ইকায়খুম্নরবা চেয়রমেন, পার্লিয়ামেন্তকী অপুনবা মীফমদা ইকায়খুম্নরবা রাস্ত্রপতিনা পীখিবা ৱারোলদগী তমহৌবা য়াবা ৱাফমসিদা ভারত মচা করোর ১৩০গী অপামবা অমদি থাজরমবশিং মমি তারি‍। ইকায়খুম্নরবা রাস্ত্রপতিগী ৱারোল অসিবু ঐনা হাউসতা শৌগৎপা ফোঙদোকচরি‍।

ৱারোল অসিদা ইকায়খুম্নরবা মেম্বর ৪৫ হেনবনা মখোয়গী মীৎয়েঙ থমখ্রে‍। মফমসি অহল ওইরবশিংগী অমদি নীংথিনা খঙ-হৈরবা মীওইশিংগী হাউসনি‍। খন্ন-নৈনবা অসি হেন্না মশক থোকহন্না মীপুম খুদিংনা হোৎনরি‍। শ্রী গুলাম নবি জী, শ্রী অনন্দ শর্ম জী, শ্রী ভুপেন্দ্র য়াদব জী, শ্রী সুধান্সু ত্রিবেদি জী, শ্রী সুধাকর সেখর জী, শ্রী রামচন্দ্র জী, শ্রী রামগোপাল জী, শ্রী সতিস চন্দ্র মিস্রা জী, শ্রী সঞ্জয় রাউত জী, শ্রী স্বপন দাস জী, শ্রী প্রসন্ন অচার্য় জী, শ্রী এ নবনীতি জী, মখোয়গুমবা ইকায়খুম্নরবা মেম্বর পুম্নমক্না মখোয়গী ৱাখল্লোন থমবিখ্রে‍।

মখোয়গী ৱারোলশিংদগী ঐনা অসুম খোৎচিঞ্জহৌবদা অনৌবা ৱাফম কয়া থোরক্লি‍। ঐখোয়গী মমাঙগী মীফম অদু য়াম্না কান্নবা ওইখি হায়বা ৱাফমসিদা হাউস অসিনা চাউথোকচবা য়াই‍ অমদি মসি মেম্বর খুদিংমক্কী মতেংনা ওইথোকপনি‍। ৱাফমসিদা চীং লেম্লবা হাউস অসিগী মেম্বর পুম্নমকপু থাগৎপা ফোঙদোকফম থোকই‍।

মফমসি খঙ-হৈরবা অমদি অহল ওইরবা মীওইশিংগী হাউসনি, মরম অসিনা লৈবাকসিনা থাজবা কয়া ৱাংনা থমবা মশানা তাবনি, ত্রেজরী বেঞ্চতা ফম্লিবা মীওইশিংনসু থাজবা কয়া থম্লি, অমদি অদোমগী হোৎনজমলনা লৈবাকসিগীদমক অফবা ৱাফম কয়া পুথোরক্তুনা ঐগুম্বা নৌরিবা মেম্বর অমগী লমজিং লমতাক ওইবিগনি হায়না ঐনা থাজবা থম্লি‍। অদুবু ঐনা থম্লমবা থাজবশিং অদু নীংবা কাইনিংঙাই ওইরবরা হায়না ঐনা খল্লে‍।

ঐনা খনবদা অদোম্না হৌজিক লৈরিবা মফমদুদগী হোংবা পামদবগী মমি তাবা উই‍। তশেংবদি অদোম মনিং হন্দুনা চৎলিবরা হায়না খল্লি‍। নীংবা কায়নিংঙাই মশক অমা উৎপগী মহুত্তা অদোমগী মফমদগী অনৌবা ইহুল, অনৌবা ৱাখল্লোন অমদি অনৌবা থৌনানা লৈঙাক অসিবু লমজিংবিদুনা লৈবাক অসিবু অফবা মায়কৈ অমদা পুবিরম্লবদি ফরমগদবনি; অদুবু অদোম্না মচি লেঙদনা লৈবনা হেন্না ফরে হায়না খল্লবা মাল্লি‍। ফীভমসিনা কাকা হথ্রাসিনা ইবা ফাগি পুবা শৈরেং অমা নীংশিংহল্লে‍।

য়াম্না ইচঙ থৌনা মহাক্না হায়রম্মী:

(প্রক্রতি বদলাতী শান-শান দেখো,

বাদল রহে আনু, কান-কান দেখো

তুম নিসক্রিয় সে পরে হুএ হো

ভাগ্যবদ পর অরে হুএ হো

ছোরো মিত্র! পুরানী দফলী,

জীবন মে পরিবর্তন লাও

পরম্পরা সে উঞ্চা উথকর,

কুস তো স্তেন্দর্দ বনাও!)

ইকায়খুম্নরবা চেয়রমেন, খন্ন-নৈনবা অসি হৌরকপা মতমদা, গুলাম নবিজীনা মহাক্কী ৱারোলদা অশাওবা উৎখি, লৈঙাক অসিবু হীরম কয়াদা শীথনবা হোৎনখি, অদুবু মদু মহৌশানি‍। অদুবু মহাক্না মরী মখোঙ শম্নদবা ৱাফম কয়া হায়খি‍। মহাক্না জম্মু অমসুং কাস্মিরগী ফিরেপ অসি হাউসতা খন্ন-নৈনবা তৌদনা লৌখিবনি হায়রি‍। লৈবাক অসিনা খন্ন-নৈনবা অদু তি.ভি.দা নুমিৎ চুপ্পা উখি তাখি‍। পাক শন্না খন্নখিবা অমদি অসুম্না পাক শন্না খন্ন-নৈরবা মতুংদা ফিরেপ লৌখিবা অদু লৈবাক মীয়াম্না উখি‍। ইকায়খুম্নরবা মেম্বরশিংনা মীখল তৌরবা মতুংদা ফিরেপ অদু লৌখিবনি‍।

অজাদ সাহিব, অদোমগী মফমদা ঐ অমুক নৌহৌননা নীংশিংজগে‍। মীয়াম্না লিরবা থৌদোকশিং থুনা কাউনদে‍। হাউসনা তেলঙ্গনাগী মতাঙদা কমদৌনা ফিরেপ লৌখিবগে নীংশিংবিয়ু‍। হাউস শো লোনশিনখি, তি.ভি.শিং মুত্থৎখি‍। খন্ন-নৈননবা মফম অমত্তা ফংখিদে অদুগা মদু করমবা ফীভমদা পাস তৌখিবগে হায়বদু কনানসু কাউনদ্রি‍। অদোম অহলনি পাউতাকসু পীবিয়ু, অদুবু অচুম্বদুদি য়াবিয়ু‍।

চহী কয়াগী মতুংদা, অদোম্না অনৌবা স্তেত অমা শেম্নবা তাঞ্জা ফংখি‍। অদোম্না মদু পুম্নমকপু কোনশিন্দুনা তৌরমবা য়াবনি‍। হৌজিক্তসু অনন্দজীনা হায়খিবদুনি, অদোম্না স্তেতশিংদা হংলমখিবরা, মঙোন্দা হংবিয়ু, ৱাফম কয়ামরুম ফোঙদোকখিবনি‍। অদুগা মখোয়না তঙায়ফদনা অন্ধ্র-তেলঙ্গনাগী মীয়ামদা মখোয়না পাম্লিবদু হংবিরমবদি য়াবনি‍। অদুবু অদোম্না তৌখিবদু হৌখ্রে অদুগা মতমদুদা মতমদুগী প্রধান মন্ত্রী ইকায়খুম্নরবা মনমোহন সিংহ জীনা লোক সভাদা ৱাফম অমা ফোঙদোকখি অমদি ৱাফমদু ঙসি নীংশিংমিন্নবা মথৌ তাই হায়না ঐনা খল্লি‍।

মহাক্না হায়খি: ভারতকী দেমোক্রেসী অসি তেলঙ্গনা ৱাফমগী মতাঙদা চঙশিল্লিবা ইহৌ অসিনা মাঙহল্লি‍। অতল জীগী লৈঙাক্না উত্তরাখন্দ, ঝার্খন্দ, ছত্তিসগর ইকায়খুম্নবা ঙাক্না ইংনা চিক্না পুম্নমক তাথোক তাশিন তৌরগা শেমখি‍। অদুগা হায়রিবা স্তেত অহুমসিনা মখোয় মখোয়গী মওংদা লৈবাক চাওখৎহনবদা থৌদাং য়ারি‍। জম্মু অমসুং কাস্মির অমদি লদাখকী মতাঙদা লৌরিবা ফিরেপ পুম্নমক মপুং ফানা মতম শাংনা খন্নরবা মতুংদা লৌখিবনি‍।

জম্মু অমসুং কাস্মিরগী ফীভমগী মতাঙদা দেতা খরা মফমসিদা উৎলি‍। ঐঙোন্দসু ফিগর খরা লৈ‍। হাউস অসিদা ঐসু ৱাফম খরা ফোঙদোকফম থোকই হায়না ঐনা খল্লি‍।

জুন ২০, ২০১৮ – মফমদুদা লৈঙাক চৎখ্রবা মতুংদা অনৌবা সিস্তেম অমা শেমখি‍। গভর্নরগী লৈঙাক থম্লবা মতুংদা রাস্ত্রপতিগী লৈঙাক থমখি অমদি ৩৭০ লৌথোক্নবা ফিরেপ লৌখি‍। মদুগী মতুংদা লায়রবা মীচম কাঙলূপনা রিজর্বেসনগী কান্নবা অহানবা ওইনা ফংখি‍।

অহানবা ওইনা জম্মু অমসুং কাস্মিরদা পহারি লোল লোনবা মীওইশিংনা রিজর্বেসনগী কান্নবা ফংখি‍।

অহানবা ওইনা জম্মু অমসুং কাস্মিরদা, নুপীশিংনা স্তেতকী ৱাংমদা ময়ুম পানখিবা তারগদি মখোয়গী মরল মথুম মৎপিবদগী কঞ্জনবা হক ফংখি‍।

নীং তম্লবা মতুংদা অহানবা ওইনা ব্লোক দেভেলপমেন্ত কাউন্সিলগী মীখল পাঙথোকখি‍।

অহানবা ওইনা রেরা আইন জম্মু অমসুং কাস্মিরদা চৎনখি‍।

অহানবা ওইনা স্তার্ত অপ পোলিসী, ত্রেদ অমসুং এক্সপোর্ত পোলিসী, লোজিস্তিক পোলিসী শেমদুনা জম্মু অমসুং কাস্মিরদা চৎনহনখি‍।

লৈবাকসিবু ঙকহনগদবা ৱাফম অমনা, অহানবা ওইনা জম্মু অমসুং কাস্মিরদা এন্তি-করপ্সন ব্যুরো লিংখৎখি‍।

