மாண்புமிகு அவைத் தலைவர் அவர்களே, பாராளுமன்ற கூட்டுக் கூட்டத்தில் மாண்புமிகு குடியரசுத் தலைவரின் உரையிலிருந்து கற்றுக்கொண்ட பாடங்கள் 130 கோடி இந்தியர்களின் அபிலாஷைகளையும் எதிர்பார்ப்புகளையும் பிரதிபலிக்கின்றன. மாண்புமிகுகுடியரசுத் தலைவரின் உரைக்கு ஆதரவாக  எனது கருத்துக்களை இந்த அவையில் முன்வைக்க விரும்புகிறேன்.

மாண்புமிகு உறுப்பினர்களில் 45 க்கும் மேற்பட்டவர்கள் இந்த உரையின்மீது தங்கள் கருத்துக்களை முன்வைத்துள்ளனர். இது மூத்தோர்களின் அவை. அனுபவம் வாய்ந்த பல பெரியவர்களின் அவை. விவாதத்தை மேலும் வளப்படுத்துவதாகவே அனைவரின் முயற்சியும் இருந்தது. திரு. குலாம் நபிஜி, திரு. ஆனந்த் சர்மாஜி, திரு. புபேந்திர யாதவ்ஜி, திரு. சுதான்ஷு திரிவேதிஜி, திரு. சுதாகர் சேகர்ஜி, திரு. ராமச்சந்திர பிரசாத்ஜி, திரு. ராம்கோபால்ஜி, திரு. சதீஷ் சந்திர மிஷ்ராஜி, திரு. சஞ்சய் ரவுத்ஜி, திரு. பிரசன்ன ஆச்சார்யஜி, திரு. நவ்நீத்ஜி போன்ற மாண்புமிகு உறுப்பினர்கள் தங்கள் கருத்துக்களை இந்த அவையில் எடுத்துரைத்தனர்.

அனைவரது பேச்சுகளிலிருந்தும் நான் குறிப்புகளை எடுக்கும்போது, ​​பல புதிய தகவல்கள் வெளிவந்தன. எங்கள் கடைசி அமர்வு மிகவும் பயனுள்ளதாக இருந்தது என்பதையும், அது அனைத்து மாண்புமிகு உறுப்பினர்களின் ஒத்துழைப்பால் ஏற்பட்டது என்பது குறித்தும் இந்த அவை பெருமிதம் கொள்ளலாம். இந்த மதிப்பிற்குரிய அவையின்  மாண்புமிகு உறுப்பினர்களையும் பாராட்ட வேண்டிய தேவையை ஏற்படுத்தி உள்ளது.

இது அனுபவம் வாய்ந்த மற்றும் மூத்த பிரமுகர்களின் அவையாகும். எனவே நாட்டிலும் இவர்கள் மீது அதிக எதிர்பார்ப்புகள் இருப்பது இயற்கையானது. அரசுத் தரப்பில் அமர்ந்திருப்போரும் நிறைய எதிர்பார்ப்புகளைக் கொண்டிருந்தனர், மேலும், எனக்கு தனிப்பட்ட வகையில் நிறைய எதிர்பார்ப்புகள் இருந்தன, உங்கள் முயற்சிகளிலிருந்து நிறைய நல்ல விஷயங்கள் என்னைப் போன்ற புதிய உறுப்பினர்களுக்கு தகுதியான வழிகாட்டுதலாக, நாட்டிற்காக வெளிப்படும் என்று நான் எண்ணினேன்.  ஆனால், என்னுடைய எதிர்பார்ப்புகளுக்கேற்ற அவை இல்லாத்தால், நான் ஏமாற்றமடைந்துள்ளேன்.

நீங்கள் முன்பு இருந்த அதே இடத்தில் சிக்கிக்கொண்டது போல் தெரிகிறது. சில நேரங்களில் நீங்கள் பின்னோக்கிச் செல்வது போலவும் தெரிகிறது. விரக்தியையும் விரக்தியின் உணர்வையும் உருவாக்குவதற்கு பதிலாக நாட்டிற்கு சரியான வழியை நீங்கள் காட்டியிருந்தால் நன்றாக இருந்திருக்கும்; ஒரு புதிய உற்சாகம், புதிய யோசனை, புதிய ஆற்றலை வழங்க அரசாங்கத்திற்கு வழிகாட்டுதல் கிடைத்திருக்கக் கூடும். ஆனால்,  தேக்கமடைவதும் நல்லது என்று  கூட நீங்கள் நினைத்திருக்கலாம்.

இது எனக்கு காகா ஹத்ராசியின் நகைச்சுவைமிக்க கவிதை வரிகளை நினைவுபடுத்துகிறது.

And this reminds me of a humorous poem by Kaka Hathrasi.

Very aptly he said:

Prakrtibadalateekshan-kshandekho,

Badalraheanu, kan-kandekho

Tum nishkriya se pade hue ho

Bhaagyavaad par ade hue ho.

Chhodomitr ! Puraaneedaphalee,

Jeevanmeinparivartanlao

Parampara se ooncheuthakar,

Kuchh to standard banao!

 

प्रकृतिबदलतीक्षण-क्षणदेखो,

बदलरहेअणु, कण-कणदेखो

तुमनिष्क्रियसेपड़ेहुएहो

भाग्यवादपरअड़ेहुएहो।

छोड़ोमित्र ! पुरानीडफली,

जीवनमेंपरिवर्तनलाओ

परंपरासेऊंचेउठकर,

कुछतोस्टैंडर्डबनाओ।

 

மாண்புமிகு அவைத்தலைவர் அவர்களே, கலந்துரையாடலைத் தொடங்கும் போது, ​​குலாம் நபிஜி தனது உரையில் கோபத்தைக் காட்டினார். பல விஷயங்களில் அரசாங்கத்தை விமர்சிக்கும் முயற்சிதான் அதில் இருந்தது, ஆனால் அது மிகவும் இயல்பான விஷயம்தான். ஆனால் அவர் ஆதாரமற்ற விஷயங்களைச் சொல்லிக்கொண்டிருந்தார். ஜம்மு-காஷ்மீர் குறித்த முடிவு சபையில் எந்த விவாதமும் இல்லாமல் எடுக்கப்பட்டது என்றார். டி.வி.யில் நாள் முழுவதும் அதுபற்றிய விவாதத்தை நாடு பார்த்தது, கேட்டது. நாடு கண்டது. அத்தகைய விரிவான கலந்துரையாடலுக்குப் பிறகுதான் சபை முடிவு செய்தது.

ஆசாத் சாஹிப், உங்கள் நினைவை மேலும் புதுப்பிக்க விரும்புகிறேன். பழைய விஷயங்களை மக்கள் அவ்வளவு விரைவாக மறப்பதில்லை. தெலுங்கானா குறித்து சபை எவ்வாறு முடிவு செய்தது என்பதை நினைவில் கொள்ளுங்கள். இந்த அவை மூடப்பட்டது. தொலைக்காட்சிகள் அணைக்கப்பட்டன. கலந்துரையாடலுக்கு இடமில்லை, அது நிறைவேற்றப்பட்ட சூழலை யாரும் மறக்க முடியாது. எனவே எங்களுக்கு அறிவுரை கூறுங்கள், நீங்கள் மூத்தவர் தான். இருந்தாலும் உண்மையை ஏற்றுக்கொள்ள வேண்டும்.

பல பத்தாண்டுகளுக்குப் பிறகு, ஒரு புதிய மாநிலத்தை உருவாக்க உங்களுக்கு வாய்ப்பு கிடைத்தது. அனைவரையும் அவர்களது அபிலாஷைகள், உற்சாகத்துடன் அழைத்துச் செல்வதன் மூலம் நீங்கள் அதைச் செய்யலாம். இப்போது ஆனந்த்ஜி சொல்லிக்கொண்டிருந்தார், நீங்கள் மாநிலங்களைக் கேட்டீர்களா, மற்றவர்களிடம் கேட்டீர்களா, அவர் நிறையவே சொன்னார். ஓ, குறைந்த பட்சம் அவர்கள் ஆந்திர-தெலுங்கானா மக்களிடம் அவர்களின் விருப்பம் என்ன என்று கேட்டிருக்கலாம். ஆனால் நீங்கள் செய்தது ஒரு வரலாறு. அந்த நேரத்தில், அப்போதைய பிரதமர், மரியாதைக்குரிய மன்மோகன் சிங் ஜி, மக்களவையில் ஒரு விஷயத்தைச் சொல்லியிருந்தார், அதை இன்று நாம் நினைவில் கொள்ள வேண்டும் என்று நினைக்கிறேன்.

அவர் அப்போது கூறினார்: “தெலுங்கானா பிரச்சினை தொடர்பாக தொடர்ந்து நடைபெற்று வரும் போராட்டத்தின் விளைவாக இந்தியாவில் ஜனநாயகம் பாதிக்கப்படுகிறது. அடல் ஜியின் அரசாங்கம் உத்தரகண்ட் உருவாக்கியது, ஜார்கண்ட், சத்தீஸ்கர், முழு கண்ணியத்துடன், அமைதியுடன், ஒற்றுமையுடன் உருவாக்கியது. இன்று இந்த மூன்று புதிய மாநிலங்களும் நாட்டின் முன்னேற்றத்தில் தங்களுக்கே உரிய வகையில் பங்களிப்பை செய்கின்றன.

ஜம்மு-காஷ்மீர் மற்றும் லடாக் பற்றி எந்த முடிவுகளை எடுத்தாலும் நீண்ட மற்றும் முழுமையான கலந்துரையாடலுக்குப் பிறகே எடுக்கப்பட்டுள்ளன.

ஜம்மு-காஷ்மீரின் நிலைமை குறித்த சில தகவல்கள் இங்கு முன்வைக்கப்பட்டன. என்னிடமும் சில புள்ளிவிவரங்கள் உள்ளன. இந்த அவையின் முன் நானும் அந்த அறிக்கையை கொடுக்க வேண்டும் என்று நினைக்கிறேன்.

20 ஜூன் 2018 - மாநில அரசின் வீழ்ச்சிக்குப் பின்னர், குடியரசுத் தலைவரின் ஆட்சி கொண்டுவரப்பட்டு, 370 வது பிரிவை நீக்க முடிவு செய்யப்பட்டது.

அதன்பிறகு முதன்முறையாக அந்த மாநிலத்தில் ஏழைகள் மற்றும் நலிந்தவர்கள் இடஒதுக்கீட்டின் பலனைப் பெற்றார்கள் என்று நான் கூற விரும்புகிறேன்.

ஜம்மு-காஷ்மீரில் முதன்முறையாக பஹாடி மொழி பேசும் மக்களுக்கு இடஒதுக்கீடு நன்மை கிடைத்தது.

ஜம்மு-காஷ்மீரில் முதன்முறையாக, மாநிலத்திற்கு வெளியில் இருந்து யாரையாவது திருமணம் செய்து கொண்டாலும் பெண்கள் தொடர்ந்து தங்கள் சொத்துக்களை வைத்திருப்பதற்கான உரிமை கிடைத்தது.

சுதந்திரத்திற்குப் பிறகு முதல் முறையாக தொகுதி மேம்பாட்டு கவுன்சில் தேர்தல்கள் நடைபெற்றன.

ஜம்மு-காஷ்மீரில் முதல் முறையாக ரியல் எஸ்டேட் ஒழுங்குமுறை ஆணையச் சட்டம் நடைமுறைக்கு வந்தது.

ஜம்மு-காஷ்மீரில் முதல்முறையாக தொடக்கக் கொள்கை, வர்த்தக மற்றும் ஏற்றுமதி கொள்கை, தளவாடங்கள் கொள்கை ஆகியவை செயல்படுத்தப்படுகின்றன.

நாட்டையே ஆச்சரியப்படுத்தும் வகையில், ஜம்மு-காஷ்மீரில்தான் முதன்முறையாக ஊழல் தடுப்பு அலுவலகம் நிறுவப்பட்டது.

முதல் முறையாக, ஜம்மு-காஷ்மீரில் பிரிவினைவாதிகளுக்கு எல்லையைத் தாண்டி நிதி கட்டுப்படுத்தப்பட்டது.

