হেদ ওফ স্তেৎকী এস.সি.ও. কাউন্সিলগী ২০শুবা সমিৎ নবেম্বর ১০, ২০২০দা (ভিদিও কনফরেন্সকী থোংদা) পাংথোকখ্রে। মীফম অদু রুসিয়ন ফেদরেসনগী রাস্ত্রপতি ব্লাদিমীর পুতিন্না ময়াই তাংবল লৌখি। প্রধান মন্ত্রী শ্রী নরেন্দ্র মোদীনা ভারতকী মীহুৎশিং লুচিংখি। অতৈ এ.সি.ও.গী মেম্বর লৈবাকশিং মখোয়গী রাস্ত্রপতিশিংনা লুচিংখি, অদুগা ভারত অমসুং পাকিস্তান্দি প্রধান মন্ত্রীগী থাক্না লুচিংখি। অতৈ শরুক য়াখিবশিং অদুদিঃ এস.সি.ও. সেক্রেতরিয়েৎকী সেক্রেতরী জেনরেল, এস.সি.ও. রিজনেল এন্তি-তেরোরিস্ত স্ত্রকচরগী এগজিক্যুতিব দাইরেক্তর, এস.সি.ও.গী ওবজার্বর মরিগী রাস্ত্রপতিশিং (অফগানিস্তান, বেলরুস, ইরান, মোঙ্গোলিয়া)নি।

মসি ভর্চুএল ওইবা মওংদা পাংথোকপা অমদি ২০১৭তা মপুং ফাবা মেম্বর অমা ওইরবা মতুংদা ভারতনা শরুক য়াবা অহুমশুবা মীফম্নি। প্রধান মন্ত্রী নরেন্দ্র মোদীনা এস.সি.ও.গী লুচিংবশিংদা ৱা ঙাংবদা কোবিদ-১৯গী লাইচৎনা ওইহল্লিবা শিংনবশিং অমদি অৱাবা অসিগী মরক্তা মীফম অসি শিনবীবগীদমক রাস্ত্রপতি ব্লাদিমীর পুতিন্দা নুংঙাইবা ফোংদোকখি।

প্রধান মন্ত্রীনা মহাক্কী ৱারোলদা, লাইচৎনা মরম ওইদুনা শেন্মিৎলোন অমদি খুন্নাইদা পীরিবা শাফু অসিনা অৱাবা ওইহল্লবা মালেমগী অনীংবা অপাম্বা মপুং ফাহন্নবগীদমক শেমদোক্লবা মল্তিলেতরেলিজম অমা মথৌ তাবগী মতাংদা ফোংদোকখি। ভারতনা যু.এন.এস.সি.দা নন-পর্মানেন্ত মেম্বর অমা ওইনা জনুৱারী ১, ২০২১দগী থবক পায়বা হৌগদৌরিবা অসিদা, মালেমগী ওইবা লৈঙাক্তা মথৌ তাবা অহোংবা পুরক্নবা ‘রিফোর্ম মল্তিলেতরেলিজম’দা মিৎয়েং থমগনি।

প্রধান মন্ত্রীনা ভারতকী শান্তি, ঙাক-শেল অমসুং চাউখৎপা অসিদা থম্লিবা থাজবা, শান্তি অমসুং চাউখৎপা অমসুং তেরোরিজম, আইন্না য়াদনা খুৎলাই ললোনবা, দ্রগ অমসুং মনী লোন্দরিংগী মায়োক্তা লাওখিবা খোল্লাও অদু অমুক হন্না পনখি। মহাক্না পনখি মদুদি ভারতকী থৌনা ফরবা লান্মীশিংনা য়ু.এন. পিচকিপিং মিসন ৫০ লোমদা শরুক য়াখি অমসুং ভারতকী ফার্মা ইন্দস্ত্রীনা লাইচৎ মনুংদা মথৌ তাবা হিদাকশিং লৈবাক ১৫০ হেনবদা থাখি।

প্রধান মন্ত্রীনা এস.সি.ও.গী লমদমগা লৈনরিবা ভারতকী অচেৎপা নাৎকী অমসুং পুৱারী ওইরবা মরী অদু পনখি অমসুং ইন্তর্নেস্নেল নোর্থ-সাউথ ত্রান্সপোর্ত কোর্রিদোর, চাবহার পোর্ত অমসুং অশগাবাৎকী য়ানা ৱারোলনচিংবা খোংথাংশিংগা লোইননা লমদম অসোম্দা কনেক্তিবিতী মপাঙ্গল কলহন্নবা ভারতনা ফোংদোকখিবা ৱাফম অদু অমুক হন্না নীংশিংখি। মহাক্না ২০২১দা এস.সি.ও.গী ২০শুবা কুমওন অসি “এস.সি.ও. নাৎকী চহি” হায়না পাংথোকপদা মপুং ফানা শৌগৎখি অমসুং ভারতকী নেস্নেল ম্যুজিয়ম্না শরুক য়ামিন্নরিবা বুদ্ধগী লন-থুমদা অহানবা এস.সি.ও. এগজিবিসন পাংথোক্নবা শেম-শাদুনা লৈরে হায়না ফোংদোকখি, মথংগী চহিদা ভারত্তা এস.সি.ও. ফুদ ফেস্তিবেল অমসুং রুসী অমসুং চাইনীজ লোন্দা ভারতকী সাহিত্যগী লাইরিক তরা হন্দোকপগী মতাংদসু পনখি।

ভারতনা নবেম্বর ৩০, ২০২০দা ভর্চুএল ওইনা পাংথোক্কদবা মথংগী এস.সি.ও. কাউন্সিলগী সরকারশিংগী মকোক্কী রিগুলর মীফম য়ুম্বু ওইনবা শেম-শাদুনা লৈরে হায়না প্রধান মন্ত্রীনা ফোংদোকখি। ভারতনা এস.সি.ও.গী মরক্তা ইনোবেসন অমসুং স্তার্তঅপশিংগী মতাংদা স্পিসিএল ৱর্কিং গ্রুপ অমা শেম্নবা অমসুং ত্রেদিস্নেল মেদিসিনগী মতাংদা সব-গ্রুপ অমা শেম্নবগী ৱাফম পুখৎখি। মহাক্না লাইচৎ মতুংগী মালেমদা, মালেমগী শেন্মিৎলোন অমসুং এস.সি.ও. লমদমগী শেনমিৎলোনগী থৌওংদা ফোর্স মল্তিপ্লায়র অমা ওইবা ঙমগদবা ভারতকী মিৎয়েং “আত্মনির্ভর ভারত” (মরোমদোম লেপচবা ভারত)কী মতাংদা শন্দোক্না তাকখি।

প্রধান মন্ত্রীনা তাজিকিস্তান রিপব্লিক্কী রাস্ত্রপতি ইমোমলী রাহমোনবু মথং চহিগী এস.সি.ও.গী চিয়র্মেনগী ফম পায়গদবা অদুগীদমক নুংঙাইবা ফোংদোকখি অমসুং ভারতনা মপুং ফানা শৌগৎকনি হায়না থাজবা পীখি।

*****