ঙসি ভিদিও কনফরেন্সকী খুৎথাংদা প্রধান মন্ত্রী শ্রী নরেন্দ্র মোদীনা অলীগর মুস্লিম য়ুনিভর্সিতি(এ এম য়ু)গী চহি ১০০সুবা মপোক কুমওন থৌরমদা ৱা ঙাংখ্রে। থৌরম অদুগী শরুক অমা ওইনা মহাক্না পোস্তেল স্তাম্প অমসু ফোঙখি।

সার সায়াদনা ফোঙদোকখিবা ‘লৈবাক্কী খনবা মীওই অমনা অহানবা ওইনা অমসুং মরুওইনা পাংথোক্কদবা থবক অসি মীয়ামগী য়াইফনবা থবক পাংথোকপনি। কাংলুপ, ফুরুপ নৎত্রগা লাইনিংগী য়েংদনা থবক তৌগদবনি’ হায়বা ৱাফম অসি থৌরম অদুদা ৱা ঙাংবদা প্রধান মন্ত্রীনা নিংশিংখি।

প্রধান মন্ত্রীনা হায়খি লৈবাক অসিগী মীওই খুদিংমক সংবীধান্না পীরিবা মখোয়গী হকশিং ফংনবা লম্বী অমদা লৈবাক অসি চঙশিল্লি অমসুং কনাগুম্বা অমগী লাইনিংনা মরম ওইদুনা মীওই অমতা নাথৈদুনা থম্লোইদবনি অমসুং মসি ‘সবকা সাথ, সবকা বিকাস,সবকা বিশ্বাস’ হায়বা ৱাশক অসিগী য়ুম্ফমনি। মীচঙ-মীখাই নাইদনা সরকারগী স্কিমশিংগী কান্নবা ফংহল্লে। মীচঙ-মীখাই নাইদনা লায়রবা মীওই করোর ৪০গী বেঙ্ক একাউন্তশিং হাঙলে। মীচঙ-মীখাই নাইদনা লায়রবা মীওই করোর ২ হেনবগী চেক্কী য়ুমশিং শারে। মীচঙ-মীখাই নাইদনা নুপী করোর ৮ হেনবগী গ্যাস কন্নেক্সন পীরে। মীচঙ-মীখাই নাইদনা অয়ুশ্মান ভারত স্কিমগী মখাদা মীওই করোর ৫০ হেনবদা লুপা লাখ ৫ ফাওবগী লেম্না লায়য়েংবগী খুদোংচাবা ফংহল্লে। লৈবাক অসিগী লন-থুমশিং মীওই খুদিংমক্কীনি অমসুং পুম্নমক কান্নবা ফংগদবনি। মসি খঙনা ঐখোয়গী সরকারনা থবক পায়খৎলি।

অনৌবা ভারত অমা শেমগৎনবা পান্দম অসিদা লৈবাক অমসুং খুন্নাই চাউখৎপা অসি রাজনিতিগী মিৎয়েং অমদগী য়েংলোইদবনি। লান্না পাউ শন্দোকপশিংদগী মীকুপ-নাহুম শিংনা লৈগদবনি অমসুং কনাগুম্বগী থম্মোয়দা লৈবাক্কী য়াইফবা অসিনা মরুওইনা লৌগদবনি। রাজনিতিদা ঙাইবা য়াই অদুবু খুন্নাইদি ঙাইবা য়াইদে। মসিগা চপ মান্নবা মওংদা খুন্নাইগী লায়রবশিং ঙাইবা ঙম্লোই। ঐখোয়না মতম মাঙহনবা ঙম্লোই অমসুং অত্মানির্ভর ভারত অমা ওইহন্নবা পুন্না থবক তৌমিন্নগদবনি। লৈবাক্কী পান্দমশিং ফংনবা খেন্নবশিং তোখাইনা থমগদবনি হায়না শ্রী মোদীনা মখা তাখি। 

লাইচৎ মনুংদা খুন্নাইগী য়াইফনবা থবক কয়া পাংথোকপগীদমক য়ুনিভর্সিতি অসি থাগৎলদুনা প্রধান মন্ত্রীনা হায়খি মীওই লিশিং কয়া লেম্না তেস্ত পাংথোক্লে, আইসোলেসন ৱার্দশিং শেমগৎলে, প্লাজমা বেঙ্কশিং শেমগৎলে অমসুং পি.এম কিয়ার ফন্দদা য়াম্লবা শেনফম কৎতুনা খুন্নাইগীদমক অদোম্না মরুওইনা লৌবা অদু থবক্না উৎলে।অসিগুম্বা মওং-মরিল তানা পাংথোকপা থবকশিং অসিনা ভারতনা মাইপাক্না কোরোনা লাইচৎ থেংনবা ঙম্বনি।

প্রধান মন্ত্রীনা হায়খি মালেমগী লৈবাক কয়াগা ভারতকা লৈনবা মরীশিং ফগৎনবা হৌখিবা চহি ১০০ অসিদা অলীগর মুস্লিম য়ুনিভর্সিতিনা থবক কয়া পাংথোকখ্রে। উর্দু, অরাবীক অমসুং পর্সিয়ান লোলশিংদা য়ুনিভর্সিতি অসিদা পাংথোকখিবা রিছর্সশিংনা মালেমগী ইস্লাম লাইনিং চৎপা লৈবাকশিংগা ভারতকা কলচরগী লমদা লৈনবা মরীশিংদা অনৌবা থৌনা পীরে। অফবা মরীশিং শেমগৎপা অমসুং লৈবাক শেমগৎ-শাগৎনবা য়ুনিভর্সিতি অসিগী থৌদাং অনি লৈরে।

