গুজরাতকী মুখ্যমন্ত্রী শ্রী বিজয় রুপানীজী, পন্দিৎ দীন দয়াল পেত্রোলিয়ম য়ুনিভর্সিতী বোর্দ ওফ গভর্নেন্সকী চিয়রমেন শ্রী মুকেশজী, স্তেন্দিং কমিতীগী চেয়রমেন শ্রী দি. রাজগোপালনজী, দায়রেক্তর জেনরেল প্রোফেসর এস সুন্দর মনোহরনজী, ফেকল্তী মেম্বর্স, পেরেন্তশিং অমসুং ঐগী নহা ওইরিবা মরূপ পুম্নমক!

পন্দিৎ দীন দয়াল উপাধ্যায় পেত্রোলিয়ম য়ুনিভর্সিতীগী ৮শুবা কনভোকেসনগী থৌরম অসিদা অদোম ময়ামদা হন্না হন্না নুংঙাইবা ফোংদোকচরি! ঙসি গ্রেজুএৎ ফংগদৌরিবশিং, মখোয়গী মমা-মপাশিংদসু হন্না হন্না নুংঙাইবা ফোংদোকচরি। ঙসি লৈবাক অসিনা অদোমগুম্বা ইন্দস্ত্রী রীদী গ্রেজুএৎশিং ফংজগদৌরি। অদোমগী হোৎনমলগীদমক্তা, অদোম্না য়ুনিভর্সিতী অসিদগী তমখিবশিং অদুগীদমক অদোমদা নুংঙাইবা ফোংদোকচরি, অমসুং নেস্নেল বিল্দিংগী অচৌবা পান্দম অদুবু পুদুনা ঙসি অদোম মফম অসিদগী চৎকদৌরিবা অমসুং পন্থুং অদুগীদমক্তা, অনৌবা খোংচৎ অদুগীদমক্তা নুংঙাইবা ফোংদোকচরি।

ঐনা থাজৈ মদুদি অদোম্না অদোম ইশাগী স্কিল, অদোমগী তেলেন্ত, অদোমগী প্রোফেস্নেলিজমদগী আত্মনির্ভর ভারতকী অচৌবা থৌনা ওইদুনা শাফোংলক্কনি। ঙসি পি.দি.পি.য়ু.গা মরী লৈনবা তোঙান তোঙানবা প্রোজেক্ত ৫গী শঙ্গাবা অমসুং উরেপ-উয়ুং তম্বগী থবকসু পাংথোক্লে। অনৌবা খুদোংচাবশিং অসি, পি.দি.পি.য়ু. অসি লৈবাক অসিগী ইনর্জী সেক্তরদা নত্তনা, প্রোফেস্নেল এজুকেসন, স্কিল দিবেলপমেন্ত অমসুং স্তার্ত-অপ ইকোসিস্তেমগী মরুওইবা সেন্তরসু অমা ওইগদৌরিবনি। 

মরূপশা,

ঐহাক য়াম্না ঙল্লিঙৈ হৌরকপা মতমদগী য়ুনিভর্সিতীগী প্রোজেক্ত অসিগা লোইনরক্লি অমসুং মরম অসিনা ঐহাক মসি উবদা য়াম্না নুংঙাইবা ফাওই মদুদি ঙসি পি.দি.পি.য়ু. অসি লৈবাক অসিদা নত্তনা মালেমদসু মশাগী মফম অমা শেমজরি, অশাগী শক্তাক শেমজরি। ঐনা ঙসি মফম অসিদা চীফ গেস্ত ওইনা নত্তনা অদোমগী অচৌবা ৱাশক অসিগী ইমুং অসিগী মীহুৎ অমা ওইনা অদোমগী নরক্তা লাকচরিবনি।

অদুগা মসি উবদা ঐ য়াম্না চাউথোকচবা পোকই মদুদি য়ুনিভর্সিতী অসি মসিগী মতমদগী খুমাং য়াম্না চাউখৎলি। মীয়াম্না অসিগুম্বা মখলগী য়ুনিভর্সিতী অসিবু কয়াম্না চাউখৎপা ঙমগনি হায়না ঙাংনরম্বা মতম অমা লৈখি। অদুবু মফম অসিগী মহৈরোইশিংনা, ফেকল্তী মেম্বরশিংনা, মফম অসিদগী থোরকখিবা প্রোফেস্নেলশিংনা, মখোয়গী মতৌনা অদুগুম্বা ৱাহং কয়াদুগী পাউখুম পীখি।