অহানবা ওইনা ঙমখৈ ৱাংমদগী জম্মু অমসুং কাস্মিরবু তোখাই তাবা পাম্বশিংদা শেল থাদবা থিংবা ঙমখি‍।

অহানবা ওইনা জম্মু অমসুং কাস্মিরবু তোখাই তাবা পাম্বশিং ওকপগী চৎনবী লেপখি‍।

অহানবা ওইনা জম্মু অমসুং কাস্মির পুলিস অমসুং সিক্যুরিতী ফোর্সনা জম্মু অমসুং কাস্মিরদা তেরোরিজম অমসুং তেরোরিস্তশিংগী মায়োক্তা খোঙফম চেৎনা লেপ্পা ঙমখি‍।

অহানবা ওইনা জম্মু অমসুং কাস্মিরগী পুলিসকী মীওইশিংনা কেন্দ্রগী শিন্মীশিংনা চহী কয়া ফংদুনা লাক্লিবা এলাউৱেন্সকী কান্নবশিং ফংখি‍।

অহানবা ওইনা জুম্মু অমসুং কাস্মিরগী পুলিসমেনশিংনা এল.তি.সি. লৌদুনা কন্যাকুমারদি, অৱাং-নোংপোক্তা নৎত্রগা অন্দমান-নিকোবারদা কোয়বা চৎপা য়ারে‍।

ইকায়খুম্নরবা চেয়রমেন, গভর্নরগী লৈঙাক লৈরবা থা ১৮গী মতুংদা সর্পঞ্চ ৪৪০০ অমদি পঞ্চ লিশিং ৩৫ হেনবগী মীখল ইংনা চিক্না পাঙথোকখি‍।

থা ১৮দা জম্মু অমসুং কাস্মিরদা খোঙহাম খুৎহাম্ফম লাখ ২.৫ শাখ্রে,

থা ১৮সিদা জম্মু অমসুং কাস্মিরগী য়ুমথোঙ লাখ ৩ লিশিং ৩০দা মৈ পীখ্রে‍।

থা ১৮সিদা, জম্মু অমসুং কাস্মিরগী মীওই লাখ ৩.৫ হেনবদা অসুস্মান ভারতকী গোল্দ কার্দ পীখ্রে‍।

শুপ্নতগী থা ১৮সিদা জম্মু অমসুং কাস্মিরগী অহল ওইরবা, নুপী অমদি শোইনাইরবা মীওই লাখ অমা মখায়দা পেন্সন স্কিম ফংহনখ্রে‍।

অজাদ সাহিবনা হান্নসু চাওখৎ থৌরাংগী থবকশিং অদুমক পায়খত্তুনা লাক্লি হায়না হায়বিখি‍। ঐখোয়না মদুদা য়ানিংদবা লৈখিদে‍। অদুবু কমদৌনা চাওখৎ থৌরাংগী থবক পায়খৎলমবগে হায়বদুগী মতাঙদা ঐনা খুদম অমা পীবা পাম্মি‍।

মার্চ ২০১৮ ফাওবদা, পি.এম. অৱাস য়োজনাগী মখাদা শুপ্নতগী য়ুম লিশিং ৩.৫খক শারমখি‍। অদুবু হৌজিক্তি চহী ২ ফাদবা মতমসিদা স্কিম অসিগী মখাদা য়ুম লিশিং ২৪ হেন্না শাখ্রে হায়বা অদোম উবিরম্লগনি‍।

হৌজিক্তি লম্বী থোং, মহৈ তম্ফমশঙশিংগী ফীভম ফগৎহন্নবা, অনা লাইয়েংশঙশিং চাউখৎহন্নবা, ঈথৈ লৌখোঙগী ফীভম শেম্নবা অমদি লম কোয়বা লাকপা হেনগৎহন্নবা পি.এম. পেকেজ য়াওনা অতৈ স্কিম কয়া খুৎলৈ থুনা পায়খৎলি‍।

ইকায়খুম্নরবা ভাইকোজী মহাক্কী মশাগী ওইজবা মওং অমা লৈজৈ, মহাক মতম পুম্নমক্তা পুক্নিং নুংশিগল্লি‍। মহাক্না ওগস্ত ৫, ২০১৯বু জম্মু অমসুং কাস্মিরগী অমম্বা নুমিৎনি হায়রি‍। ভাইকোজী, অমম্বা নুমিৎ নত্তে, অমম্বা নুমিত্তি তেরর অমসুং তোখাই তানিংবগী ইহুল য়োকখৎলিবা মখোয়গীনি‍। ঙসি অসি ইমুং লাখ কয়াগীদমক্তদি অনৌবা মঙাল অমা উবা ফংলবনি‍।

ইকায়খুম্নরবা চেয়রমেন, অৱাং নোংপোক্কী মতাঙদসু মফমসিদা খন্নরি‍। অজাদ সাহিবনা অৱাং নোংপোক লমদম মৈ চাক্লি হায়না হায়বিরি‍। করিগুম্ব মফমদুদা মৈ চাক্লম্লবদি অদোম্না হান্না অদোমগী এম.পি.গী কাঙবু অমা মফমদুদা থাবিরম্লগনি, পাউগী মীফম পাঙথোক্লম্লগনি, ফোতোশিংসু ফোঙলম্লগনি‍। মরম অদুনা অজাদ সাহিবকী পাউ অসি ২০১৪ মমাঙগী ওইরমগনি হায়না খল্লি‍। ঙসি অৱাং-নোংপোক লমদম অসি হান্না খন্নরুদবা মওংদা ইং চিকপা ফীভম লৈদুনা লৈবাকসিগী চাওখৎ লমবীদা ভারতকী মাঙজিল থাবা খোঙবু ওইরক্লি হায়না হায়জনিংই‍। অৱাং-নোংপোক লমদমদা চহী ৪০-৪০, ৫০-৫০গী হিংশাগী ইহৌ, ব্লোকেদশিং লৈরম্মী অমদি মখোয়শিংদু কয়া য়াম্না নুংনাংনিংঙাই ওইবগে হায়বদু পুম্নমক্না খঙই‍। অদুবু ঙসিদি হায়রিবা ইহৌশিং অসি লোইখ্রে, ব্লোকেদসু লেপখ্রে অমদি অৱাং-নোংপোক লমদম পুমবা ইং চিকপগী লম্বীদা খুমাঙ চাওশিন্না চঙশিল্লি‍।

ঐনা ৱাফম অমা পনবা পাম্মি – ব্রু ত্রাইবকী চহী ২৫-৩০গী ৱাফম অদোমসু খঙবিরমগনি, ঐখোয়সু খঙই‍। মীওই লিশিং ৩০রোম তমবা ঙমদবা ফীভমদা লৈরি‍। মতম খরগী ওইবা পীক্লবা খাঙপোকশঙশিংদা মীওই ১০০-১০০ নমশিন্দুনা লৈরি‍। ফীভমসি চহী ৩০রোম চত্থদুনা মখোয়গী অৱাবা হন্থদনা লাক্লি‍। অদুগা মখোয়গী মরালদি করিসু নত্তে‍। অঙকপা ৱাফম অমা য়েংবিয়ু, অদোমগী পার্তীনা অৱাং-নোংপোক লমদমদা লৈঙাক খ্বাইদগী হেন্না পায়রি‍। অদোমগী পার্তীগী খোঙবুনা ত্রিপুরাদা চুপ্লি পায়রম্মি, অদোগী নুংশি চান্নরবা মরূপশিং লৈরম্মি‍। করিগুম্বা অদোমনা তৌগে নিংলম্লবদি অদোমগী মিজোরামদা লৈঙাক লৈরম্মী, অদোমগী মরূপ ত্রিপুরাদা লৈরম্মি অদুগা অদোম্না কেন্দ্রদা লৈরম্মি‍। অদোম্না পাম্লম্লবদি ব্রু ত্রাইবশিংগীদমক্তা অদোম্না নুংঙাইরবা ৱাখৈ অমা পুরক্লমবা য়াবনি‍। অদুবু ঙসিদি, চহী কয়াগী মতুংদা ৱাফম অসিগী মপুং ফাবা মতম পুম্বগী ওইবা ৱাখৈ ঐখোয়না পুরক্লে‍।

অসিগুম্বা চাউরবা ৱাফম অমবু করিসু নাচুংদনা কুইনা লৈরম্লিবা করিগীনো খনবদা ঐ ঙকই‍। অদুবু হৌজিক্তি ঐ খঙলে মদুদি মখোয়গী খুল, ময়ুমদগী তোখাইহনবিরবা ব্রু কাঙলূপকী মীয়ামগী পুন্সি মাঙলবসু মখোয়গী চৈনা য়াম্লবসু মখোয়গী ভোৎতি য়ামদে‍। পুম্নমক মীখলগী কুমহৈ ওইবনা মখোয়গী চৈনা ঐখোয়না উরমদে অমদি ঐখোয়না ৱারোইশিন পুরকপা ঙম্লমদে‍। মসি ঐখোয়গী পুৱারীনি ঐখোয়না কাউগুমসি‍।

ঐখোয়গী ৱাখল্লোন খেন্নৈ; সবকা সাথ সবকা বিকাস সবকা বিস্বাস হায়রিবা লাইৱা অসিবু মাঙদা পুখৎপদা ঐখোয় পুন্না চৎমিন্নরি, অমদি ঐখোয়না তৌবা ঙমবা থাক্তা ৱায়েৎ লৈরিবা ৱাফমশিংগী ৱারোইশিন পুরকপদা থৌদাং মপুং ফানা য়াদুনা চঙশিল্লি‍। অদুগা ঐখোয়না মখোয়গী অৱাবা খঙই‍। ঙসিদি মীওই লিশিং ২৯না মখোয় মশাগী ময়ুম ফংলগনি, মখোয়গী শক্তম লৈরগনি অমদি মখোয়গী মফম ফংজরগনি হায়বসিদা লৈবাকসিনা চাউথোকচবা য়ারে‍। মখোয়না মশাগী মঙলান মঙজবা য়ারগনি; মখোয়গী অঙাঙশিংগী তুংগী ফিরেপ লেপচবা ঙম্লগনি‍। মরম অসিনা ব্রু ফুরুপ অমদি অৱাং-নোংপোক পুম্নমক্কী ৱারোইশিন পুরক্নবা মসিনা লম্বী ওইরগনি‍।

ঐনাএ বোরোগী মতাঙদা শাংথবা পামদে, অদুম ওইনমক মদুসু ৱারোইশিন পুরকখিবা মরুওইবা ৱাফম অমনি‍। মদুগী তোপ তোপ্পা ৱাফম হায়রগদি হিংশাগী লম্বীদা চৎলমবা খুৎলায় পায়বা কাঙলূপ পুম্নমক পুনশিন্নখ্রে‍। মসিগী মতুংদা বোরো ইহৌগী দিমান্দ পুম্নমক্কী ৱারোইশিন পুরক্লবা মতুংদা য়ানচেদা পুম্নমক্না ইদুনা য়ানবা পুরকখ্রে‍।

