রাস্ত্রপতিগী লোইশঙ

মরৈ য়েৎনবনা ৱাথোক অমা ওইবা য়াদনবা গনতন্ত্র চৎপা লৈবাক অমদা ৱারি শানবা অসিনা খ্বাইদগী ফবা পাম্বৈনি: রাস্ত্রপতি কোবিন্দ

ভারতকী রাস্ত্রপতিনা কেবরিয়াদা ৮০সুবা ওল ইন্দিয়া প্রেসাইদিং ওফিসারস কনফরেন্স হৌদোকখ্রে

Posted On: 25 NOV 2020 1:58PM by PIB Imphal

ঙসি গুজরাতকী কেবরিয়াদা ৮০সুবা ওল ইন্দিয়া প্রেসাইদিং ওফিসারস কনফরেন্স হৌদোকপা হৌরমদা ভারতকী রাস্ত্রপতি শ্রী রাম নাথ কোবিন্দনা হায়খি, মরৈ য়েৎনবনা ৱাথোক অমা ওইবা য়াদনবা গনতন্ত্র চৎপা লৈবাক অমদা ৱারি শানবা অসিনা খ্বাইদগী ফবা পাম্বৈনি।

রাস্ত্রপতিনা হায়খি গনতন্ত্র চৎপা সংসদ অমদা লৈবাক ঙাক্লিবা দল অদুগা লোয়ন্না ওপোজিসনগীসু মরুওইবা থৌদাং অমা লৈ অমসুং মরম অদুনা অনি অসিগী মরক্তা নুংশিনবা, মতেং পাংনবা অমসুং ৱাহন্থোক লৈনা ৱারি শানবা অসি দরকার ওই। হাওসতা মীয়ামগী মীহুৎশিং অফবা ৱাফমশিং মরি য়েৎনবা অমসুং ৱারি শানবা পুক্নিং থৌগৎনবা অফবা ফিবম অমা থম্বা অসি প্রেসাইদিং ওফিসারশিংগী থৌদাংনি।

রাস্ত্রপতিনা হায়খি ফজবা অমসুং অচুম্বা অসি গনতন্ত্র চৎপা ঐখোয়গী লৈবাক্কী য়ুম্ফমনি। হাওসকী স্পিকরগী চৌক্রি অসিনা ইকায়খুম্নবা অমসুং মথৌ পাংথোকপা অনিমক্কী খুদম্নি। মসিদা পুকচেল শেংবা অমসুং অচুম্বা দরকার ওই। ফম অসি মীচং মীখাই নাইদবা, অচুম্বা অমসুং ফজবগী খুদম্নি অমসুং হায়রিবা অৱাংবা ফিদমশিং অসিনা মখোয়গী থবকশিংদা ইথিল পীগনি হায়না প্রেসাইদিং ওফিসারশিংদা থাজবা থম্লি।

রাস্ত্রপতিনা হায়খি গনতন্ত্র চৎপা লৈবাক অসি মীয়ামগী য়াইফনবা খ্বাইদগী ফবা থবকশিংনা উৎকদবনি। মরম অদুনা সংসদ অমসুং লেজিসলেচরগী মেম্বর অমা ওইবা অসি চাউথোকচনিংঙাই ওইবা ৱাফম অমনি। মীয়াম য়াইফনবা অমসুং লৈবাক চাউখৎনবা মেম্বরশিং অমসুং প্রেসাইদিং ওফিসারশিংনা অমগা অমগী ইকায়খুম্নবা ঙাক্নগদবনি। প্রেসাইদিং ওফিসারশিং অৱাংবা থাক্তা থমদুনা, গনতন্ত্র চৎপা লৈঙাক্কীদমক অমসুং মখোয় মশাগীদমক এম.পিশিং অমসুং এম.এল.এশিংনা ইকায়খুম্নবা ঙাক্কদবনি। 

রাস্ত্রপতিনা হায়খি ঐখোয়গী পর্লিয়ামেন্তরি সিস্তেম অসিগীদমক পর্লিয়ামেন্ত অমসুং লেজিসলেতিপ এশেমব্লিশিং অসি মরুওইবা য়ুম্বীনি। ঐখোয়গী ইরৈচাশিংগী তুংগী য়াইফনবগীদমক থবক পাংথোক্নবা মরুওইবা থৌদাং অমা মখোয়না লৌরি। হৌখিবা চহি খর অসিদা, মীয়ামগী অনিংবা, অপাম্বশিং অমসুং খঙবা হেনগৎলক্লে। মরম অদুনা, পর্লিয়ামেন্ত অমসুং লেজিসলেচরশিংগী থৌদাংশিং হেনগৎনবা মিৎয়েং চঙগদবনি। মীয়ামগী মীহুৎশিংনা গনতন্ত্রগী অচুম্বা ৱাখল্লোনশিং ঙাক্কনি হায়বগী থাজবা থম্লি। গনতন্ত্রগী লোয়শঙশিং অমসুং মীয়ামগী মীহুৎশিংগী মমাঙদা লৈরিবা খ্বাইদগী চাউবা শিংনবদি মীয়ামগী অনিংবশিং থুংনবা থবক পাংথোকপা অসিনি।

চহি অসিগী মীফমগী পান্দম ‘মপাঙ্গল কনবা গনতন্ত্র চৎপা লৈবাক অমা ওইনবা-লেজিসলেচর, ইজুকিউতিপ অমসুং জুদিসিয়ারিগী মরক্তা অফবা মরী থম্নবা’ অসিদা হরাওবা ফোঙদোক্লদুনা রাস্ত্রপতিনা হায়খি লৈবাক অমগী হকচাং কয়াৎ অহুম- লেজিসলেচর, ইজুকিউতিপ অমসুং জুদিসিয়ারি ফজনা থবক পাংথোক্লি অমসুং মসিগী চৎনবগী অসি ভারত্তা অচেৎপা মরা তারে। মীফম অসিগী মনুংদা খন্নখিবা ৱাফমশিংগী লৌবা ৱারেপশিং চৎনদুনা ঐখোয়গী গনতন্ত্র চৎপা লৈঙাক অসি হেন্না মপাঙ্গল কনখৎহল্লগনি।

রাস্ত্রপতিনা হায়খি গনতন্ত্রগী লৈঙাক অমগী মরুওইবা পান্দমদি মীয়ামগী য়াইফনবা থবক পাংথোকপা, মরুওইনা ঐখোয়গী খুন্নাইগী লায়রবা, তোল্লবা অমসুং ফিবম চাদ্রবা কাংলুপশিং চিংখৎপা অমসুং লৈবাক চাউখৎহনবনি। মসিগী পান্দম অসি ফংনবা লৈঙাক্কী কয়াৎ অহুম অসিনা মখা তানা পুন্না থবক তৌমিন্নগনি হায়বগী থাজবা থম্লি।

****



(Release ID: 1675776) Visitor Counter : 6