তেলিভিজন্দা থাদোকখিবা লৈবাক মীয়ামদা পীবা ৱারোল অমদা প্রধান মন্ত্রী শ্রী নরেন্দ্র মোদীনা লৈবাক মীয়াম পুম্নমক্তা লৈবাক অসিনা কোরোনাগী মাইয়োক্তা লান্দারিঙৈ চৈরক্তা মখোয়গী চেকশিনবা হন্থদনবা অমসুং লায়থোক্তনবা অকনবা আপিল তৌখি।
শ্রী নরেন্দ্র মোদীনা লোকদাউন লৌথোক্লবসু মসিনা ভাইরস অসি মুত্থৎখ্রে হায়বদি নত্তে হায়খি।
মহাক্না শেন্মিৎলোনগী থবকশিং মহৌশাগী ফিবমদা হঞ্জিল্লকপা অমসুং মীয়াম্না মখোয়গী ময়ুমগী মপান্দা থোক্তুনা মখোয়গী মথৌদাংশিং পাঙথোকপা ঙমজদুনা লৈবাক শিনবা থুংনা ফিবম ফগৎলকপদা শিংথাখি।
শ্রী মোদীনা কৈথেলশিংসু কুম্হৈগী মাংওইননা মহৌশাগী ফিবমদা লাক্লে হায়না পনখি।
হৌখিবা থা ৭-৮ অসিদা ভারত মচা খুদিংমক্না হোৎনজবনা মরম ওইদুনা ভারতকী ফিবম শাফনা লৈরিবনি অমসুং কনাগুম্বা অমত্তনা ফিবম অসিবু হেন্না শাথিবা মওংদা লাক্নবা হোৎনরোইদবনি হায়খি।
প্রধান মন্ত্রীনা পনখি মদুদি লৈবাক অসিগী নাবা ফগৎলকপগী চাং ৱাংলে অমসুং শিবগী চাংনা নেম্লে। শ্রী মোদীনা ইরৈচা লাখ ১০গী মনুংদা মীওই ৫৫০০ কোরোনা নারি অদুগা য়ু.এস. অমসুং ব্রাজিলগুম্বা লৈবাকশিংদদি ফিগর অসি ২৫০০০ য়ৌরিবনি হায়খি।
মহাক্না হায়খি মদুদি ভারতকী শিবগী চাং অসি ইরৈচা লাখ ১০গী মনুংদা ৮৩ ওইরি, অদুগা য়ু.এস., ব্রাজিল, স্পেন, বৃতেন অমসুং অতোপ্পা চাওখৎলবা লৈবাকশিংদদি মসি ৬০০ ওইরিবনি।
প্রধান মন্ত্রীনা চাওখৎলবা লৈবাকশিংগা চাংদম্নবদা, ভারতনা লৈবাক অসিগী মজাতি কন্নবা হোৎনবদদি হেন্না মায় পাক্লি হায়না শিংথাখি।
প্রধান মন্ত্রীনা লৈবাক অসিগী কোবিদ ইনফ্রাস্ত্রকচর ফগৎলকপগী মতাংদা পনখি। মহাক্না হায়খি মদুদি কোরোনা অনাবশিংগীদমক ফমুং লাখ ৯০ লৈ, মসিগা লোইননা লৈবাক অসিদা ক্বারেন্তিন সেন্তর ১২০০০ লৈরি হায়খি।
মহাক্না লৈবাক শিনবা থুংনা কোরোনা তেস্ত তৌনবা লেব ২০০০ লৈরি অদুগা তেস্ত তৌবগী মশিং অসি অথুবদা করোর ১০ য়ৌরগনি হায়খি।
ভারতনা রিসোর্স মরাং কায়না লৈবা লৈবাকশিংগা চাংদম্নবা মতমদা মজাতি কনবা মায় পাক্না ঙম্লি অমসুং লৈবাক অসিনা কোবিদ লাইচৎ থেংননবা হোৎনবদা তেস্ত তৌবগী মশিং হেনগত্তুনা অদুক্কী মতীক মপাঙ্গল কল্লি হায়খি।
