐখোয়না খা মাইকৈগী ৱারী শাবা মতমদা মাধবচার্য়, নিম্বার্কচার্য়, বল্লাভচার্য়, রামানুজাচার্য় লৈ। নোংচুপ মাইকৈদা য়েংলগদি মীরাবাই, একনাথ, তুকারাম, রামদাস, নর্সী মেহতা লৈ। অৱাং মাইকৈদা অমুক য়েংলগনা লাইনীংবা রমানন্দ, কবিরদাস, গোস্বামী তুলসিদাস, গুরুনানকদেব, লাইনীংবা রেদাস লৈরে অমসুং নোংপোক মাইকৈদনা মশিং থীঙমদ্রবা শক্নাইরবা মীওই কয়া অমা লৈরে। অসিগুম্লবা মমিং য়াম্না লৈ। চৈতন্য মহাপ্রভু অমসুং শীমন্ত শঙ্কর দেবনচিংবা লাইনীংবা কয়াগী ৱাখল্লোন্দগী খুন্নাই অসিদা ইথিল কয়া ফংদুনা লাকখি। ভক্তিগী মতমগী অসিগুম্লবা মতম অসিদা রসখান, সুরদাস, মলিক মোহম্মদ জায়শী, কেশৱদাস, বিদ্যাপতি অমদি অতোপ্পা শক্নাইরবা মীওই কয়া অমনা মখোয়গী ৱাখল্লোনগী খুত্থাংদা খুন্নাইবু শেমদোক্নবা, মাং থাদুনা চৎনবা অমসুং চাউখৎনবা লমজিং-লমতাকপীখি। ভক্তিগী মতমদা অসিগুম্লবা লাইওইরবা মীওইশিং অসিনা মীওই খুদিংদা অমত্তা ওইনা পুন্না লেপমিন্নবগী ৱাখল্লোন ফাওহনখি। মরম অদুনা মসিগী ইহৌ অসিনা মফম খুদিং, ঙমখৈ খুদিং ৱাংমা লানখিদুনা ভারতকী কাচিন-কোয়া খুদিংদা য়ৌবা ঙমখি। তোঙান-তোঙানবা লাইনীং, কাস্ত, কাঙলুপকী মীওই খুদিংনা মশাবু ইকায় খুম্নজবা অমসুং নাৎকী ওইবা হেরিতেজকীদমক্তা খোঙফম চেৎনা লেপ্নখি। ভক্তি ইহৌগী মতম অসিদা মতম কুইনদগী হৌরক্লিবা ভারতকী ইহৌশিংদা মশাদা থাজবা অমসুং ৱাখল তারকপগী থৌওং কয়া থোক্লকখিবনি।

মরুপশিং,

শক্নাইরবা শ্রী রামকৃষ্ণ পরমহন্সকী মরমদা নৈনবগী থৌওং য়াওদনা ভাক্তিগী হীরম অসি নৈনবদা মখা চত্থবা য়ারোই। অদুগুম্বা ফাওরবা লাইনীংবা অমসুং মহাক্কী মরম ওইদুনা ভারতনা স্বামি ভিভেকানন্দ ফংজরিবনি। স্বামি ভিভেকানন্দনা ভক্তি, লৌশিং অমসুং কর্মা হায়রিবা অহুম অসি মথানুংদা চেৎনা লৌজখিবনি। মহাক্না ভক্তিগী পাক চাউবা অসি চাউথোকপা ওইনা মীওই খুদিংদা লৈরিবা খেৎনবশিং উবা হৌরকখি। মহাক্না মীওইবা অমসুং লুপকী ৱাখল্লোন শেমগৎপদা মিৎয়েং চঙবতা নত্তনা কর্মদসু মিৎয়েং চঙদুনা ইথিলসু পীখি।