முதல் முறையாக, ஜம்மு-காஷ்மீரில் பிரிவினைவாதிகளை வாழ்த்தும் பாரம்பரியம் முடிவுக்கு வந்துள்ளது.

ஜம்மு-காஷ்மீரில் பயங்கரவாதம் மற்றும் பயங்கரவாதிகளுக்கு எதிராக காவல்துறையும் பாதுகாப்பு படையினரும் முதல் முறையாக தீர்க்கமான நடவடிக்கை எடுத்து வருகின்றனர்.

முதன்முறையாக, ஜம்மு-காஷ்மீர் காவல்துறையினர் மற்ற மத்திய அரசு ஊழியர்கள் பல ஆண்டுகளாகப் பெற்று வரும் கூடுதல் சம்பளப்படிகளின்  பலனைப் பெற்றுள்ளனர்.

முதல் முறையாக, இப்போது ஜம்மு-காஷ்மீர் காவல்துறையினர் எல்.டி.சி பயனைப் பெற்று கன்னியாகுமரி, வடகிழக்கு அல்லது அந்தமான்-நிக்கோபார் பயணம் செய்யலாம்.

மரியாதைக்குரிய தலைவர் அவர்களே, ஆளுநர் ஆட்சிக்குப் பின்னர் 18 மாதங்களில், 4400 க்கும் மேற்பட்ட சர்பஞ்ச் பதவிகளுக்கும் 35 ஆயிரத்துக்கும் மேற்பட்ட பஞ்ச் பதவிகளுக்கும் அமைதியான தேர்தல் நடைபெற்றது.

18 மாதங்களில், ஜம்மு-காஷ்மீரில் 2.5 லட்சம் கழிப்பறைகள் கட்டப்பட்டன,

18 மாதங்களில், ஜம்மு-காஷ்மீரில் 3 லட்சம் 30 ஆயிரம் வீடுகளில் மின்சாரம் வழங்கப்பட்டது.

18 மாதங்களில், ஜம்மு-காஷ்மீரில் 3.5 லட்சத்துக்கும் மேற்பட்டவர்களுக்கு ஆயுஷ்மான் யோஜனாவின் தங்க அட்டைகள் வழங்கப்பட்டுள்ளன.

18 மாதங்களில், ஜம்மு-காஷ்மீரில் ஓய்வூதிய திட்டத்துடன் ஒன்றரை லட்சம் முதியவர்கள், பெண்கள் மற்றும் ஊனமுற்றோர் இணைக்கப்பட்டுள்ளனர்.

ஆசாத் சாஹிப் மேலும் அபிவிருத்தி முன்னதாகவே நடைபெறுகிறது என்றும் கூறினார். நாங்கள் அதை ஒருபோதும் சொல்லவில்லை. ஆனால் வளர்ச்சி எவ்வாறு நடைபெறுகிறது என்பதற்கு ஒரு எடுத்துக்காட்டு கொடுக்க விரும்புகிறேன்.

மார்ச் 2018 நிலவரப்படி, பிரதமர் அவாஸ்யோஜனாவின் கீழ் 3.5 ஆயிரம் வீடுகள் மட்டுமே கட்டப்பட்டுள்ளன. பிரதான் மந்திரி அவாஸ் யோஜனாவின் கீழ் மூன்றரை ஆயிரம். இந்த திட்டத்தின் கீழ் 2 ஆண்டுகளில் 24 ஆயிரத்துக்கும் மேற்பட்ட வீடுகள் கட்டப்பட்டுள்ளன.

தொலைத் தொடர்பு இணைப்புகளை மேம்படுத்துவதற்கும், பள்ளிகளின் நிலையை மேம்படுத்துவதற்கும், மருத்துவமனைகளை மேம்படுத்துவதற்கும், நீர்ப்பாசனத்தை மேம்படுத்துவதற்கும், சுற்றுலாவை அதிகரிப்பதற்கும் பிரதமர் திட்ட தொகுப்பு உள்ளிட்ட பல திட்டங்கள் இப்போது விரைவாக முன்னெடுக்கப்படுகின்றன.

மரியாதைக்குரிய வைகோஜி தனக்கென ஒரு பேச்சுப் பாணியைக் கொண்டவர். எப்போதும் மிகவும் உணர்ச்சிவசப்படுபவரும் கூட. ஜம்மு-காஷ்மீருக்கு 5 வது ஆகஸ்ட் 2019 கருப்பு நாள் என்று அவர் கூறினார். வைகோஜி அவர்களே, இது ஒரு கருப்பு நாள் அல்ல, பயங்கரவாதத்தையும் பிரிவினைவாதத்தையும் ஊக்குவிப்பவர்களுக்கு இது ஒரு கருப்பு நாள் என்பதை நிரூபித்துள்ளது. இன்று லட்சக்கணக்கான குடும்பங்களுக்கு, ஒரு புதிய நம்பிக்கை, நம்பிக்கைக்கான புதிய ஒளி காணப்படுகிறது.

மரியாதைக்குரிய தலைவர் அவர்களே, வடகிழக்கு பற்றியும் இங்கு விவாதிக்கப்பட்டுள்ளது. வடகிழக்கு எரிகிறது என்று ஆசாத் சாஹிப் கூறுகிறார். அது எரிந்து கொண்டிருந்தால், நீங்கள் முதலில் உங்கள் பாராளுமன்ற பிரதிநிதிகள் குழுவை அங்கு அனுப்பியிருப்பீர்கள், நிச்சயமாக பத்திரிகையாளர் சந்திப்பை முடித்திருப்பீர்கள், புகைப்படமும் வெளியிடப்பட்டிருக்கும். எனவே, ஆசாத் சாஹிப்பின் தகவல்கள் 2014 க்கு முன்னர் இருந்ததாக நான் நினைக்கிறேன்.

 ஆகவே, வடகிழக்கு இன்று அமைதியுடன் இந்தியாவின் வளர்ச்சி பயணத்தின் முன்னோடி முன்னணி பங்காளியாக மாறியுள்ளது என்பதை நான் புதுப்பிக்க விரும்புகிறேன்.  வடகிழக்கில் 40-40, 50-50 ஆண்டுகளாக பேசப்பட்டு வந்த வன்முறை இயக்கங்கள், முற்றுகைகள் இருந்தன, அவை எவ்வளவு பெரிய கவலையாக இருந்தன என்பது அனைவருக்கும் தெரியும். ஆனால் இன்று வன்முறை முடிவுக்கு வந்துள்ளது. முற்றுகைகள் நிறுத்தப்பட்டு, முழு வடகிழக்கும் சமாதான பாதையில் முன்னேறி வருகிறது.

நான் ஒரு விஷயத்தைக் குறிப்பிட விரும்புகிறேன் - புரு பழங்குடியினரின் பிரச்சினை கிட்டத்தட்ட 30-25 ஆண்டுகளாக இருந்தது, உங்களுக்கும் தெரியும், சுமார் 30 ஆயிரம் மக்கள் நிச்சயமற்ற வாழ்க்கை வாழ்ந்து வந்தனர் என்பதை நாங்கள் அறிந்திருக்கிறோம். அத்தகைய ஒரு சிறிய அறையில், அது கூட தற்காலிக குடிசை, அதில் 100–100 பேர் வாழ வேண்டிய கட்டாயம் ஏற்பட்டது. இது 30 ஆண்டுகளாக நடந்து வருகிறது, சித்திரவதைக்குக் குறைவில்லை. அவர்கள் செய்த குற்றம் ஒன்றுமில்லை. இப்போது முரண்பாட்டைப் பாருங்கள், உங்கள் கட்சிக்கு வடகிழக்கில் பெரும்பாலான அரசாங்கங்கள் இருந்தன.

திரிபுராவில் உங்கள் நண்பர்கள்தான் ஆட்சியில் இருந்தார்கள். உங்களுக்கு நண்பர்கள் இருந்தார்கள், அன்பர்களே. உங்களுக்கு விருப்பம் இருந்ததால், உங்களுடன் மிசோரம் அரசாங்கம் இருந்தது, உங்கள் நண்பர்கள் திரிபுராவில் அமர்ந்திருந்தார்கள், நீங்கள் மையத்தில் ஆட்சியில் இருந்தீர்கள். நீங்கள் விரும்பியிருந்தால், புரு - ரீயாங் பழங்குடியினரின் பிரச்சினைக்கு நீங்கள் ஒரு மகிழ்ச்சியான தீர்வைக் கொண்டு வந்திருக்கலாம். ஆனால் இன்று, பல வருடங்களுக்குப் பிறகு, அந்தப் பிரச்சினையைத் தீர்ப்பதிலும் அதை நிரந்தரமாகத் தீர்ப்பதிலும் நாம் வெற்றி பெற்றிருக்கிறோம்.

இவ்வளவு பெரிய பிரச்சினையில் ஏன் இவ்வளவு அக்கறையின்மை இருந்தது என்று எனக்கு ஆச்சரியமாக இருக்கிறது? ஆனால் அக்கறையின்மைக்கு காரணம், வீடுகளிலிருந்து, கிராமத்திலிருந்து பிரிக்கப்பட்ட புரு சாதியைச் சேர்ந்தவர்கள் அழிக்கப்பட்டனர். அவர்களின் வலி உணரமுடியாத்து. ஆனால், வாக்குகள் மிகக் குறைவுதான் என்பதை இப்போது நான் புரிந்துகொண்டேன். இது வாக்குகளின் விளையாட்டாக இருந்தது, இதன் காரணமாக அவர்களின் தாங்க இயலாத வலியை எங்களால் ஒருபோதும் உணர முடியவில்லை, அவர்களுடைய பிரச்சினையை எங்களால் தீர்க்க முடியவில்லை. இது எங்கள் வரலாறு, மறந்து விடக்கூடாது.

எங்கள் சிந்தனை மாறுபட்டதாக இருந்தது. அனைவரோடும் சேர்ந்து, அனைவரின் வளத்திற்காக, அனைவரின் நம்பிக்கையைப் பெற்று நாட்டை முன்னெடுத்துச் செல்வதில் நாங்கள் நம்பிக்கை கொண்டிருந்தோம். எங்களால் முடிந்த அனைத்தையும் முழு பொறுப்புடனும், இரக்கத்துடனும் சிக்கல்களைத் தீர்ப்பதில் நாங்கள் ஈடுபட்டுள்ளோம். அவர்களின் துன்பத்தை நாங்கள் புரிந்துகொள்கிறோம். இன்று, 29 ஆயிரம் பேர் தங்கள் சொந்த வீட்டைப் பெறுவார்கள், தங்கள் சொந்த அடையாளத்தைப் பெறுவார்கள், தங்கள் சொந்த இடத்தைப் பெறுவார்கள் என்று நாடு பெருமிதம் கொள்ளலாம். அவர்கள் தங்கள் கனவுகளை நனவாக்க முடியும், அவர்கள் தங்கள் குழந்தைகளின் எதிர்காலத்தை தீர்மானிக்க முடியும்.

வட கிழக்கில் உள்ள பிரச்சினைகளை, அது புரு பழங்குடியினருடையதாக இருந்தாலும் சரி, அல்லது வேறு எந்தவொரு இனத்தவருடையதாக இருந்தாலும் சரி அவற்றைத் தீர்க்க வேண்டும் என்று நாங்கள் விரும்புகிறோம்.

போடோ பிரச்சினையில் நான் நீண்ட தூரம் செல்ல விரும்பவில்லை, ஆனால் அதுவும் மிக முக்கியமான ஒரு வேலையாகும். அதன் சிறப்பு என்னவென்றால், வன்முறையின் பாதையில் உள்ள அனைத்து ஆயுதக் குழுக்களும் ஒன்றிணைந்தன. இந்த ஒப்பந்தத்தில் கையெழுத்திட்ட பிறகு இன்னும் நிறைவேறாத கோரிக்கைகள் இல்லை என்று அனைவரும் ஒப்புக்கொண்டனர்.

சுகேந்து சேகர்ஜி உள்ளிட்ட பல சக உறுப்பினர்களும் பொருளாதார விஷயங்கள் பற்றி விவாதித்தனர்.

