ମଧ୍ୟପ୍ରଦେଶରେ ହେଉଥିବା କିଷାନ ସମ୍ମିଳନୀକୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଭିଡିଓ କନଫରେନ୍ସ ଜରିଆରେ ସମ୍ବୋଧିତ କରିଛନ୍ତି । ଏହାଛଡା ସେ ଶୀତଳ ଭଣ୍ଡାର ଭିତ୍ତିଭୂମି ଓ ଅନ୍ୟାନ୍ୟ ସୁବିଧା ସୁଯୋଗର ଶିଳାନ୍ୟାସ କରିବା ସହ ଉଦଘାଟନ ମଧ୍ୟ କରିଛନ୍ତି ।

ଏହି ଅବସରରେ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଛନ୍ତି, ଚାଷୀ ଯେତେ କଠିନ ପରିଶ୍ରମ କଲେ ମଧ୍ୟ ଖାଦ୍ୟ ଶସ୍ୟ, ଫଳ ଓ ପରିପାରିବାର ଭଣ୍ଡାରଣ ବିନା ତାକୁ ବିପୁଳ କ୍ଷତି ସହିବାକୁ ପଡିବ । ବ୍ୟବସାୟୀକ ଜଗତକୁ ଆଧୁନିକ ଭଣ୍ଡାରଣ ବ୍ୟବସ୍ଥା ଓ ନୂତନ ଖାଦ୍ୟ ପ୍ରକ୍ରିୟାକରଣ କ୍ଷେତ୍ରରେ କାର୍ଯ୍ୟ କରିବାକୁ ସେ ନିବେଦନ କରିଛନ୍ତି । ଏହା ଚାଷୀମାନଙ୍କୁ ସାହାଯ୍ୟ କରିବା ସହ ଦେଶକୁ ମଧ୍ୟ ରକ୍ଷା କରିବ ।

ଉନ୍ନତ ଦେଶଗୁଡିକରେ ଭାରତୀୟ କୃଷକମାନଙ୍କୁ ଅବିଳମ୍ଭେ ଅତ୍ୟାଧୁନିକ ସୁବିଧା ଯୋଗାଇବା ଉପରେ ପ୍ରଧାନମନ୍ତ୍ରୀ ଗୁରୁତ୍ଵାରୋପ କରିଛନ୍ତି । ସେ ଆହୁରି କହିଛନ୍ତି ଯେ, ଦ୍ରୁତ ପରିବର୍ତ୍ତିତ ବୈଶ୍ଵିକ ଦୃଶ୍ୟପଟ୍ଟରେ ଭାରତୀୟ ଚାଷୀମାନେ ଅତ୍ୟାଧୁନିକ ସୁବିଧା ବିନା ଅସହାୟ ହୋଇ ରହିବେ ନାହିଁ । ନିକଟରେ ନୂତନ କୃଷି ନୀତି ସମ୍ପର୍କରେ ଚାଲିଥିବା ଆଲୋଚନା ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଛନ୍ତି ଯେ, ଏଭଳି ସଂସ୍କାରମୂଳକ ଆଇନ ପାଇଁ ଦୀର୍ଘ 20-22 ବର୍ଷ ଧରି ବିଚାରବିମର୍ଷ ଚାଲିଥିଲା । ଏସବୁ ଆଇନ ରାତାରାତି ପ୍ରବର୍ତ୍ତିତ ହୋଇନାହିଁ । ଦେଶର କୃଷକ, ଚାଷୀ ସଂଗଠନ, କୃଷି