১. মন্ত্রী শ্রী নরেন্দ্র মোদীনা ২০২০গী নবেম্বর ২১-২২দা সাউদি অরাবিয়াদা ভর্চ্যুএল ফোর্মেৎতা পাঙথোকপা ১৫শুবা জি২০ সম্মিৎতা শরুক য়াখ্রে। জি২০ সম্মিৎকী অনিশুবা নুমিৎকী এজেন্দা অসি ইনক্লুসিব, সস্তেনেবল অমসুং মপাঙ্গল কনবা তুংলমচৎ অমা ওইহন্নবগী মতাংদা সেসন অমদা মীৎয়েং থমখি অমসুং গ্রহা অসিবু ঙাক শেন্নবগী মতাংদা সাইদ ইভেন্ত অমা পাঙথোকখি।
২. প্রধান মন্ত্রীনা মহাক্কী ৱারোলদা কোবিদ মতুংদা ওইরক্কদবা খুন্নাই অসিদা ইনক্লুসিব, মপাঙ্গল কনবা অমসুং সস্তেনেবল রিকবরী মরু ওই, কান্নগদবা মালেমগী ওইবা লৈঙাকপগী মওং-মতৌ মথৌ তাই অমসুং মল্তিলেতরেল ইন্সতিত্যুসনশিংগী মচৎ, লৈঙাকপগী মওং-মতৌ অমসুং প্রোসেসশিংদা ফগৎহনবগী খুত্থাংদা মল্তিলেতরেলদা অহোংবা পুরকপা অসি খ্বাইদগী তঙাই ফদবা ওইরে হায়না ফোঙদোকখি।
৩. প্রধান মন্ত্রীনা মখা তারদুনা ‘মীপুম খুদিংমক চাউখৎহন্নবা’ পান্দম থম্লিবা সস্তেনেবল দিবেলপমেন্ত গোল্সকী ২০৩০গী এজেন্দাগী মরু ওইবা অদু থমখি। মহাক্না হায়খি ভারতনা মাংলোমদা চংশিন্নবা অমসুং ইনক্লুসিব দিবেলপমেন্তগী হোৎনরিবশিং অসিগা মরী লৈনবা ‘রিফোর্ম-পর্ফোর্ম-ত্রান্সফোর্ম’দা য়াওবা চপ মান্নবা ৱাখল্লোন অদু ঙাক্না চৎলি।
৪. কোবিদ-১৯ লাইচৎ শন্দোরকপা অসিগা লোইননা হোংলক্লিবা ফীভম অসিদা ভারতনা ‘মরোমদোম লেপচবা ঙম্বা ভারত’ অমা ওইন্নবা থৌরাং পাইখৎখি হায়না মহাক্না হায়খি। ৱাখল্লোন অসি তুংইন্নদুনা মসিগী তৌবা ঙম্বা অমসুং থাজবা য়াবা অসিদা য়ুম্ফম ওইরগা ভারতনা মালেমগী শেন্মীৎলোন অমসুং গ্লোবেল সপ্লাই চেনশিংগী মরু ওইবা অমসুং থাজবা য়াবা য়ুম্বী অমা ওইরক্লগনি। মালেমগী থাক্তা ভারতনা ইন্তরনেস্নেল সোলর এলাইন্স অমসুং কোলিসন ফোর দিজাস্তর রেজিলেন্ত ইনফ্রাস্ত্রকচর অসিগুম্বা ইন্সতিত্যুসনশিং লিংখৎপগী থৌরাংসু পাইখৎখি।
৫. ‘গ্রহা অসিবু ঙাক শেন্নবগী’ সাইদ ইভেন্ত অমদা রেকোর্দ তৌখিবা মেসেস অমদা প্রধান মন্ত্রীনা অপুনবা, মপুং ফাবা অমসুং অমত্তা ওইবগী মওংদা অইং-অশাদা হোংলক্লিবা অসি লান্থেংনবা মথৌ তাই হায়না ফোঙদোকখি। মহাক্না হায় ভারতনা পেরিস এগ্রীমেন্তগী পান্দমশিং খক্তা ফংনবা হোৎনবা নত্তনা মখোয়গী হেনবা কয়া ফংনবা হোৎনগনি। মহাক্না ভারত অসি অকোইবগী ফীভমগা চান্ন-চিন্ননা হিংবগী য়েলহৌঙৈদগী লৈজরবা চৎনবীনা ইথিল পীখি অমসুং কার্বোন চাং হন্থবা অমসুং ক্লাইমেৎ রেজিলেন্ত দিবেলপমেন্ত এপ্রোচ অমা পাইখৎখি। মহাক্না হায় মীওইবা জাতিনা য়াইফনবা মীপুম খুদিংমক য়াইফবা তাই অমসুং ঐখোয়না থবক শুবা অসি পোত্থোক পুথোক্নবা। পাম্বৈ অমা খক্তা ওইনা উবা য়ারোই। মসিগী মহুত্তা ঐখোয়না শিন্মী খুদিংমক্কী মীওইবগী ইজৎ অদু ফংহনবা তাই। অসিগুম্বা এপ্রোচ অসিনা ঐখোয়গী গ্রহা অসি ঙাক শেন্দুনা থম্বা ঙম্নবগী খ্বাইদগী ফবা পাম্বৈ ওইগনি।
৬. প্রধান মন্ত্রীনা সাউদি অরাবিয়ানা মাই পাক্না রিয়াধ সম্মিৎ পাঙথোকখিবগীদমক থাগৎপা ফোঙদোকখি অমসুং ২০২১দা জি২০গী প্রসিদেন্সীগী ফম পাইগদবা অসিদা ইতালীবু তরাম্না ওকখি। ২০২২দা ইন্দোনেসিয়া, ২০২৩দা ভারত অমসুং ২০২৪দা ব্রাজিলনা জি২০গী প্রসিদেন্সীগী ফম পাইগনি হায়না ৱারেপ লৌখি।
৭. সম্মিৎ অসি লোইশিনবদা পুন্না মালেমগী ওইবা থবক পাইখৎনবা, অমত্তা ওইনা লেপ্নবা অমসুং মল্তিলেতরেলগী কোওপরেসন পীন্দুনা মীপুম খুদিংমক চাউখৎহন্নবা, গ্রহা অসি ঙাক শেন্নবা অমসুং অনৌবা ফ্রন্তিয়রশিং শেমগৎনবগীদমক ২১শুবা চহিচাগী হৌজিক লৈরিবা শিংনবশিং অমসুং খুদোংচাবশিং অসি মায়োক্নবা ঙম্নবা জি২০ লিদর্স দেক্লেরেসন অমা থোকখি।

*****