শিপ্পিংগী রাজ্য মন্ত্রী (আই./সি.) শ্রী মনশুখ মন্দাবিয়ানা ঙসি নই-দিল্লীদা ভেসেল ত্রাফিক সর্বিস (ভি.তিএস.) অমসুং ভেসেল ত্রাফিক মোনিতরিং সীস্তেম (ভি.তি.এম.এস.)কী লমদমসিদা শাজবা সোফৱেয়র সোল্যুসন অসি ই.-লোঞ্চ তৌখ্রে।

শ্রী মন্দাবিয়ানা থৌরম হৌদোকপগী ৱারোলদা ভারতকী হিথাংফমশিংগী ত্রাফিক শেন্নবগী ওইনা মীরমদা শাবা মমল তাঙবা সোফৱেয়রগী মপাল তাংবগী মহুত্তা লৈবাক অসিদা হৌজিক তঙাই ফদবা লৈরিবা অসিগী মতুং ইন্না লমদম অসিদা ওইনা সোফৱেয়র শাজবদা মিৎয়েং চঙখ্রে।

শ্রী মন্দাবিয়ানা হায়খিবদা প্রধান মন্ত্রী শ্রী নরেন্দ্র মোদীগী ‘আত্মা নির্ভর ভারত’কী মঙলানগী শরুক অমা ওইনা ‘ভারত্তা শাবা’ ভি.তি.এস. অমসুং ভি.তি.এম.এস. সোফৱেয়র অসিনা ‘মালেমগী ওইনা শাবা’ ভেসেলশিংগী ত্রাফিক শেন্নবগী পথাপ অমা ওইরগনি হায়খ্রে।

ভি.তি.এস./ভি.তি.এম.এস. অসি ভেসেলগী লৈফম, অতোপ্পা ত্রাফিক্কী লৈফম নত্ত্রগা মেতিওরোলোজিকেলগী ওইবা খুদোংথিবগী চেকশিনৱা খঙনবা অমসুং হিথাংফম মনুংদা নত্ত্রগা ঈশিং লম্বীগী ত্রাফিকশিং নীংথিনা শেন্ননবা সোফৱেয়র অমনি। ভেসেল ত্রাফিক সর্বিস (ভি.তি.এস.)না সমুদ্রদা মীওইবগী পুন্সিবু তেক্ত-কায়দনা থম্বা, লম্বী তাকপগী মতাংদা অচুম্বা অমসুং তেক্ত-কায়দবা থৌওং ওইহনবা অমসুং ঈশিংগী ওইবা অকোয়বগী ফিভম্বু ঙাক শেনবা, থংনবা সমুদ্র তোর্বান, থবক তৌফম অমসুং মেরিতাইম ত্রাফিক্তা থোকহন্নিংদবা থৌদোক থোক্তনবা কঙফালদা লৈবা শেন্নফমশিংদা তেংবাংবগী থবক তৌই। ভেসেল ত্রাফিক মেনেজমেন্ত সীস্তেম অসি মালেমগী খ্বাইদগী চিনবা সমুদ্রগী ঈশিংদা থম্নৈ অমসুং মসিনা তেক্ত-কায়দবা লম্বী খঙবা, ত্রাফিক নুংঙাইহনবা অমসুং অকোয়ববু ঙাক-শেনবদা মরু ওইবা তেংবাং কয়া অমা পীরি। হিথাংফম অমসুং মসিবু শিজিন্নরিবা মীওইশিংদা অহেনবা খুদোংচাবা পীবা ওইনা মসিনা অচিনবা লম্বীশিং, এক্সেস চেনেলশিং অমসুং হিথাংফমশিংদা থেংনবা ত্রাফিক্কী থৌওংশিং অসি নীংথিজনা শেন্নবা ঙমহল্লি। থৌদোক কয়া থোকপা অমসুং ইমর্জেন্সীগী ফিভম কয়া অমা মসিনা লাইনা থেংনবা ঙমহল্লি। ত্রাফিক্কী চত্থোক-চৎশিন তৌবগী দেতাশিং অসি থমজিনবা য়াহন্দুনা মসিবু হিথাংফম শেন্নবা মীওইশিং, কোসস্ত-গার্দ অমসুং মীওই থীবা অমসুং কনবগী থবকশিংদা শিজিন্নবা য়াহল্লি।

