প্রধান মন্ত্রী শ্রী নরেন্দ্র মোদীনা পন্দিৎ দীন্দয়াল পেত্রোলিয়ম য়ুনিভর্সিতী, গান্ধীনগর, গুজরাতকী ৮শুবা কনভোকেসন্দা শরুক য়াখ্রে। মহাক্না ‘মোনোক্রিস্তেলাইন সোলর ফোতো ভোলতেক পেনেলগী ৪৫ মেগা ৱাত প্রদক্সন প্লান্ত’ অমসুং সেন্তর ওফ একসিলেন্স ওন ৱাতর তেক্নোলোজী’গী উরেপ উয়ুং তমখ্রে। মহাক্না য়ুনিভর্সিতী অসিদা ‘ইন্নোবেসন এন্দ ইক্যুবেসন সেন্তর – এক্নোলোজী বিজিনেস ইনক্যূবেসন’, ‘ত্রানস্লেস্নেল রিসর্চ সেন্তর’ অমসুং ‘স্পোর্তস কম্প্লেক্স’ শঙ্গাখ্রে।

মহৈরোয়শিংদা ৱা ঙাংলদুনা প্রধান মন্ত্রীনা মালেম অসিনা অচৌবা অৱাবা অমা মায়োক্নরিঙৈ মতম অসিদা গ্রেজ্যুৎ লোইশিনবা অসি অরায়বা থবক অমা নত্তে অদুবু নখোয়না তৌবা ঙম্বশিং অদুনা খুদোংচাদবশিং অসিদগী হেন্না চাউই হায়না ফোঙদোকখি। মহাক্না মখা তারদুনা হায় লাইচৎ অসিনা মরম ওইদুনা মালেমগী ইনর্জী সেক্তরদা অচৌবা অহোংবশিং লাজপা মতম অসিদা মহৈরোয়শিংদা ইন্দস্ত্রীদা চংগদৌরি।

প্রধান মন্ত্রীনা হায়খি অসুম্না ঙসি ভারতকী ইনর্জী সেক্তরনা গ্রোথ, ওন্তর্প্রিনোরশিপ অমসুং থবক পীবা ঙম্বগী পোতেন্সিএল চাউনা লৈরে। লৈবাক অসিনা ঙসি কার্বোন ফুদপ্রিন্ত ৩০-৩৫% হন্থহন্নবা পান্দমগা লোইনা মাংলোমদা চংশিল্লি অমসুং দিকেৎ অসিদা নেচরেল গ্যাসকী সিয়র অসি শরুক ৪ হেনগৎহন্নবা খোঙথাংশিং লৌখৎখ্রে হায়না মহাক্না লাউথোকখি। লাক্কদৌরিবা চহি মঙা অসিদা থাও শুংদোকপগী চাং অসি শরুক অনি ওইহন্নবা থবক পাইখৎলি, ইনর্জী সেক্যুরিতীগা মরী লৈনবা স্তার্তঅপ ইকোসিস্তেম অসি মপাঙ্গল কনখৎহনখ্রে অমসুং মহৈরোয়শিং অমসুং প্রোদেস্নেলশিংগীমক্তা ফন্দ থমখ্রে হায়না প্রধান মন্ত্রীনা হায়খি।

প্রধান মন্ত্রীনা মহৈরোয়শিংদা পুন্সিদা পান্দম থম্নবা হায়খি। মাই পাকপা মীওইশিংগী অৱাবা লৈতে হায়বা নত্তে অদুবু অৱাববু থেংনবা, মখোয়বু ময়োক্নবা, মখোয়বু মাইথিবা পীবা, অৱাবগী ৱারোইশিন পুরকপা অদু খক্তনা মাই পাকপা ঙম্বনি হায়না মহাক্না থমখি। মহাক্না মখা তারদুনা হায়খি অৱাবা থেংনবা ঙম্বশিংনা পুন্সিদা মাই পাকই। মহাক্না হায়খি ১৯২২-৪৭গী মতমগী নহাশিংনা নীংখা-তম্নবগীদমক্তা পুম্নমক কত্থোকখি। মহাক্না মহৈরোয়শিংনা লৈবাক অসিগীদমক্তা হিংনবা অমসুং আত্মানির্ভর ভারতকী খোঙজং অসি শৌগৎতুনা থৌদাং লৌবগী ৱাখল্লোন পোক্নবা খঙহনখি।

প্রধান মন্ত্রীনা হায় মাই পাকপা অসি থৌদাং লৌবগী ৱাখল্লোন পোক্লবা মতমদা ফংগনি অমসুং থৌদাং লৌবগী ৱাখল্লোন অসিনা পুন্সিগী পান্দম ওইহনগদবনি। মহাক্না অসিগুম্বা মীওইদি পুন্সিদা মাই পাকপা ওই, মখোয়গী পুন্সিদা থৌদাং লৌদুনা করিগুম্বা খরা তৌরমখি হায়না ফোঙদোকখি। মাইথিরবশিং অসি পোৎলুমগা লোইননা হিংলিবা মীওইশিংনি। থৌদাং লৌবগী ৱাখল্লোন অসিনা মীওই অমগী পুন্সিদা খুদোংচাবগী ৱাখল্লোনসু পী হায়না মহাক্না মখা তাখি। মহাক্না হায় ভারতনা সেক্তর কয়াদা মাংজিল থানা চংশিল্লি অমসুং নহা ওইরিবা গ্রেজ্যুৎ লোইরবশিংনসু কত্থোকপগা লোইননা মাং থানা চংশিনগদবনি। মহাক্না মহৌশা অমসুং অকোইবগী ফীভম ঙাক শেন্নবসু ফোঙদোকখি।

প্রধান মন্ত্রীনা হৌজিক্কী চারোন, ২১শুবা চহিচাগী নহাশিংদা অনৌবা ৱাখল্লোনগা লোইননা মাংলোমদা চংশিন্নবা হায়খ্রে। অনৌবা ৱাখল্লোন অমসুং থম্মোয় শেংবগী অর্থদি ৱাখল ময়েক শেংবা হায়বনি। মহাক্না হায়খি মালেম অসিনা ২১শুবা চহিচা অসিদা ভারত্তা থম্লিবা আশাশিং অমসুং থাজবশিং অসি ৱাংঙি অমসুং ভারতকী আশাশিং অমসুং থাজবশিং অসি মহৈরোয়শিং অমসুং প্রোফেস্নেলশিংগা মরী লৈনৈ।

***