அனைத்து கட்சி கூட்டம் நடந்தபோது கூட, நான் மிகவும் ஆர்வத்துடன் கூறியிருந்தேன், பொருளாதார அமர்வு பற்றிய விவாதத்திற்காக முழு அமர்வையும் அர்ப்பணிக்க வேண்டும். தீவிரமான விவாதம் இருக்க வேண்டும். அனைத்து அம்சங்களையும் முன்னிலைப்படுத்த வேண்டும். நம்மிடம் உள்ள திறமைகள் மற்றும் திறன்களைக் கொண்டு விவாதத்தை வளப்படுத்த வேண்டும், இதன் மூலம் இன்று உலகளாவிய பொருளாதார நிலைமையை இந்தியா எவ்வாறு அதிகபட்சமாகப் பயன்படுத்த முடியும், இந்தியா அதன் வேர்களை எவ்வாறு வலுப்படுத்துகிறது, இந்தியா தனது பொருளாதாரத்தை எவ்வாறு வலுப்படுத்த முடியும் என்பதற்கான புதிய விஷயங்களையும் புதிய வழிகளையும் கண்டறிய முடியும். நாங்கள் அதைப் பற்றி விரிவாக விவாதிக்கலாம், ஆழமாக விவாதிப்போம், அனைத்து கட்சி கூட்டத்திலும் அனைவரையும் நான் கேட்டுக்கொண்டேன். இந்த அமர்வு எண்ணிக்கையின் பொருளாதார சிக்கல்களுக்கு முற்றிலும் அர்ப்பணிக்கப்பட விரும்புகிறேன்.

பட்ஜெட் விவாதிக்கப்பட வேண்டிய ஒன்றுதான். மேலும் ஆழமாக அது விவாதிக்கப்படும். இந்தச் செயல்முறையை மேலும் சிறப்பானதாக ஆக்க அது உதவி செய்யும். அதற்கு பதிலாக குற்றச்சாட்டுகள் வைக்கப்படும். வாதங்கள் எழும். இந்த முயற்சிகள் அனைத்துமே அமிர்தத்தை வெளிக்கொண்டு வரும் என்றுதான் நான் நம்புகிறேன். அதனால்தான் பொருளாதாரத்தைப் பற்றி, பொருளாதார நிலைமை பற்றி, பொருளாதார கொள்கைகள் பற்றி விவாதிக்க வேண்டும் என்று ஒவ்வொருவரையும் நான் அழைத்தேன். டாக்டர் மன்மோகன்ஜியைப் போன்ற அனுபவம் மிக்க பெரியவர்கள் இங்கே நம்மிடையே இருக்கிறார்கள். நாடு நிச்சயமாக இதனால் பயன்பெறும். நாம் இதைச் செய்ய வேண்டும். இது குறித்து நாங்கள் வெளிப்படையாகவே இருக்கிறோம்.

 

ஆனால் பொருளாதார நிலைமை தொடர்பாக இங்கு விவாதிக்கப்படுவதால், நாடு ஏமாற்றமடைய எந்த காரணமும் இல்லை. மேலும் அவர்கள் ஏமாற்றத்தை பரப்புவதன் மூலம் எதையும் பெறப்போவதில்லை. இன்றும், நாட்டின் பொருளாதாரத்தின் அடிப்படைக் கொள்கைகளான அடிப்படைக் கோட்பாடுகள், அடிப்படைகளாகவே இருக்கின்றன, நாட்டின் பொருளாதாரம் வலுவானது, நிலையானது மற்றும் முன்னேற முழு சக்தியும் உள்ளது. உள்ளார்ந்த. இந்த குணம் அதற்குள் இருக்கிறது.

எந்த நாடும் சிறிய சிந்தனையுடன் முன்னேற முடியாது. இப்போது நாட்டின் இளைய தலைமுறை நாம் பெரிதாக சிந்திக்க வேண்டும், தொலைவில் சிந்திக்க வேண்டும், அதிகம் சிந்திக்க வேண்டும், மேலும் பலத்துடன் முன்னேற வேண்டும் என்று எதிர்பார்க்கிறது. இந்த அடிப்படை மந்திரத்தின் மூலமும், 5 டிரில்லியன் டாலர் பொருளாதாரத்தை நோக்கி செயல்படுவதன் மூலமும், நாட்டை முன்னேற்ற முயற்சிப்போம், இணைக்க முயற்சிப்போம். இதற்காக ஏமாற்றமடையத் தேவையில்லை. முதல் நாளிலேயே நாம் திகைக்க வேண்டாம். எது சாத்தியமானது, எது சாத்தியமில்லை என்பதைப் பார்ப்போம். ஒவ்வொரு முறையும் நம்மை அவ்வளவு தூரம் நகர்த்துவதைக் கட்டுப்படுத்திக் கொள்ளாமல், யாரோ இரண்டு படிகள் நடக்கிறார்கள், நாம் அதைப் பின்பற்ற வேண்டுமா? குறைந்தபட்சம் சில நேரங்களில் நீங்கள் ஐந்து படிகள் எடுக்க முயற்சி செய்கிறீர்கள், சில நேரங்களில் நீங்கள் ஏழு படிகளுக்கு முயற்சி செய்கிறீர்கள், குறைந்த பட்சம் நீங்கள் என்னுடன் வருவீர்கள்.

இந்த அவநம்பிக்கை ஒருபோதும் நாட்டிற்கு நல்லதாக இருக்காது, எனவே 5 டிரில்லியன் டாலர் பொருளாதாரத்தைப் பற்றி பேசுவதன் நல்ல முடிவு என்னவென்றால், அதை எதிர்ப்பவர்கள் 5 டிரில்லியன் டாலர் பற்றி பேச வேண்டும். எல்லோரும் 5 டிரில்லியன் டாலர் பொருளாதாரத்தை முன்வைக்க வேண்டும். இது ஒரு பெரிய மாற்றம்.

இப்போது உலகளாவிய அடிப்படையில் வேலை செய்ய ஓர் ஏற்பாடு உருவாக்கப்பட்டுள்ளது. நாங்கள் மனநிலையை மாற்றியுள்ளோம்: இதனால் இந்த கனவை நிறைவேற்ற கிராமங்கள் மற்றும் நகரங்கள், எம்.எஸ்.எம்.இக்கள், ஜவுளிப் பகுதிகள், வேலைவாய்ப்பு கிடைக்கக்கூடிய இடங்களில் உள்கட்டமைப்பு இருக்க வேண்டும்.

தொழில்நுட்பம் மற்றும் புதிய தொழில் முயற்சிகளை வளர்த்தெடுக்க நாங்கள்  முயற்சிக்கிறோம். சுற்றுலா மிகப்பெரிய ஒரு வாய்ப்பு ஆகும்.

ஏதோ ஒரு சில காரணங்களால் அல்லது வேறு காரணங்களால் கடந்த 70 ஆண்டுகளில் நாட்டில் சுற்றுலாவை மேம்படுத்துவதற்கும், இந்த நாட்டிற்கான தனிமுத்திரையை பெறுவதற்கும் கிடைத்த வாய்ப்பை இழந்துவிட்டோம். இன்றும் ஒரு வாய்ப்பு உள்ளது, இன்று இந்தியாவின் பார்வையில் சுற்றுலாவை வளர்க்க வேண்டும். இந்தியாவின் சுற்றுலாவை மேற்கத்திய பார்வையில் நாம் வளர்க்க முடியாது. இந்தியாவைப் பார்க்க உலகம் வர வேண்டும்.

இந்தியாவில் உற்பத்தி செய் என்ற இயக்கத்தில் இதை  நாங்கள் வலியுறுத்தியுள்ளோம். அதன் வெற்றியும் உங்களுக்குத் தெரியும். வெளிநாட்டு முதலீட்டின் புள்ளிவிவரங்களை நீங்கள் பார்க்க வேண்டும்.

வரி கட்டமைப்பின் முழு செயல்முறையையும் எளிதாக்க நாங்கள் தொடர்ந்து முயற்சித்தோம். வணிக தரவரிசைகளை எளிதாக்குவதில் இந்தியாவின் தரவரிசை விஷயமாக இருந்தாலும் அல்லது இந்தியாவில் எளிதில் வாழ்வதற்கான தலைப்பாக இருந்தாலும் சரி, நாங்கள் இருவரும் ஒன்றாக இணைந்து பணியாற்றியுள்ளோம்.

எனக்கு நினைவிருக்கிறது, நான் குஜராத்தில் இருந்தபோது, ​​ வங்கித் துறையில் கட்டுரைகளை எழுதும் பல சிறந்த அறிஞர்கள், நம் நாட்டில்  வங்கிகளை ஒன்றிணைக்க வேண்டும் என்று சொல்லியிருந்தார்கள். இது நடந்தால், அது ஒரு பெரிய சீர்திருத்தமாக கருதப்படும். இதை நாம் பலமுறை படித்திருக்கிறோம். இந்த அரசாங்கம்தான் பல வங்கிகளை ஒன்றிணைத்து, எளிதாகச் செய்துள்ளது. இன்று வங்கிகள் துறை சக்திவாய்ந்ததாக உள்ளது, இது வரவிருக்கும் தேசத்தின் முதுகெலும்பான நிதி நிலையைப் பலப்படுத்தும்.

இன்று, உற்பத்தித் துறையை ஒரு புதிய கண்ணோட்டத்தில் பார்க்க வேண்டும், பணம் வங்கிகளில் சிக்கியதற்கு என்ன காரணம் என்று. முந்தைய அரசாங்கம் ஆட்சியில் இருந்தபோது இருந்த காரணங்களை நான் விரிவாகக் கூறியுள்ளேன், நான் யாரையும் இழிவுபடுத்த முயற்சிக்கவில்லை. உண்மையை தேசத்தின் முன் வைப்பதன் மூலம், நான் தொடர்ந்து முன்னேற முயற்சிக்கிறேன். இதுபோன்ற விஷயங்களில் சொல்வதற்கு நிறைய இருந்தபோதிலும், நான் எனது நேரத்தை வீணாக்க மாட்டேன்.

எந்தவொரு பிரச்சினையிலும் விவாதத்திற்கு பஞ்சமில்லை. ஜி.எஸ்.டி பற்றி நாங்கள் பலமுறை விவாதித்தோம், அதை மீண்டும் மீண்டும் மாற்றினோம். நான் அதை நல்லது அல்லது கெட்டது என்று நினைக்க வேண்டுமா. எனக்கு ஆச்சரியமாக இருக்கிறது. இது, ஜிஎஸ்டியின் உருவாக்கம், கூட்டாட்சி கட்டமைப்பின் முக்கிய சாதனை. இது காங்கிரஸ் ஆட்சி செய்தவர்களின் மாநிலங்களின் அபிலாஷைகளையும் பிரதிபலிக்கிறது. கடவுள் கொடுத்த எல்லா ஞானமும் நம்மிடம் இருக்கிறது எனவே மேலும் முன்னேற்றத்திற்காக நாம் செயல்பட மாட்டோம் என்று சொல்லிக் கொண்டு விவாதிப்பதை நாம் நிறுத்த வேண்டுமா?

இது எங்கள் பார்வை அல்ல, ஒரு மாற்றம் அவசியமான போதிலும் செய்யப்பட வேண்டும் என்பதே எங்கள் கருத்து. இவ்வளவு பெரிய நாடு இருக்கிறது, நிறைய பாடங்கள் உள்ளன. மாநில வரவு செலவுத் திட்டம் வரும்போது, ​​விற்பனை வரியில், வரவுசெலவுத் திட்டத்தின் போது விற்பனை வரி அல்லது பிற வரிகள் இருக்கும் போது, ​​பல விவாதங்கள் உள்ளன, இறுதியில் மாநிலங்கள் மாற்றங்களைச் செய்துள்ளன. இப்போது இது மாநிலங்களிலிருந்து விலகி ஒன்றிணைந்ததால், கனமானதாகத் தெரிகிறது.