হৌখিবা চহি তরামঙাগী খুজিংদা পি.দি.পি.য়ু.না ‘পেত্রোলিয়ম’ সেক্তরগা লোইননা ইনর্জী স্পেক্ত্রম অপুনবদা অমসুং অতৈ লমশিংসু পাকথোক-চাউথোকখি। অমসুং পি.দি.পি.য়ু.না চাউখৎলকপা অসি য়েংলদুনা ঙসি ঐ গুজরাত্তসু হায়জরি মদুদি ঐনা থবক অসি হৌদোক্নবা খনখিবা মতমদা ঐগী পুক্নীংদা খনখি পেত্রোলিয়ম য়ুনিভর্সিতী মরমদি গুজরাত অসি পেত্রোলিয়মগী লমদা মাংদা চখৎপা পামখি, অদুবু অদুগুম্বা লৈবাক্কী অমদি মালেমগী রিক্ব্যার্মেন্ত অদুদা, য়ুনিভর্সিতী অসিনা মশাগী শক্তম লৌজরিবা অসি, ঐ গুজরাত সরকারদা হায়জরি মদুদি কাংলোন্দা মথৌ তারবদি অহোংবা পুরক্তুনা মসিবু শুপ্নগী পেত্রোলিয়ম য়ুনিভর্সিতী মহুত্তা হৌজিক ঐখোয়না মসিবু ইনর্জী য়ুনিভর্সিতী অমা ওইনা মসিগী মমিং অসি কনভর্ত তৌরবদি হেন্না ফগনি। মরমদি মসিগী মশক্কী অকোইবা অসি য়াম্না পাক-চাউথোক্কগদৌরি। অদুগা অদোম ময়াম্না অসুক তেনখ্রবা মতম অসিদা তানশিনখিবা, লৈবাক অসিদা পীখিবা, ইনর্জী য়ুনিভর্সিতী মসিগী চাউথোকপা অসিনা লৈবাক অসিদা য়াম্না চাউনা কান্নহনগনি। পেত্রোলিয়ম য়ুনিভর্সিতীগী ৱাখল্লোন অসি শুপ্নগী ঐগীনি অমসুং ঐগী ৱাখল্লোন অদুমকপু চাউথোকহন্দুনা ঐনা পেত্রোলিয়মগী মহুত্তা ইনর্জীগী লম পুম্নমকপু মসিগা লোইননা পুনশিন্নবগীদমক অদোমদা হায়জরি। অদোম খন্নবীয়ু অমসুং ফৈ হায়না খনবীরবদি ঐনা হায়জরিবা অসিদা মিৎয়েং চংবীয়ু।

মফম অসিদা লিংখৎকদৌরিবা মেগাৱাৎ ৪৫গী সোলর পেনেল মেন্যুফেকচরিং প্লান্ত ওইরো নত্ত্রগা সেন্তর ওফ এক্সিলেন্স ওল ৱাতর তেক্নোলোজী ওইরো, লৈবাক অসিগীদমক্তা পি.দি.পি.য়ু.গী লার্জর ভিজনবুসু মসিনা ফোংদোক্লি।

মরূপশা,

ঙসি অদোম্না লাইচৎ অসিনা মরম ওইদুনা মালেমগী ইনর্জীগী সেক্তর্দা চাউনা অহোংবা কয়া লাক্লিবা মতম অসিদা ঙসিদি অদোম্না ইন্দস্ত্রীগী লমদা খোংদারক্লি, য়ুনিভর্সিতীদগী থোরক্তুনা ইন্দস্ত্রীগী মায়কৈদা চংশিল্লক্লি।

অসিগুম্বা ফিভম অসিদা ঙসিদি ভারতকী ইনর্জীগী সেক্তরদা শাহৌগী, ইন্তর্প্রাইজ স্পিরিৎকী, এম্প্লোইমেন্তকী, মপান নাইদ্রবা ওইথোকপা কয়া লৈরে। হায়বদি অদোম ময়াম্না মতম চানা, অচুম্বা সেক্তরদা থুংলরে। চহি চা অসিদা শুপ্নগী ওইল এন্দ গ্যাস সেক্তর খক্তদা লুপা করোর লাখ কয়া ইনভেস্ত তৌগদৌরি। মরম অসিনা অদোমগীদমক্তা রিসর্সতগী হৌরগা মেন্যুফেকচরিং ফাওবা তাঞ্জাগী তাঞ্জা ঙাক্তনি।

মরূপশা,

ঙসি লৈবাক অসিনা মসিগী কার্বোন ফুৎপ্রিন্ত অসি 30-35% ফাওবা হন্থহন্নবগী পান্দমগা লোইননা মাং থাদুনা চৎলি। মালেমগী মাংদা ৱাফম অসি ঐনা পুদুনা চৎখিবা মতমদা মালেমনা অঙকপা পোক্নখি ভারতনা মসিবু তৌবা ঙমগদ্রনে? হোৎনরিবদি চৎলিবা চহি তরাগী খুজিং অসিদা, ঐখোয়গী ইনর্জীগী তঙাই ফদবশিং অসিগী মনুংদা নেচরেল গ্যাসকী শেয়র অসি শরুক ৪ হেনগৎহনবনি। লৈবাক্কী ওইল রিফাইনিং কেপাসিতীবুসু লাক্কদৌরিবা চহি ৫ অসিদা চাউরাক্না শরুক অনি ওইহন্নবগীদমক থবক পাইখৎলি। মসিদসু অদোম ময়ামগী ওইথোকপা ময়াম অমা লৈরি। লৈবাক অসিগী ইনর্জী সেক্যুরিতীগা মরী লৈনবা স্তার্তঅপ ইকোসিস্তেম অসিবু মপাঙ্গল কলহন্নবগীদমক্তসু লেপ্তনা থবক চৎথরি। সেক্তর অসিগী অদোমগুম্বা স্তুদেন্তশিং অমসুং প্রোফেস্নেলশিংগীদমক্তা অখন্নবা ফন্দ অমসু শেমলে। অদোমদসু করিগুম্বা আইদিয়া লৈবীরবা, করিগুম্বা প্রদক্ত নত্ত্রগা কন্সেপ্ত লৈবীরবা, মদুবু অদোম্না ইনক্যুবেৎ তৌবা পাম্বীরবদি ফন্দ অসি অদোমগীদমক্তা হেন্না ফবা খুদোংচাবা অমসুনি, সরকারগী মায়কৈদগী খুদোল অমসুনি।

