প্রধানমন্ত্রীগী লোইশঙ

উত্তর প্রদেশতা খুঙ্গংগী থক্নবা ঈশিং পীবগী প্রোজেক্তশিংগী উরেপ-উয়ুং তম্বগী থৌরমদা প্রধান মন্ত্রীনা থমখীবা ৱারোলশিং

Posted On: 22 NOV 2020 2:54PM by PIB Imphal

য়েংবীয়ু, করিগুম্বা পুন্সিগী অচৌবা খুদোংচাদবা অমগী ৱারোইশিন পুরকপা উবা ফংবা মতমদা তোঙানবা থাজবা অমা লাকপনি। মসিগী থাজবা অসিগী মতাংদা অদোমগা ৱারী-ৱাতাই শাবগী থৌরম অমা শিনখিবা অদু তেক্নোলোজীগী খুদোংচাদবা খরা লৈবদগী মীপুম খুদিংগা ৱারী শাবদি ওইথোক্ত্রে অদুবু ঐহাক্না নখোয় পুম্ববু উবদি ঙম্লি। নখোয়না নখোয়গী য়ুমদা হরাওবা ফোংদোক্লিবা, নখোয়না শেৎলিবা ফিজোলশিং অমসুং নখোয়না নয়ুমশিংবু লৈতেংদুনা ফজহল্লিবশিং খুদিংমক ঐহাক্না উবা ফংলি। হায়বদি, নখোয়গী ৱাখল্লোন্দা কয়া য়াম্না নুংঙাইবগে হায়বসি ঐহাক্না মফমসিদগী উবা ফংলি। নখোয়গী হরাওবা, নুংঙাইজবা, মসিগী প্রোজেক্ত অসিবু নখোয়না কয়া য়াম্না মগুন লৈনা লৌরিবা, ঈশিংবু নখোয়না কয়া য়াম্না লুনা খঞ্জবগে হায়বগী মওংশিং অসিনা নখোয়না নখোয়গী য়ুমশিংদা লুহোংবা অমা লৈবদা হরাও তয়াম্বগী মওং অদুগুম্বা অমা ঙসি শাগৎলি।

মসিনা হায়বদি, সরকারনা নখোয়গী খুদোংচাদবশিংবু মশক খঙলি, মদুগী ৱারোইশিন পীনবা অচুম্বা মাইকৈদা চৎলি অমসুং অদোম্না অসুক য়াম্বা মওংদা অমসুং থৱাই য়াওবা অমসুং হরাও-তয়াম্না শরুক য়ারিবা অসিনা প্রোজেক্ত অসিনা হান্ননা খন্নরম্বা মতমদগী হেন্না ঙন্না লোইশিনবা ঙমগনি অমসুং মসিদা অদোম্না থবক হেন্না নীংথিনা শুরবদি শেল খরসু তুংশিনবা ঙমগনি হায়বগী ঐঙোন্দা য়াম্না থাজবা লৈরে। মীয়াম পুম্বনা শরুক য়ারবনিনা, মসিগী মহৈসু য়াম্না চাউনা ফংলগনি।

ইমা বিন্ধ্যাবাসিনা ঐখোয় খুদিংবু য়াম্না চানবীবা অদুনা লমদম অসিগী ইমুং লাখ কয়াগী কান্নগদবা স্কিম অসি হৌদোকপা ঙম্লে। স্কিম অসিগী খুত্থাংদগী ইমুং লাখ কয়া অমদা তোতিদগী অসেংবা ঈশিং ফংলগনি। মসিগী থৌরম অসিদা শরুক য়ারিবী উত্তর প্রদেশকী রাজ্যপাল শ্রীমতি অনন্দিবেন পতেলজী, সোনভদ্রদা লৈরিবা উত্তর প্রদেশকী মুখ্য মন্ত্রী শ্রী য়োগী অদিত্যনাথজী, কেন্দ্রগী মন্ত্রী-মন্দলগী ঐহাক্কী খোঙলোই শ্রীমান গজেন্দ্র সিংহজী, য়ু.পি. সরকারগী মন্ত্রী শ্রী মহেন্দ্র সিংহজী, অতোপ্পা মন্ত্রীশিং, এম.পি. অমসুং এম.এল.এ.শিং, বিন্ধ্য লমদম অসিগী ইচে-ইচল অমসুং ইয়াম্বা-ইনাও খুদিংমকপু ঐহাক্না নোল্লুকচরি অমসুং থাগৎচরি।