ବିଶେଷଜ୍ଞ, କୃଷି ଅର୍ଥନୀତି ବିଶାରଦ, କୃଷି ବୈଜ୍ଞାନିକ ଓ ଅଗ୍ରଣୀ ଚାଷୀମାନେ କୃଷି କ୍ଷେତ୍ରରେ ଉନ୍ନତି ପାଇଁ ନିରବଛିନ୍ନ ଭାବେ ଦାବି କରିଆସୁଥିଲେ । ଦଳୀୟ ଇସ୍ତାହାରରେ କୃଷି ସଂସ୍କାର ନେଇ କୁହାଯାଇଥିଲେ ମଧ୍ୟ ପ୍ରକୃତପକ୍ଷେ ଏହାକୁ ତ୍ୱରାନ୍ୱିତ କରାଯାଇନଥିଲା । ଆଗରୁ ଏସମ୍ପର୍କରେ ଯେଉଁ ଆଲୋଚନା ଚାଲିଥିଲା ନୂତନ କୃଷି ନୀତିରେ ତାହାହିଁ ପ୍ରତିଫଳିତ ହୋଇଛି ବୋଲି ପ୍ରଧାନମନ୍ତ୍ରୀ କହିଛନ୍ତି ।

ପ୍ରଧାନମନ୍ତ୍ରୀ କହିଛନ୍ତି ଯେ, ପୂର୍ବ ସରକାରମାନେ ଦୀର୍ଘ 8 ବର୍ଷ ଧରି ସ୍ଵାମୀନାଥନ କମିଟିର ରିପୋର୍ଟକୁ କାର୍ଯ୍ୟକାରୀ କରିନଥିଲେ । ଏପରିକି ଚାଷୀମାନଙ୍କ ଆନ୍ଦୋଳନ ମଧ୍ୟ ଏମାନଙ୍କୁ ସଚେତନ କରାଇପାରିନଥିଲା । ଚାଷୀମାନଙ୍କ ପାଇଁ ବିଶେଷ କିଛି ଖର୍ଚ୍ଚ କରିବାର ପଡିବ ନାହିଁ  ବୋଲି ସେମାନେ ଧରିନେଇଥିଲେ । ବିରୋଧୀ ଦଳଙ୍କୁ ସମାଲୋଚନା କରି ସେ କହିଛନ୍ତି ଯେ, ସେମାନେ ଚାଷିମାନଙ୍କୁ ରାଜନୀତି ପାଇଁ ବ୍ୟବହାର କରୁଥିଲେ । ମାତ୍ର ତାଙ୍କ ସରକାର ଚାଷୀମାନଙ୍କୁ ଅନ୍ନଦାତା ଭାବେ ବିବେଚନା କରିବା ସହ ସେମାନଙ୍କ ସମସ୍ୟା ପ୍ରତି ଉତ୍ସର୍ଗୀକୃତ ମନୋଭାବ ପ୍ରଦର୍ଶନ କରୁଛନ୍ତି । ତାଙ୍କ ସରକାର ସ୍ଵାମୀନାଥାନ କମିଟିର ରିପୋର୍ଟରେ କରାଯାଇଥିବା ସୁପାରିଶକୁ ତ୍ୱରାନ୍ୱିତ କରିଛନ୍ତି ଏବଂ ଚାଷୀମାନଙ୍କ ଉତ୍ପାଦିତ ସାମଗ୍ରୀ ଖର୍ଚ୍ଚର ଦେଢଗୁଣା ଏମଏସପି ପ୍ରଦାନ କରିଥିବା ଶ୍ରୀ ମୋଦୀ ପ୍ରକାଶ କରିଥିଲେ । 