অসুম্না ঐনা ফাওই মদুদি ঙসি ঐনা অদোমদা ৱাফম অসি হায়জবা অসিদা অৱাবা খরসু ফাওবীগনি। অদোম্না খনবীরমগনি কোরোনাগী মতমনি, করম্বা মতমদা ফরক্কদবনো খঙদে। অমসুং অদোমগী পুক্নীংদা ফাওরিবা অৱাবশিং অসিসু মসানা তাবনি। মালেম অপুনবনা অসুক ৱানা খাংনরিবা মতম অসিদা গ্রেজুএত ওইবা অসি তরাই তরাইবা অমদি নত্তে। অদুবু নীংশিংবীয়ু, অদোমগী থৌনা, অদোমগী তৌব-ঙম্বশিং অদু শিংনবশিং অসিদগী শরুক কয়া হেন্না চাউই। থাজবা অসি কৈদঙৈদসু মাংহনগনু।

প্রোব্লেম করিনো? মসিদগী হেন্না মরুওইবদি অদোমগী পর্পোজ করিনো? অদোমগী প্রিফরোন্স করিনো অমসুং অদোমগী প্লান করিনো হায়বসিনি। অমসুং মরম অসিনা, অদোমগী পর্পোজ অমা লৈবা, প্রিফরেন্স লেপথোকপা মসি মরুওই অমসুং মদুগীদমক্তা য়াম্না পার্ফেক্ত ওইবা প্লান অমা লৈবা অসিসু মরুওই।

মরূপশা,

করিগুম্বা অদোম্না চহি চাম্মা মমাংগী মতম অদু নীংশিংলুরগদি, অমসুং ঐনা পাম্মি মদুদি ঙসি ঐগী লৈবাক্কী নহাশিংনা মতম অদুবু নীংশিংবীয়ু চহি চাম্মগী মমাং অদুবু। ঙসি ঐখোয় ২০২০দা লৈরি, খনবীয়ু ১৯২০দা ঙসি অদোমগী চহি অসিদা। ১৯২০দা অদোমগী চহি ওইখিবশিং অদুগী মঙলান করি ওইখি? ১৯২০দা অদোমগী চহি ওইখিবশিং অদুগী থৌনা করি ওইখি, মখোয়গী ৱাখল্লোন করি ওইখি? চহি চাম্মা লিরবা পুৱারী অদুদা অমুক্তং মিৎয়েং তাবীয়ু। নীংশিংলুরগদি ১৯২০দগী হৌখিবা মতম অদু ভারতকী নীং খা তম্বগী য়াম্না মরুওইবা ওইখি।

মতম অদুগী নহারোলশিংসু মখোয়গী পুম্নমক লৈবাক অসিগীদমক কৎথোক্তুনা, শুপ্নগী পান্দম অমগীদমক থবক তৌখি অমসুং পান্দম অদু করিনো – ভারতকী নীংতম্বা। ইমা ভারতীবু মীনাই য়োৎহিংদগী নান্থোকহনবা অমসুং মদুদা ইচেল কয়ানি, তোঙান তোঙানবা ৱাখল্লোনগী মীওইশিংনি, অদুবু ইচেলশিং অদুদি মায়কৈ অমখক্তদা চেন্থখি অমসুং ইচেল অদুদি ইমা ভারতীগী নীং খা তম্বগীনি। মহাত্মা গান্ধীগী লুচিং মখাদবু ওইরো, সুভাশ বাবুগী মিৎয়েং মখাদবু ওইরো, ভগত সিংহগী, সুখদেবগী, বীর সাৱরকরগী মিৎয়েং মখাদবু ওইরো, পুম্নমক্না; ইচেল তোঙান তোঙানবা ওইবা য়াই, লম্বেল তোঙাল্লম্বা য়াই, লম্বী তোঙাল্লম্বা য়াই অদুবু পন্থুং অদুদি অমত্তা ওইখি – ইমা ভারতীগী নীং তম্বা।

ঐগা নহা ওইরিবা মরূপশা,

ঙসি ঐখোয় মতম অদুদা লৈত্রে অদুবু ঙসিসু ইমা লৈবাক্কী সেবাগী তাঞ্জা অদুদি মদুমক্নি। করিগুম্বা মতম অদুদা নহারোলশিংনা মখোয়গী নহা ওইবা মতম অদু নীং খা তম্বগীদমক্তা কৎথোক্লবদি ঐখোয়না আত্মনির্ভর ভারতকীদমক্তা হিংবা তম্বা ঙমগনি, হিংদুনা উৎপা ঙমগনি। ঙসি ঐখোয় আত্মনির্ভর ভারতকীদমক্তা ইশানা আন্দোলন অমা ওইগদবনি, আন্দোলনগী লান্মী অমা ওইগদবনি, আন্দোলন অমা লুচিংগদবনি। ঙসি ঐখোয় আত্মনির্ভর ভারতকীদমক্তা হিন্দুস্তানী খুদিংমক্না, মরুওইনা ঐগী নহা ওইরিবা মরূপশিং, ঙসি অদোমদা থাজবা থম্লি, অদোম নশাবু কৎথোকচগদবনি।