মরূপশিং,

বিন্ধ্য চিংশাংগী মফমশিং অসি থাইনগী মতমদগী হৌনা থাজবগী, শেংবগী অমসুং লাই-নিংবগী অচেৎপা মফম অমা ওইদুনা লাক্লি। উত্তর প্রদেশকী মীয়াম কয়া অমনসু খঙলবনি, রহিমদাসজীনসু হায়রম্লবনি। রহিম দাসজীনা অসুম্না হায়বীরম্মি –“জাপর বিপরা পরৎ হে, সো আৱৎ য়হি দেশ

ইচিল-ইনাওশিং, রহিম দাসজীগী অসিগুম্লবা থাজবা অসিগী মতুং ইন্না মফম অসিগী রিসোর্স কয়া অমা লৈ, মফম অসিদা খুদোংচাবা কয়া অমা লৈ। বিন্ধ্যাঞ্চলদগী শিপ্রা, ৱেনগঙ্গা, সোন, মহানদ, নর্মদানচিংবা তুরেল কয়াগী হৌরকফম্নি। ইমা গঙ্গা, বেলন অমসুং কর্মনাশ তুরেলগী থৌজাল অসি লমদম অসিদসু ফংলি। অদুবু নিং-তম্বগী মতুংগী দিকেদ কয়াদা চৈথেং অমসুং খুদোংচাদবা কয়া থেংনখিবা অসিসু মফম অসিননি। বিন্ধ্যাঞ্চল ওইরবসু, বুন্দেলখন্দ ওইরবসু, রিসোর্স কয়া অমা লৈজরবসু, মফম অসি অৱাৎপগী মফম ওইদুনা লাক্লি। তুরেল কয়া অমা লৈজরবসু, মফম অসি ঈশিং খ্বাইদগী তাঙবা অমসুং অকংবা মফম অমা ওইনা মীয়াম্না শক খঙনরি। মরমশিং অসিনা মীয়াম কয়া অমদি মফম অসি থাদোক্তুনা চৎপা ফাওবা য়াওরিবনি।

মরূপশিং,

হৌখিবা মতম কয়া অমদগী বিন্ধ্যাঞ্চলদা লৈরক্লিবা খুদোংচাদবশিং অসিগী ৱারোইশিন পুরক্নবা থবক পায়খৎপা হৌরে। মফম অসিগী য়ুম্থোং খুদিংদা ঈশিং অমসুং কান্নবা কয়া ফংহন্নবা পায়খৎলিবা খোংথাংশিং অসি থবকশিং অসিগী শরুক অমনি। হৌখিবা চহিদা, বুন্দেলখন্দদা ঈশিংগা মরী লৈনবা অচৌবা প্রোজেক্ত অমগীদমক্তা থবক পায়খৎপা হৌখ্রবনি অমসুং মসিগী হীরম অসিদা হৌজিকসু অয়াঙবা খোঙজেলদা থবক পায়খৎলিবনি। ঙসিদি বিন্ধ্যাদা লুপা করোর ৫ মখায়গী শেনফমগী ঈশিং ফংহন্নবা প্রোজেক্ত অমগী উরেপ-উয়ুংসু তম্লে।

মসিগী প্রোজেক্ত অসিগীদমক্তা সোনভদ্র অমসুং মির্জাপুরগী মরূপ লাখ কয়া, অমসুং ইমাশিং, ইচে-ইচলশিং অমসুং ইচানুপীশিংবু ঐহাক্না মরু ওইনা থাগৎপা ফোংদোক্লি। অমসুং, ঙসি ঐহাক্না লমদম অসিগী মীয়ামগা ৱারী শাবা অসিদা ঐহাক্কী মতম কুইনদগী লোইনরকপা মরূপ, লৈখিদ্রবা সোনেৱাল পতেলজীবুসু ঐহাক্না নীংশিংলি। মহাক্না মফম অসিগী ঈশিং থক্নবগী খুদোংচাদবশিং অসিগী মতাংদা য়াম্না খঞ্জরম্বনি। মসিগী প্রোজেক্ত অসিনা হৌবা উবদা সোনেৱালজীগী থৱাইনা, মফম অমা হেক্তদা লৈরবসু, য়াম্না নুংঙাইরমগনি অমসুং ঐখোয় খুদিংদা মহাক্না য়াইফ-পাউজেল কয়া অমসু পীরমগনি।