শ্রী সুখেন্দু সেখরজী য়াওনা মশিং য়াম্লবা মরূপশিংনা মফমসিদা শেন্মিৎলোনগী মতাঙদা খন্নখ্রে‍। পার্তী পুম্নমক্কী মীফম পাঙথোকপা মতমদসু ঐনা থমখিবা ৱাফমদি ঐখোয়না মীফম অসিদা মপুং ফানা শেন্মিৎলোনগী ৱাফমশিং খন্ননবা হৌদোকখি‍। মুন্না খন্নবা মথৌ তাই‍। হীরম খুদিংমক পুথোক্কদবনি‍। তোঙান তোঙানবা মফমশিংদা লৈরিবা মীয়ামগী হৈশিংবশিং তোপ তোপ্পা অমনি‍। অদুবু ঐখোয় পুনশিন্দুনা ঙসিগী মালেমগী শেন্মিৎলোনগী ফীভমসিদা ভারতনা কমদৌনা খুদোংচাবা লৌবা য়াগদগে, ভারতনা কমদৌনা মশাগী খোঙফম চেৎশিলহনগদগে, কমদৌনা ভারতনা মশাগী শেন্মিৎলোনগী ইন্তরেস্ত মপাঙ্গল কনখৎহনগদগে হায়বসিদা ঐখোয়না অনৌবা ৱাফমশিং পুথোক্তুনা অনৌবা লম্বী য়াত্তুনা ঐখোয়না মচা খায়না মমুৎ তানা খন্ন-নৈনসি হায়না ঐনা পার্তী পুম্নমক্কী মীফমদা ময়ামগী মফমদা হায়জখি‍। অদুগা ঐনা মীফম অসি লৈবাকসিগী শেন্মিৎলোনগী ৱাফমশিংদা মপুং ফানা কত্থোকপা পাম্মি‍।

বদজেত খন্নবা মথৌ তাই, মসিদা হেন্না কুপ্না খন্নদুনা খোইহি পুথোক্কদবনি‍। মরাল শিনবা, ৱাফংনবা খরা শোয়দনা লৈগনি, অদুম ওইনমক নৈনবা য়েৎনবা অসিদগী খোইহি থোরক্কনি হায়বা ঐনা খঙই মরম অসিননি ঐনা মীপুম খুদিংবু শেন্মিৎলোন, শেন্মিৎলোনগী ফীভম, শেন্মিৎলোনগী থৌরাংগী মতাঙদা খন্ননবা ৱাফম হন্না থমজরিবসি, অদুগা ঐখোয়গী ইরক্তা দোক্তর মনমোহন জীগুম্বা খঙ-হৈরবা মীওইশিং য়াওরি, মখোয়দগী লৈবাকসিনা কান্নবা ফংগনি‍। মসি তৌবা তঙায় ফদবনি অমদি ঐখোয়না মসিবু তরাম্না ওক্লি‍।

অদুবু মতাঙসিদা শেন্মিৎলোনগী ফীভমগা মরী লৈননা খন্নরিবা অসিদা লৈবাকসিনা নীংবা কায়নিংঙাই করিসু লৈতে‍। অদুগা মখোয়না নীংবা কায়নিংঙাই ওইবা ৱাফম শন্দোকপনা করিসু কান্নবা পুরক্লোই‍। ঙসিমকসু, লৈবাকসিগী শেন্মিৎলোনগী মরুওইবা পথাপ ওইরিবা ফীভম অসিদা য়েংলগা লৈবাকসিগী শেন্মিৎলোন মপাঙ্গল কল্লি, মরা চেৎলি অমদি মাঙদা চৎনবগী মতিং মপুঙ ফানা লৈরি‍। মশাগী মপুং ফাবা মতিং য়াওজরি‍।

লৈবাক অমত্তনা ৱাখল মচা খন্দুনা মাঙদা চৎপা ঙম্লোই‍। হৌজিক লৈবাকসিগী নহারোলশিংনা ঐখোয়গী ইফমদা ৱাখল চাউনা খন্নবা, ৱাখল শান্না খন্নবা, হেন্না খন্নবা অমদি কোক চুংশিন্নবা থাজবা থম্লি‍। হায়রিবা মরুওইবা লাইৱাশিং অসি শীজিন্নদুনা, দোলর ত্রিলিয়ন ৫গী শেন্মিৎলোন্দা পুদুনা ঐখোয়গী লৈবাকসিবু চাওখৎহন্নবা অমদি মরী শম্নহন্নবা হোৎনগদবনি‍। পুক্নিং হন্থবগী মথৌ তাদে‍। অহানবা নুমিত্তা মসি ওইথোকপা য়ারোই হায়রি‍। ওইথোক্লোইদবনা করিনো অদুগা ওইথোক্কদবনা করিনো? কনাগুম্বনর খোঙথাং অনি থাংবদা ঐখোয়সু মদুমক তৌগদৌরিবরা? অদোম খরনা খোঙথাং মঙা থাংবা য়াই, খরনা খোঙথাং তরেৎ থাংবা য়াই, অদুগা কনাগুম্বা খরনা ঐগা লোয়ননা চৎমিন্নবা য়াই‍।

পুক্নিং হন্থবসিনা লৈবাকসিগীদমক্তা করিসু অফবা পুরক্লোই, অদুগা দোলর ত্রিলিয়ন ৫গী শেন্মিৎলোনগী মতাঙদা ঙাঙনগদৌরিবা অসিগী অফবা মহৈ হায়রগদি য়ানিংদবশিংদুসু দোলর ত্রিলিয়ন ৫গী মতাঙদদি ঙাঙগদৌরি‍। মীপুম খুদিংমক্না দোলর ত্রিলিয়ন ৫গী শেন্মিৎলোনগী মতাঙদা ৱাফমশিং থমগদৌরি‍। মসিমক অহোংবা অমনি‍। মসি নৎত্রবদি ঐখোয় হান্নগী হামু হামুদা নৈশিন্দুনা লৈরি‍। হৌজিক্তি মালেমসিগী মমাঙদা থবক তৌননবা মফম অমা হাংদোক্লে‍। ঐখোয়না ৱাখল্লোন হোংদোক্ল: অদুগা মঙলান অসি মঙফাওনহন্নবগীদমক খুঙ্গঙ অমদি ময়োল্লমশিংদা মচাক মথুম লৈফম থোকই, থবক পীবা ঙমগদৌবা এম.এস.এম.ই.শিং তেক্সতাইলগী লমদা লৈহনফম থোকই‍।

ঐখোয়না তেক্নোলোজী, স্তার্ত অপ য়োকখৎলি‍। তুরিজম চাউরবা খুদোংচাবা অমনি‍। হৌখিবা চহী ৭০সিদা ঐখোয়না ভারতপু মশক তাক্কদবা তুরিজমবু মরম অমা নৎত্রগা অমদগী নাথৈদুনা লাক্লি‍। ঙসিমকসু চাউরবা তাঞ্জা অমা লৈরি অমদি ঙসি ভারতনা তুরিজমবু ভারতকী মীৎয়েঙদগী শেমগৎপা মথৌ তাই, ঐখোয়গী তুরিজম নোংচুপকী মীৎয়েঙদগী শেমগৎপা য়ারোই‍। মালেম অসিনা লাক্তুনা ভারতপু য়েংলগদবনি‍। মদু নত্তবদা করিগুম্বা মখোয়না নোক-খেবগী নুংঙাইবগী তাইবংপান য়েংনিংলবদি মালেমসিদা মখোয়না চৎপা য়াবা মফম কয়া লৈরি‍। ঐখোয়না মেক ইন ইন্দিয়াদা মীৎয়েঙ চঙলি, মদুগী কান্নবা উবা ফংলি‍। অদোমসু মপান লৈবাকশিংদগী লাক্লিবা ইনভেস্তমেন্তশিং উরম্লগনি‍।

খাজনাগী মওং মতৌ লায়থোকহন্নবা ঐখোয়না লেপ্তনা হোৎনদুনা লাক্লি‍। মালেমসিদা লল্লোন ইতিক তৌবদা নুংঙাইবগী নৎত্রগা ভারত্তা হিংবদা নুংঙাইবগী রেঙ্কিংদা ওইরবসু ঐখোয়না অনিমক্তা পুন্না হোৎনমিন্নরি‍। ঐনা গুজরাত্তা লৈরিঙৈদা বেঙ্কিং সেক্তরগী মতাঙদা আর্তিকল ইবা অফাওবা স্কোলার কয়ানা লৈবাকসিদা বেঙ্কশিং পুনশিন্নগদবনি হায়না হেক হেক হায়খিবা ঐ নিংশিংলি‍। করিগুম্বা মসি ওইরক্লবদি মসিমক অচৌবা অওনবা অমা ওইগনি‍। হায়রিবশিং অসি ঐখোয়না কয়ারক হন্না পাখ্রে‍। লৈঙাক অসিননি বেঙ্ক কয়া লায়না পুনশিনখিবা‍। অদুগা ঙসিদি মতিং লৈবা বেঙ্কশিংগী সেক্তর অসি মপাঙ্গল কলহন্নবা অমদি হৌগৎলক্কদৌরিবা লৈবাকসিগী শেন্মিৎলোনগী য়াংলেন শরুবু মাঙদা পুখৎননবা শেম শাদুনা লৈরে‍।

ঙসিদি, মেনুফেকচরিং সেক্তর অসি অনৌবা মীৎয়েঙ অমদগী য়েংবা অমদি করিগীদমক্তা শেনফমশিং বেঙ্কতা পন্দুনা লৈরিবনো খন্থবা মথৌ তারে‍। মমাঙগী লৈঙাক্কী মতমদা ঐনা হঞ্জি হঞ্জিন কনাগুম্বা অমত্তসু চিংথনবা হোৎনখিবা লৈতে‍। অচুম্বা অদুবু লৈবাক মাঙদা থমদুনা ঐনা মাঙদা চৎখৎনবা হোৎনদুনা লাকখি‍। ঐনা অসিগুম্বা ৱাফমশিংদা ঐগী মতম মাঙহনখিদে; মদু নৎলমদ্রবদি হায়নিংঙাই ৱাফম কয়া লৈখি‍।