ঙসিগী ভারত, হোংদোকপগী অচৌবা খোংচৎ অমদা চৎলি। অদোমদা হৌজিক্কী মতম অসিগা লোইননা তুংলমচৎ শেমগৎনবগীদমক্তসু চাউরবা থৌদাং লৈরি। অদোম খনবীয়ু, করম্বা গোল্দল পেরদতনো অদোম্না লৈরিবসে। অদোম্না করিগুম্বদসু খল্লমলোই মদুদি ভারতকী নীং খা তম্বগী চহি ৭৫, ২০২০দা পাংথোক্কদৌরি অমসুং ভারতগী নীং খা তম্বগী চহি ১০০, ২০৪৭দা পাংথোক্কদৌরি, হায়বদি চহি ২৫ অসি অদোমগী খ্বাইদগী মপুওইবা চহিনি। লৈবাক্কী মরুওইবা চহি ২৫ অমসুং অদোমগী মরুওইবা চহি ২৫ অমত্তা ওইরি, ইন ত্যুন ওইরি। অদোম্না ফংলিবা অসিগুম্না লাইবক ফবা অসি কনানসু ফংলরোই।

অদোম য়েংবীয়ু মখোয়গী পুন্সিদা সেন্স ওফ রেস্পোন্সিবিলিতীগী ৱাখল্লোন লৈবা করিগুম্বা খরা তৌদুনা উৎখিবা অদুতনা পুন্সিদা মায় পাকখি। মায় পাকপগী খ্বাইদগী অহানবা হৌরকপা, মদুগী লন অদু সেন্স ওফ রেস্পোন্সিবিলিতী ওই। অমসুং করিগুম্বদা অমমম্তা ওইনা অদোম্না য়েংলগদি মায়থিবা নংখিবা মখোয়গী পুন্সিদা য়েংলগদি, অদোমগী মরূপশিংগী মায়কৈদা য়েংলগদি, মদুগী মরম অদু, মখোয়গী পু্ক্নীংদা মতম চুপ্পা সেন্স ওফ রেস্পোন্সিবিলিতীগী মহুত্তা সেন্স ওফ বর্দনগী পোৎলুম্না নন্দুনা লৈবা উগনি।

য়েংবীয়ু মরূপশা, সেন্স ওফ রেস্পোন্সিবিলিতীগী ৱাখল্লোন অসিনা মীওই অমগী পুন্সিদা সেন্স ওফ ওপর্চ্যুনিতীসু পোকহল্লি। মখোয় অদু লম্বীদা অপনবা অমত্তা উদে তাঞ্জাগী তাঞ্জা ঙাক্তা উই। সেন্স ওফ রেস্পোন্সিবিলিতী অসি মীওই অমগী পর্পোজ ওফ লাইবকা লোইননা ত্যুন তৌগদবনি, মখোয়গী মরক্তা কন্ত্রাদিক্সন লৈহল্লোইদবনি। সেন্স ওফ রেস্পোন্সিবিলিতী অমসুং পর্পোজ ওফ লাইফ অসি মদুদা অদোমগী ৱারেপকী গারী অদু খোংজেল য়াংনা থৌবা ঙমগদবা তালী অনিনি।

ঐনা ইশাগী ওইবা মওংদা হায়জরি মদুদি অদোমগী নুংদা সেন্স ওফ রেস্পোন্সিবিলিতী অমা শোইদনা শেমদুনা থম্বীয়ু। সেন্স ওফ রেস্পোন্সিবিলিতী অসিনা, লৈবাক্কী, লৈবাক্কী তঙাইফদবশিং মপুং ফাহন্নবগী ওইহনগদবনি। ঙসি লৈবাক অসিনা সেক্তর কয়াদা খোংজেল য়াংনা মাংদা চংশিল্লি।

মরূপশা,

মীওইবগী পুন্সিগীদমক্তা খোংজেল অমসুং চাউখৎপা অসি তঙাইফদে। লোইননা ঐখোয় তুংগী মীরোলগীদমক্তা মহৌশা অমসুং অকোইবগী ফিভম ঙাক্তুনা থম্বা অসিসু অদুক্কী মতিক মরুওই। ক্লীন ইনর্জীনা মঙাল নাইবা তুংলমচৎকী অশা ওইবগুম, পুন্সিদসু ৱাফম অনি মরুওই – অমনা ক্লীন স্লেৎ অমসুং অনিশুবদা ক্লীন হর্ত। ঐখোয়না মতম পুম্নমক্তা তাদুনা লাক্লি, অদোমসু হায়বীরমগনি, অদোমসু তারমগনি, হেরা, তোকওদা মদুদি অদুমাইনা অদুম তৌবনি, করিসু ওইররোই, ঐখোয়দা করি কাইগে এদজস্ত তৌরা লোইরে, তোকও, তোকসি। ওইবা য়ারোই। কয়ারক হন্না মীয়াম্না হায়নৈ মদুদি লৈবাক অসিদা পুম্নমক অসি অসুম্না অসুম্না চৎথরদৌনি, ঐখোয়গী অসিদদি অসুম্না অসুম তৌই, হেরা মসিদি ঐখোয়গী চৎনবীনি, অসুমাইনা অসুম তৌরগদবনি।