இதோ பாருங்கள்! ஜிஎஸ்டி மிகவும் எளிமையானதாக இருந்திருக்க வேண்டும்; இப்படியிருந்திருக்க வேண்டும்; இந்த அளவிற்கு இருந்திருக்க வேண்டும் என்றெல்லாம் இங்கே கூறப்பட்டது என்று நான் தெரிந்து கொண்டேன். நான் ஒரே ஒரு கேள்வியைத்தான் எழுப்ப விரும்புகிறேன். அந்த அளவிற்கு உங்களிடம் அறிவு இருந்திருந்தால், அதை எளிமையாக ஆக்குவதற்கான தெளிவான இலக்கு இருந்திருந்தால், நண்பர்களே, ஏன் இந்த விஷயத்தை முடிவுக்கு கொண்டுவராமல் தொங்கலிலேயே விட்டு வைத்திருந்தீர்கள்? ஆம். இத்தகைய குழப்பமான கருத்துக்களை பரப்பாதீர்கள்.

 

நான் உங்களுக்கு சொல்கிறேன், நீங்கள் இன்று கேட்க வேண்டும். பிரணாப் தா நிதி அமைச்சராக இருந்தபோது குஜராத்திற்கு வந்தபோது, ​​அவருடன் நாங்கள் நீண்ட நேரம் கலந்துரையாடினோம். நான் அவரிடம் கேட்டேன் என்ன நடந்தது இது ஒரு தொழில்நுட்ப உந்துதல் அமைப்பு. அது இல்லாமல் வேலை செய்ய முடியாது. எனவே காத்திருங்கள் என்று கூறி, அவர் தனது செயலாளரை அழைத்தார், பாருங்கள், மோடி ஜி என்ன சொல்கிறார் என்று கேள்வியை செயலரிடம் கேட்கச் சொன்னார்.

எனவே நான் சொன்னேன், இதோ பாருங்கள். இது ஒரு தொழில்நுட்பத்தின் மூலமாகவே செயல்படுத்தப்பட வேண்டிய ஒரு செயல்பாடு. எனவே  அதற்குரிய தொழில்நுட்பம் இல்லாமல் அது முன்னேறப் போவதில்லை. அதற்கு  அவர், இல்லை, நாங்கள் முடிவு செய்துள்ளோம், நாங்கள் ஒரு நிறுவனத்தை இதற்காக வேலைக்கு அமர்த்துவோம், நாங்கள் அதை செய்யப் போகிறோம். நான் ஜிஎஸ்டி பற்றி என்னிடம் அவர் பேச வந்த நேரத்தைப் பற்றி பேசுகிறேன், அப்போதும் அப்படி ஒரு ஏற்பாடு இருக்கவில்லை.

இரண்டாவதாக, ஜிஎஸ்டி வெற்றிகரமாக இருக்க உற்பத்தி மாநிலங்களின் சிரமங்களை நீங்கள் தீர்க்க வேண்டும் என்று நான் சொன்னேன். தமிழ்நாடு, கர்நாடகா, குஜராத், மகாராஷ்டிரா ஆகியவை பெரிய அளவில் உற்பத்தி மாநிலங்களாக இருக்கின்றன.  நுகர்வு நிலைகள், நுகர்வோர்களுக்கு அவ்வளவு கடினம் அல்ல. அருண் ஜெட்லி நிதியமைச்சராக இருந்தபோது, ​​இந்த விஷயங்களை அவர் கவனத்தில் எடுத்துக் கொண்டு, அதைத் தீர்த்தார் என்று நான் இன்று பெருமையுடன் சொல்கிறேன். அதன்பிறகு, முழு நாடும் ஜி.எஸ்.டி.யோடு சென்றுவிட்டது. இதன் காரணமாக நான் முதலமைச்சராக எழுப்பிய பிரச்சினைகளை, பிரதமராக அந்த பிரச்சினைகளை தீர்த்துக் கொண்டேன். அவ்வாறு தீர்ப்பதன் மூலம் ஜிஎஸ்டிக்கு வழி வகுக்கப்பட்டது.

இது மட்டுமல்ல, மாற்றத்தைப் பற்றிப் பேசினால், சில சமயங்களில் ஏன் மீண்டும் மீண்டும் மாற வேண்டும் என்று சொல்கிறோம்? எங்கள் பெரிய மனிதர்கள் இவ்வளவு பெரிய அரசியலமைப்பைக் கொடுத்திருக்கிறார்கள் என்று நினைக்கிறேன், அவர்களும் அதை முன்னேற்றத்திற்காக வைத்திருக்கிறார்கள். சீர்திருத்தங்கள் ஒவ்வொரு அமைப்பிலும் எப்போதும் தன்னாட்சி பெற்றதாக இருக்க வேண்டும், மேலும் நாட்டின் இந்த ஆர்வத்தில் ஒவ்வொரு புதிய மற்றும் நல்ல ஆலோசனையையும் வரவேற்கும் யோசனைகளை எடுத்துக்கொள்வதன் மூலம் நாங்கள் மேலே நகர்கிறோம்.

மரியாதைக்குரிய தலைவர் அவர்களே, இந்தியப் பொருளாதாரத்தில் இன்னமும் தீர்க்கப்படாத ஒரு விஷயம் இருக்கிறது. அதன் மீது நாம் கவனம் செலுத்த வேண்டும். நாட்டில் ஏற்பட்டு வரும் இந்த மிகப்பெரிய மாற்றத்தில் நமது இரண்டாம் தர, மூன்றாம் தர நகரங்கள் மிகவும் உற்சாகத்தோடு இதில் விரைந்து பங்களித்தன. இரண்டாம் தர நகரங்களில், மூன்றாம் தர நகரங்களில் உள்ள சிறுவர்கள் விளையாட்டில் முன்னேறி வருகின்றனர் என்பதை நீங்கள் காணலாம். இரண்டாம் தர நகரங்களில், மூன்றாம் தர நகரங்களில் உள்ள சிறுவர்கள் கல்வியில் முன்னேறி வருவதை நீங்கள் காணலாம். புதிய தொழில்களை தொடங்குவதற்கான தொழில்முனைவர்களிலும் அதிகமான எண்ணிக்கையினர் இரண்டாம் தர, மூன்றாம் தர நகரங்களைச் சேர்ந்தவர்கள்தான்.

ஆகவே, நிறைய பல விஷயங்களைத் தூக்கிச் சுமக்காத நம் நாட்டின் ஆர்வமுள்ள இளைஞர்கள் இந்த சிறிய நகரங்களில் ஒரு பெரிய புதிய சக்தியைக் கொண்டு வருகிறார்கள், , சிறிய நகரங்கள், அதன் பொருளாதாரங்கள் ஆகியவற்றில் இந்த திசையில் நாம் சிறிது முன்னேற்றம் அடைந்துள்ளோம்.

நம் நாட்டில், டிஜிட்டல் முறையினை நோக்கிய மாற்றங்கள், இந்த அவையில் டிஜிட்டல் பரிவர்த்தனைகள் பற்றிய உரைகள், பேச்சாளர்கள் தங்கள் உரைகளை எடுத்துக் கொண்டால், அவர்கள் அப்படிச் சொன்னது குறித்து ஆச்சரியப்படுவார்களா? சிலர் கைபேசியை கேலி செய்தார்கள். அதே மக்கள் தான் இப்போது டிஜிட்டல் முறையில் வங்கி, ரசீது முறை ஆகியவற்றைப் பார்க்கத் தொடங்கியுள்ளனர்… இன்று டிஜிட்டல் பரிவர்த்தனைகள் பெரும்பாலும் சிறிய இடங்களில் காணப்படுவதும், நவீன உள்கட்டமைப்பை நிர்மாணிப்பதில் இரண்டாம் அடுக்கு, மூன்றாம் அடுக்கு நகரங்களும் முன்னேறியுள்ளதும் எனக்கு ஆச்சரியத்தைத் தருகிறது. நமது ரயில்வே, நமது நெடுஞ்சாலைகள், நமது விமான நிலையங்கள், அதன் முழு வீச்சும் இப்போது தென்படுகிறது. விமானத் திட்டத்தைப் பாருங்கள், நாட்டின் 250 வது விமானப் பயணப்பாதை நேற்றுமுன்தினம் தொடங்கப்பட்டது, இந்தியாவுக்குள் இருநூற்று ஐம்பது பாதை. நமது விமான பயண முறை எவ்வளவு வேகமாக மாறுகிறது. வரும் நாட்களில் இது மேலும் உயரும்.

கடந்த ஐந்து ஆண்டுகளில், எங்களிடம் செயல்படும் நிலையில் 65 விமான நிலையங்கள் இருந்தன. இன்று நாங்கள் 100 ஐ தாண்டிவிட்டோம். 65 செயல்பாட்டில் இருந்து இப்போது 100  விமான நிலையங்கள் செயல்பட்டு வருகின்றன. இவை அனைத்துமே அந்த புதிய துறையின் வலிமையை அதிகரிக்கப் போகின்றன.

இதேபோல், கடந்த ஐந்து ஆண்டுகளில் நாங்கள் அரசாங்கத்தை மாற்றியது மட்டுமல்லாமல், அதன்  சிந்தனைப் போக்கையும் மாற்றியுள்ளோம். அரசு வேலை செய்யும் முறையையும் மாற்றியுள்ளோம். அணுகுமுறையையும் மாற்றியுள்ளோம்.

இப்போது டிஜிட்டல் இந்தியா பற்றி பேசலாம். பிராட்பேண்ட் இணைப்பு வரும்போது, ​​முதலில் வேலை தொடங்கியது, திட்டம் தயாரிக்கப்பட்டது, ஆனால் அந்த திட்டத்தின் முறை மற்றும் சிந்தனைக்கு எவ்வளவு மதிப்பு இருந்தது? பிராட்பேண்ட் இணைப்பு 59 கிராம பஞ்சாயத்துகளை மட்டுமே சென்று அடைந்தது. இன்று, பிராட்பேண்ட் இணைப்பு ஐந்து ஆண்டுகளில் 1.25 லட்சத்துக்கும் மேற்பட்ட கிராமங்களை எட்டியுள்ளது. பிராட்பேண்டை இயக்குவது மட்டுமல்லாமல், பொதுப் பள்ளிகள், கிராமங்கள் மற்றும் பிற அலுவலகங்கள் மற்றும் மிக முக்கியமாக பொதுவான சேவை மையங்கள் ஆகியவை செயல்படுத்தப்பட்டுள்ளன.

2014 இல் நாங்கள் ஆட்சிக்கு வந்தபோது, ​​நம் நாட்டில் 80 ஆயிரம் பொது சேவை மையங்கள் இருந்தன. இன்று, அவற்றின் எண்ணிக்கை 3 லட்சத்து 65 ஆயிரம் ஆக உயர்ந்துள்ளது, மேலும் கிராமத்து இளைஞர்கள் இதை நடத்தி வருகின்றனர். கிராமத்தின் தேவைகளைப் பூர்த்தி செய்வதற்காக, தொழில்நுட்பத்தின் முழு சேவைகளையும் வழங்குகின்றனர்.

12 லட்சத்துக்கும் மேற்பட்ட கிராமப்புற இளைஞர்கள் தங்கள் சொந்த கிராமங்களில் வசித்து வருகின்றனர். மாலையில் அவர்கள் பெற்றோருக்கு  உதவுகிறார்கள்; அவர்களும் பண்ணை வேலையைச் செய்கிறார்கள். இந்த வேலைவாய்ப்பு முறையில் 12 லட்சம் கிராமப்புற இளைஞர்கள் சேர்க்கப்பட்டுள்ளனர்.

இந்த நாடு பெருமையாக இருக்கும், இருக்க வேண்டும். அரசாங்கத்தை விமர்சித்ததற்காக டிஜிட்டல் பரிவர்த்தனையை நாம் கேலி பேசினோம்; பீம் செயலியின் பயன்பாடு உலகளவில் ஏற்றுக் கொள்ளப்பட்டு,   மிகவும் சக்திவாய்ந்த தளமாகவும், நிதிசார் பரிவர்த்தனை, டிஜிட்டல் முறை பரிவர்த்தனைகளுக்கு பாதுகாப்பான தளமாகவும் வளர்ந்து வருகிறது. மேலும் இந்த செயலியைப் பற்றித் தெரிந்து கொள்ள  உலகின் பல நாடுகள் எங்களை மேலும் தொடர்பு கொள்கின்றன. இது நாட்டுக்கு பெருமை சேர்க்கும்  ஒன்றாகும். எந்த நரேந்திர மோடியும் இதை உருவாக்கவில்லை. இது டிஜிட்டல் பரிவர்த்தனைகளுக்கான சிறந்த செயல்திறன் கொண்ட தளத்தை இன்று நம் நாட்டின் இளைஞர்களின் அறிவாற்றல், திறமை ஆகியவற்றினால் ஏற்பட்டதாகும்.

