প্রধান মন্ত্রী শ্রী নরেন্দ্র মোদীনা ঙসি ভিদিও কনফরেন্সকী থোংদা ইনকম তেক্স এপিলেৎ ত্রিব্যুনেলগী কত্তক বেঞ্চকী ওফিস-কম-রেসিদেন্সিএল কম্প্লেক্স শঙ্গাখ্রে। থৌরম অদুদা প্রধান মন্ত্রীনা হায়খি মদুদি বেঞ্চ অসিনা হৌজিক ওরিশা খক্তা নত্তনা নোংপোক অমসুং অৱাং থংবা ভারতকী থেক্স থিবা লাখ কয়াদা অনৌবা খুদোংচাবশিং ফংহল্লগনি অমসুং লমদম অসোমদা মতম কুইনদগী লৈরক্লবা কেস কয়া লোইশিনবদা মতেং ওইরগনি।

প্রধান মন্ত্রীনা ঙসি হায়খ্রে মদুদি লৈবাক অসিনা তেক্স তেরোরিজমদগী তেক্স ত্রান্সপরেন্সীগী মায়কৈদা চংশিল্লি। মহাক্না হায়খি মদুদি অহোংবা অসি রিফোর্ম, পর্ফোর্ম অমসুং ত্রান্সফোর্মগী মিৎয়েংদগী পুরক্লিবনি। মহাক্না হায়খি মদুদি তেক্নোলোজীগী মতেংদগী কাংলোন অমসুং থৌওংশিং শেমদোকপগী থবক পায়খৎলি। প্রধান মন্ত্রীনা হায়খি, “ঐখোয়না পুকচেল তিংনা থবক পাংথোক্লি অমসুং মসিগা লোইননা তেক্স এদমিনিস্ত্রেসনগী ৱাখল্লোনসু হোংদোক্লি।”

প্রধান মন্ত্রীনা হায়খি মদুদি লৈবাক অসিগী ৱেল্থ ক্রিয়েতরগী অৱাবশিং হন্থহল্লকপদা, মখোয়দা শোইদ-ঙামদবা ফংহনবদা, লৈবাক অসিগী সিস্তেমদা মখোয়গী থাজবা হেনগৎলকই। মহাক্না হায়খি মদুদি হেনগৎলক্লিবা থাজবা অসিগী মরমদগী লৈবাক অসিগী চাউখৎ-থৌরাংগীদমক তেক্স সিস্তেমদা য়াওনবগীদমক পার্তনর কয়া থোরক্লি। প্রধান মন্ত্রীনা হায়খি মদুদি তেক্সতা হন্থহনবগা লোইননা থৌওং লাইথোকহন্দুনা খ্বাইদগী চাউবা শেমদোকপা অসি থমোই শেংবা তেক্স থিবশিংগী মতৌগা মরী লৈনৈ, মরমদি মসিদগী মখোয়বু অৱাবশিংদগী কনবা ঙমগনি।

প্রধান মন্ত্রীনা হায়খি মদুদি সরকারগী ৱাখল্লোনদা ইনকম তেক্স রিতর্ন ফাইল তৌরবা মতুংদা অহানবা ওইনা মপুং ফানা থাজবা থমগদবনি। মসিনা মরম ওইদুনা, ঙসি লৈবাক অসিদা ফাইল তৌখিবা রিতর্ন চাদা ৯৯.৭৫ করিগুমবা মখল অমত্তগী য়ানীংদবা তৌদনা লৌশিল্লি। মহাক্না হায়খি মদুদি মসি লৈবাক অসিগী তেক্স সিস্তেমদা য়াম্না চাউবা অহোংবা অমনি।

শ্রী মোদীনা হায়খি মদুদি মীনাই নাইথাংগী শাংলবা মতম অদুনা তেক্স থিবা অমসুং তেক্স কলেক্তরগী মরক্তা তুহৎপীরবা অমদি তুহৎলিবগী মরী ওইদুনা লাক্লি। গোস্বামী তুলসীদাসপু খুদম ওইনা পল্লদুনা শ্রী মোদীনা হায়খি, “বরসত হরসত সব লখেং, করসত লখে নকোয় তুলসী প্রজা সুভাগ সে, ভুপ ভানু সো হোয়” মসিগী ৱাহন্থোক্তি নোং চুরকপদা, ঐখোয় পুম্নমক্না উবা ফংই; অদুবু নোং অদু নোংদুম ওনখিবদা, নুমিৎনা ঈশিং চুপশিনখিবদা, কনানসু নুংঙাইতবা তৌনদে। প্রধান মন্ত্রীনা হায়খি মদুদি তেক্স খোমজিনবা মতমদা সিস্তেম্না মীচম মীয়ামগীদমক্তা খুদোংচাদবা পোকহল্লোইদবনি; অদুবু লন অসি মীয়ামদা য়ৌহনবা মতমদদি, মীয়াম্না মখোয়গী পুন্সিদা মসিগী কান্নবা ফাওহনগদবনি। মহাক্না হায়খি মদুদি চহি কয়াদগী সরকার অসিনা মসিগী মিৎয়েং অসিদা মাংদা চখৎলি অমসুং ঙসিগী তেক্স থিবশিংনা তেক্স সিস্তেমদা অঙকপা ফংনা অহোংবা অমসুং নুং পান উবা ঙমলি। মহাক্না হায়খি মদুদি তেক্স থিবশিংনা রিফন্দগীদমক্তা থা কয়া ঙাইনবগী মথৌ তাদ্রে অমসুং চয়োল খরগী মনুংদা মহাক্না রিফন্দ ফংলে, অদুনা মহাক্না তেক্স সিস্তেমদা নুং-পান উবা ঙমলে।

প্রধান মন্ত্রীনা অপেনবা ফোংদোকখি মদুদি আই.তি. এপিলিয়েৎ ত্রিব্যুনেল অসিসু ভর্চুএলগী থোংদা হিয়ারিংগীদমক্তা লৈবাক অপুনবদা মসিগী বেঞ্চশিং অপগ্রেদ তৌরি। মহাক্না হায়খি মদুদি তেক্নোলোজীগী মতম অসিদা সিস্তেম অপুনবদা অপগ্রেদেসন তৌবা অসি য়াম্না মরু ওই। মহাক্না শাফু পীরদুনা হায়খি মদুদি মরুওইনা ঐখোয়গী জুদিসিয়রীদা তেক্নোলোজী অদুক্কী মতিক শিজিন্নবনা লৈবাক অসিগী মীয়াম্না অনৌবা খুদোংচাবা ফংবা হৌরে।

*****