জি.এস.তি. হোংদোক হোংজিন তৌই হায়বা ৱাফমসিদা খন্নখিবা অমা লৈ‍। অফবনি নৎত্রগা ফত্তবনি খনগেরা, জি.এস.তি. শেমখিবসি ভারতকী ফেদরেল স্ত্রকচরদা চাউনা মায় পাকপা অমনি হায়না ঐনা খল্লি‍। হৌজিক্তি স্তেতশিংগী অপামবসু মসিদা ফোঙদোক্লে‍। কংগ্রেসনা লৈঙাকপা স্তেতশিংদগীসু ৱাফম কয়া লাকখি‍। তাইবঙ মপুনা লৌশিং পুম্নমক ঐখোয়দা পীবিরে, ঐখোয়না তৌরিবসিনা অরোয়বনি হায়রগা ঐখোয় তোক্লগদরা? হেন্না ফগৎহন্নবা ঐখোয় করিসু তৌররোইদরা? মসি ঐখোয়গী মীৎয়েঙ নত্তে; ঐখোয়গী ৱাখল্লোন্দি মথৌ তাবা মফমদা অহোংবা পুরক্কদবনি হায়বসিনি‍। চাউরবা লৈবাক ওইবনা হীরম কয়া লৈ‍। স্তেত বদজেত লাকপদা সেল তেক্সকী মতাঙদা নৎত্রগা অতৈ তেক্সগী মতাঙদা য়েৎনবা কয়া উবিরমগনি অদুগা মমৈথংদা স্তেতশিংনা শেমদোক শেনজিন তৌই‍। হৌজিক্তি হীরমশিং অসি স্তেতশিংদগী লাক্তুনা পুনশিল্লরে অমদি হেন্না লুমথরক্লে‍।

জি.এস.তি. অসি য়াম্না চমবা ওইগদবনি, মসি ওইগদবনি মদু ওইগদবনি হায়নবা কয়া লৈরে‍। ঐনা হায়নিংলিবদি, করিগুম্বা অদোমগী মফমদা ৱাখল লৌশিং অদুক য়াম্না লৈরগদি, লায়থোকহন্নবা মমুৎ তানা খঙলম্লগদি করিগীদমক্তা পন্থদুনা থম্লম্লিবনো? মীয়ামদা চমম্নবা ৱাফম থমবিগনু‍।

ঙসি ঐনা হায়রিবসি অদোম্না তাফম থোকই‍। প্রনাবনা শেলথুম মন্ত্রী ওইরিঙৈদা গুজরাত্তা লাকপা মতমদা ঐখোয়না শাংনা খন্নখি‍। ঐনা দদা করি তৌরবগা ওইরিবসি তেক্নোলোজীনা থৌবা সিস্তেম্নি মদু য়াওদনা থবক তৌবা য়ারোই হায়না হায়খি‍। মদুদা দদানা নহাক্কী ৱাহঙদু ঙাইখো হায়রগা মহাক্কী সেক্রেতরী কৌশিন্দুনা মোদীজীনা হায়রিবসি য়েংউ হায়খি‍। মতাঙদুদা ঐনা উবিরেদনা ওইরিবসি তেক্নোলোজীনা থৌবা সিস্তেম্নি অদুনা তেক্নোলোজী য়াওদনা ঐখোয়না মাঙদা চঙশিনবা য়ারোই হায়না হায়খি‍। মদুদা মহাক্না কম্পেনী অমা নেক্লগা থবক্তু পায়খৎলগনি হায়না হায়রমখি‍। ঐনা হায়রিবসি ঐনা জি.এস.তি.গী মতাঙদা ৱারী শান্ননবা লাকপগী মতমদুগী ৱারীনি, অদুগা মতমদুদা অদুগুম্বা সিস্তেম অমত্তা লৈরমদে‍। অনিসুবদা, জি.এস.তি. মায় পাকহন্নবা তামিল নাদু, কর্নাতকা, গুজরাত অমদি মহারাস্ত্রনচিংবা মেনুফেকচরিং স্তেতশিংগী খুদোংচাদবা ৱাফমশিং কোকহনবা মথৌ তাগনি হায়না ঐনা হায়খি‍। পোত্থোক শীজিন্নরিবা স্তেতশিংগীদমক্তদি থোইদোক্না ৱানিংঙাই লৈতে‍। ঙসি ঐনা পোঙনা হায়রি মদুদি অরুন জেতলীনা শেলথুম মন্ত্রী ওইবা মতমদা মহাক্না হায়রিবশিং অসিগী ৱারোইশিন পুরকখি‍। মদুগী মতুংদা লৈবাক পুমবদা জি.এস.তিও চৎনখি‍। মসিনা মরম ওইরগা ঐনা মুখ্য মন্ত্রী ওইনা হৌদোকখিবা ৱাফম অদু ঐনা প্রধান মন্ত্রী ওইরগা ৱারোইশিন পুরক্লে অমদি জি.এস.তি.গী লম্বী য়াৎখি‍।

মসিদা নত্তনা, হোংদোক হোংজিন তৌবগী মতাঙদদি ঐখোয়গী মমীং লৈরবা মীওইশিংনা চাউরবা সংবিধান অমা থম্বিরম্মী; মখোয়না মসিবু হেন্না ফগৎহন্নবা লম্বীসু য়াৎলম্মী‍। অওনবা পুরকপা হায়বসি সিস্তেম খুদিংদা মনীং তমবা ওইহনগদবনি অমদি লৈবাকসিগীদমক ফগদবা অনৌবা ৱাখল্লোন খুদিংমক্তগী ঐখোয়না লৌশিন্দুনা থবক পায়খৎলি‍।

ইকায়খুম্নরবা চেয়রমেন, ভারতকী শেন্মিৎলোনগী মতাঙদা পুক্নিং চঙনিংঙাই ওইবা য়াম্না খন্নরুদবা ৱাফম অমা লৈরি‍। লৈবাকসিদা লাক্কদৌরিবা অচৌবা অওনবা অসিদা ঐখোয়গী তিয়র-২, তিয়র-৩গী ময়োল্লমশিংনা ইচঙ থৌনা থৌদাং য়ারি‍। শান্ন-খোৎনবগী মতাঙদা তিয়র-২, তিয়র-৩গী ময়োল্লমগী অঙাঙশিংনা মাঙদা কাখৎলক্লি‍। মহৈ মশিংগী মতাঙদসু তিয়র-২, তিয়র-৩গী ময়োল্লমগী অঙাঙশিংনা মাঙ থারক্লি‍। স্তার্ত অপকী মতাঙদসু য়েংবিয়ু, খ্বাইদগী মশিং য়ামবা স্তার্ত অপশিং তিয়র-২, তিয়র-৩গী ময়োল্লমশিংদগী ওইরি‍।

মরম অসিনা লৈবাকসিগী ৱাখল চাউরবা পোৎলুম কয়া পুদ্রিবা নহাশিংনা অনৌবা থৌনাগা লোয়ননা থোরক্তুনা অপীকপা ময়োল্লমশিংগী, মখোয়গী শেন্মিৎলোনশিংগীদমক্তা চাওখৎপগী মায়কৈদা খোঙ থাংজিল্লি‍।

লৈবাকসিদা দিজিতেল ত্রাঞ্জিসনগী মতাঙদা হাউসসিদা কনা কনানা করি করি হায়নখিবগে হায়বদু স্পীকরনা য়েংবিরবদি অঙকপা ফাওগনি‍। কনাগুম্বা খরনদি মোবাইল ফোনবু নোক্নবসু য়াওখি‍। অদুগুম্বা মীওইশিংদুনা হৌজিক্তি দিজিতেল বেঙ্কিং, বিল্লিং সিস্তেমদা মায় ওনশিনবা হৌরক্লে‍। ঙসিদি দিজিতেল ত্রাঞ্জেক্সন অসি অপীকপা মফমশিংদা অয়ামবনা শীজিন্নবা উবদা অমদি অনৌবা মচাক মথুম শেমগৎপদা তিয়র-২, তিয়র-৩গী ময়োল্লমশিংনা মাঙজিল থানা চৎপা উবদা ঐসু ঙকই‍। ঐখোয়গী রেলৱেজ, হায়ৱেশিং অমদি এয়রপোর্তশিংদা অমদি অনৌবা ফ্লাইত প্লানশিং য়েংবিয়ু – ২৫০ শুবা রুত নহানখক্তা হৌদোক্তুনা ভারত্তা রুত চানি য়াঙ্খৈ লৈরে‍। ঐখোয়গী নোংথক্কী চত্থোক চৎশিনগী সিস্তেম অসি য়াম্না থুনা হোংলক্লি অমদি কয়া অমসু হোংলকখিগনি‍।

হৌখিবা চহী মঙাদা ঐখোয়গী মথৌ তৌরিবা এয়রপোর্ত ৬৫ লৈরম্মী, ঙসিদি ১০০ হেল্লে‍। ১০০সিগী মনুংদা ৬৫দি মথৌ তৌবা য়ারে অমদি হায়রিবশিং অসিনা লম অসিদা মপাঙ্গল কনখৎহল্লগনি‍।

মতৌ অসুম্না হৌখিবা চহী মঙাসিদা ঐখোয়না লৈঙাক্তা অহোংবা পুরকপদা নত্তনা ঐখোয়গী ৱাখল্লোন ঐখোয়না থবক তৌবগী মওং অমদি চঙশিল্লিবা লম্বী পরিংদসু অহোংবা পুরক্লে‍। ঐখোয়না দিজিতেল ইন্দিয়াগী মখাদা ব্রোদবেন্দ কন্নেক্তিভিতীগী ৱাফম হৌদোরকপা মতমদা অহানবদা থৌরাং য়াত্তুনা থবক পায়খৎখি অমদি খল্লিবা ৱাখল অমদি তৌরিবা মওংদুনা গ্রাম পঞ্চায়ত ৫৯খক্তদা ব্রোদবেন্দ ফংখি‍। ঙসিদি চহী মঙা খুদিংগী খুঙ্গঙ লাখ ১.২৫কী চাংদা ব্রোদবেন্দ য়ৌহল্লি‍। ব্রোদবেন্দ ফংহনবদা নত্তনা পব্লিক স্কুলশিং, খুঙ্গঙশিং অমদি অতৈ ওফিসশিং, মরুওইনা কম্মন সর্ভিস সেন্তরশিংদা শীজিন্নবা ফংহল্লে‍।

ঐখোয়না ২০১৪দা লাকপা মতমদা লৈবাকসিদা কম্মন সর্ভিস সেন্তর লিশিং ৮০ খক্তমক লৈরমখি‍। ঙসিদি কম্মন সর্ভিস সেন্তর লাখ ৩ লিশিং ৬৫দা হেনগত্তুনা খুঙ্গঙগী নহাশিংনা চলাইরি‍। খুঙ্গঙগী মথৌ তাবশিং ফংহন্নবগীদমক্তা মখোয়না তেক্নোলোজীগী মপুং ফাবা সর্ভিসশিং ফংহল্লি‍।