ইচিল-ইনাওশিং,

লাক্কদৌরিবা মতমশিং অসিদা মফম অসিগী খুঙ্গং লিশিং ৩দা পাইপকী খুত্থাংদা থক্নবা ঈশিং ফংলকপা মতমদা মফম অসিগী মীয়াম কয়াগী পুন্সিদা অহোংবা লাক্লগনি। মসিনা মরম ওইদুনা য়ু.পি.গী, লৈবাক্কী য়ুমথোং খুদিংদা ঈশিং ফংহনবগী খোঙথাং অসিগী মপাঙ্গলসু হেন্না লৈরগনি। মসিগী প্রোজেক্ত অসিসু কোরোনাগী শিংনবা কয়াগী মরক্তা উত্তর প্রদেশপু চাউখৎপগী মাইকৈদা খোঙজেল য়াঙনা পুরিবা খোঙথাংশিংগী খুদম অমনি। উত্তর প্রদেশতা স্কিম অমসুং প্রোজেক্ত অমগী মথংদা অমা পায়খৎলকপগী মওং অসি উরবা মতমদা মতাংদা ৱা ঙাংলম্বা, অফ-ফত্তা য়াম্না ঙাংলম্বা মীওইশিংসু উত্তর প্রদেশ সরকার, সরকারগী থৌমীশিংগী মতাংদা লৈরম্বা মখোয়গী ৱাখল্লোনশিং হোংবা হৌরক্লে।

য়ু.পি.দা কোরোনাগী মাইকৈদা থেংনরিবা লানগী মওং, ময়ুমদা হল্লক্লবা মাইগ্রেন্তশিংবু নীংথিনা য়েংশিন্দুনা থবক্কী খুদোংচাবা পীবগী মওং অসি অরায়বা থৌওংদি নত্তে। অসুক য়াম্না চাউরবা লমদম অসিদা মতম অমত্তদা য়াম্লবা হীরম কয়াগী মতাংদা থবক পায়খৎলিবগী মওং অসিদা উত্তর প্রদেশনা নীংথিজবা থৌওং অমা পাংথোক্তুনা মীয়ামদা উৎলি। ঐহাক্না উত্তর প্রদেশকী মীয়াম্বু, সরকারবু অমসুং য়োগীজীগী কাঙবু অপুনববু য়াম্না থাগৎচরি।

মরূপশিং,

য়ুম্থোং খুদিংদা ঈশিং য়ৌহনবগী খোঙথাং অসি চাউরাক্না চহি অমদি হেল্লক্লে। মসিগী মনুংদা, লৈবাক অসিগী ইমুং করোর ২গা লাখ ৬০ হেনবগী ময়ুমশিংদা অশেংবা তোতি ঈশিং ফংহন্নবা থবক পায়খৎখ্রে। মসিগী মনুংদা উত্তর প্রদেশকী ইমুং লাখ কয়া অমসু য়াওরি।

ঐখোয়না ঐখোয়গী খুঙ্গংদা লৈরিবা খুঞ্জাশিং, ইচিল-ইনাওশিংদা শহরদা ফংলিবা খুদোংচাবশিং অসি ফংহন্নবা কন্না হোৎনরি। ঙসি হৌদোক্লিবা প্রোজেক্ত অসিনা ঐখোয়না পায়খৎলিবা খোঙথাং অসিদা য়াম্না তেংবাংগনি। মসিগী মথক্তা, অতল ভুজন য়োজনাগী খুত্থাংদা ঈশিংগী থাকপু ৱাংখৎহন্নবা হোৎনরিবা অসিনা লমদম অসিদসু য়াম্না তেংবাংগনি।