মরুপশিং,

চহি চা কয়াদগী চত্থরক্লিবা ভক্তি ইহৌগা লোয়ননা কর্মগী ইহৌসু চত্থরম্মি। ভারতকী মীয়াম্না মীখা পোনবা অমসুং নম্থদুনা লৈঙাকপগী মাইয়োক্তা লান্থেংনরিবনি। ছত্রপতি শিবাজী ওইরো, মহারানা প্রতাপ ওইরো, রানী লক্ষ্মীবাই ওইরো, কিত্তুরগী রানী চেনম্মা ওইরো, ভগ্বান বিরসা মুন্দাগী খুৎলাই পায়দুনা চঙশিনবা ইহৌ ওইরো, মীপুম খুদিংনা ইহৌ হৌরম্মি। অচান-মীরাই নাইদবা অমসুং মীওৎ-মীনৈগী মাইয়োক্তা মীচম-মীয়াম্না চঙশিল্লম্বা খোঙজং অদু অঙকপা ফংনা মতোম লোম্বগী থাক্তা লৈরম্মি। মসিনা তুংদা ঐখোয়গী নিং-তম লান্দা অচৌবা ইথিল অমা পীখি।

মরুপশিং,

ভক্তি অমসুং কর্মগী ইহৌশিং কন্না চত্থরিঙৈ মতমদা মদুগা লোয়ননা ত্রিবেনী শঙ্গমগী লৌশিংগী ইহৌনা নিং-তম লালহৌদা ৱাখল তারকপগী ইথিল পীখি। নিং-তম্বগী ৱাখল্লোন্না মীপুম খুদিংদা পুক্নিং থৌগৎখি। লৌশিংগী ইহৌনা খুৎলাই ওইনা শিজিন্নদুনা নিং-তম্বগী লালহৌদা মাই পাকপগী ৱাখল্লোন অমা মতমদুদা লৈরকখি অমসুং অনৌবা ভারত অমা শেম্নবা ৱাখল লৈবা চারোন-শুরোন অমা শেম্বগী থৌওং অমসু চত্থখি। মসিদা শক্নাইরবা মহৈ-লোইশঙ অমসুং য়ুনিবর্সিতীশিংনা মপুং ওইবা থৌদাং কয়া লৌখি।

বিশ্ব ভারতী য়ুনিবর্সিতী ওইরো, বনারস হিন্দু য়ুনিবর্সিতী ওইরো, অলিগর মুস্লিম য়ুনিবর্সিতী ওইরো, হৌজিক্না লাহোরদা লৈরিবা নেস্নেল কোলেজ ওইরো, মৈশুর য়ুনিবর্সিতী ওইরো, ত্রিচী নেস্নেল কোলেজ ওইরো, মহাত্মা গান্ধী কাশী বিদ্যাপিথ ওইরো, গুজরাত বিদ্যাপিথ ওইরো, ৱিলিংদন কোলেজ ওইরো, জামিয়া মিলিয়া ইস্লামিয়া ওইরো, লক্ষনৌ য়ুনিবর্সিতী ওইরো, পত্না য়ুনিবর্সিতী ওইরো, দিল্লী য়ুনিবর্সিতী ওইরো, আন্ধ্র য়ুনিবর্সিতী ওইরো, অন্নামল্লাই য়ুনিবর্সিতী ওইরো, অসিগুম্লবা য়াম্লবা য়ুনিবর্সিতী কয়া অসি লৈবাক অসিদা মতম অমত্তদা হৌদোকখিবনি। মসিগী ইয়ুনিবর্সিতীশিং অসিদা ভারতকী পুম্নৌ নৌবা অখঙ-অহৈ কয়া অমা থোক্লকপা হৌরকখি।

মসিগী মহৈ-মশিং তম্ফমশঙশিং অসিনা ভারতকী নিং-তম্বগীদমক্তা চত্থরিবা ইহৌ অসিদা অনৌবা ৱাখল্লোন, থাক অমসুং লমজিং লমতাকপীখি। ভক্তি ইহৌনা ঐখোয় খুদিংবু পুন্সিনহনখি। লৌশিংগী ইহৌনা ৱাখলগী পাঙ্গল হাপখি অমসুং কর্মগী ইহৌনা ঐখোয়গী ইশাগী হক্কীদমক্তা লান্থেংননবা পাঙ্গল অমসুং পুক্নিং থৌগৎখি। চহি-চা কয়াদগী চত্থরক্লিবা ইহৌ অসিনা কত্থোকপা, চেৎনা নীংজবা অমসুং অরানবা তৌবদা চুম্থোকচবগী খুদম অমা ওইহনখি। মসিগী ইহৌশিং অসিনা ইথিল পীদুনা মীওই লিশিং কয়া অমনা নিং-তম লালহৌ অসিদা থৱাই-থাজরগে হায়না চোংথোক্নরকখি।