அவைத்தலைவர் அவர்களே, கடந்த ஜனவரி மாதத்தில், பீம் செயலியைக் கொண்டு கைபேசி மூலமாக 2 லட்சத்து 16 ஆயிரம் கோடி ரூபாய்களுக்கு ஒரே மாதத்தில் பரிவர்த்தனை மேற்கொள்ளப்பட்டுள்ளது. இப்படித்தான் நமது நாடு மாற்றத்தை ஏற்றுக் கொண்டுள்ளது. 

ரூபே அட்டை பற்றியும் அது அறிமுகம் செய்யப்பட்டது பற்றியும் உங்களுக்குத் தெரிந்திருக்கும். ஒரு சில ஆயிரங்கள் மட்டுமே அவை இருந்தன. நமது நாட்டின் பங்களிப்பு என்பது வெறும் 6 சதவீதமாக மட்டுமே இருந்தது. ஆனால் இன்று அது 50 சதவீதத்தை எட்டியுள்ளது.

இன்று ரூபே டெபிட் கார்டு சர்வதேச அளவில் உலகின் பல நாடுகளிலும் ஏற்றுக்கொள்ளப்படுவது அதிகரித்து வருகிறது. எனவே இந்தியாவின் ருபே அட்டை, தனக்கென ஒரு இடத்தை உருவாக்கி வருகிறது, இது நம் அனைவருக்கும் பெருமை சேர்க்கும் விஷயமாகும்.

மரியாதைக்குரிய தலைவர் அவர்களே, மற்றொரு விஷயத்திலும் இந்த அரசின் அணுகுமுறை இதேபோலத்தான் இருந்தது. அதுதான் ஜல் ஜீவன் மிஷன் (நீர் ஆதார இயக்கம்). இந்த வகையில் நூறு சதவீதத்திற்கு அடிப்படை பிரச்சனைகளை தீர்க்க நாங்கள் முயற்சி செய்தோம்.

கழிப்பறைகள் – 100 சதவீதம்

வீடுகள் – 100 சதவீதம்

மின்வசதி – 100 சதவீதம்

கிராமங்களில் மின்வசதி – 100 சதவீதம்

நாங்கள் மேற்கொண்ட இந்த விஷயங்களில் ஒவ்வொன்றிலுமே, பிரச்சனைகளில் இருந்து நாட்டை விடுவிக்க வேண்டும் என்ற அணுகுமுறையுடன் தான் செயல்பட்டோம்.

வீடுகளுக்கு தூய்மையான தண்ணீரை வழங்குவதற்காக ஒரு பெரிய பிரச்சாரத்தை நாங்கள் மேற்கொண்டுள்ளோம், இந்த நோக்கம், இதன் தனித்தன்மை என்னவென்றால், இது மத்திய அரசின் பணி என்றாலும், அந்த பணத்தை மத்திய அரசுதான் செலவிடப் போகிறது. இதற்கான உந்துசக்தி மத்திய அரசாக இருக்கும். ஆனால் உண்மையில் இதை செயல்படுத்தவிருப்பது, நேரடியாக கூட்டாட்சி, நமது கிராமம், கிராம அமைப்பு ஆகியவற்றின் மைக்ரோ யூனிட்டாக இருக்கும் என்று நாம் கூறலாம். அதை அவர்களே தீர்மானிப்பார்கள்; திட்டமிடுவார்கள்; வீடு வீடாக தண்ணீர் வழங்கும் முறை அவர்களால் அமைக்கப்படும். இந்தத் திட்டத்தையும் நாங்கள் முன்னெடுத்து வருகிறோம்.

கூட்டுறவு கூட்டாட்சிக்கு  இது ஒரு சிறந்த எடுத்துக்காட்டு - 100 க்கும் மேற்பட்டவை சுயவிருப்பம் கொண்ட ஆர்வமிக்க மாவட்டங்கள். நம் நாட்டில் வாக்கு வங்கி அரசியலுக்காக நாங்கள் முன்னோக்கியும் பின்னோக்கியும் ஏராளமான விஷயங்களை செய்துள்ளோம். ஆனால் இந்த நாட்டின் பகுதிகள் தொடர்ந்து பின்தங்கிய நிலையில்தான் இருந்தன. நாம் அவர்கள் மீது கவனம் செலுத்த வேண்டியிருந்தது. ஆனால் நாங்கள் மிகவும் தாமதமாக வந்தோம். பல அளவீடுகளை வைத்துப் பார்க்கும்போது பல மாநிலங்களில் சில மாவட்டங்கள் முற்றிலும் பின்தங்கிய நிலையில் உள்ளன என்று நான் படித்தேன். அதையும் நாங்கள் சரிசெய்தால், சராசரியாக நாடு பெரிய அளவில் மேம்படும். சில சமயங்களில் ஓய்வு பெறப் போகும் அதிகாரியும் அத்தகைய மாவட்டத்தை அப்படியே வைத்திருப்பார்கள். அதாவது, ஆற்றல்மிக்க, திறமையான அதிகாரிகள் யாரும் அங்கு நியமிக்கப்படுவதில்லை. அவர் போய்விட்டார் என்றுதான் அவர்கள் நினைத்தார்கள். நாங்கள் அதை மாற்றியுள்ளோம். சுயவிருப்பமுள்ள 100 மாவட்டங்கள் அடையாளம் காணப்பட்டுள்ள நிலையில், பல்வேறு மாநிலங்கள் மற்றும் மாநிலங்களின் மாவட்டங்களும் உள்ளன, இதுபோன்ற 50 சுயவிருப்பமுள்ள தொகுதிகளை அடையாளம் காணவும், அவற்றின் நிர்வாகத்தில் மாற்றங்களைச் செய்யவும், இடஞ்சார்ந்த கவனம் செலுத்துவதன் மூலம் மாற்றத்தைக் கொண்டுவரவும் முயற்சிகள் மேற்கொள்ளப்பட்டுள்ளன.

மாவட்ட அளவில் கூட, இந்த சுயவிருப்பமுள்ள மாவட்டம் கூட்டுறவு கூட்டாட்சிவாதத்தை செயல்படுத்தும் நிறுவனமாக மிகவும் இனிமையான அனுபவத்துடன் முன்னேறி வருகிறது என்பதை இன்று உணர்ந்துள்ளது. மாவட்ட அதிகாரிகளிடையே இணையத்தில்  போட்டி நடக்கிறது; எல்லோரும் முயற்சி செய்கிறார்கள. அதனால் அந்த மாவட்டம் தடுப்பூசி போடுவதில் முன்னேறியுள்ளது. நானும் இந்த வாரம் அதற்காக வேலை செய்வேன், தடுப்பூசி தகவல்பட்டியலில் முன்னேறுவேன் என்று அதிகாரிகள் செயல்படுகின்றனர். அதாவது, மக்களின் வசதியை அதிகரிக்க இவ்வாறுதான் அங்கு  நல்ல வேலை செய்யப்படுகிறது.

ஆயுஷ்மான் இந்தியா திட்டமும் நம்மிடம்  இருக்கிறது. ஏனென்றால் மாவட்டத்தில் எல்லா சுகாதார சேவைகளும் ஒரே மாதிரியானவை. இந்த முறை நாங்கள் அங்குள்ள சுகாதாரத் துறைக்கு முன்னுரிமை அளித்துள்ளோம், இதனால் இந்தப்  பகுதிகள் முன்னேற முடியும்.

மேலும், சுயவிருப்பமுள்ள மாவட்ட மக்கள் நமது பழங்குடி சகோதர சகோதரிகளாக இருந்தாலும், நமது மாற்றுத் திறனாளிகளாக இருந்தாலும், அவர்களுக்காக முழு உணர்திறனுடன் செயல்பட அரசாங்கம் முயற்சிகளை மேற்கொண்டு வருகிறது.

கடந்த ஐந்து ஆண்டுகளாக, நாட்டின் அனைத்து பழங்குடி போராளிகளை கவுரவிக்கும் பணி நடைபெற்று வருகிறது. நாட்டின் சுதந்திரத்திற்காக பழங்குடியினர் செய்த பங்களிப்பை எடுத்துக் கொண்டு, ஒரு அருங்காட்சியகம், ஒரு ஆராய்ச்சி நிறுவனம் இருக்க வேண்டும், நாட்டை உருவாக்குவதிலும் காப்பாற்றுவதிலும் அவர்களின் பங்கு எவ்வளவு இருந்தது என்பது தெரியவரும். இது ஒரு உத்வேகமாக மாறும். இது நாட்டை ஒருங்கிணைப்பதற்கும் ஒரு காரணமாக மாறும். அதற்கான பணிகள் நடந்து கொண்டிருக்கின்றன.

எங்கள் பழங்குடி குழந்தைகளிடம் நம்பிக்கைக்குரிய பல பழக்கங்கள் உள்ளன. அவர்களுக்கு வாய்ப்பு இல்லை. அவர்களுக்கு வாய்ப்பு கிடைத்தால் அது விளையாட்டாக இருந்தாலும், கல்வியாக இருந்தாலும் ஏகலைவா பள்ளிகள் மூலம், சிறந்த வகை பள்ளிகளை உருவாக்குவதன் மூலம் இதுபோன்ற நம்பிக்கைக்குரிய குழந்தைகளுக்கு வாய்ப்புகளை வழங்குவதில் நாங்கள் ஒரு சிறந்த பணியைச் செய்துள்ளோம்.

பழங்குடியின குழந்தைகளுடன், இந்த பகுதிகளில் சுமார் 30 ஆயிரம் சுய உதவிக்குழுக்களும், வன-செல்வத்தை உற்பத்தி செய்யும் காடுகளும், அதற்காக குறைந்தபட்ச அரசு ஆதரவு விலை, அவர்களும் முன்னேறவும் அவர்களுக்கு அதிகாரம் அளிப்பதிலும் நாங்கள் முக்கிய பணியாற்றி வருகிறோம்.

பெண்களுக்கு அதிகாரமளித்தல் குறித்து குடியரசுத் தலைவரின் உரையில் மிகக் குறைவாகவே குறிப்பிடப்பட்டுள்ளது. ஆனால், நாட்டின் வரலாற்றில் முதல்முறையாக, இராணுவப் பள்ளிகளில் சிறுமிகளுக்கான சேர்க்கையைத் திறந்துவிட்டோம். ராணுவ காவல்துறையில் பெண்களை நியமிக்கும் பணியும் நடந்து வருகிறது.

பெண்களின் பாதுகாப்புக்காக, நாட்டில் 600 க்கும் மேற்பட்ட ஒற்றைச் சாளர மையங்கள் கட்டப்பட்டுள்ளன. நாட்டின் ஒவ்வொரு பள்ளியிலும் ஆறாம் வகுப்பு முதல் பன்னிரெண்டாம் வகுப்பு வரையிலான சிறுமிகளுக்கு தற்காப்பு பயிற்சி அளிக்கப்படுகிறது.

பாலியல் வன்முறையில் ஈடுபடும் குற்றவாளிகளை அடையாளம் காண ஒரு தேசிய தரவுத்தளம் தயாரிக்கப்பட்டுள்ளது, அதில் இடம்பெறும் அத்தகைய நபர்கள் கண்காணிக்கப்படுவார்கள். இது தவிர, ஆட் கடத்தலுக்கு எதிராக ஒரு பிரிவு அமைக்கவும் திட்டமிட்டுள்ளோம்.