ଋଣ ଛାଡ ସମ୍ପର୍କରେ ପ୍ରଧାନମନ୍ତ୍ରୀ କହିଛନ୍ତି ଯେ, କ୍ଷୁଦ୍ର ଓ ନାମମାତ୍ର ଚାଷୀଙ୍କ ପାଖରେ ଏହା ପହଞ୍ଚି ପାରେ ନାହିଁ, କାରଣ ସେ ବ୍ୟାଙ୍କକୁ ଯାଇପାରେ ନାହିଁ କି ଋଣ ନେଇ ପାରେନାହିଁ । ପିଏମକିଶାନ ଯୋଜନାରେ ପ୍ରତିବର୍ଷ ଚାଷୀମାନେ75 ହଜାର କୋଟି ଟଙ୍କା ସହାୟତା ପାଇବେ, ଯାହାକି ସିଧାସଳଖ ସେମାନଙ୍କ ବ୍ୟାଙ୍କ ଖାତାରେ ଜମା ହେବ । ଏଥିରେ କୌଣସି ବାଟମାରଣା ହେବ ନାହିଁ କି କେହି କମିସନ ମଧ୍ୟ ପାଇପାରିବେ ନାହିଁ । ନିମ ପ୍ରଲେପଯୁକ୍ତ ୟୁରିଆ ଚାଷୀମାନଙ୍କୁ ଯୋଗାଇ କିପରି ଦୁର୍ନୀତି ରୋକା ଯାଇପାରିଛି ପ୍ରଧାନମନ୍ତ୍ରୀ ତାହା ଉପରେ ବର୍ଣ୍ଣନା କରିଥିଲେ । ପୂର୍ବ ସରକାରମାନଙ୍କୁ ସମାଲୋଚନା କରି ପ୍ରଧାନମନ୍ତ୍ରୀ କହିଛନ୍ତି ଯେ, ସେମାନେ ଚାଷୀମାନଙ୍କ ସମସ୍ୟା ପ୍ରତି ସଚେତନ ହୋଇଥିଲେ ଦୀର୍ଘ ଦଶନ୍ଧି ଧରି 100ଟି ବୃହତ ଜନସେଚନ ପ୍ରକଳ୍ପ ଆଜି ଅସମାପ୍ତ ରହିନଥାନ୍ତା । ଏହିସବୁ ପ୍ରକଳ୍ପଗୁଡ଼ିକୁ ବିଭିନ୍ନ ମିଶନ ଜରିଆରେ ସଂପୂର୍ଣ୍ଣ କରିବା ପାଇଁ ଆମ ସରକାର ହଜାର ହଜାର କୋଟି ଟଙ୍କା ଖର୍ଚ୍ଚ କରୁଛନ୍ତି । ପ୍ରତ୍ୟେକ ଚାଷ ଜମିକୁ ଜଳ ଯୋଗାଇ ଦେବାପାଇଁ ତାଙ୍କ ସରକାର ଉଦ୍ୟମ କରୁଛନ୍ତି । ଏହାଛଡା ମହୁ ଚାଷ, ପଶୁପାଳନ ଓ ମତ୍ସ୍ୟ ଚାଷ ଇତ୍ୟାଦି ପ୍ରତି ମଧ୍ୟ ସମଦୃଷ୍ଟି ଦେଉଛନ୍ତି ।

ପ୍ରଧାନମନ୍ତ୍ରୀ କହିଛନ୍ତି ଯେ, ମତ୍ସ୍ୟ ଚାଷର ବିକାଶ ପାଇଁ ନୀଳ ବିପ୍ଲବ ଯୋଜନା କାର୍ଯ୍ୟକାରୀ କରାଯାଉଛି । କିଛିଦିନ ପୂର୍ବରୁ ମତ୍ସ୍ୟ ସମ୍ପଦ ଯୋଜନା ମଧ୍ୟ ଆରମ୍ଭ ହୋଇଛି । ଏହିସବୁ ଉଦ୍ୟମ ଯୋଗୁଁ ଦେଶରେ ମତ୍ସ୍ୟ ଉତ୍ପାଦନ ସମସ୍ତ ପୂର୍ବ ରେକର୍ଡ ଭଙ୍ଗ କରିବାରେ ସକ୍ଷମ ହୋଇଛି ବୋଲି ଶ୍ରୀ ମୋଦୀ କହିଛନ୍ତି । ସରକାରଙ୍କ ନୂତନ କୃଷି ନୀତି ନେଇ ଅବିଶ୍ଵାସର