মরুপশিং,

মসিগী লৌশিংগী ইহৌ অসিবু গুরুদেবনা লিংখৎখিবা বিশ্বভারতী য়ুনিবর্সিতীনা অনৌবা মাইকৈ অমা পীখি। গুরুদেবনা ভারতকী সংস্কৃতিগা, মশাগী চৎনবীগা লোয়নদুনা বিশ্বভারতীগী মশক অমা পীখিবা অসিনা মহাক্না মীয়াম মাংদা লৈবাক নীংবগী অনৌবা ইথিল অমা পীখি। মসিগা লোইননা মালেম শিনবা থুংনা নুংশি-চান্ননা লৈমিন্নবদসু মান্নবা মিৎয়েং চঙখি।

মরুপশিং,

বেদদগী ভিভেকানন্দ ফাওবা অসি ভারতকীদমক্তা খঞ্জরিবা গুরুদেবকী লৈবাক নীংবগী ৱাখল্লোনগী মনুং চনখি। অমসুং মসিগী ৱাখল্লোন অসি অরানবা নত্তে। মখোয়শিং অসিনা ভারতপু মালেমগী অতোপ্পা লৈবাকশিংদগী তোঙান্না তাহনগদবা নত্তে। ভারতকী অফবশিংদগী মালেম্না কান্নবা ফংবা অমসুং মালেমগী অফবশিংদগীসু ভারতনা কান্নবা লৌবা হায়বসি মহাক্কী মঙলান্নি। অদোমগী য়ুনিবর্সিতীগী মমিং অসিদা অদুম য়েংবীরো- বিশ্ব-ভারতী। ইমা ভারত অমসুং বিশ্বগী মরক্তা লৈনরিবা মরী হায়বনি। বিশ্ব-ভারতীগীদমক্তা গুরুদেবনা খঞ্জরম্বা অসি মরোমদোম লেপচবা ঙম্বা ভারতকী ৱাখল্লোনগা মান্নবনি। আত্মানির্ভর ভারতকী অভিয়ান অসিসু ভারতকী য়াইফ-য়ুম্বাল লৈদুনা মালেমগী য়াইফ-য়ুম্বালগীদমক্তা চত্থবা খোঙথাংনি। মসিগী খোঙথাং অসি ভারতপু মপাঙ্গল হাপ্নবা খোঙথাংনি, ভারতনা নুংঙাই-য়াইফদুনা মালেম্বুসু নুংঙাই-য়াইফহন্নবনি। মরোমদোম লেপচবা ঙম্বা ভারতনা মালেম পুম্বগী কান্ননবা থবক পাঙথোকখি হায়বসি পুৱারীনা শাখিনি। ঐখোয়গী চাউখৎপা অসি ঐখোয় খক্তগী নত্তে, মালেম শিনবা থুংবগীনি অমসুং মসিগী ৱাখল্লোন অসি ঐখোয়গী লু-তোংদসু য়াওরিবনি। মালেম শিনবা থুংনা নুংঙাই য়াইফবনি। ভারতী অমসুং বিশ্ব হায়বসিগী মরক্তা লৈনরিবা মরী অসিদি নখোয়দগী হেন্না কনানা খঙগনি। গুরুদবনা ঐখোয়দা “স্বদেশী” খুন্নাই অমগী ৱাশক শকহনখিবনি। মহাক্না ঐখোয়গী খুঙ্গংশিং, লৌউবশিং,  লল্লোন-ইতিকশিং, আর্ত অমসুং লিতরেচর অসিবু মরোমদোম লেপচহনবা পাম্লমই। মহাক্না মরোমদোম লেপচবা ঙম্বগী পান্দম অসি ফংনবগীদমক্তা “ইশাগী-শক্তি” হায়বা ৱাহৈ অমসু হায়রম্মি। “ইশাগী-শক্তি”গী খুত্থাংদগী লৈবাক শেম্বগী ৱারোল অমা মহাক্না হায়রম্লিবা অসি ঙসিসু য়াম্না মরু ওইবা ওইরি। মহাক্না অসুম্না হায়রম্মি – “লৈবাক শেম্বা অসি ইশাগী অপাম্বা ফংবগুম্বনি। করিগুম্বা নহাক্না নশাগী ৱাখল্লোন্দগী, থবক্তগী অমসুং নথৌদাং পাংথোক্তুনা লৈবাক শেম্বা মতমদা মদুদা নহাক্না নহাক্কী অপাম্বা অমসুং থৱাইবুসু উবা ফংগনি”।