ইচিল-ইনাওশিং,

ঐখোয়গী মফম অসিদা হায়নবা অমা লৈ, থবক অমা, কান্নবা অনি। অদুবু হৌজিক পায়খৎলিবা থৌওং অসিগী ওইনদি থবক অমা, অমসুং তোঙানবা পান্দম কয়া লৈবা কান্নবা কয়া অমা ওইরে। জল জীবন মিসনগী মরমদগী য়ুম্থোং খুদিংদা পাইপকী খুত্থাংদা ঈশিং ফংহনখিবদগী ঐখোয়গী ইমাশিং অমসুং ইচে-ইচলশিংগী পুন্সি মহিংদসু য়াম্না নুংঙাইহল্লে। মসিনা পীখিবা অফবা কান্নবা অমদি লায়রবা ইমুংশিংগী হকশেল ফহনখিবা অসিনি। মসিনা মরম ওইদুনা অমোৎপা ঈশিংগী মরমদগী থোকপা কোলেরা, তাইফোইদ, এন্সেফেলাইতিসনচিংবা তোঙানবা লাইনা কয়া অমসু হন্থহনবা ঙম্লে।

মসিদা নত্তনা, মসিগী খোঙথাং অসিনা মীওইবা খক্তদা কান্নবা পীবতা নত্তনা শা-ঙাশিংদসু কান্নবা পীরি। শা-ঙাশিংসু অফবা ঈশিং ফংলবদি, হকশেলসু ফনা লৈগনি। শা-ঙাশিং মশা ফনা লৈরবদি, লৌউবশিংসু মখোয়বু য়োকপদা লাইরগনি হায়বা ৱাখল্লোন অসিসু ঐখোয়না খন্নবদা য়াওরি। য়ু.পি.গী মফম অসিদা য়োগীজীগী সরকারগী মখাদা এন্সেফেলাইতিসকী হীরমদা মশিং য়াম্না হন্থরকপগী থৌওং লাকপা অসি অতৈ-অতোপ্পশিংনসু খঙনরবনি অমসুং থাগৎনরিবনি। অখঙ-অহৈশিং ফাওবা মসিগী মতাংদা খন্নরিবনি। পিক্লিবা অঙাংশিংগী পুন্সি কন্নবগীদমক্তা য়োগীজী অমসুং মহাক্কী কাঙবুশিংনা পায়খৎলিবা থবকশিং অসিদা উত্তর প্রদেশকী মীয়াম খুদিংনা য়াইফ-মঙ্গোল পীনরমগনি হায়বগী ঐহাক্না থাজৈ অমসুং ঐখোয়না খনবদগীসু শরুক য়াম্না হেল্লমগনি। বিন্ধ্যাচলগী খুঙ্গং লিশিং কয়াদা পাইপকী খুত্থাংদগী ঈশিং ফংবা মতমদা লমদমসিগী চম্লবা অঙাং-মচা কয়াগী হকশেল ফগৎলগনি অমসুং মসিনা মরম ওইদুনা মখোয়গী হকশেল অমসুং ৱাখল্লোন্দা ফগৎপা অমসুং চাউখৎপা লাক্লগনি। মসিদা নত্তনা, করিগুম্বা অফবা ঈশিং থক্নবা ফংলবদি, ঐখোয়না মচি ওইবা চিঞ্জাক ফংদবগী মায়োক্তা চঙশিল্লিবা, মচি ওইবা চিঞ্জাক ফংহন্নবা হোৎনরিবা অসিগী অপাম্বা মহৈসু খোঙথাংশিং অসিগী মরম্না ফংহনবা ঙমহল্লগনি।

মরূপশিং,

স্বরাজকী মতিক অসিবু খুঙ্গং চাউখৎপগী মপুং ওইবা মরম অমা ওইহন্নবা সরকারনা হোৎনরিবা অসিদা জল জীবন মিশন অসিসু শরুক অমা ওইরিবনি। মসিগী ৱাখল্লোন অসিগী মতুং ইন্না, গ্রাম পঞ্চায়ৎশিং অমসুং মরী লৈনবা লুপশিংদা শক্তি কয়া অমা পীরিবনি। জল জীবন মিসন্দা ঈশিং পীবতা নত্তনা ঈশিং য়োক্তুনা থম্বা অমসুং ঈশিংগী মগুন লৈহনবগী থৌওং কয়া অমসু য়াওরি অমসুং মসিদা খুজাশিংসু শরুক য়াহল্লিবনি। খুঙ্গংগী ঈশিং ফংফমশিংবুসু ঙাক শেন্দুনা থম্বগী থবকসু পায়খৎলিবনি।