খুঙ্গঙগী নহা লাখ ১২ হেনবনা মখোয়গী খুলদা লৈরি‍। নুমিদাংৱাইরমগী মতমদা মখোয়না মমা মপাগী মতেং পাংলি, মখোয়ন লৌবুক্তসু থবক তৌই‍। নহা লাখ ১২ হায়রিবা মওংসিদা থবক ফংহল্লি‍ অমদি লৈবাকসিনা মসিগীদমক্তা চাউথোকফম থোকই‍।

লৈঙাক অসি শিথনবগীদমক্তা দিজিতেল ত্রাঞ্জেক্সনবু নোক্নখি, অদুবু ভিম এপ মালেমনা য়াবা মপাঙ্গল কনবা সিক্যুর ওইবা দিজিতেল ত্রাঞ্জেক্সনগী ফম্পাক অমা ওইনা লৌনরক্লি অমদি মালেমগী লৈবাক কয়ানা এপ অসিগী মরমদা খঙননবা ঐখোয়দা পাউ ফাউরক্লি‍। মসি লৈবাকসিগী চাউথোকচনিংঙাই অমনি‍। মসি নরেন্দ্র মোদীনা শেমখিবা নত্তে‍। মসি লৈবাকসিগী নহাশিংগী হৈথোই শিংথোইবা ৱাখল লৌশিংগী মহৈনা ঙসি খ্বাইদগী ফবা দিজিতেল ত্রাঞ্জেক্সনগী ফম্পাক অমা ঐখোয়দা লৈরিবনি‍।

চেয়রমন সার, জনুৱারী থা মনুংসিদা মোবাইল ফোনগী খুত্থাঙদা ভিম এপতগী লুপা করোর লাখ ২ লিশিং ১৬গী চাংদা শেল থাদোক থাজিন তৌনরি‍। মওং অসিদনি লৈবাক অসিনা অহোংবা পুরক্লিবসি‍।

রুপে কার্দ – রুপে কার্দ হৌদোকখিবা অদোমসু খঙবিরমগনি‍। মসি মশিং য়াম্না য়ামদনা হৌদোকখিবনি অমদি দেবিত কার্দকী তাইবঙদা রুপে কার্দকী মফমসি চাদা পোইন্ত ৬খক্তা ওইরমখি‍। ঙসিদি চাদা ৫০ ওইরে অমদি রুপে দেবিত কার্তশিং মালেমগী ওইনা অতোপ্পা লৈবাকশিংদা চৎনবা য়াবা হেনগৎলক্লি‍। মরম অসিনা ভারতকী রুপে কার্দ মশাগী মফম কনবা ঙমজদুনা ঐখোয়গী চাউথোকচনিংঙাই ওইরি‍।

ইকায়খুম্নরবা চেয়রমেন, লৈঙাকসিগী লম্বী পরিংসিদা অতোপ্পা ৱাফম অমসু লৈরি – খুদম ওইনা জল জীবন মিসন অসিনি‍। ঐখোয়না চাদা ১০০ মপুং ফানা ফংনবগী পান্দমদা মরুওইবা ৱাফমশিংগী পাম্বৈ পুরক্নবা হোৎনখি‍।

খোঙহাম খুৎহাম্ফম – চাদা ১০০

য়ুম-কৈ – চাদা ১০০

মৈ – চাদা ১০০

খুঙ্গঙশিংদা মৈ ফংহনবা – চাদা ১০০

হায়রিবশিং অসিদা ঐখোয়না পায়খৎলিবা থবকশিং অসি লৈবাকসিবু খুদোংচাদবা ফীভমদগী মনীং তমহন্নবা পরিংদুদা চঙশিল্লবনি‍।

য়ুমথোঙ খুদিংদা অরুবা ঈশিং ফংহন্নবা ঐখোয়না অচৌবা কেম্পেম অমা পায়খৎলি অমদি মসিগী তোপ তোপ্পা ৱাফম হায়রগদি মসি কেন্দ্র লৈঙাক্কী পান্দম্নি অমদি কেন্দ্র লৈঙাক্না শেল পুথোক্কদৌরিবনি‍। কেন্দ্র লৈঙাক্না ইনবা প্রোজেক্ত ওইজরবসু মসিবু তশেংনা থবক ওইনা পায়খৎকদৌরিবদি ফেদরেলিজমগী মাইক্রো থাক্তা লৈরিবা ঐখোয়গী খুঙ্গঙশিংনি‍। ঐখোয়না থৌরাং তৌরগা মখোয়না ফিরেপ লৌজদুনা য়ুমথোঙ য়ুমথোঙদা ঈশিং ফংহন্নবা থৌওং মখোয়না শেমজগবদনি‍। থৌরাংসি ঐখোয়না পায়খৎলি‍।

এস্পিরেসনেল দিস্ত্রিক্ত ১০০ হেনবগী ৱাখল্লোন অসি ঐখোয়গী কোওপরেতিব ফেদরেলিজমগী মতিক চারবা খুদম্নি‍। ভোত বেঙ্ক রাজনিতিগী লমদা ঐখোয়না মনিং মমাঙ চিংবা থৌওং কয়া লৈবাকসিদা চত্থখ্রে, অদুবু হায়রিবা লমসিদদি লৈবাকসিদা অদুম্মক শোত্থদুনা লৈরি‍। মসিদা মীৎয়েঙ চঙবা থেঙমল্লবনি‍। স্তেত খরগী দিস্ত্রিক্ত খরদি পেরামিতর খরদা শাথিনা হন্থবা থাক্তা লৈরি‍। মদুবু ঐখোয়না শেমজিল্লবদি লৈবাকসিদা য়াম্না ফগৎলক্কনি‍। করিগুম্বদা থবক্তগী পোত্থাগদৌরবা ওফিসর অমনা লৈরিবা দিস্ত্রিক্ত অদু হান্নগী ফীভমদা অদুম্মক থম্লমগনি‍। মতিং লৈবা হৈথোই শিংথোইবা ওফিসর অমত্তা মফমদুদা কনানসু থাজিল্লোই‍। অদুবু মদুগী মওংদু ঐখোয়না হোংদোক্লে‍। এস্পিরেসনেল দিস্ত্রিক্ত ১০০ রোম ঐখোয়না শকখঙলবা মতুংদা তোঙান তোঙানবা স্তেতশিংগী দিস্ত্রিক্তশিংদগী অসিগুম্বা এস্পিরেসনেল ব্লোক ৫০ অমগসু শকখঙবিনবা অমদি মখোয়গী লৈঙাক্লোনদা অহোংবা পুরক্নবা ৱাফম লাক্লি‍।

দিস্ত্রিক্তকী থাক্তসু হায়রিবা এস্পিরেসনেল দিস্ত্রিক্তশিং অসি কোওপরেতিব ফেদরেলিজমগী নুংঙাইরবা ফঈভমগা লোয়ননা মাঙদা চঙশিল্লি‍। দিস্ত্রিক্তশিংগী ওফিসরশিংনা হিদান্ননবগীদমক ওনলাইদা চঙশিল্লকপগা লোয়ননা পুম্নমক্না ভেক্সিনেসনগী লমদা মাঙজিল থানবা হোৎনরি‍। মসি মীয়ামগী খুদোংচবা হেনগৎহন্নবা পায়খৎপা অফবা থবক অমনি‍।

অয়ুস্মান ভারতকী মতাঙদসু হায়রিবা দিস্ত্রিক্তশিং অসিদা লৈরিবা হকশেলগী সর্ভিসশিং অসি অয়ামবনা মান্নৈ‍। হন্দক্কী মতাঙসিদা হকশেলগী লমদা অহেনবা মীৎয়েঙ চঙলি‍।

মখা তারকপদা, এস্পিরেসনেল দিস্ত্রিক্তশিং অসিদা লৈরিবা ঐখোয়গী ত্রাইবেল ইচিল ইনাউশিং ওইরবসু, শোইনাইবা মীওইশৎং ওইরবসু মখোয়গীদমক্তা লৈঙাম অসিনা চপ চানা হোৎনরি‍।

হৌখিবা চহী মঙাসিদা, লৈবাকসিগী ত্রাইবেল ফাইতর পুম্নমক ইকায়খুম্নবা উৎনবগী থবক পায়খৎলি‍। লৈবাকসি নীংতম্নবগীদমক ত্রাইবেলশিংনা লৌরিবা থৌদাংবু শকখঙবা ওইনা মখোয়না লৈবাক কনবদা লৌখিবা থৌদাংশিং উৎপা ম্যুজিয়ম অমদি রিছর্চ ইন্সতিত্যুৎ অমা থমগদবনি‍। মসিনা ইথিল পীননবা মচাম অমদি লৈবাকসিদা অমত্তা ওইবা ফীভম পুরক্নবা মচাক অমা ওইগনি অমদি হীরমসিদসু থবক পায়খৎকনি‍।

ত্রাইবেলশিংগী মরক্তসু মতিং লৈবা অঙাঙ কয়া লৈর; মখোয়গীদি খুদোংচাবা ফংদে‍। শান্ন-খোৎনবদা ওইরবসু, মহৈ মশিংদা ওইরবসু মখোয়না খুদোংচাবা ফংননবা এক্লবিয়া স্কুলগী খুত্থাঙদা খ্বাইদগী ফবা মহৈ তম্ফমশঙশিং ফংহন্নবা থবক কয়া পায়খৎলি‍।

ঐখোয়গী ত্রাইবেল অঙাঙশিংগা লোয়ননা উমংগী লনথুম পুথোক্লিবা উমংশিং অমদি এম.এস.পি.গী লমদসু সেল্ফ হেল্প গ্রুপ লিশিং ৩০রোমগীদমক ঐখোয়না থবক পায়খৎলি অমদি মাঙদা চঙশিল্লি‍।

নুপী মপাঙ্গল কনখৎহনবগী লমদা রাস্ত্রপতিগী ৱারোলদা য়াম্না তেন্না পনখি‍। অদুবু লৈবাকসিগী পুৱারীদা অহানবা ওইনা ঐখোয়না মিলিতরী স্কুলশিংদা নুপীমচাশিং মিং চনবা য়াহল্লে‍। মিলিতরী পুলিসতা নুপী থবক হাপ্পগী থবকসু পায়খৎলি‍।

নুপীশিংগী শাফনবগীদমক লৈবাকসিদা ৱন-স্তোপ সেন্তর ৬০০ হেনবা লিংখৎখ্রে‍। লৈবাকসিগী মহৈ তম্ফমশঙ খুদিংমক্তা ক্লাস ৬তগী ১২ ফাওবদা তম্লিবা নুপীমচাশিংদা মশা ঙাকথোকচনবগী ত্রেনিং পীরি‍।

