প্রধান মন্ত্রী শ্রী নরেন্দ্র মোদীনা ঙসি বেক্সিন পুথোকপগী অমসুং শাবগী থবক থৌওংশিং কুপ্না য়েংশিন্নবা সহত অহুমদা চৎখ্রে। মহাক্না অহমদাবাদকী জাইদস বাইওতেক পার্ক, হাইদ্রবাদকী ভারত বাইওতেক অমসুং পুনগী সিরম ইন্সতিত্যুত ওফ ইন্দিয়াদা চৎখি।

সাইন্তিস্তশিংগী থৌনা হাপ্পীনবা অমসুং বেক্সিন পুথোকপগী খোংচৎ অসিগী অরুবা তানফম অসিদা মখোয়না হোৎনরিবশিং অসি হেনগৎনবা মতেং পাংনবা প্রধান মন্ত্রীনা মখোয়গা হকথেংননা উন্নবীবা অসিদা মখোয়না নুংঙাইবা ফোঙদোকখি। প্রধান মন্ত্রীনা ভারতকী লমদম অসিগী ওইনা পুথোকপচা বেক্সিন অসিনা হৌজিক ফাওবদা খোংজেল য়াংনা খুমাং চাউশিনবা অসিদা চাউথোকচবা পোকই হায়না ফোঙদোকখি। মহাক্না বেক্সিন পুথোকপগী খোংচৎ অসিগা লোইননা বেক্সিন য়েন্থোকপগী থবক থৌওং হেন্না ফগৎহন্নবা পাউতাকশিং লৌদুনা ভারতনা অফবা সাইন্সকী প্রিন্সিপলশিং করম্না ঙাক্না চৎপগে হায়বগী মতাংদা ৱা ঙাংখি।

প্রধান মন্ত্রীনা ভারতনা বেক্সিনশিং অসি হকচাং ফনা থম্বদা মরু ওইবা খক্তা নত্তনা মালেমগী ওইনা মরু ওই অমদি ভাইস অসিগী মায়োক্তা পুন্না লান্থেংনবদা ঐখোয়গা য়ুম্লোন্নরিবা য়াওনা অতোপ্পা লৈবাকশিংদা মতেং পাংবা অসি ভারতকী মথৌনি হায়না ফোঙদোকখি।

মহাক্না সাইন্তিস্তশিংদা লৈবাক অসিনা মাগী রিগুলেতরী প্রোসেস করম্না হেন্না ফগৎহনগদগে হায়বগী মতাংদা অরোৎপা লৈতনা ফোঙদোক্নবা হায়খি। সাইন্তিস্তশিংনা মখোয়না কোবিদ-১০ হেন্না মপুং ফানা লান্থেংননবা মখল কয়াগী অনৌবা অমদি রিপর্পজ দ্রগশিং করম্না পুথোকপগে হায়বগী শমলপ্পা ৱারোলগী প্রজেন্তেসন অমসু  উৎখি।

অহমদাবাদকী জাইদস বাইওতেক পার্ক চৎলুবদা প্রধান মন্ত্রীনা হায়, “জাইদস কাদিলানা পুথোক্লিবা লমদম অসিগী ওইবা দি.এন.এ.দা য়ুমফম ওইবা বেক্সিনগী মতাংদা হেন্না খঙনবা অহমদাবাদতা লৈবা জাইদস বায়োতেক পার্ক্তা চৎলুরে। ঐহাক্না মসিদা হোৎনরিবা তীম অদুবু মখোয়গী থবক অদুগীদমক্তা থাগৎলি। ভারত সরকারনা মসিগী খোংচৎ অসিদা মখোয়বু মতেং পাংনবা মখোয়গা লোইননা মাইপুননা থবক তৌমিন্নরি।”

হাইদ্রবাদকী ভারত বাইওতেক ফেসিলিতীদা চৎলুরাব মতুংদা প্রধান মন্ত্রীনা হায়, “হাইদ্রবাদকী ভারত বাইওতেক ফেসিলিতীদা লমদম অসিগী ওইবা মখোয়গী কোবিদ-১৯ বেক্সিনগী মতাংদা খঙহল্লকখি। হৌজিক ফাওবদা ত্রাইএলশিংদা  মখোয়না খুমাং চাউশিনবা ঙম্বগীদমক্তা সাইন্তিস্তশিংবু থাগৎপা ফোংদোক্লমখি। মখোয়গী তীমনা খোংজেল য়াংনা খুমাং চাউশিনবদা মতেং পাংনবা আই.সি.এম.আর.গা লোইননা পুন্না থবক তৌরি।”

সিরম ইন্সতিত্যুত চৎলুরবা মতুংদা প্রধান মন্ত্রীনা, "সিরম ইন্সতিত্যুত ওফ ইন্দিয়াগী তীমগা লোইননা নীংথিজনা ৱারী ৱাতাই শাখি। বেক্সিন শাবা মখা তানা হেনগৎহন্নবা মখোয়না করম্না থৌরাং তৌবগী হায়বগী মতাংদা হৌজিক ফাওবদা খুমাং চাউশিল্লিবা অদুগী অকুপ্পা মরোল মখোয়না পাউদমখি। অমসুং মখোয়গী মেন্যুফেকচরিং ফেসিলিতীদা চৎতুনা য়েংশিনখি।" হায়না ত্বীৎ তৌখি।

*******