সরকারনা খোঙলোই অমা ওইনা, মরূপ অমা ওইনা নখোয়গী চাউখৎপগী লম্বীদা খুৎশম্নদুনা চৎলিবনি। জল জীবন মিশন খক্তা নত্তনা, লায়রবশিংগী পক্কাগী য়ুম শাবীরিবা প্রধান মন্ত্রী আৱাস য়োজনা অসিদসু মসিগী ৱাখল্লোন অসি উবা ফংই। লমদম অমদা করম্বা য়ুম, করি শিজিন্নদুনা য়ুম অদুবু শাগদগে হায়বসি হৌজিক্তি দিল্লীদা ফম্লগা ৱারেপ লৌদ্রে। করিগুম্বা ত্রাইবেলগী মফমশিংদা মখোয়গী চৎনবীগী মতুং ইন্না য়ুম শানবা ওইরবদি, দিল্লীদা ফম্লিবা মীওইশিংনা খল্লিবা অদু নত্তবিদা য়ুম অদু লমদম অদুগী মীয়ামগী অপাম্বগী মতুং ইন্না শাগদবনি অমসুং মখোয়গী পুন্সি মহিংগী মতুং ইন্না শাগদবনি হায়বগী খুদোংচাবসু পীখ্রবনি।

ইচিল-ইনাওশিং,

করিগুম্বা ইশাগী খুঙ্গং চাউখৎনবা ইশানা ৱারেপ লৌবা ঙম্বগী নিং-তম্বা ফংলবা, ৱারেপশিং অদুবু থবক ওইনা পাংথোক্লকপা উরগদি খুঙ্গংগী মীওই খুদিংদা মশানা-মশাদা থাজবগী চাং য়াম্না হেনগৎলক্কনি। মরোমদোম লেপচবা ঙম্বা খুঙ্গং, মরোমদোম লেপচবা ঙম্বা ভারতকী খোঙথাংগী মপাঙ্গল হেন্না কনখৎলগনি। মসিগী মরম ওইদুনা খুঙ্গংগী থাক্তা পুথোকপা পোত্থোকসু হেনগৎলগনি। মফমদুগী থাক্তা খুৎ-শা হৈবা মীওইশিংসু চান্নবা থবক ফংগনি। চেক শুবা, মৈ তিংবা, পাইপ শেম্বা মীওইশিংসু মখোয়গী মফমশিং অমসুং নক্নবা মফমশিংদা থবক ফংনবা খুদোংচাবসু লৈরক্কনি।

মরূপশিং,

ঐখোয়গী খুঙ্গং, লায়রবা খুঞ্জাশিং, ত্রাইবেলশিংগীদমক্তা সরকারনা পীরিবা খুদোংচাবশিং অসি হান্নদি পীরম্বা নত্তে। লায়রবশিংদা এল.পি.জি. গ্যাস সিলিন্দর পীরিবা অসিনা খুঙ্গংশিং অমসুং উমংগা নক্নবা লৈবা মীওইশিংদনা হেন্না খুদোংচাবা ওই। নুপীমচাশিংনা মৈখু মরক্তা চাক থোংবা লেপখিবা, উমংদা শিং থিবা চৎপদা মাঙলিবা মতম মাঙদবগী খুদোংচাবা অমসু নুপীমচাশিংনা ফংলি। মফম অসিদা ফম্লিবা য়াম্লবা ইমা, ইচে-ইচলশিংনা হান্না শিংনা চাক থোংবা মতমদুদা য়ামদ্রবদা চুরুপ ৮০০দগী হেনবগী মৈখু অসি মখোয়গী হকচাংদা চংলম্মি। য়ুমদা অঙাং কপ্লম্মি। মমা অমনা চাক থোংবা মতমদা মখোয়গী মশা মনুংদা চুরুপ ৮০০গী মৈখু চঙলম্লিবনি। মখোয়গী ফিভম অদু করি ওইগনি, মখোয়গী হকশেলগী ফিভম করি ওইগনি। মসিদগী নিং তম্বা ফংহন্নবা ঐখোয়না খোঙথাং পায়খৎলে অমসুং হায়রিবা ইমা, ইচে-ইচলশিংদা অসিগুম্লবা য়াম্লবা মৈখু অসি চংদনবা য়ুম্থোং খুদিংদা গ্যাসকী লৈরঙ ফংহন্নবা থবক পায়খৎলিবনি। নাকল অমদনা শিঙগীদমক্তা উমং কোকথোকপগী তঙাই ফদবা অসিসু ঐখোয়না লৈহন্দ্রবনি।