তোইলেতশিং মতিক চাদবদগী মুস্লিম নুপীমচা চাদা ৭০ হেন্না লাইরিক তম্বা তোকখিবগী মতম অমা নৌহৌন্না নিংশিংলদুনা প্রধান মন্ত্রীনা হায়খি শ্বাচ্ছ ভারত মিসনগী মখাদা স্কুল কারিবী নুপীমচাশিং তোখাইবা তোইলেতশিং শারে। হৌজিক মুস্লিম নুপীমচাশিং স্কুল কাবা তোকপগী চাদা চাদা ৩০দা হন্থরে। স্কুল কাবা তোক্লবা মহৈরোয়শিংগীদমক অলীগর মুস্লিম য়ুনিভর্সিতিনা হাংদোক্লিবা ব্রিজ কোর্সশিং অসি থাগৎনিঙাইনি। মুস্লিম নুপীমচাশিং লাইরিক তম্নবা অমসুং মখোয়দা শক্তি পীনবা সরকারনা অকনবা মিৎয়েং চঙলি। হৌখিবা চহি ৬ অসিদা সরকারনা মুস্লিম নুপীমচা করোর ১ রোমদা স্কোলারশিপশিং পীরে। জেন্দরদা য়ুম্ফম ওইরগা মীচঙ-মীখাই নাইরোইদবনি অমসুং মী খুদিংমক চপ মান্নবা হকশিং ফংগদবনি, মী খুদিংমক লৈবাক অসিনা চাউখৎলকপগী কান্নবা ফংগদবনি।

প্রধান মন্ত্রীনা হায়খি ত্রিপল তালাক্কী চৎনবী মুৎথৎতুনা অনৌবা মতমগী মুস্লিমগী খুন্নাই অমা শেমগৎনবা লৈবাক অসিনা থবক পায়খৎলে। মমাংঙৈদা হায়নবা অমা লৈ, মদুদি করিগুম্বা নুপী অমা লাইরিক তমহল্লবদি, ইমুং অদু পুন্না লাইরিক হৈরবনি । ইজুকেসন্না ইমুং অমা থবক ফংহল্লি অমসুং মশানা মশাবু থবক পীজবা ঙমহল্লি। থবক ফংবা অমসুং ওন্ত্রেপ্রেনিউয়রশিপনা মীয়ামদা শেন-থুমগী মনিংতম্বা ফংহল্লি। শেন-থুমগী মনিংতম্বা ফংবদগী থৌনা লৈহল্লি। থৌনা লৈরবা নুপী অমনা ৱারেপ লৌবা খুদিংগী চপ মান্নবা মতেং পাংই।

প্রধান মন্ত্রীনা হায়খি অৱাংবা থাক্কী মহৈ-মশিং তম্বদা য়ুনিভর্সিতি অসিগী অনৌবা করিকুলম্না মরম ওইদুনা অলীগর মুস্লিম য়ুনিভর্সিতি অসি মহৈরোয়শিংনা পাম্নরে। মহৈরোয় অমনা হান্নদগী য়ুনিভর্সিতিদা তম্লিবা অসিগা মান্নবা ইন্তরদিসিপ্লিনারি সবজেকশিং অনৌবা নেসনেল ইজুকেসন পোলিসিদা য়াওরে। লৈবাক্না হান্না হায়বা ৱাখল্লোন অসিগা লোয়ন্না লৈবাক অসি চাউখৎহন্নবা ঐখোয়গী লৈবাক্কী নহারোলশিংনা থাজবা পীরে। অনৌবা ইজুকেসন পোলিসি অসিদা মল্তিপল ইন্ত্রি অমসুং একজিৎগী খুদোংচাবশিং লৈবা অসিনা মখোয়গী লাইরিক তম্বগী মতাংদা মহৈরোয়শিংনা য়াম্না লাইনা ৱারেপশিং লৌবা ঙম্লগনি। মসিনা মহৈরোয়শিংনা কোর্স মনুংদা লৌগদবা ফিগী মতাংদা লাংতক্নবা লৈতনা মখোয়গী ৱারেপশিং মনিংতম্না লৌবা ঙম্লগনি।

প্রধান মন্ত্রীনা হায়খি অৱাংবা থাক্কী মহৈ তম্বগী সিত মশিং হেনগৎহন্নবা সরকারনা লেপ্তনা হোৎনরি। লাইরিক তম্বা অসি ওনলাইন নৎত্রগা ওফলাইন ওইগেরা, মসিগী মহৈরোয় খুদিংমক য়ৌহন্নবা অমসুং খুদিংমক্কী পুন্সিদা অহোঙবা পুরক্নবা সরকারনা থবক পায়খৎলি। ভারতনা নিংতম্বা ফংখিবা চহি ৭৫সুবা থৌরমগা লোয়ন্না মীয়াম্না মশক খঙবীদ্রবা নিংতম লান্মীশিংগী মতাংদা থিজিন্নবা য়ুনিভর্সিতি অসিগী চহি ১০০সুবা থৌরম অসিদা অহেনবা থবক অমা পাংথোক্নবা মহাক্না অলীগর মুস্লিম য়ুনিভর্সিতিগী হোস্তেল ১০০দা তকশিনখি।

*****