କେନ୍ଦ୍ର ସରକାରୀ କର୍ମଚାରୀ ଏବଂ ପେନସନଭୋଗୀ ମାନଙ୍କ ନିମନ୍ତେ ଆୟୁର୍ବେଦ, ଯୋଗ ଓ ପ୍ରାକୃତିକ ଚିକିତ୍ସା ପଦ୍ଧତି ସୁବିଧା ଥିବା ଡେ କେୟାର ଥେରାପି କେନ୍ଦ୍ର ବ୍ୟବସ୍ଥା ପାଇଁ ଏକ ପ୍ରସ୍ତାବକୁ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଅନୁମୋଦନ କରିଛି । ଆୟୁର୍ବେଦ, ଯୋଗ ଓ ପ୍ରାକୃତିକ ଚିକିତ୍ସା ସୁବିଧା ଯୋଗାଉଥିବା ଘରୋଇ ଡେ କେୟାର ଥେରାପି କେନ୍ଦ୍ରଗୁଡିକ  ମଧ୍ୟ କେନ୍ଦ୍ର ସରକାରଙ୍କ ସ୍ୱାସ୍ଥ୍ୟ ଯୋଜନା (ସିଜିଏଚଏସ) ଅଧୀନରେ ଅନୁବନ୍ଧିତ ହୋଇ ପାରିବେ ।  ବର୍ତ୍ତମାନର ସିଜିଏଚଏସ ଅଧୀନରେ ଯେଭଳି ଘରୋଇ ହସ୍ପିଟାଲଗୁଡ଼ିକ ଅନୁବନ୍ଧିତ ହୋଇଛନ୍ତି ସେହିଭଳି ପ୍ରାକୃତିକ ଚିକିତ୍ସା କେନ୍ଦ୍ରଗୁଡିକ ମଧ୍ୟ ଅନୁବନ୍ଧିତ ହେବେ ।

ଉଭୟ କାର୍ଯ୍ୟରତ ଓ ପେନସନଧାରୀ ସିଜିଏଚଏସ ହିତାଧିକାରୀମାନେ ଏହି ନୂତନ ସୁବିଧା ପାଇପାରିବେ । ଆୟୁଷ ପଦ୍ଧତିର ଲୋକପ୍ରିୟତା କ୍ରମଶଃ ସିଜିଏଚଏସ ହିତାଧିକାରୀ ଓ ସାଧାରଣ ଜନତାଙ୍କ ମଧ୍ୟରେ ବୃଦ୍ଧି ପାଉଥିବାରୁ ସ୍ୱାସ୍ଥ୍ୟ ମନ୍ତ୍ରଣାଳୟ ଏହି ପଦକ୍ଷେପ ନେଇଛି । ପ୍ରଥମ ପଦକ୍ଷେପ ସ୍ୱରୂପ ଅଗ୍ରଣୀ ଭିତ୍ତିରେ ଡେ କେୟାର ଥେରାପି କେନ୍ଦ୍ରଗୁଡ଼ିକୁ ଦିଲ୍ଲୀ ଏବଂ ଏନସିଆରରେ ବର୍ଷକ ନିମନ୍ତେ ଲାଗୁ କରାଯିବ ଓ ପରେ ଅନ୍ୟାନ୍ୟ ଅଞ୍ଚଳରେ ଏହା କାର୍ଯ୍ୟକରୀ ହେବ ।

ସ୍ଵାସ୍ଥ୍ୟର ଉନ୍ନତି ଓ ସୁଧାର, ସ୍ଵାସ୍ଥ୍ୟ ବାବଦ ବ୍ୟୟ ହ୍ରାସ ଓ ରୋଗୀମାନଙ୍କର ସୁଖସ୍ଵାଚ୍ଛନ୍ଦକୁ ଦୃଷ୍ଟିରେ  ରଖି ଏହି ଯୋଜନା ତ୍ୱରାନ୍ୱିତ ହେବ । ଏହି କେନ୍ଦ୍ରଗୁଡ଼ିକ ଚିକିତ୍ସା ନିମନ୍ତେ ଦିନକରୁ ଅଧିକ ରହିବାକୁ ପଡୁନଥିବା ଶିଶୁ ଓ ବୟସ୍କ ରୋଗୀମାନଙ୍କ ନିମନ୍ତେ  ଖୁବ ସୁବିଧାଜନକ ହେବ । ଆୟୁଷ ପଦ୍ଧତିରେ ଚିକିତ୍ସା ପାଇଁ ଏହା ଭାରତ ସରକାରଙ୍କ ଆଉ ଏକ ଗୁରୁତ୍ଵପୂର୍ଣ୍ଣ ପଦକ୍ଷେପ ।