লৈবাক্কী অতোপ্পা খুঙ্গংগুম্না মফম অসিদসু মৈগী খুদোংচাদবা কয়া লৈরম্মি। ঙসিদি মফম অসি সোলার পাৱর শিজিন্নবগী মতাংদা মালেমগী মকোক থোংবা মফম অমা ওইরবনি অমসুং ভারতকী মরু ওইবা মফম অমসু ওইরবনি। মির্জাপুরগী সোলার পাৱর প্লান্ত অসিনা চাউখৎপগী অনৌবা লৈমাই অমা ইরবনি। মতৌ অসুম্না, ইরিগেসনগা মরী লৈনবা হীরমশিংদা বিন্ধ্যাঞ্চল অসিসু লৈবাক্কী অতোপ্পা মফমশিংগুম্না য়াম্না মনিংদা লৈরম্লবনি। অদুবু মতম কুইনদগী লৈরক্লবা অসিগুম্বা খুদোংচাদবশিং অসিবু লৈহন্দনবা থবক-থৌরম কয়া অমা পয়খৎলিবনি অমসুং নাকল অমরোমদনা, লৈহাও চেন্দ্রবা লমশিংদগী সোলার পাৱর পুথোক্তুনা অহেনবা চাগা পুথোক্নবা থৌরাং কয়া অমসু পায়খৎলিবনি। ঐখোয়গী চেঙ পীনবা মফমশিং অসিনা সোলার পাৱর ওইনা পীরি। চিঞ্জাক পুথোকপনা মীওইবগী পুক থনহল্লি। অদুবু হৌজিক্তি মখোয়গী লৌফমশিংদগী চিঞ্জাক পুথোকপগা লোয়ননা মৈসু পুথোকপা ঙম্লবদি মীওই কয়া অমগী পুন্সিদসু মৈ ঙালহনবা ঙম্লগনি।

ঐখোয়না বিন্ধ্যাগী মফমদা চাউখৎপা পুরক্নবা পায়খৎফম থোকপা থবক খুদিংমক পায়খৎলি। মেদিকেল ইনফ্রাস্ত্রকচর শেম-শাবা ওইরো, নত্ত্রগা লমদম অসিগী মফমশিংগী লম্বী-শোরোকশিং ফগৎহনববু ওইরো, হীরম খুদিংদা অয়াঙবা খোঙজেলদা থবক পায়খৎলি। মৈগী ফিভম অসি হান্না করি ওইরম্মি অমসুং হৌজিক্না করম্বা ফিভমদা লৈরি হায়বসি নখোয়না হেন্না খঙলবনি।

ইচিল-ইনাওশিং,

খুঙ্গংশিংদা থাজবা অমসুং চাউখৎপা ৱাৎপগী চাউরবা শিংনবা লৈরিবা অসিগী মনুংদা য়ুম অমসুং লমগী হীরম অসিসু অমনি। মসিগী শিংনবা অসিদি উত্তর প্রদেশকী মফম অসিদা লৈরিবা মীওইশিংদগী হেন্না খঙবদি লৈরোই। মসিগী মরমদি, চারোন-শুরোন কয়াদগী লৈরক্লবসু, খুঙ্গংগী অসিগুম্বা লমশিং অসিগী আইনগী ওইবা চে অমত্তা পাইদবা অসিনি। ময়ুম অসি মখোয় মশাগী ওইরবসু মসিগা মরী লৈনবা ৱারোলশিংগী মরী লৈনবা চে-চাং অমত্তা পাইনদে/লৈনদে। মীয়ামশিং অসিনা দিকেদ কয়াদগী অসুম্না অদুমক হিংদুনা লাক্লি অমসুং শিংনবশিং অসিবু থেংনদুনা অদুমক লাক্লি। ৱাহৌশিংসু চাউথোরক্তুনা খৎন-চৈনবা অমসুং মীহাৎপগী থৌওং ফাওবা য়ৌরক্লবনি, মচিল-মনাওশিংগী মরক্তা খৎন-চৈনবা থোক্লক্লিবনি। ফুৎ অমগী লমগীদমক্তা য়ুম্লোন্নবগা খৎন-চৈনবা ফাওবা থোক্লিবনি।