குழந்தைகள் மீதான கடுமையான பாலியல் வன்முறை வழக்குகளை கையாள்வதற்காக, இதுபோன்ற குற்றங்களை போஸ்கோ சட்டத்தின் கீழ் கொண்டு வந்து, அந்தச் சட்டத்தை திருத்துவதன் மூலம் குற்றவாளிகளை தண்டிப்போம். இதுபோன்ற சந்தர்ப்பங்களில், நீதியை விரைவாகப் பெற வேண்டும். எனவே நாடு முழுவதும் ஆயிரத்திற்கும் மேற்பட்ட அதிவேக நீதிமன்றங்கள் அமைக்கப்படும்.

மரியாதைக்குரிய அவைத்தலைவர் அவர்களே, இந்த அவையில் குடியுரிமை திருத்தச்சட்டம் மீதான விவாதம் நடைபெற்றது. நாட்டின் பல பகுதிகளிலும் கண்டனம் என்ற பெயரில் குழப்பம் பரவியது; வன்முறை வெடித்தது; கண்டனம் செய்வது ஓர் உரிமை என கருதப்பட்டது. அரசியல் அமைப்புச் சட்டத்தின் பெயரால் ஜனநாயகவிரோத செயல்களை மறைக்க தொடர்ந்து முயற்சிகள் மேற்கொள்ளப்பட்டன. இந்த விஷயத்தில் காங்கிரஸ் கட்சிக்கு உள்ள நிர்ப்பந்தத்தை என்னால் புரிந்து கொள்ள முடிகிறது. ஆனால் கேரள மாநில இடது முன்னணியைச் சேர்ந்த நம் நண்பர்கள் மிக குறைவாகவே புரிந்து கொண்டுள்ளனர். இங்கு வருவதற்கு முன்பாக கேரள மாநில முதல்வர் கேரளாவில் நடைபெற்று வரும் கிளர்ச்சிகளில் பயங்கரவாத குழுக்களின் பங்கு உள்ளது என சட்டமன்றத்திலேயே தெரிவித்தார்.

அது மட்டுமல்ல; கடுமையான நடவடிக்கை எடுக்கப்படும் என்றும் அவர் எச்சரித்தார். கேரளாவில் அது உங்களுக்குத் தொந்தரவாக இருக்கும் போது எப்படி டெல்லியிலும் நாட்டின் இதர பகுதிகளிலும் இந்த குழப்பத்தை உங்களால் ஆதரிக்க முடியும்?

 

குடியுரிமை திருத்தச் சட்டம் குறித்து என்ன கூறப்பட்டாலும் சரி, இங்கு எந்த விஷயம் முன்நிறுத்தப்படுகிறது என்பதை நமது உறுப்பினர்கள் அனைவரும் கேள்வி எழுப்ப வேண்டும். இந்தப் போக்கு

நாட்டை தவறாக வழிநடத்துகிறதா? அப்படியென்றால் நம் அனைவராலும் அது நிறுத்தப்பட வேண்டுமா? அல்லது நிறுத்தப்படாமல் இருக்க வேண்டுமா? இது நமது கடமையா ? இல்லையா? அத்தகைய பிரச்சாரத்தின் ஒரு பகுதியாக நாம் மாற வேண்டுமா? இப்போது அது யாருக்கும் அரசியல் ரீதியாக நல்லது செய்யப்போவதில்லை என்றே வைத்துக்கொள்வோம். இந்த பாதை சரியில்லை என்று, நாம் உட்கார்ந்து நாம் சரியான பாதையில் செல்கிறோமா? என்று சிந்திக்கப் போகிறோமா? எத்தகைய இரட்டை வேடம் இது? நீங்கள் 24 மணிநேரமும் சிறுபான்மையினருக்காக அழுகிறீர்கள். அதுவும் மிகச் சிறந்த சொற்களைப் பயன்படுத்தி. நான் இப்போது ஆனந்த்ஜி பேசியதைக் கேட்டுக்கொண்டிருந்தேன். ஆனால்  அவர்களின் வலியை நீங்கள் ஏன் உணரவில்லை? ஏனென்றால் உங்களது கடந்த காலத் தவறுகளால் அவர்கள் அக்கம்பக்கத்தில் சிறுபான்மையினராகிவிட்டார்களா? இந்த முக்கியமான பிரச்சினையில் மக்களை பயமுறுத்துவதற்கு பதிலாக, சரியான தகவல்கள் வழங்க வேண்டும் என்றுதான்  நாடு எதிர்பார்க்கிறது. இது நம் அனைவரின் பொறுப்பும் ஆகும். ஆச்சரியம் என்னவென்றால், எதிர்க்கட்சி கூட்டாளிகள் பலரும் இந்த நாட்களில் மிகவும் உற்சாகமாகிவிட்டனர். ஒரு காலத்தில் அமைதியாக இருந்தவர்கள் எல்லாம் இப்போது வன்முறையில் இறங்கி உள்ளனர். இது அவைத்தலைவரின் செயலால் ஏற்பட்ட விளைவு. ஆனால் இன்று இந்த அவை மிகவும் மூத்தவர்களுக்கு சொந்தமானதாக இருக்கவேண்டும் என்றே நான் விரும்புகிறேன். எனவே, இன்று சில பெரிய மனிதர்களின் கருத்துக்களை உங்களுக்கு படித்துக் காட்ட விரும்புகிறேன்.

முதல் அறிக்கை இதுதான்: “ பாகிஸ்தானின் கிழக்குப் பிரிவில் வாழும் சிறுபான்மை சமூகத்தவரின் உயிருக்கும், உடைமைக்கும் மானத்திற்கும் பாதுகாப்பற்ற நிலை உள்ள சூழ்நிலையில், பாகிஸ்தானின் அந்தப் பகுதியில் அனைத்து மனித உரிமைகளும் பொதுவாக மறுக்கப்ப்ட்டு வரும் நிலையில், சிறுபான்மைப் பிரிவைச் சேர்ந்த மக்கள் கிழக்குப் பாகிஸ்தானில் இருந்து இந்தியாவிற்கு குடிபெயர்வதற்கான கட்டுப்பாடுகளை தளர்த்துவது மட்டுமின்றி உலகளாவிய கருத்தொற்றுமையை திரட்ட இந்திய அரசு நடவடிக்கைகளை மேற்கொள்ள வேண்டும் என்றும் இந்த அவை கருதுகிறது.”

இது இந்த அவையில் கூறப்பட்டுள்ளது. சில ஜனசங் தலைவர்கள் மட்டுமே இப்படி பேச முடியும், இதுபோன்ற விஷயங்களை வேறு யார் சொல்ல முடியும் என்று இப்போது நீங்கள் நினைப்பீர்கள். அந்த நேரத்தில் பாஜக இல்லை, ஆனால் ஜனசங் கட்சி  இருந்தது. எனவே ஜனசங்கத்தைச் சேர்ந்த யாராவது பேசியிருக்கலாம் என்று அவர்கள் நினைத்திருக்க வேண்டும். ஆனால் இந்த அறிக்கை எந்த பாஜக அல்லது ஜனசங் தலைவருக்கும் சொந்தமானது அல்ல.

அதே பெரியவரின் மற்றொரு அறிக்கையையும் நான் உங்களுக்கு கூற விரும்புகிறேன். அவர் சொன்னார்: “ கிழக்குப் பாகிஸ்தானைப் பொறுத்தவரையில் அங்குள்ள முஸ்லீம் அல்லாத அனைவரும் அகற்றப்பட வேண்டும் என்ற முடிவு இருப்பதாகவே தெரியவருகிறது. அது ஒரு இஸ்லாமிய நாடுதான். இஸ்லாம் வழிப்பட்ட நாடு என்ற வகையில் இஸ்லாம் மீது நம்பிக்கை கொண்டவர்கள் மட்டுமே அங்கு வசிக்க முடியும் என்றும் முஸ்லீம் அல்லாதவர்கள் வசிக்க முடியாது என்றும் அது கருதுகிறது. எனவே இந்துக்கள் வெளியேற்றப்படுகின்றனர்; கிறித்துவர்கள் வெளியேற்றப்படுகின்றனர். 37ஆயிரத்துக்கும் மேற்பட்ட கிறித்துவர்கள் அங்கிருந்து இன்று இந்தியாவிற்கு இடம்பெயர்ந்து விட்டார்கள் என்று நான் கருதுகிறேன். அங்கிருந்து பவுத்த மதத்தை பின்பற்றுவோரும் விரட்டி அடிக்கப்படுகின்றனர்.”

இதுவும் கூட யாரோ ஒரு ஜனசங்க அல்லது பாஜக தலைவரின் அறிக்கை அல்ல. இந்த வார்த்தைகள் நம் நாட்டு மக்களால் மிகவும் விரும்பப்பட்ட பிரதமர்களில் ஒருவரின் வார்த்தைகள்தான் இது. மிகுந்த மரியாதைக்குரிய லால்பகதூர் சாஸ்திரிஜியின் வார்த்தைகள்தான் இவை. இவர்களையும் கூட மதவெறி பிடித்தவர் என்று நீங்கள் கூறுவீர்களா? இந்து-முஸ்லீம் மக்களை பிளவுபடுத்துவோர் என்று கூறுவீர்களா?

இந்த அறிக்கையை லால் பகதூர் சாஸ்திரி 3 ஏப்ரல் 1964 அன்று நாடாளுமன்றத்தில் வழங்கினார். அப்போது நேருஜி பிரதமராக இருந்தார். மத துன்புறுத்தல் காரணமாக இந்தியாவுக்கு வரும் அகதிகள் குறித்து நாடாளுமன்றத்தில் விவாதிக்கப்பட்டு வந்தது. அந்த நேரத்தில்தான் சாஸ்திரிஜி இவ்வாறு கூறினார்.

மரியாதைக்குரிய அவைத்தலைவர் அவர்களே, மற்றொரு அறிக்கையையும் நமது மாட்சிமை பொருந்திய அவையின் முன்வைக்க விரும்புகிறேன். குறிப்பாக இதை எனது சோஷலிஸ்ட் நண்பர்களுக்கு அர்ப்பணம் செய்கிறேன். ஏனெனில் அங்கிருந்துதான் அவர்களுக்கு உத்வேகம் கிடைக்கக் கூடும். சற்றே கவனமாக்க் கேளுங்கள்.

“இந்தியாவில் உள்ள முஸ்லீம்கள், பாகிஸ்தானில் உள்ள இந்துக்கள் வாழவேண்டும். பாகிஸ்தானில் உள்ள இந்துக்கள் பாகிஸ்தான் குடிமக்கள். எனவே அவர்களைப் பற்றி நாம் கவலைப்பட வேண்டாம் என்ற வாதத்தை நான் முற்றிலுமாக நிராகரிக்கிறேன். பாகிஸ்தானில் உள்ள இந்து எந்தவொரு இடத்தின் குடிமகனாக இருந்தாலும் சரி, இந்திய நாட்டின் இந்துக்கள் அல்லது முஸ்லீம்களைப் பாதுகாப்பது போலவே அவர்களையும் பாதுகாக்க வேண்டிய கடமை நமக்கு இருக்கிறது.”

யார் சொன்னது இதை? இதுவும் கூட ஜனசங்கம் அல்லது பாஜகவை சேர்ந்த யாருடையதும் அல்ல. இது திரு. ராம் மனோகர் லோஹியாஜியின் அறிக்கை இது. எமது சோஷலிஸ்ட் நண்பர்களை கேட்டுக் கொள்கிறேன். எங்களை நம்பினாலும் சரி, நம்பாவிட்டாலும் சரி, குறைந்தபட்சம் லோஹியாஜியின் கருத்துக்களுக்கு முரணாக இருந்து விடாதீர்கள். இதுதான் அவர்களுக்கு எனது வேண்டுகோள்.

மரியாதைக்குரிய அவைத்தலைவர் அவர்களே, இந்த சபையில் சாஸ்திரிஜியின் மற்றொரு அறிக்கையை நான் படிக்க விரும்புகிறேன். அகதிகள் மீதான மாநில அரசுகளின் பங்கு குறித்து அவர் இந்த அறிக்கையை வெளியிட்டார். லால் பகதூர் சாஸ்திரிஜியின் இந்த உரையை நீங்கள் கேட்க வேண்டும், வாக்கு வங்கி அரசியல் காரணமாக மாநிலங்களில் உள்ள சட்டமன்றக் கூட்டங்களில் தீர்மானங்களை  அறிமுகப்படுத்தும் விளையாட்டு. நீங்கள் எங்கு செல்கிறீர்கள், எங்கு இருந்தீர்கள், உங்களுக்கு என்ன நேர்ந்தது என்பது எல்லாம் உங்களுக்குத் தெரியும்.