মরূপশা,

ৱাফম পুম্নমক অসি মায়থিরবা পুক্নীংগী ৱাফমনি, অমরোমদা মসি কোহ্লিং কারবা কোক্কী ৱাখল্লোন্নি। ৱাফম ময়াম অসি মীওই খরগী মপুক্নীংদা নপশিন্দুনা লৈ, মখোয়না এপ্রোচ অসিগা লোইননা থবক পুম্নমক পাংথোকই। অদুবু ঙসিগী মীরোল অসিনা, ২১শুবা চহি চাগী নহাশিংনা, মদুবু ক্লীন স্লেৎ অমগা লোইননা মাংদা চখৎপা তাই। মীওই খরনা করিসু হোংলোই হায়না মপুক্নীংদা হক্তুনা থমখ্রবা অসি ক্লীন তৌগদবনি। মতৌ অসুম্না ক্লীন হর্ত, মসিগী ৱাহন্থোক ঐনা শন্দোক্না তাকপগী মথৌ তাররোই। ক্লীন হর্তকী ৱাহন্থোক্নি তরু-তরুবা তৌনীংবা।

মরূপশা,

হৌজিক অদোম প্রিকন্সিব নোসনগা লোইননা মাংদা চখৎলবদি, অনৌবা পোৎশক অমা হেক্তগীদমক অদোম ইশানা থোঙ থিংজিনজরবনি।

মরূপশা,

হৌজিক্তগী চহি কুনগী মতমদা ঐনা অহানবা ওইনা গুজরাতকী মুখ্যমন্ত্রী ওইখি। শিংনবা কয়া লৈখি, থাক কয়াদা থবক তৌরমখি। মতম অদুদা নৌনা মুখ্যমন্ত্রী ওইখি, ঐ অহানবদা দিল্লীদা লৈখি, খঙহৌদনা গুজরাত্তা লাকপা তাখি, ঐগী লৈননবা মফম অমত্তা লৈখিদে অদুনা গান্ধী নগরগী সর্কিৎ হাউসতা ঐনা কা বুক তৌখি, হৌজিক ৱাশক লৌগদবা ৱাৎলিবনি। অদুবু মুখ্যমন্ত্রী ওইবা চৎলিবনি হায়বসিমদি লেপ্লবনি। অদুনা মীয়াম্না লৈ চবুল পায়দুনা উনবা লাকপা অসি মহৌশানি। মতম অদুদা ঐবু উনবা লাকখিবশিং অদুনা ৱারী শানবদা মসি তোইনা হায়বীরম্মি মদুদি মোদীজী অদোম মুখ্যমন্ত্রী ওইগদৌরবনি থবক অমদি শোইদনা তৌবীয়ু। চাউরাক্না মীওই চাদা ৭০-৮০না মসি হায়খি, অদোমসু তাবদা অঙকপা ফাওগনি। মখোয়না হায়খি মদুদি অমবু ওইরবসু নুমিদাং চাক চাবা মতমদা মৈ ফংহনবীবা, মসিদদি তৌবীয়ু। মসিদগী অদোম খনবা ঙম্বীগনি মদুদি মতম অদুদা ইলেক্ত্রিক্কী ফিভম করি ওইরমগনি হায়বা।

হৌজিক ঐসু অদুগুম্বা ইমুং অদুদগী লাকপনিনা, ঐসু ৱাফম অসি তশেংনা খঙই মদুদি ইলেক্ত্রিক লৈবা অমদি লৈতবা অসিগী মগুন কয়াম্না লৈবগে হায়বদো। ঐনা খনখি মদুদি মসিগী পর্মানেন্ত সোলুসন করি ওইগনি? ঐনা ওফিসরশিংগা ৱারী শানরিঙৈ, খন্ন-নৈরিঙৈ অদুবু মদুগুম্না, হেরা মসিদি অসুম্না অসুম লৈরদৌনিদা। ঐখোয়দা লৈরিবা ইলেক্ত্রিক অসিখকসিনা ঐখোয় অসুম্না তৌবতমক ঙমগনি। ঐনা হায়খি ভাই, গিবন সিচুএসন অসিগী সোলুসনগা লৈবরা? মতম অদুদা লাইগী থৌজালদগী পুক্নীংদা ৱাখল অমা লাকখি ফিভমদু উরুবদা। ঐনা হায়খি ভাই থবক অমা তৌবা ঙমগদ্রা? এগ্রিকলচরগী ফীদর অমসুং দোমেস্তিক ফীদর অসি ঐখোয় তোঙান্না খাইদোকপা ঙমগদ্রা? মরমদি মীয়াম্না মসি ঙাংনদুনা লৈরম্মি মদুদি সাহেব লৌবুক্তা ইলেক্ত্রিক হুরান্নৈ, অদু তৌনৈ, অদা তৌনৈ, মখল মখলগী ৱাফম তারম্মি। ঐসু নৌরিবনিনা ৱাফম পুমনমক ৱাখল্লোন তাহনবদা খরা ৱারম্মি মরমদি অচৌ-অচৌবা বাবুশিংসি ৱাখল তাগদ্রা তারোইদ্রা খল্লম্মি।

ঐগী ৱাফম অসিদা ওফিসরশিংনা য়ানীংলমদে। মরমদি প্রি-কন্সিব নোসন্স লৈরম্মি, মদু ওইবা য়ারোই। কনাগুম্বদি মসি ওইথোকপা য়ারোই ফাওবা হায়রম্মি। কনানা হায়রম্মি শেল-থুমগী ফিভম ফত্তে, কনানা হায়রম্মি ইলেক্ত্রিক লৈতে। অদোম ঙক্কনি মদুগীদমক চৎখিবা ফাইশিং অদুগী অরুম্বা অদু কিলো ৫-৭-১০ ফাওবা য়ৌরমগনি। অদুগা ৱাফম পুম্নম, ওপ্সন খুদিংমক নেগতিব ঙাক্তা ওইখি।