মসিগী শিংনবশিং অসিগী চপ-চাবা ৱারোইশিন পুরক্নবা হায়দুনা স্বামিত্ব য়োজনাগী খুত্থাংদা য়ু.পি.দা দ্রোন তেক্নোলোজী শিজিন্নদুনা য়ুম অমসুং লমগী মেপ য়েকথোকপা হৌরে। মসিগী মেপশিং অসিদা য়ুমফম ওইদুনা য়ুম্থোং খুদিংগী ওইনা লম মপুশিংদা মখোয়গী লম অমসুং য়ুমগী আইনগী ওইবা চে-চাংশিং শিন্নবসু হৌরে। মসিনা মরম ওইদুনা, খুঙ্গংদা লৈরিবা লায়রবশিং অমসুং ত্রাইবেলশিংনা অতোপ্পা লম লৌশিনখ্রগনি হায়বগী মীপায়বা অমসুং নাচুংবা লৈতনা ইংনা চিক্না হিংবা ঙমহল্লগনি। নখোয়গী লমদমগী মীওই কয়া অমা গুজরাত্তা থবক তৌই। ঐহাক্না মখোয়গা ৱারী-ৱাতাই শাবদা মহাক্কী মচিল-মনাওশিং চৎখ্রিবা করিগীনো হঙই। মদুদা মখোয়না হায়বদা, অনৌবা ইয়াম্বা, ঐখোয়গী লম অদুগী খৎন-চৈনবা থোক্লে, ঐখোয়গী য়ুম অদু কনাগুম্বা অমনা লৌশিনখ্রে হায়না খুম্লকই। ঐহাক্না মফম অসিদা থবক তৌরিঙৈদা ঐহাক্কী য়ুমদো অতোপ্পনা চঙশিন্দুনা লৈশিনখ্রে হায়। অদুবু হৌজিক্তি, হায়রিবা চে-চাং অসি ফংলবদি শিংনবশিং অসি মতোমতনা অদুমক লোইখ্রগনি। মসিদা নত্তনা, নখোয়না শেল পুবা অমসুং বেঙ্কতগী লোন লৌবগী তঙাই ফদবা লৈরকপা মতমদা নখোয়গী খুঙ্গংগী লম অমসুং য়ুমগী চে-চাংশিং অদুগী অসেংবা মপু অদুমক ওইরগনি। অদোম্না বেঙ্কতা চে-চাংশিং অদু উৎলগা লোন লৌবা য়ারগনি।

মরূপশিং,

ঙসিদি, সবকা সাথ, সবকা বিকাস, সবকা বিশ্বাস হায়রিবা মন্ত্রা অসি লৈবাক্কী মফম খুদিং, মীপুম খুদিংগী থাজবগী মন্ত্রা ওইরে। ঙসিদি, লৈবাক্কী মীওই খুদিং, মফম খুদিংগী মীয়াম্না সরকার অসি মখোয় ফাওবা য়ৌরে অমসুং লৈবাক্কী চাউখৎপদা খোঙলোই অমা ওইরে হায়না খন্নরে। ত্রাইবেলশিংগী মফমশিংদসু অসিগুম্লবা মশাদা থাজবগী মওং অসি লৈরে, মসিনা অনৌবা মপাঙ্গল অমা হাপ্লে হায়বা অসি ঐহাক্না উবা ফংলি। ত্রাইবেলশিংগী মফমশিংদা তঙাই ফদবা সেবাশিং য়ৌবতা নত্তনা মসিগী লমদমশিং অসিগী চাউখৎপগী অখন্নবা থৌরাং কয়াদা থবক পায়খৎপসু হৌরবনি। ত্রাইবেলগী মফমশিংগী নহাশিংগী মহৈ-মশিং তম্বীনবগীদমক্তা লৈবাক অসিদা এক্লাব্যা মোদেলগী অনৌবা স্কুল কয়া অমসু লিংখৎলবনি। মসিনা মরম ওইদুনা ঐখোয়গী ত্রাইবেলগী লমদমশিংগী অঙাংশিংগী হোস্তেলগী খুদোংচাবা পীগনি। মসিগী মনুংদগী স্কুম কয়া অমসু য়ু.পি.দা হাংদোক্লিবনি। অসিগুম্বা খুদোংচাবশিং অসি ত্রাইবেলগী মনুং-হঞ্জিনবা মফম খুদিংগী ব্লোক ফাওবদা য়ৌহন্নবা ঐখোয়না হোৎনরি।