மரியாதைக்குரிய தலைவர் அவர்களே, லால்பகதூர் சாஸ்திரிஜி சொன்னார்:

"எங்கள் அனைத்து மாநில அரசாங்கங்களும் இதை (அகதிகள் குடியேறுவது) ஒரு தேசிய கேள்வியாக கருதுகின்றன. இதற்காக நாங்கள் அவர்களை வாழ்த்துகிறோம், அவ்வாறு செய்வதில் நாங்கள் மிகவும் மகிழ்ச்சியடைகிறோம். பீகார் மற்றும் ஒரிசா, மத்தியப் பிரதேசம் அல்லது உத்தரபிரதேசம், அல்லது மகாராஷ்டிரா அல்லது ஆந்திரா என அனைத்து மாநிலங்களும் சரி, அகதிகள் இங்கு குடியேறத் தயாராக இருப்பதாக இந்திய அரசுக்கு கடிதம் எழுதியுள்ளன. சிலர் ஐம்பதாயிரம் ஆண்கள், சிலர் பதினைந்தாயிரம் குடும்பங்கள் என்று கூறியுள்ளனர், சிலர் பத்தாயிரம் குடும்பங்கள் குடியேறும் பொறுப்பை ஏற்கத் தயாராக இருப்பதாகக் கூறினர்.

சாஸ்திரிஜியின் இந்த அறிக்கை 1964 ல் வெளியானபோது  நாட்டில் காங்கிரஸ் அரசாங்கங்கள் மட்டுமே இருந்தன. எவ்வாறாயினும், இன்று நாங்கள் ஒரு நல்ல வேலையைச் செய்கிறோம், உங்கள் வாக்கு வங்கி அரசியலுக்காக நீங்கள் தடைகளை உருவாக்குகிறீர்கள்.

மரியாதைக்குரிய அவைத்தலைவர் அவர்களே, மற்றொரு உதாரணத்தையும் வழங்க விரும்புகிறேன். நாடு விடுதலை பெற்று ஒரு சில மாதங்களுக்கு உள்ளேயே, 1947 நவம்பர் 25 அன்று காங்கிரஸ் கட்சியின் செயற்குழு ஒரு தீர்மானத்தை நிறைவேற்றியது. காங்கிரஸ் கட்சியின் செயற்குழு நிறைவேற்றிய அந்த தீர்மானம் சொன்னது:

”மேலும் தங்களது உயிரையும் மானத்தையும் காத்துக் கொள்வதற்காக பாகிஸ்தானில் இருந்து எல்லையைக் கடந்து இந்தியாவிற்கு வந்த  அல்லது வரவிருக்கின்ற முஸ்லீம் அல்லாத அனைவருக்கும் முழுமையான பாதுகாப்பு அளிக்க வேண்டிய கடமை காங்கிரஸ் கட்சிக்கு உள்ளது.”

இது முஸ்லீம் அல்லாதவர்களுக்காக. அந்த மொழியை நீங்கள் இன்று பேசினால்.

மரியாதைக்குரிய அவைத்தலைவர் அவர்களே,

1947 நவம்பர் 25 அன்று காங்கிரஸ் ஒரு வகுப்புவாத சக்தி என்று நீங்கள் நம்பவில்லை என்றால், நானும் கூட நம்பவில்லை. ஆனால் இன்று திடீரென்று மதசார்பற்றதாக அது ஆகி விட்டது என்பதையும் நான் நம்பத் தயாராக இல்லை. அன்றையதினம் முஸ்லீம் அல்லாதவர்கள் என்று எழுதுவதற்குப் பதிலாக பாகிஸ்தானில் இருந்து இடம்பெயர்ந்து வரும் அனைவருக்கும் என்று உங்களால் எழுதியிருக்க முடியும். ஆனால் அதைப்போன்று நீங்கள் எழுதவில்லை. முஸ்லீம் அல்லாதவர்கள் என்று ஏன் எழுதினீர்கள்?

நாடு பிளவுபட்ட பிறகு பாகிஸ்தானில் தங்கிவிட்ட இந்துக்களில் பெரும்பாலோர் நமது தலித் சகோதரர்களும், சகோதரிகளும்தான். இந்த மக்களிடம் பாபா சாஹேப் அம்பேத்கர் கூறினார்:

 “பாகிஸ்தானில் இன்று அடைந்து கிடக்கும் தாழ்த்தப்பட்ட இனத்தவர்களுக்கு சொல்லிக் கொள்வேன். நீங்கள் அனைவரும் இந்தியாவிற்கு வந்துவிடுங்கள்…”

இதே செய்தியைத்தான் பாபா சாஹேப் அம்பேத்கர் வழங்கினார். இந்த அறிக்கைகள் அனைத்தும் சிறந்த ஆளுமைகளுடையவை. அவர்கள் இந்த நாட்டின் தேசத்தை உருவாக்கியவர்கள். அவர்கள் அனைவரும் வகுப்புவாதிகளா? காங்கிரசும் அதன் கூட்டாளிகளும் வாக்கு வங்கி அரசியல் காரணமாக இதை மறக்கத் தொடங்கியுள்ளனர். இது நாட்டிற்கு கவலை அளிக்கும் விஷயம்.

மரியாதைக்குரிய அவைத்தலைவர் அவர்களே, 1997 ஆம் ஆண்டில், பல தோழர்கள் இங்கு வருவார்கள், இந்த சபையிலும் யாராவது இருக்கலாம். அப்போதைய அரசாங்கத்தின் அறிவுறுத்தலின் பேரில் இந்துக்கள் மற்றும் சீக்கியர்கள் என்ற வார்த்தைகள் பயன்படுத்தத் தொடங்கிய ஆண்டு இது. அதற்கு முன்பு இது இல்லை. 2011 ஆம் ஆண்டில், பாகிஸ்தானில் இருந்து வரும் கிறிஸ்தவர்கள் மற்றும் பவுத்தர்கள் என்ற சொற்களும் உருவாக்கப்பட்டது. இவை அனைத்தும் 2011 இல் நடந்தது.

குடியுரிமை திருத்த மசோதா 2003 ஆம் ஆண்டில் மக்களவையில் அறிமுகப்படுத்தப்பட்டது. குடியுரிமை திருத்த மசோதா 2003 நாடாளுமன்ற நிலைக்குழுவால்  விவாதிக்கப்பட்டு பின்னர் முன்வைக்கப்பட்டது.  அந்தக் குழு மற்றும் நாடாளுமன்ற நிலைக்குழுவில் உறுப்பினர்களாக இருந்த பல காங்கிரஸ் உறுப்பினர்கள் இங்கே இன்னும்  அதே அறிக்கையில் "அண்டை நாடுகளால் வரும் சிறுபான்மையினரை இரண்டு பிரிவினராகக் காண வேண்டும், ஒன்று மத துன்புறுத்தல் காரணமாக நம் நாட்டிற்குள் வருபவர்கள்;  மற்றொன்று - அங்கு நிலவும் உள்நாட்டு இடையூறு காரணமாக சட்டவிரோதமாக நாட்டிற்குள் வந்து குடியேறியவர்கள்." இது குழுவின் அறிக்கை. இன்று இதைப்பற்றி இந்த அரசு பேசும்போது ஏன் 17 ஆண்டுகள் கழித்து இத்தனை கலவரம்.

அவைத்தலைவர் அவர்களே, பிப்ரவரி 28, 2004 அன்று, ராஜஸ்தான் முதலமைச்சரின் வேண்டுகோளின் பேரில், பாகிஸ்தானில் இருந்து வந்த சிறுபான்மை இந்து சமூக மக்களுக்கு இந்திய குடியுரிமை வழங்க ராஜஸ்தானின் இரண்டு மாவட்டங்கள் மற்றும் குஜராத்தின் 4 மாவட்டங்களை சேகரிப்பவர்களுக்கு மத்திய அரசு உரிமை வழங்கியது. . இந்த விதி 2005 மற்றும் 2006 ஆம் ஆண்டுகளில் நடைமுறையில் இருந்தது. 2005 மற்றும் 2006 ஆம் ஆண்டுகளில் நீங்கள் ஒருவராக இருந்தீர்கள். பின்னர் அரசியலமைப்பின் அடிப்படை உத்வேகத்திற்கு எந்த அச்சுறுத்தலும் இல்லை, அது அதற்கு எதிரானதல்ல. இன்றைக்குப் பத்து ஆண்டுகளுக்கு முன்னால் எல்லாமே சரியாகத்தான் இருந்தது. எந்த சத்தமும் இல்லை. இன்று திடீரென்று உங்கள் உலகம் மாறிவிட்டது. தோல்வி. உங்களது தோல்வி இந்த அளவிற்குப் பாடுபடுத்தும் என்று நான் நினைக்கவில்லை.

மரியாதைக்குரிய அவைத்தலைவர் அவர்களே, என்.பி.ஆர் பற்றியும் நிறையவே விவாதிக்கப்படுகிறது. மக்கள் தொகை கணக்கெடுப்பு மற்றும் என்.பி.ஆர்  ஆகியவை நாட்டில் முன்பே செய்யப்பட்ட பொதுவான நிர்வாக நடவடிக்கைகள். ஆனால் வாக்கு வங்கி அரசியலில் இத்தகைய நிர்ப்பந்தம் இருக்கும்போது, ​​2010 ல்  நீங்களே கொண்டுவந்த என்.பி.ஆரை மக்களிடையே தவறான தகவல்களை பரப்பி இன்று அதை எதிர்க்கிறீர்கள்.

மரியாதைக்குரிய அவைத்தலைவர் அவர்களே, மக்கள் தொகை கணக்கெடுப்பையும் நீங்கள் பார்த்தால், நாட்டின் சுதந்திரத்திற்குப் பிறகு, முதல் பத்தாண்டுகளில் சில கேள்விகள் இருக்கும், சில கேள்விகள் இரண்டாவது பத்தாண்டுகளில் அகற்றப்படும், சில சேர்க்கப்படும். தேவை ஏற்படும்போது, ​​அவை நிர்வாகத்தின் ஒவ்வொரு அம்சத்திலும் அறியப்படுகின்றன, சிறிய மாற்றங்கள் எப்போதும் நிகழ்ந்து கொண்டே இருக்கும். வதந்திகளை பரப்பும் வேலையை நாம் செய்யக்கூடாது. நம் நாட்டில் தாய்மொழிக்கு இவ்வளவு பெரிய நெருக்கடி ஒருபோதும் இருந்ததில்லை. இன்று ஏராளமான மக்கள் சூரத்திலிருந்து ஒடிசாவுக்கு குடிபெயர்ந்துள்ளனர். நாங்கள் ஒடியா பள்ளியை நடத்த மாட்டோம் என்று குஜராத் அரசு சொன்னால், அது எவ்வளவு காலம் தொடர முடியும். யார் எந்த தாய்மொழியைப் பேசுகிறார்கள், அவரது தந்தை எந்த மொழியைப் பேசினார் என்பது பற்றிய தகவல்கள் அரசாங்கத்திடம் இருக்க வேண்டும். அதன் பின்னர்தான் ஒடியா மொழிப் பள்ளிகளை சூரத்தில் தொடங்கலாம்  என்று நான் நம்புகிறேன். முன்பெல்லாம் இடப்பெயர்வு பெரிதாக இல்லை. இன்று பெரிதாக இடப்பெயர்வு நிகழும்போது இது அவசியம்.