মরুপশিং,

ভারতকী থৱাই, ভারতনা মরোমদোম লেপচবা ঙম্বা অমসুং ভারতনা মশাবু ইকায় খুম্নবা অসি অমগা অমগা পুন্সিন্নদুনা লৈ। ভারতকী মশানা মশাবু ইকায় খুম্নবা অসিবু ঙাক-শেন্নবগীদমক্তা বেঙ্গোলগী চারোন-শুরোনশিংনা কত্থোকখিবনি। নীংশিংবীয়ু, খুদিরাম বোসনা মশাগী শুপ্নগী চহি ১৮ শুবা মতমদা ফাসিগী থক্তা কাখিবনি। প্রফুল চাকীনা চহি ১৯দা মপুন্সি কত্থোক্তুনা অথৌবা ওইখি, বেঙ্গোলগী অগ্নিকন্যা হায়রগা খঙনবা বীনা দাসসু চহি ২১দা জেল চঙখি। প্রিতিলতা বদ্দেদরনা শুপ্নগী চহি ২১ শুবা মতমদা মশাগী পুন্সি কত্থোকখিবনি। পুৱারীদা মমিং লৈহৌদ্রবা অসিগুম্বা মীওই কয়া অমা লৈ অমসুং মখোয়শিং অসিনা লৈবাক্কী মশাগী ইকায় খুম্নবা মাঙহন্দনবগীদমক্তা নোক্না-নোক্না থৱাই থাখিবনি। ঐখোয়না ঙসিদি, মখোয়দগী ইথিল লৌদুনা ভারতপু মরোমদোম লেপচবা ঙমহনগদবনি অমসুং মসিগী পান্দম অসিবু ফংহনগদবনি।