সেক্স ওফেন্দরশিং খঙদোক্নবা লৈবাক্কী ওইবা দেতাবেজ অমা শেম্লি অমদি মসিদা মীওইশিংবু য়েংশিল্লি‍। মসিগী মথক্তা মী লল্লোনবগী মায়োক্তা য়ুনিত অমা শেমগৎনবসু ঐখোয়না থৌরাং তৌরি‍।

অঙাঙশিংদা চত্থবা তমথিবা মওংগী সেক্সুএল ভাইওলেন্সশিং থেংননবগীদমক অসিগুম্বা ক্রাইমশিং অসিদা চেন্নরিবা মীওইশিং চৈরাক পীননবা পোক্সো এক্তকী মখাদা চনহল্লে‍। অসিগুম্বা থৌদোকশিংদা অচুম্বা ৱায়েল থুনা ফংহন্নবা ফাস্ত ত্রেক কোর্ত লিশিং অমা হেনবা লৈবাক শিনবা থুংনা লিংখলে‍।

ইকায়খুম্নরবা চেয়রমেন, হাউসতা সি.এ.এ.গী মতাঙদা খন্নরি‍। খোঙজঙগী মিংদা চরাংনবা ফীভম শন্দোক্লি অমদি মদুদা থোক্লিবা হিংসাগী থৌদোকশিং অদুবু খোঙজঙ চঙশিনবগী হক অমা ওইনা উৎননবা হোৎনরি‍। সংবিধানগী মিংদা সংবিধান্না য়াদবা থবকশিং কুপশিন্নবা হন্না হন্না হোৎনরি‍। কংগ্রেসনা তঙাইফদনা তৌরিবসিদি ঐসু খঙই অদুবু কেরলাদগী ঐখোয়গী লেফ্তকী মরূপশিংদি খরা খঙবিফম থোকপনি‍। কেরলাগী মুখ্য মন্ত্রীনা এসেমব্লীদা ফোঙদোকখিবা ৱাফম – কেরলাদা চঙশিল্লিবা খোঙজঙ অসিদা এক্সত্রিমিস্ত কাঙলূপশিংগী খুৎ য়াওই হায়বা ৱাফমদু মফমসিদা লাক্ত্রিঙৈদা হান্না খঙবিরক্লমগদবনি‍।

মদুতা নত্তনা মহাক্না অকনবা থবক লৌখৎকনি হায়না চেকশিনৱা ফোঙদোকখিবসু লৈখ্রবনি‍। কেরলাদা, দিল্লীদা অমদি লৈবাক্কী মফম অতৈশিংদা থোক্লিবা চরাংনবা ফীভমসি কমদৌনা অদোম্না শৌগৎকদৌরিবনো?

সিতিজনসিপ এমেন্দমেন্ত এক্তকী মতাঙদা হায়নরিবা কয়াসিদা পুথোক্নরক্লিবা ৱাফমশিং অসি মরূপ মপাংশিংনা মশা মথন্ত হংজফম থোকই‍। লৈবাকসিবু লান্না লমজিংনবা, লান্না তমশিন্নবা হোৎনরিবশিং অসি ঐখোয় পুম্নমক্না থিংগদরা নৎত্রগা থিংলোইদরা? মসি ঐখোয়গী ইথৌ নত্তবরা? ঐখোয় অসিগুম্বা কেম্পেনসিগী শরুক অমা ওইগদৌরিবরা? মসিনা কনাদসু রাজনিতিগী ওইবা অফবা ফীভম পুরক্লোই‍। ফীভমসিদা ঐখোয়না চৎলিবসি অচুম্বা লম্বীদা ওইরিবরা হায়বসি খন্থফম থোক্তবরা? অদোম্না পুং ২৪ চুপ্পা মাইনোরিতীশিংগীদমক খোঞ্জেল থোক্লি‍। হৌজিক্তসু অনন্দজীগী ৱাফম তাখি‍। অদুবু অদোম্না তৌখিবা অরানবদুনা মরম ওইরগা মখোয়না মাইনোরিতী ওইনা লৈরম্লিবসিদা অদোম্না মখোয়গী অৱাবা উদ্রিবা করিগীনো? মীয়ামবু অরুবা ৱাফমশিংদা কিহনবগী মহুত্তা অচুমবা পাউদম পীফম থোকই‍। মসি ঐখোয় পুম্নমক্কী থৌদাংনি‍। ঙক্লিবা ৱাফমদি, ওপোজিসনগী খোঙবু কয়া অমা হন্দক মরকসি মথুম মরাং হৌরি‍। তুমিন্না লৈরমবা কয়া ঙসিদি লাউ খোঙলক্লি‍। মসি চেয়রমেন সারগী মহৈনি‍। অদুবু ঙসি অহলশিংগী হাউস অসিদা অফাওবা মীওই খরগী ৱাফমশিং পাথোকচবা পাম্মি‍।

অহানবা ৱাফমদি – “পাকিস্তানগী ইস্তর্ন ৱিংদা লৈরিবা মাইনোরিতী কাঙবুশিংগী পুন্সি, লনথুম অমদি ইকায়খুম্নবদা লৈরিবা খুদোংথিবা অমদি পাকিস্তানগী মফমশিংদা মখোয়দা মীওইবগী হক ফংহন্দবগী ফীভমসি য়েংলগা নোংপোক পাকিস্তানদগী ভারত্তা মাইনোরিতী কম্ম্যুনিতীশিং য়ুম হোংলকপদা লৈরিবা অথিংবশিং কোমথোকপগী মথক্তা মালেমগী ওইবা ৱাখল্লোনশিংসু লৌশিন্নবা ভারত লৈঙাক্না হোৎনফম থোকই হায়না হাউস অসিনা খল্লি‍।”

ৱাফমসি হাউস্তা ফোঙদোকখিবনি‍। জন সংঘ লুচিংবা খরা নত্তনা কনানা অসুম্না হায়রমগদগে হায়বা অদোম্ন, খল্লমগনি‍। মতম অদুদা বি.জে.পি. লৈরমদে জন সংঘদি লৈরম্মি‍। অদুনা জন সংঘদগী কনাগুম্বা অমনা হায়খৎবা ৱাহৈনি খল্লমগনি‍। অদুবু ৱাফম অসি বি.জে.পি. নৎত্রগা জন সংঘগী লুচিংবা অমত্তা মরী লৈনদে‍।

হায়রিবা মীওই অসিনা হায়খিবা ৱাফম অমসু ঐনা হায়বা পাম্মি, মহাক্না হায়রমখি – “নোংপোক পাকিস্তানগী মতাঙদা মফমদুদা লৈবা মুস্লিম নত্তবা মীওইশিং তান্থোকখিনবা ফিরেপ লৌরে হায়বা তারে‍। মফমসি ইস্লামিক স্তেত অমনি‍। ইস্লামিক স্তেত অমা ওইনা মফমদুদা ইস্লামদা থাজবা মীওইখক্তমক লৈগদবনি অমদি ইস্লামিক নত্তবা মীওইশিংদি লৈবা য়ারোই হায়বা ৱাফম লৈরি‍। মরম অদুনা হিন্দুশিং তান্থোরক্লি, খৃস্তিয়ানশিং তান্থোরক্লি‍। ঙসিফাওবদা খৃস্তিয়ান লিশিং ৩৭ হেন্না মফমদুদগী ভারত্তা হোংলকখ্রে‍। বুদ্ধিস্তশিংসু মফমদুদগী তান্থোরক্লি‍।”

মসিসু জন সংঘ নৎত্রগা বি.জে.পি. লুচিংবা অমত্তগী ৱাফম নত্তে‍। ঐনা হাউসতা থমজনিংবদি ৱাফম অসি লৈবাকসিগী নুংশিরবা প্রধান মন্ত্রী ওইরমবা অফাওবা মীওই অমা ওইরমবা ইকায়খুম্নরবা লাল বহাদুর সাস্ত্রিজীগী ৱাফম্নি‍। হৌজিক অদোম্না মহাকপু কাঙলুপ নাইবা মীওইনি হায়গদৌরি‍। অদোম্না মখোয়বু হিন্দু অমসুং মুস্লিম খাইদোক্নবা মীওইশিংনি হায়গদৌরি‍।

ৱাফম অসি পার্লিয়ামেন্ততা এপ্রিল ৩, ১৯৬৪দা লাল বহাদুর সাস্ত্রীজীনা ফোঙদোকখিবনি‍। মতমদুদা নেহরুজীনা প্রধান মন্ত্রী ওইরি‍। মতমদুগা লাইনিংনা মরম ওইদুনা ওৎপিরবা মীওইশিংনা ভারত্তা হোংলকপদা পার্লিয়ামেন্ততা খন্নখি‍। মদুদা সাস্ত্রিজীনা হায়খিবা ৱাফম্নি‍।

ইকায়খুম্নরবা চেয়রমেন, ইকায়খুম্নরবা হাউস অসিদা অতোপ্পা ৱাফম অমগসু থমজগে‍। ৱাফমসি অখন্ননা ঐগী সোসিএলিস্ত মরূপশিংগীদমক্তনি মরমদি মখোয়না মসিদগী পুক্নিং থৌগৎনরি‍। মুন্না তাবিয়ু‍।

“ভারতকী মুস্লিমশিং হিংগদবনি অমদি পাকিস্তানগী হিন্দুশিংসু হিংগদবনি‍। পাকিস্তানগী হিন্দুশিং পাকিস্তানগী সিতিজন্নি হায়বা ৱাফমসি ঐ তশেংনা য়ানিংদে, মরম অসিনা ঐখোয়না মখোয়গীদমক ৱাবিফম থোক্তে‍। পাকিস্তানগী হিন্দুশিং মফম অমা হেক্তগী সিতিজন ওইরবসু হিন্দুস্তানগী হিন্দু অমসুং মুস্লিমগুম্না মখোয়বু ঙাকথোকপিবা হায়বসি ঐখোয়গী ইথৌনি‍।”

মসি কনানা হায়খিবনো?‍ ৱাফমসিসু জন সংঘ নৎত্রগা বি.জে.পি.গী মীওই অমত্তগা মরী লৈনদে‍। মসি শ্রী রাম মনোহর লোহিয়াজীগী ৱাফম্নি‍। ঐখোয়গী সোসিএলিস্ত মরূপশিং থাজবিরবসু থাজবিদ্রবসু লোহিয়াজীবুদি লাল্লি হায়বিগনু, মসি ঐনা নোল্লুক্না হায়জরি‍।