প্রধান মন্ত্রীনা য়াম্লবা মীয়াম অসিবু মশাগী ওইজবা থিদনা "সেবা পর্মো ধর্ম"গী লাইৱা তুংইন্নদুনা হোৎনরিবা দোক্তর, নর্স অমসুং হেল্থ ৱার্করশিংবু থাগৎপা ফোংদোকখি।
মহাক্না মীয়ামদা অসুম্না কন্না হোৎনরিবা মরক অসিদা লায়থোক্তনবা অমসুং কোরোনা ভাইরস অসি মুৎখ্রে খন্দনবা নত্ত্রগা কোরোনাদগী কিনিংঙাই অমত্তা ওইদ্রে হায়না খন্দনবা চেকশিন-ৱা থমখি।
মতম খরগী মমাংদা চেকশিনবা লেপ্লিবা মীয়াম্বু চেকশিন্নবা হায়রদুনা মহাক্না হায়খি, "করিগুম্বা অদোম্না চেকশিন্দ্রবা অমসুং মাস্ক উপ্পীদনা চত্থোক্লবা, অদোম, অদোমগী ইমুং, অদোমগী ইচা, অহল ওইরবশিংবু চপ মান্ননা অৱাফমদা পুশিল্লবনি।"
প্রধান মন্ত্রীনা কোরোনা কেস মশিং অহানবদা হন্থরম্লগা ইখঙ-খঙহৌদনা হেনগৎলক্লিবা  য়ু.এস. অমসুং য়ুরোপকী ফিবম পনখি।
মহাক্না মীয়ামদা লাইচৎ অসিগী ভেক্সিন অমা পুথোক্ত্রিবফাওবা লাইথোক্তনা অমসুং কোবিদ-১৯গী মাইয়োক্তা শোক্নরিবা লান্থেং অসি পাঙ্গল হন্থহন্দনবা পুক্নিং চিংশিনখি।
প্রধান মন্ত্রীনা হায়খি মদুদি মীওইবা খুন্নাইবু কন্নবা অথুবদা হোৎনরি অমসুং লৈবাক অসিগী সাইন্তিস্তশিং য়াওনা লৈবাক কয়ানা ভেক্সিন অমা পুথোক্নবা কন্না হোৎনরি।
মহাক্না হায়খি মদুদি কোরোনা ঙাকথোক্নবা ভেক্সিন কয়াদা থবক পায়খৎলি অমসুং মসিগী মনুংদগী খরা অমদি এদভান্স স্তেজ য়ৌরে।
প্রধান মন্ত্রীনা হায়খি মদুদি সরকার অসিনা ভেক্সিন অমা হেক শেম শাবা লোইবগা  মীপুম খুদিংমক্তা য়ৌহন্নবা লম্বী য়াৎপগী থৌরাং তৌরি।
মহাক্না হন্না মীয়ামদা ভেক্সিন অমা হেক পুথোক্ত্রিবফাওবা চেকশিন্দবা তৌবীদনবা তকশিনখি।
প্রধান মন্ত্রীনা হায়খি মদুদি ঐখোয়না খুদোংচাদ্রবা মতম অমদা লৈরি অমসুং খরা খিতং চেকশিলহৌদবনা লাংফম অচৌবা অমদা তাশিন্দুনা নুংঙাইবা পুম্নমক মাং তাকহনবা য়াই হায়খি।
মহাক্না ইরৈচা খুদিংমক্তা মখোয়গী মথৌদাংশিং পাঙথোকপা মতমদা মীকুপ নাহুম শিংনা পাঙথোক্নবা পুক্নিং চিংশিনখি।
মহাক্না ইরৈচাশিংদা ফুৎ ৬কী অথাপ্পা থম্বীনবা (দো গজ কী দুরী), খুৎ-শা সাপোন্না তোইনা হাম্বীনবা অমসুং ফেস মাস্ক উপ্পীনবা পুক্নিং চিংশিনখি।

*****