କୌଣସି କାରଣ ନାହିଁ  ଓ ଏଥିରେ ତିଳେମାତ୍ର ମିଥ୍ୟା ମଧ୍ୟ ନାହିଁ । ସରକାର ଏମଏସପି ଉଠାଇଦେବାକୁ ଚାହୁଁଥିଲେ ସ୍ଵାମୀନାଥାନ କମିଟିର ସୁପାରିଶକୁ କାହିଁକି ଲାଗୁ କରିଥାନ୍ତେ, ସେ ବିଷୟରେ ଟିକିଏ ଚିନ୍ତା କରିବାକୁ ଜନସାଧାରଣଙ୍କୁ ନିବେଦନ କରିଛନ୍ତି ।  

ଶସ୍ୟ ବୁଣା ହେବା ପୂର୍ବରୁ ଚାଷିକୁ ଆଶ୍ଵାସନା ଦେବା ପାଇଁ ଏମଏସପି ଘୋଷଣା କରାଯାଇଥାଏ । ଏପରିକି କରୋନା ବୈଶ୍ଵିକ ମହାମାରୀର ମୁକାବିଲା କରୁଥିବା ବେଳେ ମଧ୍ୟ ଶସ୍ୟ ଆହରଣ କାଳରେ ସ୍ଵାଭାବିକ ଭାବେ ଏମଏସପି ପ୍ରଦାନ କରାଯାଇଛି । ଆଗରୁ ଯେଭଳି ଏମଏସପି ଦିଆଯାଇଆସୁଛି ତାହା ସେହିଭଳି ଅବ୍ୟାହତ ରହିବ ବୋଲି ପ୍ରଧାନମନ୍ତ୍ରୀ ଚାଷିମାନଙ୍କୁ ପ୍ରତିଶ୍ରୁତି ଦେଇଛନ୍ତି । ସରକାର ଏମଏସପିର ମୂଲ୍ୟ କେବଳ ବୃଦ୍ଧି କରିନାହାନ୍ତି ବରଂ ଏମଏସପି ଦେଇ ଅଧିକ ଶସ୍ୟ ମଧ୍ୟ ସଂଗ୍ରହ କରିଛନ୍ତି । ଯେତେବେଳେ ଡାଲି ଜାତୀୟ ଶସ୍ୟର ସମସ୍ୟା ଦେଶରେ ଦେଖାଦେଇଥିଲା ତାହାର ସ୍ମରଣ କରି ପ୍ରଧାନମନ୍ତ୍ରୀ କହିଛନ୍ତି ଯେ, ଏହା ଦେଶ ବାହାରୁ ମଧ୍ୟ ଅଣାଯାଇଥିଲା । ସରକାର 2014ରେ ନୀତିର ପରିବର୍ତ୍ତନ କରି 112 ଲକ୍ଷ ଟନ ଡାଲି ଜାତୀୟ ଶସ୍ୟ ଚାଷୀମାନଙ୍କଠାରୁ ସଂଗ୍ରହ କରିଥିଲେ । ତେବେ 2014 ପୂର୍ବର 5 ବର୍ଷ ମଧ୍ୟରେ ମାତ୍ର ଦେଢ ଲକ୍ଷ ଟନ ଡାଲି ଜାତୀୟ ଶସ୍ୟ ସଂଗ୍ରହ ହୋଇଥିଲା । ଆଜି ଡାଲିଜାତୀୟ ଶସ୍ୟ ଉତ୍ପାଦନ କରୁଥିବା ଚାଷୀମାନେ ଅଧିକ ଏମଏସପି ପାଉଛନ୍ତି ଓ ଏହାର ବଜାର ମୂଲ୍ୟ ମଧ୍ୟ ହ୍ରାସ ପାଇଛି । ଏହା ସିଧାସଳଖ ଭାବେ ଗରୀବମାନଙ୍କ ପାଇଁ ଲାଭଦାୟକ ହୋଇଥିବା ଶ୍ରୀ ମୋଦୀ କହିଛନ୍ତି । ପ୍ରଧାନମନ୍ତ୍ରୀ ସ୍ପଷ୍ଟିକରଣ ଦେଇ କହିଛନ୍ତି ଯେ, ନୂତନ ଆଇନ ବଳରେ ଚାଷୀମାନେ ତାଙ୍କ ଉତ୍ପାଦିତ ସାମଗ୍ରୀ ମଣ୍ଡି କିମ୍ବା ମଣ୍ଡି ବାହାରେ ବିକ୍ରି କରିବାର ସ୍ଵାଧୀନତା ପାଇଛନ୍ତି । ଚାଷୀ ଯେଉଁଠି ଅଧିକ ମୂଲ୍ୟ ପାଇବ ସେଠି ତାହାର ଜିନିଷ ବିକ୍ରି କରିପାରିବ । ନୂଆ ଆଇନ ପରେ କୌଣସି ଗୋଟିଏ ବି ମଣ୍ଡି ବନ୍ଦ ହୋଇନାହିଁ । ଏପିଏମସିଗୁଡିକର ଆଧୂନିକୀକରଣ ନିମନ୍ତେ ସରକାର 500 କୋଟିରୁ ଉର୍ଦ୍ଧ୍ଵ ଟଙ୍କା ଖର୍ଚ୍ଚ କରୁଛନ୍ତି ବୋଲି ଶ୍ରୀ ମୋଦୀ କହିଛନ୍ତି ।

ଭାଗ ଚାଷ ସମ୍ପର୍କରେ ସ୍ପଷ୍ଟିକରଣ ଦେଇ ପ୍ରଧାନମନ୍ତ୍ରୀ କହିଛନ୍ତି ଯେ, ଏହା ଆମ ଦେଶରେ ବହୁକାଳରୁ ଚାଲିଆସୁଛି । ଭାଗ ଚାଷରେ କେବଳ ଉତ୍ପାଦିତ ସାମଗ୍ରୀର ନେଣଦେଣ ହେଉଥିବା ବେଳେ ଜମି ଚାଷୀ ପାଖରେ ହିଁ ଥାଏ । ଏସମ୍ପର୍କରେ ରାଜିନାମା ସହ ଜମିଜମାର କୌଣସି ସମ୍ପର୍କ ନାହିଁ । ଏପରିକି ପ୍ରାକୃତିକ ବିପର୍ଯ୍ୟୟ ସମୟରେ ମଧ୍ୟ ଚାଷୀ ପୁରା ପଇସା ପାଇଥାଏ । ନୂତନ ଆଇନରେ ଚାଷୀ ପାଇଁ ପର୍ଯ୍ୟାପ୍ତ ଲାଭର ସୁବିଧା ରହିଛି । ଚାଷୀମାନଙ୍କ ଉଦବେଗ ପ୍ରତି ସମବେଦନା ପୂର୍ବକ ଏଥିରେ କୌଣସି ଆଶଙ୍କାର କାରଣ ନାହିଁ ବୋଲି କହିଛନ୍ତି । ସରକାର ପ୍ରତ୍ୟେକ ବିଷୟରେ ଆଲୋଚନା ପାଇଁ ପ୍ରସ୍ତୁତ ଅଛନ୍ତି । ମହାମାନ୍ୟ ଅଟଳ ଜୀଙ୍କ ଜୟନ୍ତୀ ଆସନ୍ତା 25 ତାରିଖ ଦିନ ଏହି ବିଷୟରେ ସେ ପୁଣି ଆଲୋଚନା କରିବେ ବୋଲି କହିଛନ୍ତି । ସେହିଦିନ ପିଏମକିଶାନ ସମ୍ମାନ ନିଧିର ଦ୍ଵିତୀୟ କିସ୍ତି କୋଟି କୋଟି ଚାଷୀଙ୍କ ବ୍ୟାଙ୍କ ଖାତାରେ ଜମା ହେବ ବୋଲି ପ୍ରଧାନମନ୍ତ୍ରୀ କହିଛନ୍ତି ।

**********