মরুপশিং,

ভারতপু মপাঙ্গল লৈবা অমসুং মরোমদোম লেপচবা ঙমহন্নবা অদোমগী থৌদাং খুদিংমক অসিনা মালেম পুম্ববু হেন্না নুংঙাইবা মফম অমা ওইহনগনি। ইং ২০২২দা লৈবাক অসিনা নিং-তম্বগী চহি ৭৫ ফারগনি। বিশ্বভারতী লিংখৎপগী চহি ২৭কী মতুংদা ভারতনা নিং-তম্বা ফংখিবনি। ঙসিদগী চহি ২৭কী মতুংদা ঐখোয়না নিং-তম্বগী ১০০শুবা চহিগী নুংঙাইবা ফোংদোক্কনি। ঐখোয়না অনৌবা পান্দম অমা শেম্বা তাবনি, অনৌবা শক্তি শেম্বা তাবনি, ঐখোয়গী খোঙচৎ অসিবু অনৌবা মওং অমদা হৌবা তাবনি। মসিগী খোঙচৎ অসিদা ঐখোয়বু লমজিংগদৌরিবা অসি গুরু রামদেবকী ৱাহৈশিং অমসুং ৱাখল্লোনশিংননি। করিগুম্বা অমা পাংথোক্নিংবগী ইথিল লৈরবা, খোঙফম চেৎলবা, অদু ওইরবদি পান্দমসু মশানা অদুমক ফংজরগনি। বিশ্বভারতী ৱারী শাবা মতম অসিদা, পুৱারী ওইরবা পোশ মেলা অসি হন্দক চহিগী ওইনদি পাংথোক্ত্রে। চহি ১০০গী মনুংদা মসিনা অহুমশুবনি। মসিগী লাইচৎ অসিনা ঐখোয়দা মসিগী কান্নবা অসি খঙহল্লে অমসুং ভোকেল ফোর লোকেলগী মন্ত্রা অসিসু পোশ মেলাগা শাগোন্নরগা লৈরে। মসিগী মেলা অসিদা খুৎ-শা হৈবা কয়া লাকপা অদু হন্দক্তি লাইচৎ অসিনা মরম ওইদুনা লাকপা ফংদ্রে। ঐখোয়না ইশানা ইশাবু ইকায় খুম্নবগী ৱারী তৌবা মতমদা, আত্মানির্ভরতাগী ৱারী তৌবা মতমদা,  ঐহাক্না হায়জবগী মতুং ইন্না ঐহাক্কী থবক অমখক্তা পাংথোকপীয়ু। বিশ্বভারতীগী মহৈরোইশিং, পোশ মেলাদা লাক্কনি তৌরম্বা খুৎ-শা হৈবশিংগা পাউ ফাওনবীয়ু, মখোয়গী পোত্থোকশিংগী মরমদা ৱারোলশিং খোমজিনবীয়ু, অদুগা অসিগুম্লবা লায়রবা খুৎ-শা হৈবশিংগী পোত্থোকশিং অসি ওনলাইন্দা মতৌ করম্না য়োনবা য়াগদগে হায়বা য়েংবীয়ু, নখোয়না সোসিএল মীদিয়াগী মতেং লৌবা য়াগনি। মসিদা অমুক্তা য়েংবীয়ু অদুগা থবক তৌবীয়ূ। মসিদা নত্তনা, তুংদসু মফম মফমগী আর্তিস্তশিং, খুৎ-শা হৈবশিং অসিনা মালেমগী কৈথেলগী মখোয়গী পোত্থোকশিং অসি মতৌ করম্না য়োনবা য়াগদগে হায়বগী মতাংদা তাকপী তম্বীদুনা মখোয়গী লম্বী য়াৎপীয়ু। অসিগুম্বা থৌওং কয়া অসিনা লৈবাক অসিবু মরোমদোম লেপচবা ঙমহনগনি অমসুং গুরুদেবকী মঙলান অসিবু মঙফাওনবা ঙমহনগনি। নখোয়না গুরুদেবকী খ্বাইদগী ইথিল পীবা মন্ত্রা অদুদি নীংশিংলমগনি –“জাদী তোর দাক শুনে কেৱো না আশে তোবে একলা চলা রে”। মীওই কনা অমত্তনা নাক্তা লেপ্ত্রবসু, ঐহাক্কী পান্দম ফংনবগীদমক্তা ইথন্তা চৎপা তারবসু ঐহাক চৎকনি।

মরুপশিং,

গুরুদেবনা হায়বীরম্মি – “ঈশৈ নোংমাই অমসুং আর্ত য়াওদ্রবদি, লৈবাক অসিনা ফোংদোকপা ঙম্বগী মতিক মাঙই অমসুং মসিগী মীওইশিংগী হৈ-শিংবা অদু মপান্দা থোক্লকপা ঙমদে”। গুরুদেবনা ঐখোয়গী লিরবা নাৎকী হেরিতেজপু ঙাক শেনবা অসি য়াম্না লুনা খঞ্জরম্মি। ঐখোয়না করিগুম্বা মতম অদুগী বেঙ্গোল অদু য়েংলুবা মতমদা য়াম্না নুংঙাইবা ৱাফম অমসু খঙবা ঙমগনি। মাইকৈ খুদিংমক্তা নিং-তম্বগী ইহৌ হৌরিঙৈ মতমদা বেঙ্গোলনা নাৎপু য়োকখত্তুনা থম্বগী থৌদাং অমসু পাঙথোক্লম্মি। বেঙ্গোলগী মফম খুদিংদা সংস্কৃতি, সহিত্য, ঈশৈ-নোংমাইগী খুত্থাংদা নিং-তম ইহৌদা তোঙানবা মওংদা ইথিল অমসু পীরিবনি।

