প্রধান মন্ত্রী শ্রী নরেন্দ্র মোদীনা ঙসি অনৌবা পর্লিয়মেন্ত বিল্দিংগী উরেপ-উয়ুং তমখ্রে। অনৌবা বিল্দিং অসি আত্মনির্ভর ভারতকা শাগোন্নরিবা শরুক অমনি অমসুং নীং খা তম্লবা মতুংদা আহানবা ওইনা মীয়ামগী পর্লিয়মেন্ত শানবগী চাউরবা খুদোংচাবা অমা ওইরগনি, মসিনা ২০২২দা নীং খা তম্বগী চহি ৭৫শুবা থৌরমদা ‘ন্যু ইন্দিয়া’গী তঙাইফদবশিং অমসুং অনীংবা-অপাম্বশিংগা চুশিন্নরগনি।

থৌরম অদুদা ৱা ঙাংলদুনা প্রধান মন্ত্রীনা হায়খি মদুদি ঙসিগী থৌরম অসি ভারত মচাশিংগী ৱাখল্লোন্না থল্লবা ভারতকী দিমোক্রেসীগী পুৱারীদা মরুওইবা থৌরম অমনি। মহাক্না হায়খি মদুদি ভারতকী পর্লয়মেন্ত হাউস শাবা হৌবা অসি ঐখোয়গী দিমোক্রেসীগী চৎনবীগী খ্বাইদগী মরুওইবা তাঙ্কক অমনি। মহাক্না লৈবাক মীয়ামদা হায়খি মদুদি পুন্না অমত্তা ওইনা পর্লিয়মেন্তকী অনৌবা বিল্দিং অসি শামিন্নসি। মহাক্না হায়খি মদুদি ভারতনা নীং খা তম্বগী চহি ৭৫শুবা থৌরম পাংথোকপদা ঐখোয়গী পর্লিয়মেন্তকী অনৌবা বিল্দিং অসিদগী হেন্না ফজবা অমসুং হেন্না শেংবা অতৈ অমমুক লৈররোই।

প্রধান মন্ত্রীনা ২০১৪দা মহাক্না এম.পি. ওইনা ইহান হান্না পর্লিয়মেন্ত হাউস্তা চংলকখিবা মিৎকুপ অদু নীংশিংখি। মহাক্না হায়খি মদুদি অহানবা ওইনা পর্লিয়মেন্ত হাউস্তা চংদ্রিঙৈগী মমাংদা, মহাক্না মকোক নোনখি অমসুং দিমোক্রেসীগী শেংলবা লাইশঙ অসিবু খুরুমজখি। মহাক্না হায়খি মদুদি অনৌবা পর্লিয়ামেন্ত হাউস্তা এম.পি.শিংগী থবক-থৌরমদা লাইহনগদবা অনৌবা পোৎলম কয়া হাপকনি। মহাক্না হায়খি মদুদি করিগুম্বা অরিবা হাউস্না নীং খা তম্লবা মতুংদা ভারত্তা লম্বী তাকখিবা ওইরবদি, অনৌবা হাউ্স অসিনা লৈবাক অসিদা ‘আত্মনির্ভর’ ওইনবগী শাখি ওইরগনি। করিগুম্বা অরিবা হাউস্তা লৈবাক অসিগী তঙাইফদবশিং মপুং ফাহন্নবা থবক তৌবা তারগদি, ২১শুবা চহি চাগী ভারতকী অনীংবা-অপাম্বশিং অদু অনৌবা হাউস অসিনা মপুং ফাহনগনি।

প্রধান মন্ত্রীনা হায়খি মদুদি মফম অতৈদা দিমোক্রেসী অসি মীখলগী থৌরাংশিং, লৈঙাক অমসুং লৈঙাকলোনগী মরী লৈনৈ। অদুবু ভারত্তা দিমোক্রেসী অসি পুন্সিগী মগুনগী মতাংদনি, মসি পুন্সিগী লম্বীনি অমসুং লৈবাক অসিগী থৱাইনি। মহাক্না হায়খি মদুদি ভারতকী দিমোক্রেসী মতম কয়াগী খঙলু-উরুবা অদুনা শেমগৎপা থৌরাং অমনি। ভারতকী দিমোক্রেসীদা, পুন্সিগী লাইৱাসু য়াওই, পুন্সিগী মশকসু য়াওই অমসুং লোইননা থৌরাংগী লাইৱাসু য়াওই। মহাক্না হায়খি মদুদি ভারত্তা দিমোক্রেসী অসি নুংতিগী অহোংবা পুরক্লি। ভারত্তা ঐখোয়না মীখল খুদিংগা লোইননা ভোতর তর্নআউৎ অসি হেনগৎলকপা উরি।

প্রধান মন্ত্রীনা মীয়ামদা হায়খি মদুদি মখোয়না ভারতপু খ্বাইদগী মরুওইবা ওইনা লৌনবা ৱাশক্কদবনি, শুপ্নগী ভারতকী চাউখৎপা অমসুং ভারতকী শাহৌগীদমক লাইনীং ওইগদবনি, ৱারেপ খুদিংমক লৈবাক্কী পাঙ্গল হেনগৎহনবা অমসুং লৈবাক্কী কান্নবনা মাংদা থাগদবনি। মহাক্না পুম্নমক্তা ৱাশক্নবা হায়খি মদুদি মখোগীদমক্তা লৈবাক্কী কান্নবদগী হেন্না কান্নবা অমত্তা লৈরোইদবনি। লৈবাক্কীদমক্তা মখোয়না খনবা অদু মশাগী লনাইগীদমক খনবদগী হেন্না মরুওইগদবনি। লৈবাক্কী অপুনবা, মখল মখাদগী হেনবা মখোয়গীদমক্তা মরুওইবা করিসু লৈরোইদবনি। লৈবাক্কী সংবিধানগী ইকাই খুম্নবা ঙাকপা অমসুং ফিদম অদু মপুং ফাহনবা অসি মখোয়গী পুন্সিগী খ্বাইদগী চাউবা পান্দম ওইগদবনি।

                                 *****