ବର୍ତ୍ତମାନ ପଞ୍ଚକର୍ମ ଓ ଅବଙ୍ଗ୍ୟ ଇତ୍ୟାଦି ଚିକିତ୍ସା ସିଜିଏଚଏସ ଅନୁବନ୍ଧିତ ହସ୍ପିଟାଲଗୁଡିକରେ ଭର୍ତ୍ତି ହେଲା ପରେ ହିଁ ରୋଗୀମାନଙ୍କ ନିମନ୍ତେ ଉପଲବ୍ଧ ହେଉଛି । ଏଥିପାଇଁ ସିଜିଏଚଏସକୁ ରୁମ ଦେୟ ଇତ୍ୟାଦି ବହନ କରିବାକୁ ପଡୁଛି । ଡେ କେୟାର ସେଣ୍ଟର ଯୋଗୁଁ ହସ୍ପିଟାଲରେ ଭର୍ତ୍ତି ହେବାର ବ୍ୟୟ ହ୍ରାସ ପାଇବା ସହିତ ରୋଗୀମାନଙ୍କ ନିମନ୍ତେ ମଧ୍ୟ ସୁବିଧା ହେବ । ଆୟୁଷ ଡେ କେୟାର ସେଣ୍ଟରରେ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର (ସିଏଚସି), ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର (ପିଏଚସି) ଡ଼ିସପେନସରୀ, କ୍ଲିନିକ, ପଲିକ୍ଲିନିକ ଓ ସ୍ଥାନୀୟ କର୍ତ୍ତୁପକ୍ଷଙ୍କ ନିକଟରେ ପଞ୍ଜୀକୃତ ଅନ୍ୟାନ୍ୟ କେନ୍ଦ୍ରଗୁଡ଼ିକ ମଧ୍ୟ ଅନ୍ତର୍ଭୁକ୍ତ । ତେବେ ପଞ୍ଜୀକୃତ ଆୟୁଷ ମେଡିକାଲ ଡାକ୍ତରଙ୍କ ତତ୍ଵାବଧାନରେ ସେଠାରେ ଭେଷଜ, ଶଲ୍ୟ ଓ ଅର୍ଦ୍ଧଶଲ୍ୟ ଚିକିତ୍ସା ହେଉଥିବା ଆବଶ୍ୟକ । ଏଥିପାଇଁ ନିମ୍ନୋକ୍ତ ବିଷୟଗୁଡିକ ରହିଥିବା ଦରକାର

(କ)     ଯୋଗ୍ୟତା ସମ୍ପନ୍ନ ପଞ୍ଜୀକୃତ ଆୟୁଷ ମେଡିକାଲ ଚିକିତ୍ସକ

(ଖ)    ଉତ୍ସର୍ଗୀକୃତ ଆୟୁଷ ଥେରାପି ଅନୁଭାଗ (ଆବଶ୍ୟକତା ଅନୁସାରେ)

(ଗ)    ରୋଗୀମାନଙ୍କର ଦୈନିକ ରେକର୍ଡ ଓ ବୀମା କମ୍ପାନୀର ସ୍ଵୀକୃତପ୍ରାପ୍ତ ପ୍ରତିନିଧିମାନଙ୍କର       ପ୍ରବେଶ ଅନୁମତି     

(ଘ)    ଘରୋଇ କେନ୍ଦ୍ରଗୁଡ଼ିକରେ ଏନଏବିଏଚ ଅଧିସ୍ଵୀକୃତି କିମ୍ବା ପ୍ରବେଶସ୍ତରୀୟ ପ୍ରମାଣପତ୍ର

**********