মরুপশিং,

গুরুদেবনা লৈবাক অসিগী মতাংদা হান্নদগী হায়রম্লবনি। মহাক্না অসুম্না হায়রম্মি – “ওরে নুতুন জুগের ভোরে, দিশ নে শোমাই কারিয়ে ব্রিথা, শোমোই বিচার কোরে, ওর নোতুন জুগে রা ভেরে, এশো গ্যানী এশো কোর্মি নাশো ভারোতো। লাজ হে, বিরো ধোরমে পুন্নোকোর্মে, বিধে হদয় রাজো হে”। গুরুদেবকী অসিগুম্বা ৱাখল্লোন অসিবু ওইথোকহনবগী থৌদাং অদু হৌজিক্তি ঐখোয়গীনি।

মরুপশিং,

ঐহাক্না গুরুদেবকী মতাংদা ৱারী শাবা মতমদা ঐহাক্না ইশাবু লাকশিনবা ঙমদবগী মতৌ অমা ফাওজৈ। মমাংদা ঐহাক মফম অসিদা লাক্লম্মে, মতমদুদসু ঐহাক্না মসিগী মতাংদা খরা হায়খি। ঐহাক্না অমুক্কা হন্না হায়রি, গুরুদেবকা গুজরাতকা নক্নবা অদুগী মতাংদনি। মসিবু হন্না হন্না নীংশিংবগী তঙাই ফদ্রিবা অসিগী মরমদি মসিনা খ্বাইদগী হেনবা ভারত অমা হায়বগী ৱাখল্লোন অমা ফাওহল্লি। তোঙান-তোঙানবা লোল, চাকচা-হৈজা, ফিজেৎ-চাজেৎশিং অসিনা ঐখোয়বু অমগা-অমগগী মরক্তা কয়া য়াম্না নক্নহল্লিবনো হায়বদো উৎলি। তোঙানবা কয়া অমা লৈরিবা ঐখোয়গী ভারত অসিদা ঐখোয়না অমনা-অমদগী কয়া য়াম্না তমজবা ফংবগে হায়বদু উৎলি।

মরুপশিং,

নখোয়না মফম অমা হেক্তদা, হীরম অমত্তদা চৎপা মতমদা নখোয়না কন্না হোৎনজবা অদুনা অনৌবা ভারত অমা শেমগদৌরিবনি। ঐহাক্না গুরুদেবকী ৱাহৈ খরা অসি হায়রগা ঐহাক্কী ৱারোল অসি লোইশিনগে। গুরুদেবনা অসুম্না হায়রম্মি, “ওরে গুহে, বাশি খোল দার খোল, লাগলো যে স্থেলো, জেলে, মোবোতোলে লাগলো যে দোল, দার খেল, দার খেল”। লৈবাক অসিগী অনৌবা খুদোংচাবা কয়ানা নখোয়বু ঙাইদুনা লৈরে। অদোম খুদিংমক মাই পাকপীরো, মাং থানা চৎপীরো, অদুগা লৈবাক্কী মঙলান অসিবু মঙফাওনহনবীরো। অদোম্বু ঐহাক্না অমুক হন্না য়াইফ-পাউজেল পীজরি অমসুং মসিগী চহি ১০০ অসিনা ঐখোয়গী মাঙদা লৈরিবা খোঙচৎ অসিগী অকনবা ঙাক্লৌ অমা ওইরসনু, ঐখোয়বু অনৌবা অৱাংবা থাক্তা পুরসনু অমসুং বিশ্বভারতীনা হৌদোরকখিবদা লোয়নরকখিবা মঙলান অদুবু মঙফাওনহনবা ওইনা মালেমগী য়াইফনবা লম্বী অমা য়াৎপা ওইনা ভারতকী য়াইফ-য়ুম্বালগী লম্বী অসিবু মপাঙ্গল হাপ্পা ওইনা মাঙ থানা চৎপা ঙম্বা ওইবীয়ু হায়না ঐহাক্না নখোয়দা য়াইফ-পাউজেল পীজরি। অমুক্কসু হন্না মীয়াম্বু হন্না-হন্না থাগৎচরি।

*****