ইকায়খুম্নরবা চেয়রমেন, হাউস অসিদা সাস্ত্রিজীগী ৱাফম অমগসু পাথোকচগে‍। ৱাফমসি মহাক্না লাঞ্জেল্লকপশিংগীদমক স্তেত লৈঙাকশিংগী থৌদাংগী মতাঙদা হায়খিবনি‍। অদোম্না লাল বহাদুর সাস্ত্রিজীগী ৱাফমসি মুন্না তাবিয়ু, ভোত বেঙ্ক রাজনিতীনা মরম ওইরগা স্তেত লৈঙাকশিংনা শান্নরিবা কুমহৈশিং অসি খঙবিয়ু‍। অদোম্না কদোমদা চৎলিবগে, কদায়দা লৈরমবগে অমদি অদোমগী মফমদা করি থোকখ্রবগে হায়বা খঙগনি‍।

চেয়রমেন সার, লাল বহাদুর সাস্ত্রিজীনা হায়রম্মি-

“ঐখোয়গী স্তেত লৈঙাকশিংনা ৱাফম অসি (লাঞ্জেল্লকপশিং খুন্দাহনবা) লৈবাক্কী ৱাহং অমা ওইনা খন্নরি‍। মসিগীদমক্তা ঐখোয়না মখোয়বু থাগৎলি অমদি মদুমক ঐখোয়না হরাউনা পাঙথোকপা পাম্মি‍। বিহার, ওরিসা, মধ্য প্রদেশ, উত্তর প্রদেশ, মহারাস্ত্র নৎত্রগা অন্ধ্র ওইরবসু, স্তেত খুদিংমক্না মখোয়বু খুন্দাহন্নবা শেম শারে হায়না ভারত লৈঙাক্তা চে ইরকখি‍। কনাগুম্বনা মীওই লিশিং য়াঙ্খৈ, কনানা ইমুং লিশিং তরামঙা অদুগা কনাগুম্বা খরনা ইমুং লিশিং তরা খুন্দাহন্নবা থৌদাং লৌগনি হায়বা ৱাফম থম্লকখি‍।”

সাস্ত্রিজীগী ৱাফম অসি লৈবাকসিগী মফম অয়ামবদা কংগ্রেস লৈঙাক লৈরিঙৈ মতম ১৯৬৪দা হায়খিবনি‍। ঙসিদি ঐখোয়না অফবা থবক অমা তৌরকপগা অদোম্না অদোমগী ভোত বেঙ্ক রাজনিতীগীদমক্তা খুরৌ থাংলি‍।

ইকায়খুম্নরবা চেয়রমেন, ঐনা খুদম অমগা পীবা পাম্মি – নবেম্বর ২৫, ১৯৪৭দা লৈবাকসিগী নীংতম্লবা থা খরগী মনুংদা কংগ্রেস ৱর্কিং কম্মিতীনা ৱারেপ অমা পাস তৌখি‍। কংগ্রেস ৱর্কিং কম্মিতীগী নবেম্বর ২৫, ১৯৪৭গী ৱারেপ্না করি হায়রি:

“পাকিস্তান্তদগী ঙমখৈ লান্দুনা লাকখ্রবা অমদি লাক্কদবা মুস্লিম নত্তবা মীওই খুদিংমক্তা মপুং ফাবা ঙাকশেল পীননবা কংগ্রেসনা লেপ্লি‍।”

অদোম্না ৱাফমদুদা ঙসিসু লেপ্লবদি পায়খৎলিবা থবকসি মুস্লিম নত্তবশিংগীনি‍।

ইকায়খুম্নরবা চেয়রমেন, নবেম্বর ২৫, ১৯৪৭দা কংগ্রেস কাঙলুপ নাইখিদে হায়না ঐনা খল্লি‍। অদুগা ঙসিনা মখোয় খঙহৌদনা সেকুলর ওইরক্লে মসিসু ঐনা থাজদে‍। নবেম্বর ২৫, ১৯৪৭দা অদোম্না মুস্লিম নত্তবা হায়বসিগী মহুত্তা পাকিস্তানদগী লাকপা মীওই খুদিংমক হায়রমবা য়ারমবনি‍। করিগীদমক্তা মুস্লিম নত্তবা হায়রম্লিবনো?

খাইদোক্নখ্রবা মতুংদা পাকিস্তানদা লৈহৌরিবা হিন্দু অয়ামবা ঐখোয়গী দলিত ইচিল ইনাউশিংনি‍। অদুগা হায়রিবা মীওইশিং অসিদা ববাসাহেব অম্বেদকারনা হায়রমখি –

“পাকিস্তান মনুংদা পন্দুনা ঙসি লৈহৌরবা সেদ্যুল কাস্তশিংগী মফমদা ভারত্তা লাক্ননবা ঐনা হায়নিংই…”

বাবা সাহেব অম্বেদকারনা পাউজেল অসি পীখিবনি‍। ৱাফমশিং অসি অফাওবা মীওইশিংনা হায়রমবনি ঙাক্তনি, মখোয়শিং অসি লৈবাকসি শেম্লমবা মীওই ঙাক্তনি‍। মখোয় কাঙলূপ নাইবশিংলা? কংগ্রেস অমসুং মখোয়গী মপাং ওইরিবা লৈবাক শেম্লমবশিং ভোত বেঙ্ক রাজনিতিনা মরম ওইরগা কাউবা হৌরক্লে‍। মসি লৈবাকসিগী ওইনা নুংনাংনিংঙাই ওইবা ৱাফম অমনি‍।

ইকায়খুম্নরবা চেয়রমেন, ১৯৯৭দা লৈরমবা মরূপ মপাং কয়া হাউস অসিদসু য়াওরমখিগনি‍। মতমদু লৈঙাক্কী ৱাফমশিংদা হিন্দু অমদি সিখ হায়বা ৱাহৈশিং শীজিন্নবা হৌরকখিবা চহীনি‍। মদুগী মমাঙদা মসি লৈরমদে মতুংদা হাপচিল্লকখিবনি‍। ২০১১দা পাকিস্তান্দগী লাকপা খৃস্তিয়ান অমসুং বুদ্ধিস্তকী কাঙলূপশিংসু হাপচিল্লকখি‍।

সিতিজনসিপ এমেন্দমেন্ত বিল ২০০৩দা লোক সভাদা পুথোরকখি‍। বিল অদুবু খন্নখিবা পার্লিয়ামেন্তকী স্তেন্দিং কম্মিতীদা য়াওখিবা কংগ্রেসকী মেম্বর কয়া ঙসিসু মফমসিদা য়াওরি অমদি স্তেন্দিং কম্মীতীনা রিপোর্ত অদুদা হায়খিবা ৱাফমদি “য়ুম্লোন্নবা লৈবাকশিংদগী লাকপা মাইনোরিতীশিং শরুক অনি থোক্না য়েংগদবনি, অমনা লাইনিংনা মরম ওইরগা ওৎপি নৈবিবদগী লাকপা অদুগা অমনা সিভিল দিস্তরবেন্সনা মরম ওইরগা লাকপা‍।” মসি কম্মিতী অদুগী রিপোর্তনি‍। লৈঙাক অসিনা মসিগী মতাঙদা ৱাফম পুখৎলকপদা চহী ১৭গী মতুংদা করিগী ৱাথোক ওইরিবনো?

চেয়রমেন সার, ফেব্রুৱারী ২৮, ২০০৪দা রাজস্থানগী মুখ্য মন্ত্রীনা হায়জরকপগী মতুং ইন্না কেন্দ্র লৈঙাক্না পাকিস্তান্দগী লাকপা মাইনোরিতী হিন্দু কাঙলূপগী মীওইশিংদা ভারতকী সিতিজনসিপ পীননবা অয়াবা রাজস্থানগী দিস্ত্রিক্ত ২ অমদি গুজরাতকী দিস্ত্রিক্ত ৪গী কল্লেক্তরশিংদা পীখি‍। হায়রীবা চৎন পথাপ অসি ২০০৫ অমদি ২০০৬ ফাওবা চৎনদুনা লৈরম্মি‍। ২০০৫ অমদি ২০০৬তা অদোম্না পাল্লমখিবনি‍। মতমদুদি সংবিধানগী মরুওইবা মশক্তা শিংনবা লৈরমদে, মদু সংবিধানগী মায়োক্তা নত্তে‍।

ঙসিদগী চহী ১০গী মমাঙদদি করিসু কায়রমদে, কনানসু খোঞ্জেল থোক্নখিদে, ঙসিদি খঙহৌদনা মালেম অসি হোংলক্লে‍। মায়থিবনা অদোমবু লৈতাহন্দবনি‍।

ইকায়খুম্নরবা চেরয়মেন, এন.পি.আর.গী মতাঙদসু ময়াম খন্নরি‍। সেন্সস অমসুং এন.পি.আর. অসি লৈবাকসিদা হান্নদগী চত্থদুনা লাকপা লৈঙাক্লোনগী থৌওংশিংনি‍। অদুবু ভোত বেঙ্ক রাজনিতীগী ৱাফম লাকপা মতমদা ২০১০দা এন.পি.আর. পুরকখৎবা মীওইশিংদুনা ঙসি অরানবা পাউ শন্দোক্লি মসিগী মায়োক্তা লেপ্লি‍।

ইকায়খুম্নরবা চেয়রমেন, করিগুম্বা অদোম্না সেন্সসকী মতাঙদা য়েংলবসু লৈবাকসিনা নীংতম্লবা মতুংদা অহানবা চহী তরাদদি ৱাহং খরা লৈরমগনি, অনিসুবা চহী তরাদা ৱাহং খরা লৌথোকখিগনি, খরা হাপচিল্লক্কনি‍। লৈঙাক্লোন্দা মথৌ তাবগী মতুং ইন্না খরা হোংদোক হোংজিন অদুমক লৈগনি‍। ঐখোয়না তোকঙা শন্দোকপগী থবক তৌরোইদবনি‍। লৈবাকসিগী ইমালোলগী মতাঙদা ৱাথোক অচৌবা অমত্তা থোকখিদ্রি‍। ঙসিদি সুরত্তগী য়াম্লবা মীয়াম ওরিসাদা হোংখ্রে‍। গুজরাত লৈঙাক্না ওরিয়া স্কুল চলাইরোই হায়রগদি মদু কয়াম কুইনা চত্থদুনা লৈখিগদগে‍। লৈঙাক অসিনা কনানা করমবা মমালোল ঙাঙবগে, কনাগুম্বগী মপানা করি লোল ঙাঙনরমবগে হায়বা খঙগদবনি, অমদি ওরিয়া স্কুলশিং সুরত্তা হৌবা তাবনি‍। হান্নদি য়ুম হোংদোক হোংজিন লৈরমদে, ঙসিদি য়ুম হোংনরকপগা লোয়ননা মসি মথৌ তারক্লে‍।