মহৈ-মশিং তম্বগা লোয়ন-লোয়ননা শেন্দাং লম্বীগী খুদোংচাবশিংসু থিবগী থবক চত্থরি। ত্রাইবেলগী ইচিল-ইনাওশিংদা উমংগী পোত্থোকশিংগী অহেনবা মমল ফংহনবগীদমক্তা বন ধন কেন্দ্র ১২০০ হেন্না লৈবাক শিনবা থুংনা হাংদোক্লবনি। মসিগী খুত্থাংদগী করোর কয়াগী কারবারসু তৌখ্রবনি।

মসিদা নত্তনা, আত্মানির্ভর ভারত খোঙথাংগী মখাদা উমংগী পোত্থোকশিংদা য়ুম্ফম ওইবা ইন্দস্ত্রী শেম্নবা অমসুং মসিগা মরী লৈনবা খুদোংচাবশিং লৈহন্নবা থবক পায়খৎপা হৌখ্রবনি। ত্রাইবেলগী মফমশিংগী চাউখৎনবগীদমক্তা শেলগী অৱাৎপা লৈহন্দনবগীদমক্তা দিস্ত্রিক্ত মিনরেল ফন্দসু শেমখ্রে। লমদমশিং অসিদগী থোক্লকপা শেনফমশিংগী শরুক অমদি মফম অসিগী চাউখৎপদা শিজিন্নবা হায়বসি ঐখোয়গী ৱাখল্লোন্নি। উত্তর প্রদেশতসু মসিগী ফন্দ অসিগী চাউরাকপা লুপা করোর ৮০০ তুংশিনবা ঙম্লে। মসিগী ওইনা প্রোজেক্ত লিশিং ৬ মখায় হেন্না অয়াবা পীখ্রে অমসুং মসিগী মনুংদগী প্রোজেক্ত কয়া অমদি লোইশিনখ্রবনি।

মরূপশিং,

মসিগী থবক-থৌরমশিং অসিনা ভারতকী মীওইশিংগী মশানা-মশাদা থাজবা য়াম্না হেনগৎহল্লে। মসিগী থাজবগী মতিক অসিনা ঐখোয় খুদিংনা ঙসিদি মরোমদোম লেপচবা ঙম্বা ভারত অমা ওইহন্নবা হোৎনদুনা লৈনরি। বিন্ধ্যা ৱাতর সপ্লাই প্রোজেক্ত অসিনা মসিগী থাজবগী চাং অসি হেন্না মপাঙ্গল কনখৎহনগনি হায়না ঐহাক্না থাজৈ।

অদুগা, ময়াম অসিগী মরক অসিদা ঐখোয়না কোরোনাগী ইরাং অসি লোইদ্রি হায়বা কাওরোইদবনি। ফুৎ তরুক্কী অরাপ্পা, মাস্ক অমসুং সাপোন শিজিন্নদুনা ল-নান্না লৈবগী কাঙলোন অসি ঐখোয়না করিগুম্বা মতম অমত্তদা কাওরোইদবনি। চেকশিন্দবা মিৎকুপ অমনা, ঐহাক্কী য়ুম, খুঙ্গংবু খুদোংথিবা নংহনবা য়ারিবনি। মসিগী হিদাক পুথোক্নবা ঐখোয়গী সাইন্তিস্তশিংনা য়াম্না কন্না হোৎনরি। মালেমগী সাইন্তিস্ত খুদিংমক অমসুং খ্বাইদগী ইনাক খুনবা লৈবাকশিংসু অমসুং লায়রবা লৈবাকশিংগী মীয়ামসু হীরম অসিদা কন্না হোৎনরিবনি। হিদাক লৈত্রিবা ফাওবা লাইথোকপা য়াদে।

নখোয়না ৱাফম অসি মতম পুম্বদা নীংশিংগনি হায়বা থাজবা অসিগা লোয়ননা ঐহাক্না মীয়াম্বু থাগৎপগা লোয়ননা য়াইফ-পাউজেল পীজরি।

***



(Release ID: 1674923) Visitor Counter : 7