হৌজিক ঐ করিগুম্বা খরা তৌবা হায়না খনখি। মদুগী মতুংদা ঐনা সেকেন্দ ওপ্সন অমদা থবক তৌবা হৌখি। ঐনা অৱাং গুজরাত্তা সোসাইতী অমদগী, মদুদা খুঙ্গং ৪৫না য়াওই, মখোয়বু কৌখি। ঐনা হায়খি, ঐগী মঙলান অমা লৈ অদোম পাংথোকপা ঙম্বীগদ্রা? মখোয়না হায়খি ঐখোয় খঞ্জখিগে। ঐনা হায়খি ইঞ্জিনীয়রশিংনচিংবগী মতেং লৌবীয়ু। ঐনা পাম্বদি খুঙ্গংদা পুরিবা মৈ অসিদা দোমেস্তিক অমসুং এগ্রিকলচর ফীদর তোঙান্না খাইদোকপনি। মখোয় অমুক হন্না লাকখি, মখোয়না হায়খি সাহেব ঐখোয় মতেং অমত্তা মথৌ তাদে। মসিদা চাদিং তৌনবা লুপা করোর ১০গী অয়াবা গুজরাত সরকারনা ঐখোয়দা পীবীয়ু। ঐনা হায়খি মদু ঐগী থৌদাংনি। ঐনা পর্মিসন পীখি।

মখোয়না থবক অদু হৌখি। ঐনা ইঞ্জিনীয়রশিংদা খরা কন্না মদু তৌনবা হায়খি। অমসুং খুঙ্গং ৪৫ অদুদা দোমেস্তিক ফীদর অমসুং এগ্রিকলচর ফীদর তোখাইহনখি। মদুনা মরম ওইদুনা লৌবুক্তা ইলেক্ত্রিক পীগদবা অদু পীরে, মদুগী মতম তোঙান্না, য়ুমথোং খুদিংদা পুং ২৪ ইলেক্ত্রিক ফংহনবা হৌরে। অদুদগী ঐনা এজুকেসন য়ুনিভর্সিতীশিংগী মতেং লৌদুনা নহারোলশিংবু থাদুনা মদুগী থার্দ পার্তী এসেসমেন্ত তৌহনখি। অদোম ঙকপীগনি মদুদি নুমিদাংগী মতমদা চাক চাবদা ইলেক্ত্রিক ফংবা ৱারম্বা গুজারাত্তা, পুং ২৪ ইলেক্ত্রিক ফংবগা লোইননা ইকোনোমী কয়াসু হৌখি। তেলরসু মখোয়গী ফি তুনবা মেচিন অদু মখোংগী মহুত্তা ইলেক্ত্রিক মেচিন্না চলাইরে। ফি শুবসু ইলেক্ত্রিক প্রেসনা থবক পাংথোকপা হৌরে, ফেন লৈবা হৌনরে, তি.ভি. লৈবা হৌনরে। অমরোমদা পুন্সি মপুং ফানা হোংদোকপা হৌরে। সরকারগী ইনকমদসু হেনগৎলে।

মদুগী চাংয়েং অদুনা ঐখোয়গী মতম অদুগা ওফিসর পুম্নমক্কী ৱাখল্লোন হোংহনখি। মমৈথংদা ৱারোইশিন পুরকখি মদুদি লম্বী অদু চুম্মি। অমসুং গুজরাত অপুনবদা নুমিৎ লিশিং অমগী থৌরম পাংথোকখি। নুমিৎ লিশিং অমগী মনুংদা এগ্রিকলচর ফীদর অমসুং দোমেস্তিক ফীদর তোখাইনহনগনি। অমসুং নুমিৎ লিশিং অমগী মনুংদা গুজরাত অপুনবদা য়ুমথোং খুদিংদা পুং ২৪ ইলেক্ত্রিক ফংহনবা ঙমখি। করিগুম্বা ঐনা প্রি-কন্সিব নোসন্স অদুদা চৎলম্লবদি মসি ওইরম্লোই, ক্লীন-স্লেৎ ওইখি ঐ। মকোক্তগী নৌনা খনখি ঐ অমসুং মদুনা মরম ওইদুনা ফল অসি ফংখি।

মরূপশা, ৱাফম অমখক ইন্দুনা চৎপীয়ু রেস্ত্রিক্সন্স নোৎ মেতর, য়োর রেস্পোন্স মেতর্স। ঐ অদোমদা অতোপ্পা খুদম অমগা পীজগে। গুজরাত অসি মসিগী থাক্তা সোলর পোলিসী শেমজবা আহানবা রাজ্যনি। মতম অদুদা ৱাফম অসি ঙাংনখি মদুদি সোলর ইলেক্ত্রিক্কী মমল অসি য়ুনিৎ অমদা লুপা ১২-১৩ ফাওবা ওইগনি। মমল অসি মতম অদুগা পানবদা য়াম্না ৱাংখি মরমদি থর্মেলগী ইলেক্ত্রিক অসিদি লুপা অনি, অনি মখাই, অহুমদা ফংলম্মি। মদুগী ইলেক্ত্রিক অদু হৌজিক লুপা ১৩দা, অদোম্না খঙবীরিবদুনি কোইলাং লাংবগী ফেশন অমসু চৎনরম্মি, পোৎ খুদিংমক্তা পিন্ত পোইন্ত তৌবসু চৎনৈ, মতম অদুদদি অমসুং ঐগীদমক্তদি য়াম্না অৱাবা ওইরম্মি। হৌজিক ঐগী মাংদা হিরম অমা লাক্লে। মদুদি সাহেব মসিদি য়াম্না চাউবা অৱাবা অমা ওইগনি। হোয় লুপা ২-৩ ওইবা ইলেক্ত্রিক অদুগা লুপা ১২-১৩গী ইলেক্ত্রিক।

