প্রধান মন্ত্রী, শ্রী নরেন্দ্র মোদীনা, মহাক্কী লান্মীশিংগা দিৱালী পাংথোকমিন্নবা অদু মখা চৎথরদুনা লোঙ্গেৱালাদা লৈবা ভারতকী ঙমখৈগী পোস্ততা লান্মীশিংদা ৱা ঙাংখ্রে। মহাক্না হায়খি মদুদি মহাক্কী দিৱালী অসি উন্না কুপ্পা চিং ওইরবসু নত্ত্রগা লৈকংলা ওইরবসু লান্মীশিংগা লোইননা পাংথোকমিন্নদ্রবদি মপুং ফাবা ওইদে। মহাক্না ঙমখৈদা লৈরিবা লান্মীগী মীওইশিংদা ভারত মচা পুম্নমক্কী য়াইফ-পাউজেল পীখি। মহাক্না থৌনা ফরবা মমা অমসুং মচে-মচলশিংদসু নুংঙাইবা ফোংদোকখি অমসুং মখোয়গী কৎথোকখিবশিং অদুদা শ্রদ্ধাঞ্জলিসু কৎখি। প্রধান মন্ত্রীনা আর্ম ফোর্সশিংদা লৈবাক মীয়ামগী তৌবীমল ফোংদোকখি অমসুং হায়খি মদুদি ভারত মচা করোর ১৩০না ফোর্সশিং অসিগীদমক খোংফম চেৎনা লেপ্লি।

প্রধান মন্ত্রীনা শাফু পীখি মদুদি ঙসিগী মতম অসিদা এতেক্কর অমসুং ইন্ত্রুদরশিংগী পাউখুম পীবা ঙম্বা লৈবাক অদু শোইদ-ঙামদবা ওইরে। মহাক্না হায়খি মদুদি ঙসি মালেমগী ওইবা তেংবাং পীনবা অমসুং শরুক য়ামিন্নরিবা অসি চাউনা অহোংবা পুজরক্লবসু ঐখোয়না মসি কাওথোক্লোইদবনি মদুদি ঙাক-শেল অসি চেকশিন্না পাংথোক্কদবনি। নুংঙাইবা হায়বসি চেকশিনবগী মখা পোল্লি অমসুং চেকশিনবা অসিনা মায় পাকপগী ৱাখল ফাওহল্লি।

প্রধান মন্ত্রীনা লাওথোকখ্রে মদুদি ভারতকী পোলিসী অসি ময়েক য়াম্না শেংই। ঙসিগী ভারত ৱাখল তমিন্নবা অমদি অমগা অমগা পাউ ফাওদোক্নবদা থাজবা থম্লি অদুবু ঐখোয়গী খাংবা ঙম্বগী চাংয়েং তৌরক্লগদি লোন অদুমক্তা মান্ননা পাউখুম পীগনি।

মহাক্না লাওথোকখি মদুদি মালেম্না য়ারি মদুদি ভারতনা মসিগী লৈবাক্কী কান্ননবগীদমক মখল অমত্তদা য়াশিন্নবা পুরক্কদবা লৈতে। মসি ভারতকী হেনগৎলক্লিবা পাঙ্গল অমসুং অচেৎপা খোংফম অসিনা ওইহনবা ঙম্লিবনি। প্রধান মন্ত্রীনা হায়খি মদুদি ঙসি মালেমগী থাক্তা ইশাবু খোংফম চেৎনা লৈবা ঙম্লিবা অসি ভারতকী আর্ম ফোর্সশিংনা ঙাকপী শেনবীবদগীনি। ভারতকী মিলিতরী পাৱরনা মরম ওইদুনা ঙসি ভারতনা কনাগুম্বা অমা হেক্তগা ওনশিন্দুনা ৱারী শানবা ঙম্লিবনি। ঙসি ভারতনা তেরোরিজম্বু চংজফম পীবশিংবু ময়ুমদা চংদুনা পারা তম্বীরে।  

ভারত লম শন্দোকপগী ৱাখল চেনবা শক্তিশিংগা মায়োক্ননবা শাফু কনবা খোঞ্জেন অমা ওইনা শাফোংলক্লি। মহাক্না হায়খি মদুদি লম শন্দোকপগী ৱাখল অসি ১৮শুবা চহি চাগী ৱাখল্লোনগী মমি অদুনি অমসুং মসিনা মালেম অপুনবদা অৱাবা পোকহল্লি।

‘আত্মনির্ভর ভারত’ অমসুং ‘ভোকেল ফোর লোকেল’গী মতাংদা পল্লদুনা প্রধান মন্ত্রীনা হায়খি মদুদি ফোর্সশিংনা ৱারেপ অসি লৌখ্রে মদুদি খুৎলাই মখল ১০০ হেন্না অমসুং লান্মীগী থবক-থৌরমদা য়াওবা অতৈ খুৎশু-খুৎলাই হৌজিক মপান্দগী পুশিল্লরোই। মহাক্না লোকেল ফোর ভোকেলগী ৱাখল্লোনগী খুমাং য়ানবীবগীদমক আর্ম ফোর্সশিংদা থাগৎপা ফোংদোকখি।

শ্রী মোদীনা লৈবাক্কী আর্ম ফোর্সশিংনা শিজিন্নগদবা খুৎলাইশিং শানবগীদমক খঙহনখি, স্তার্তঅফ কয়ানা থোরক্তুনা ফোর্সশিংগী মথৌ তাবশিংবু মপুং ফাহন্নবগীদমক ফোংদোকখি। মহাক্না থাজবা থমখি মদুদি নহাশিংগী লুচিং মখাদা স্তার্তঅপশিংনা ঙাকশেলগী লমদা লৈবাক অসিনা আত্মনির্ভর ওইনবগী লম্বীদা শোইদনা পুগনি।

প্রধান মন্ত্রীনা হায়খি মদুদি আর্ম ফোর্সশিংদগী ইথিল পোক্তুনা ঙসি লৈবাক অসিনা কোবিদ লাইচৎ মনুং অসিদা মীওই খুদিংমক্কী ঙাক-শেন্নবগীদমক হোৎনরি। মীওই খুদিংমক্কীদমক চানবা পোৎলম ফংহন্নবা হোৎনবগা লোইননা ঐখোয়গী শেন্মিৎলোনবুসু লম্বীদা অমুক হন্না পুরক্নবা লেপ্তনা হোৎনরি।

প্রধান মন্ত্রীনা মমিং চৎখিবা লোঙ্গেৱালাগী লানফম অদুবু নীংশিংলদুনা হায়খি মদুদি লান্না মতম পুম্নমক্তা লান্মীগী শেম-শাবা অমসুং লাল্লোংগী থৌরাংগী মফম ফংগনি। মতম অসিদা পাকিস্তানগী লান্মীগী তমথিবা উৎখি অমসুং মসিগী লান্মীনা বঙ্গলাদেশকী লানজদ্রবা মীয়ামদা মীওৎ-মীনৈ চৎথখি অমসুং মমা ওইবী অমসুং মচে মচল ওইবীশিংদা ওৎপী নৈবীখি। পাকিস্তান্না নোংচুপ থংবা ঙমখৈদা মালেমগী পুক্নীং চিংশিনবা ঙম্ননবা থবক কনখৎহনখি। মদুগী পাউখুম ভারতনা চপ চানা পীখি।

***