மரியாதைக்குரிய அவைத்தலைவர் அவர்களே, முன்னர் நம் நாட்டில் இடப்பெயர்வு சிறிய அளவில்தான் இருந்தது. காலப்போக்கில், நகரங்கள் மீதான ஈர்ப்பு அதிகரித்து வருகிறது, நகரங்களின் வளர்ச்சி, மக்களின் விருப்பங்களை மாற்றுகிறது, எனவே கடந்த 30-40 ஆண்டுகளில் இடப்பெயர்வு அதிகமாக நிகழ்வதை நாம் தொடர்ந்து காண்கிறோம். இப்போது நானும் இந்த இடம்பெயர்வுக்கு உட்பட்டவன், இன்று வரை, எந்த மாவட்டங்களில் இருந்து குடியேற்றம் உள்ளது, யார் மாவட்டத்தை விட்டு வெளியேறுகிறார்கள் என்று தெரியாமல் அந்த மாவட்டத்தின் வளர்ச்சிக்கு நீங்கள் முன்னுரிமை கொடுக்க முடியாது.

இரண்டாவதாக பல வதந்திகளை பரப்புவது, மக்களை தவறாக வழிநடத்துவது, நீங்கள் 2010 இல் தேசிய மக்கள் தொகை பதிவேடு (என்பிஆர்)-ஐ கொண்டு வந்தீர்கள். 2014 முதல் நாங்கள் இங்கு அமர்ந்திருக்கிறோம், அதே பதிவுகள் குறித்து யாரிடமும் கேள்விக்குறியை வைத்திருந்தோமா? எங்களிடம் உள்ளது. உங்கள் நேரத்தின் என்பிஆர் பதிவு. அந்த பதிவின் அடிப்படையில் இந்த நாட்டின் எந்த குடிமகனும் சித்திரவதை செய்யப்படவில்லை.

மரியாதைக்குரிய அவைத்தலைவர் அவர்களே,  அதுமட்டுமல்ல. அப்போதைய உள்துறை அமைச்சர், தேசிய மக்கள் தொகை பதிவேட்டைத் தொடங்கும்போது, ​​ஒவ்வொரு பொதுவான குடியிருப்பாளரின், வழக்கமான குடியிருப்பாளரின் பதிவேட்டில் சேர வேண்டியதன் அவசியத்திற்கு சிறப்பு முக்கியத்துவம் கொடுத்திருந்தார், மேலும் அனைவரும் இந்த முயற்சியில் ஒரு பகுதியாக இருக்க வேண்டும் .மக்களைப் பயிற்றுவிக்கவும், மக்கள் என்.பி.ஆர்.ஐ ஆதரிக்கவும் ஊக்கப்படுத்துமாறு ஊடகங்களுக்கு அவர் வேண்டுகோள் விடுத்தார். இதற்கெனவே அப்போதைய உள்துறை அமைச்சர் மக்களுக்கு வெளிப்படையான ஒரு வேண்டுகோளையும் விடுத்தார்.

யுபிஏ அரசுதான் 2010 இல் என்.பி.ஆரை அறிமுகப்படுத்தியது, மேலும் 2011 ஆம் ஆண்டில் என்.பி.ஆருக்கான உடற்கூறுகளின் தரவுகளையும் சேகரிக்கத் தொடங்கியது. உங்கள் அரசாங்கம், என்.பி.ஆரின் கீழ், கோடிக்கணக்கான குடிமக்களின் பதிவுகளை பதிவுசெய்து ஸ்கேன் செய்யும் பணிகள் 2014-இல் நிறைவடைந்தன. அதன்பிறகு இதர பணிகள் உடற்கூறுகளின் தரவு சேகரிப்பு நடந்து கொண்டிருந்தது. நான் உங்கள் பதவிக்காலம் பற்றி பேசுகிறேன்.

அன்று நீங்கள் தயாரித்த அந்த என்பிஆர் பதிவுகளை 2015 இல் நாங்கள் புதுப்பித்தோம். மேலும் இந்த என்பிஆர் பதிவுகளின் மூலம், வங்கி கணக்குக்கான பிரதமர் திட்டம் மற்றும் அனைத்து அரசு திட்டங்களின் மூலமாக  நேரடி நன்மை பெறுவோருக்கான பணப்பரிமாற்றம், நேரடியாக பயனாளிகளை சேர்க்க நேர்மறையான வழியில் என்பிஆர் இன் பதிவைப் பயன்படுத்தினோம். இது ஏழைகளுக்கு நன்மைகளை வழங்கியது. 

ஆனால் இன்று, இதை அரசியல் ஆக்குவதன் மூலம், நீங்கள் என்பிஆர்-ஐ எதிர்க்கிறீர்கள். மேலும் கோடிக்கணக்கான ஏழைகள் இந்த பொது நலத் திட்டங்களின் ஒரு பகுதியாக மாறுவதைத் தடுக்கும் பாவத்தையும் செய்கிறீர்கள். அவர்களின் அற்பமான அரசியல் கதைக்காக அவர்கள் என்ன செய்தாலும், அவர்களின் ஏழை எதிர்ப்பு மனநிலை நன்றாகவே அம்பலமாகிறது.

2020 மக்கள் தொகை கணக்கெடுப்போடு, என்பிஆர் பதிவுகளை புதுப்பிக்க  விரும்புகிறோம், இதனால் ஏழைகளுக்கான இந்த திட்டங்கள் இன்னும் திறம்பட,  நேர்மையாக அவர்களை சென்றடைய முடியும். ஆனால் இப்போது நீங்கள் எதிர்க்கட்சியில் இருப்பதால், நீங்கள் தொடங்கிய என்பிஆர் மோசமாகத் தெரிகிறது.

மரியாதைக்குரிய அவைத்தலைவர் அவர்களே, அனைத்து மாநிலங்களும் இதற்குத் தேவையான அரசிதழ் மூலமான  அறிவிப்புகளை வெளியிடுவதன் மூலம் என்பிஆர்-க்கு ஒப்புதல் அளித்துள்ளன. இப்போது சில மாநிலங்கள் திடீரென தங்கள் நிலைபாட்டினை தலைகீழாக மாற்றிக் கொண்டு அதில் தடைகளை ஏற்படுத்தி வருகின்றன, மேலும் இதன் முக்கியத்துவத்தையும் ஏழைகளுக்கு அதன் நன்மைகளையும் வேண்டுமென்றே புறக்கணித்து வருகின்றன. ஆட்சியில் இருந்த 70 ஆண்டுகளில் நீங்கள் செய்யாத இதுபோன்ற செயல்களை நாங்கள் செய்வதை எதிர்த்து, எதிர்க்கட்சியில் அமர்ந்திருக்கும்போது  இப்படிப் பேசுவது உங்கள் தகுதிக்குப் பொருத்தமானதாக இல்லை.

ஆனால் நீங்களே கொண்டு வந்த, வளர்த்தெடுத்த வேலைகள் எல்லாமே  ஊடகங்களில் பெரிதாக  விளம்பரப்படுத்தப்பட்டன. இப்போது நீங்கள் அதைத் தீண்டத்தகாதது என்று அழைப்பதன் மூலம் எதிர்க்க முயற்சிக்கிறீர்கள்! இது உங்கள் வழிகாட்டிகள் மட்டுமே இதை தீர்மானிக்கிறார்கள்; அதுவும் வாக்கு வங்கி அரசியலுக்காக. இதில் உங்களை வினவும் கேள்வி இருந்தால், வளர்ச்சி மற்றும் பிரிவினைப் பாதைகளுக்கு இடையில், மக்களைப் பிளவுபடுத்தும் பாதையை நீங்கள் வெளிப்படையாகத் தேர்வு செய்கிறீர்கள்.

இத்தகைய சந்தர்ப்பவாத எதிர்ப்பு எந்தவொரு கட்சிக்கும் பயனளிக்கலாம் அல்லது தீங்கு விளைவிக்கலாம். ஆனால் நாடு நிச்சயமாக இதனால் பாதிக்கப்படுகிறது. இது நாட்டின் சூழலை அவநம்பிக்கை கொண்டதாக மாற்றுகிறது. எனவே, மக்களிடையே உண்மையை மட்டுமே கொண்டு வர வேண்டும் என்பதே எனது வேண்டுகோள்.

இந்த பத்தாண்டுகளில் இந்தியாவிடம் இருந்து உலகம் அதிகம் எதிர்பார்க்கிறது.  இந்தியர்கள் எங்களிடமிருந்து அதிக எதிர்பார்ப்புகளைக் கொண்டுள்ளனர். இந்த எதிர்பார்ப்புகளை நிறைவேற்ற நாம் அனைவரும் மேற்கொள்ளும் முயற்சிகள் 130 கோடி இந்தியர்களின் விருப்பங்களுடன்  ஒத்துப்போக வேண்டும்.

தேசிய நலன் சார்ந்த அனைத்து விஷயங்களிலும், இந்த அவை அனைவருடனும் இணைந்து  செல்கிறது. அனைவருடனும் ஒன்றாக நகர்கிறது. ஒற்றுமையாக முன்னேறுகிறது, இத்தகைய உறுதியுடன் நாம் நகரும்போது மட்டுமே இது சாத்தியமாகும். விவாதங்கள், கலந்துரையாடல்கள் எல்லாம் இருக்கட்டும். பின்னர் முடிவுகளை எடுக்கலாம்.

திரு. திக்விஜய் சிங்ஜி இங்கு ஒரு கவிதையை வாசித்தார். எனக்கும் ஒரு கவிதை நினைவுக்கு வருகிறது.

எனக்கு வீடில்லை; வெட்டவெளிதான்.

உண்மையான கனிவு, விருப்பம், கனவுகள் நிரம்பியது அது.

எனது நாடு வளர்ச்சிபெற்றதாக, மகத்தானதாக இருப்பதை பார்க்க விழைகிறேன்

மகிழ்ச்சியும் அமைதியும் நிரம்பிக் கிடக்க கனவு காண்கிறேன்!!

நமது முன்னாள் குடியரசுத் தலைவரும் இந்தியாவின் மகத்தான புதல்வரான டாக்டர் ஏபிஜே கலாம் அவர்களின் இந்த வரிகளை நான் மிகவும் விரும்புகிறேன். நீங்கள் உங்களுக்கு விருப்பமான வரிகளை விரும்புகிறீர்கள். உங்கள் தேர்வை மாற்றிக் கொள்ள விரும்புகிறீர்களா? அல்லது 20ஆம் நூற்றாண்டைப் பற்றியே நினைத்துக் கொண்டு 21ஆம் நூற்றாண்டில் வாழப்போகிறீர்களா என்பதை நீங்களை முடிவு செய்து கொள்ளுங்கள்.

இந்த புதிய இந்தியா முன்னேறியுள்ளது. இது கடமையின் பாதையில் செல்லத் தொடங்கியது; மேலும் இந்தக் கடமை அனைத்து உரிமைகளின் சாரத்தையும் உள்ளடக்கியது. இது மகாத்மா காந்தியின் செய்தி மட்டுமே.

காந்திஜி சொன்னபடி கடமையைச் செய்யும் பாதையில் முன்னேறுவோம், மேலும் வளமான, திறமையான, உறுதியான புதிய இந்தியாவை உருவாக்கத் தொடங்குவோம். இந்தியாவின் ஒவ்வொரு விருப்பமும் ஒவ்வொரு தீர்மானமும் நம் அனைவரின் கூட்டு முயற்சிகள் மூலமாகவே உணரப்படும்.

மேதகு குடியரசுத் தலைவர் மற்றும் மாண்புமிகு உறுப்பினர்கள் அனைவருக்கும் எனது மனமார்ந்த நன்றியைத் தெரிவித்துக் கொள்கிறேன், மேலும் நாட்டின் ஒற்றுமை மற்றும் ஒருமைப்பாட்டிற்கு முன்னுரிமை அளிப்பதன் மூலம், இந்திய அரசியலமைப்பின் உயர்வான உணர்வுகளுக்கு மதிப்பளிப்பதன் மூலம், நாம் ஒன்றுபட்டு நடப்போம், நம் நாட்டை முன்னோக்கி கொண்டு செல்வதற்கான பங்களிப்பு. இந்த விவாதத்தை வளப்படுத்திய மரியாதைக்குரிய குடியரசுத் தலைவர், மரியாதைக்குரிய உறுப்பினர்களுக்கு இந்த  தருணத்தில் மீண்டும் எனது நன்றியைத் தெரிவித்துக் கொள்கிறேன்.

மிக்க நன்றி.

*****

(Release ID: 1605061) Visitor Counter : 635