অদুবু মরূপশা, ঐগী মাংদা অদুগুম্বা মিৎকুপ অমা লাকখি মদুদি ঐগী মিচৎকী মরমদা ৱাগদ্রা নত্ত্রগা ঐগী তুংগী লাক্কদৌরিবা মীরোলগীদমক ৱাগদ্রা। ঐ খঙই মদুদি অসিগুম্বা মখলগী ৱারেপ অসিগীদমক মীদিয়াদা য়াম্না থিনা ঙাংনগনি। করপ্সন মখল-মখাগী ইরাল শিরক্কনি, ময়াম অমা তৌরক্কনি। অদুবু ঐ ক্লীন-হর্ত ওইখি। ঐনা জেন্যুনলী থাজখি মদুদি ঐ লাইফ স্তাইল হোংদোক্নবা খরদি তৌবা তাই।

মমৈথংদা ঐনা ৱারেপ লৌখি। সোলর ইনর্জীগী মায়কৈদা চৎনবা ৱারেপ লৌখি। অমসুং ঐনা থমোই শেংনা ৱারেপ অসি লৌখি। মঙাল নাইবা তুংলমচৎকীদমক তৌখি, ভিজন অমগা লোইননা তৌখি।

গুজরাত্তা সোলর প্লান্ত হৌখি, মশিং য়াম্না হৌখি। অদুবু গুজরাতনা পোলিসী শেমখিবা মতম অদুদদি ভারত সরকারনসু ফুলস্তোপ কোমাগা লোইননা পোলিসী অদুমক মতম অদুদা শেমখি। অদুবু মখোয়না করি তৌখি, মখোয়না মমল লুপা ১৮-১৯দা লেপখি। হৌজিক ঐখোয়গী ওফিসর লাক্তুনা হায়ররে, সাহেব ঐখোয়না লুপা ১২-১৩ পীরে, মখোয়না ১৮-১৮ পীরে অদু ওইরবদি ঐখোয়গীসিদা কনানা লাকপীগনি। ঐনা হায়খি য়ারোই, ঐদি লুপা ১২-১৩ অসিদা অসুম লেপকনি, ১৮-১৯ ঐ পীবা ঙম্লোই, অদুবু ঐখোয়না দিবেলপমেন্তকীদমক্তা অদুগুম্বা ইকোসিস্তেম পীগনি, ত্রান্সপিরেন্সী পীগনি, স্পীদ পীগনি। মালেম্না ঐখোয়দা লাক্কনি, অফবা গোভর্নেন্সকী মোদেল অমগা লোইননা মাংদা চখৎকনি অমসুং ঙসি উবীরে অদোমগী গুজরাতনা লৌখিবা সোলরগী ইনিসিএতিব অদুনা ঙসি গুজরাত সোলর পাৱর জেনরেসন্দা কদাই ফাওবা য়ৌরবনো হায়বদু অদোমগী মাংদা উবীরি। অমসুং ঙসি য়ুনিভর্সিতী মশামক্না থবক অসি তৌবীনবা চোংথোকপীরক্লে।

১২-১৩দগী হৌখিবা অদুনা লৈবাক অপুনবগী সোলর মুবমেন্ত ওইখি। অমসুং মসিদা লাক্লবা মতুংদদি ইন্তর্নেস্নেল সোলর এলাইএন্স, মসিদা মালেমগী চাউরাক্না লৈবাক ৮০-৮৫ রোম্না মেম্বর ওইবা অদুগুম্বা ইন্সতিত্যুৎ অমা শেমখ্রে অমসুং মালেম অপুনবদা মুবমেন্তকী মরম ওইখরে। অদুবু মসি কনভিক্সন ক্লীন হর্তকা লোইননা তৌবা তাই মদুগী ফল ওইনা ঙসি হিন্দুস্তান অসি সোলরগী মনুংদা খোংজেল য়াংনা মাংদা চংশিল্লি। ঙসি য়ুনিৎ অমদা ১২-১৩দগী হন্থখিদুনা লুপা অনিদগীসু তাখ্রে।

লৈবাক অসিগীসু খ্বাইদগী মরু ওইবা অসি সোলর পাৱর ওইখ্রে। অমসুং ঐনা ২০২২ ফাওবদা গিগাৱাৎ ১৭৫গী রিন্যুএবল ইনর্জীগীদমক্তা ৱারেপ লৌরে অমসুং ঐনা থাজৈ মদুদি ঐখোয়না ২০২২গী মমাংদা মসি মপুং ফাহনবা ঙমগনি। অমসুং ২০৩০ ফাওবদা রিন্যুএবল ইনর্জীগী ঐখোয়গী পান্দম গিগাৱাৎ ৪৫০, য়াম্না চাউবা পান্দম্নি। মসিসু মতমগী মমাংদা মপুং ফাগনি, মসি ঐগী থাজবনি।

ওইথোকপা ঙমলোইদবা থবক অমত্তা লৈতে। ঐনা তৌবা ঙমগনি নত্ত্রগা ঐনা তৌবা ঙম্লোই হায়বা ৱাফমসিখক্তনি। থাজবা অসি অদোম্না মতম পুম্নমক্তা কান্নরক্কনি।