ইকায়খুম্নরবা চেয়রমেন, হান্নদি লৈবাকসিদা য়ুম হোংমসি য়াম্লমদে‍। মতমগী মতুং ইন্না ময়োল্লমশিংদা, চাওখৎলবা ময়োল্লমশিংদা পুক্নিং চিংশিনবা হেল্লক্তুনা মীয়ামগী অপামবা হোংলক্লি, মরম অসিনা হৌখিবা চহী ৩০-৪০সিদা য়ুম হোংবসি য়াম্না উবা ফংলক্লি‍। কনানা ময়োল্লম অমদা লৈরি কনানা চৎখ্রে হায়বা খঙদনা দিস্ত্রিক্ত অগী চাওখৎ থৌরাংগী প্রাইওরিতী পীবা য়ারোই‍।

মসি অদোম পুম্নমক্কী মরুওইবা ৱাফম্নি … অদুগা অনিসুবদা ২০১০দা অদোম্না এন.পি.আর. পুরকখ্রবসু তোকঙা শন্দোক্লি মীয়ামবু লান্না লমজিংলি‍। ঐখোয় মফমসিদা ২০১৪দগী লৈঙাক চুপ্লি পায়রি, ঐখোয়না হায়রিবা এন.পি.আর.দুগী মতাঙদা ৱাহং অমত্তা হংখ্রবরা‍। ঐখোয়দা অদোম্না পায়খৎলমবা এন.পি.আর.গী রেকোর্দ লৈ‍। এন.পি.আর.দা য়ুম্ফম ওইরগা লৈবাকসিগী মীয়াম অমত্তদা ওৎ নৈবা তৌখিদ্রি‍।

ইকায়খুম্নরবা চেয়রমেন, মসিদসু নত্তনা য়ু.পি.এ.গী মতমদুগী গৃহ মন্ত্রীনা এ.পি.আর. হৌদোকপা মতমদা মীচম মীয়াম পুম্নমক এন.পি.আর.দা মিং য়াওহৌনবা ৱাফম থমখি‍। মহাক্না মিদিয়াদা এন.পি.আর. য়োকখৎনবা, ৱাফম থমখি‍। মতমদুদা গৃহ মন্ত্রীনা মীয়ামদা খঙহন্নবা অমদি এন.পি.আর.দা য়াওশিন্নবা হায়খি‍।

য়ু.পি.এ.না ২০১০দা এন.পি.আর. হৌদোকখি অমদি ২০১১দা এন.পি.আর.গী বাইওমেত্রিক দেতা খোমগৎপা হৌখি‍। ২০১৪দা অদোমগী লৈঙাক চৎখ্রবা মতমদু ফাওবদা, এন.পি.আর.গী মখাদা সিতিজন করোর কয়াগী রেকোর্দ চনশিনবা স্কেন্নিং তৌবা লোইখি, অমদি বাইওমেত্রিক দেতা খোমগৎপগী থবক চত্থখি‍। ঐনা হায়রিবসি অদোমগী লৈঙাক্কী মতমগী ৱাফম্নি‍।

ঙসি অদোম্না ২০১৫দা শেম্লমবা এন.পি.ার. রেকোর্দ অদু ঐখোয়না অপদেত তৌবনি‍। হায়রিবা এন.পি.আর. রেকোর্দসিগী খুত্থাঙদা এন.পি.আর. রেকোর্দ শীজিন্নদুনা প্রধান মন্ত্রী জন ধন য়োজনা, দাইরেক্ত বিনিফিত ত্রান্সফরনচিংবা লৈঙাক্কী স্কিমশিংগীদমক ৱাৎহৌবা বিনিফিসিয়রীশিং হাপচিন্দুনা লায়রবশিংদা কান্নবা পীরি‍।

অদুবু ঙসিদি ৱাফমসিবু রাজনিতীগী মচু শঙদুনা অদোম্না এন.পি.আর.গী মায়োক্তা লেপ্তুনা লায়রবা মীয়াম করোর কয়াবু মীয়ামগী য়াইফ-থৌরাংগী স্কিমশিংগী শরুক ওইহনবদগী অদোম্না থিংদুনা পাপ অমা লঙশিল্লি‍। মখোয়না শান্নরিবা রাজনিতীগী কুমহৈ অসিনা মখোয়গী লায়রবগী মায়োক্তা লৈবা মতৌ উত্থোক্লি‍।

লায়রবশিংগীদমক্তা পায়খৎওইবা স্কিমশিং মওং চুম্না য়ৌহন্নবগীদমক্তা ২০২০ সেন্সসকা লোয়ননা, ঐখোয়না এন.পি.আর. রেকোর্দ অপদেত তৌবা ঐখোয়না পাম্মি‍। অদুবু হৌজিক অদোম ওপোজিসনদা লৈরবা মতমসিদা অদোম্না হৌদোক্লমবা এন.পি.আর. অসি ফত্তনা উবা হৌরক্লে‍।

ইকায়খুম্নরবা চেয়রমেন, স্তেত পুম্নমক্না মরী লৈনবা গেজেত নোতিফিকেসন থোক্তুনা এন.পি.আর. অসিবু অয়াবা পীরি‍। হৌজিক্না স্তেত খরনা খঙহৌদনা মমায় লৈথোকখিদুনা মসিদা অপনবা পীরি অমদি মসিগী কান্নবা অমদি লায়রবশিংনা ফংগদবা কান্নবশিং থৌওইনা নাথৈদুনা থম্লি‍। অদোম্না চহী ৭০দা তৌখিদ্রিবা থৌওং অমা তৌরি অমদি মসি অদোম্না ওপোজিসন্দা ফম্লগা তৌবদা মতিক চাদে‍।

অদোম্না পুরক্লমবা, য়োকখৎলমবা মিদিয়াদা পাক শন্না খঙহল্লমবা থবক অসি হৌজিক অদোক্না মসিবু শোক্ন শম্নবা য়াদবা অমগুম মসিগী মায়োক্তা লেপ্লি‍। মসিনা অদোমগী ফিরেপ ভোত বেঙ্ক রাজনিতিগী য়েংলগা লৌবনি হায়বা উৎলি‍। কনাগুম্বা খরবু পেলহনবগী মতাঙদদি চাওখৎপা অমদি খাইবুং তানবা অনিগী মরক্তা অদোম্না খাইবুং তানবা লম্বী খল্লি‍।

অসিগুম্বা তাঞ্জা ঙাইবা ওপোজিসনগী মওং মতৌসিনা পার্তী অমদা মাঙহনবা নৎত্রগা কান্নরমবা য়াই, অদুবু মসিনা লৈবাকসিবুদি অৱাফমদা তাহল্লি‍। মরমসিনা ঐনা হায়জনিংবদি মীয়ামদা অচুমবা ৱাফমদুখক্তা থম্বিয়ু হায়বসিনি‍।

মালেম অসিনা ভারত্তা চাউনা থাজবা থম্লি অমদি ভারত মচাশিংনা ঐখোয়না থাজবা থম্লি‍। হায়রিবা থাজবা অসি ফংহনবা হায়বসি ভারত মচা করোর ১৩০গী অপামবগা চুনহন্নবা হোৎনগদবনি‍।

মসি হাউস অসিনা লৈবাক্কী ওইবা ৱাফম খুদিংমক্তা পুন্না চৎমিন্নবা, লিংজেল মান্ননা মাঙদা চৎমিন্নবা অমদি খোঙফম চেৎনা চৎমিন্নবা হায়বা সঙ্গচাদবম, সম্বাদবম হায়বসিগা চৎমিন্নরবা মতমদা ওইথোকপা য়াগনি‍। ৱাফমসিদা ঐখোয় য়েৎনসি, খন্নসি অমদি ৱারেপ লৌসি‍।

শ্রী দিগবিজয় সিংহজীনা মফমসিদা শৈরেং অমা থিবিখি, অদুনা ঐসু শৈরেং অমা নীংশিংলক্লে‍।

ঐগী য়ুম লৈতে, অহাংবা মালংখক্তমক লৈ

অচুমবা, থৌজাল, অপামবা অমদি মঙলান্না থল্লবা

ঐগী লৈবাকবু চাওখৎহনবা অমদি অৱাংবা থাক্তা থাঙ্গৎনবগী অপামবা

অকোয়বসিদা নুংঙাইবা অমদি ইং চিকপগী মঙলান !!

ভারতকী অথোইবা মপারি, হান্নগী রাস্ত্রপতি দোক্তর এ.পিই.জে. অব্দুল কলামগী ৱাহৈশিং অসি ঐনা পামজৈ, অদোমসু অদোমগী অপাম্বা ৱাহৈশিং লৈ‍। অদোমসু জাকি রাহি ভাবনা জৈসি, প্রভু মুরত দেখি তিন জৈসি হায়বা ৱাফমসি তাবিরম্লগনি‍। অদোম্না ২০শুবা চহীচাগী ৱাফমশিং নীংশিংদুনা ২১শুবা চহীচাসিদা হিংখিগদরা হায়বসি হৌজিক অদোম্না খনফম থোক্লে‍।

অনৌবা ভারত অসি মাঙদা চঙশিল্লি‍। লৈবাকসিনা থৌদাংগী লম্বীদা চঙশিল্লি অমদি থৌদাং হায়বসি হক পুম্নমক্কী তুংনফম্নি, মসি মহাত্মা গান্ধীগী অমত্তা ঙায়রবা পাউজেলনি‍।

ঐখোয়না গান্ধিজীনা তাক্লমপা থৌদাংগী লম্বীদুদা চঙশিনসি, অমদি নুংঙাই য়াইফরবা, মতুং লৈবা অমদি খোঙফম চেৎপা ভারত অমা শেমবা হৌরসি‍। ভারতকী অপামবা অমদি ফিরেপ খুদিংমক ঐখোয় পুন্না হোৎনমিন্নরবা তুংদা ফংবা ঙমগনি‍।

ঐনা অমুক্কা হন্না রাস্ত্রপতি অমদি মেম্বর পুম্নমকপু থাগৎচরি অমদি ৱাখল্লোনসিগা লোয়ননা লৈবাকসিগী অমত্তা ওইবা লিংজেল মান্নবা হায়বসিদা মরুওইবা মীৎয়েঙ থমদুনা ভারতকী সংবিধানগী ৱাংলবা ৱাখল্লোনবু ইকায়খুম্নদুনা ঐখোয় পুন্না চৎমিন্নসি অমদি লৈবাকসিবু মাঙদা পুখৎনবা ঐখোয়গী থৌদাং য়ামিন্নরসি‍। ৱাখল্লোন অসিদা ঐনা অমুক্কা হন্না রাস্ত্রপতি অমদি মপুং ফারবা ঙসিগী খন্ন-নৈনবা অসিদা য়াওবিরিবা ইকায়খুম্নরবা মেম্বরশিংবু থাগৎপা ফোঙদোকচরি‍।

ময়ামবু হন্না হন্না থাগৎচরি‍।

***