মরূপশা,

অহোংবা অসি ইশাদা তৌববু ওইরো নত্ত্রগা মালেমদা তৌববু ওইরো, অহোংবা অসি নোংমদা, চয়োল অমদা নত্ত্রগা চহি অমদা ওইবা নত্তে। হোংনবগীদমক্তা হোৎনবা খরা অদুবু চাং নাইনা খরা খরা ঐখোয় নুংতিগী লেপ্তনা হোৎনবা তাই। চাং নাইনা তৌখিবা অপীক অপীকপা থবকনা, য়াম্না চাউনা অহোংবা পুরকই। খুদম ওইনা অদোম নুংতিগী য়ামদ্রবদা মিনিৎ ২০ করিগুম্বা অনৌবা খরা পাবা নত্ত্রগা ইবগী হৈনবী থম্বা য়াই। মতৌ অসুম্না অদোম মসিসু খনবা য়াই মদুদি নুংতিগী মিনিৎ ২০ করিগুম্বা খরা তম্নবগীদমক দিদিকেৎ তৌসিরা!

নোংমগী মনুংদা অদোম্না য়েংলুরগদি মসি শুপ্নগী মিনিৎ ২০ খক্কী ৱানি। অদুবু মিনিৎ কুন অসি চহি অমদা পুং ১২০গা মান্ননা লৌগনি। পুং ১২০গী হোৎনবা অদুনা অদোমগী নুংদা কয়াম্না অহোংবা পুরকপগে হায়বদু খঙলকপদা অদোমসু অঙকপা পোক্কনি।

মরূপশা,

অদোম্না ক্রিকেৎতসু উরম্লগনি। তীম অমনা অচৌবা তার্গেৎ চেজ তৌরকপা মতমদা মখোয়না মসি খন্দে মদুদি মখোয়না পুন্না রন কয়া লৌগনি। বেৎসমেন্না মসি খল্লি মদুদি মহাক্না ওভর খুদিংদা রন কয়া লৌগদগে।

মন্ত্র অসি ফাইনান্সিএল প্লানিংদসু মীওই অয়াম্বনা ইন্দুনা চৎনৈ। থা খুদিংগী লুপা লিশিং মঙা তুংশিল্লি, অমসুং চহি অনিদা লুপা লাখ অনিদগী হেন্না মপুং ফাই। মতৌ অসুম্না হোৎনবা, সস্তেন্দ ইফোর্ত অসিনা অদোমগী নুংদা কেপাবিলিতীজ বিল্দ তৌই মদুগী ফল শোর্ত তর্মদদি উবা ফংদে হায়ববু লোং রনদা মসি অদোমগী য়াম্না চাউবা লন ওই, অদোমগী য়াম্না চাউবা পাঙ্গল ওই।

লৈবাক্কী থাক্তা লৈবাক অসিসু অসিগুম্বা সস্তেন্দ ইফোর্তশিংগা লোইননা চৎলবদি মসিগীসু অসিগুম্বা ফল ফংই। খুদম ওইনা স্বচ্ছ ভারত অভিয়ান অসি য়েংবীয়ু। ঐখোয় লুবা নানবগী মতাংদা শুপ্নগী গান্ধী জেয়েন্তীদা, শুপ্নগী ওক্তোবর খক্তদা খনবগী মহুত্তা ঐখোয়না নুমিৎ খুদিংদা মসিগীদমক হোৎনদুনতা লৈ। ঐনসু ২০১৪দগী হৌরগা ২০১৯গী মরক্তা চাউরাক্না মন কী বাত খুদিংমক্তা লুবা নানবগী মতাংদা লৈবাক মচাশিংদা ৱারী শাখি, ৱারী-ৱাতাই তৌখি, মখোয়দা হায়জখি। মতম পুম্নমক্তা তোঙান তোঙানবা হিরমদা ৱারী খরা খরা শাখি। অদুবু মীওই লাখ-করোর কয়াগী হোৎনবা মচা মচানা স্বচ্ছ ভারতকী আন্দোলন ওইখ্রে। সস্তেন্দ ইফোর্তকী মসিনি শাফু হায়বদু। ফল অসিমক ফংই।

মরূপশা,

২১শুবা চহি চাদা মালেমগী অনীংবা অপাম্বশিং ভারত্তা থম্লি অমসুং ভারতকী অনীংবা অমসুং অপাম্বশিংনা অদোমদা থম্লি। ঐখোয় খোংজেল য়াংনা চৎপা তাই, মাংদা চখৎপা তাই। পন্দিৎ দীন দয়াল উপাধ্যায়জীনা অন্ত্যোদয়গী ভিজন পীবীরম্মি, নেসন ফর্স্তকী ফিদমগা লোইননা চৎখি, ঐখোয় পুন্না মখোয়সিবু হেন্না মপাঙ্গল কলহনগদবনি। ঐখোয়গী থবক খুদিংমক, লৈবাক্কী মিংদা ওইহনগদবনি, ৱাখল্লোন অসিগা লোইননা ঐখোয় মাংদা চখৎকদবনি।

অমুক্কা হন্না অদোম ময়ামদা হন্না হন্না নুংঙাইবা ফোংদোকচরি অমসুং মঙাল নাইবা তুংলমচৎকীদমক্তা য়াইফ-পাউজেল পীজরি।

হন্না হন্না থাগৎচরি!!

*****