ভি.তি.এম.এস. অসি আই.এম.ও. কনবেন্সন এস.ও.এল.এ.এস. (সেফতী ওফ লাইফ এৎ সী)গী মখাদা তঙাই ফদনা শিজিন্নদবা য়াদবা ওইহল্লি। ভি.তি.এম.এস. ত্রাফিক ইমেজ অসি রাদার, এ.আই.এস., দাইরেক্ত ফাইন্দিং, সি.সি.তি.ভি. অমসুং ভি.ঐচ.এফ. নত্ত্রগা অতোপ্পা খুৎশম্নদুনা পাঙথোকপা পথাপ অমসুং সর্বিসশিং শিজিন্নদুনা খোমজিন-তাশিনবগী থবক পাঙথোকই। হৌজিক্কী মতমগা চানবা ভি.তি.এম.এস. অসিদা ৱারোল খুদিংমক অসি শিজিন্নবা নুংঙাইনবা হায়দুনা অমত্তা ওইবা ৱর্কিং ইনবাইরনমেন্ত অমদা পুন্সিল্লি অমসুং মসিনা ত্রাফিক শেন্নবা অমসুং পাউ-ফাওনবগী থৌওং কয়াবু নীংথিনা পাঙথোকপা ঙমহল্লি।

হৌজিক-হৌজিক ভারত্তা চাউরাক্না ভি.তি.এস. সীস্তেম ১৫না ভারতকী সমুদ্র তোর্বানশিংদা থবক তৌদুনা লৈরি অমসুং পথাপ খুদিংগী ওইনা মশা-মশাগী ভি.তি.এস. সোফৱেয়র লৈজবনা ভি.তি.এস. সোফৱেয়র অসিগা অমগা-অমগা মান্নদে। লমদম অসিদা পুথোকচবা সোফৱেয়র শাবগী থবক চত্থরিবা অসিদা আত্মানির্ভর ভারতকী খোঙথাংগী শরুক অমা ওইনা হন্দক্তা দাইরেক্তর জেনেরেল ওফ লাইৎ অমসুং লাইৎহাউস (দি.জি.এল.এল.)কা কান্নবা মওংদা খুৎশম্নখিবা অসিনা লমদম অসিদা শেমজবা ভি.তি.এম.এস. সোফৱেয়র শাবগী হীরম অসিদা হেন্না মপাঙ্গল হাপ্লগনি। মসিদা নত্তনা ভারত অমসুং মফমশিং অসিগী হিথাংফমগী সেক্তরদসু মসিনা কান্নবা পীগনি। মসিনা নুংতিগী ওইবা থবকশিং শেন্নবা ঙম্বা অচৌবা পথাপ অমা ওইবা ঙমদ্রিবা ফাওবগী ওইনদি মসিগী প্রোতোতাইপ সীস্তেম অমা চাংয়েং তৌনবা অমসুং পেরেলেল সীস্তেম অমা ওইনা  তরাশুবা থাদা পুথোকপা ঙমগনি হায়বগী থাজবা থম্নরি।

লৈবাক অসিদা ভি.তি.এস. সোফৱেয়র শাজবা অসিনা হীরম অসিগী মতাংদা পাঙথোকপা ফোরেন এক্সচেঞ্জকী থৌওংশিংসু হন্থহনগনি অমসুং সোফৱেয়র অসিগী মতাংদা মীরমদা মীপাল তাংবা অদুসু হন্থহনগনি। মসিনা পীগদবা কান্নবশিং মখাদা পীরিঃ

১) ভারতকী তোঙান-তোঙানবা ভি.তি.এস.শিংগী ফোরেন এক্সচেঞ্জশিং কনবা ঙম্লগনি।

২) ভি.তি.এস. সোফৱেয়র অসি ভারতকা লল্লোন-ইতিক্কী মরমদা মরী ফজনা লৈবা লৈবাকশিং, মিং ওইনা পল্লবদা মালদিবস, মোরিসস, ম্যানমার, শ্রী লঙ্কা, বঙ্গলাদেশ অমসুং অতোপ্পা গল্ফ লৈবাকশিংদা পীবা য়াগনি।

৩) সোফৱেয়র অসিবু তুংদা অপগ্রেদ তৌবগী শেলসু হন্থহল্লগনি।

৪) হিথাংফমশিংগী এম.আই.এস./ই.আর.পি. সোফৱেয়রশিংবু অমগা-অমগা পাউ ফাওনহনবদসু লাইহনগনি।

৫) ভারতকী ভি.তি.এস. সোফৱেয়র লৈজবা অসিনা ভারতকী কম্পেনীশিংনা মালেমগী ওইবা বিদশিংদা কম্মর্সিএল ওইনা চাংয়েংনবা ঙমহনগনি।

রীএল তাইম ওইবা, সমুদ্র তোর্বান্দা জহাজ চেনবগী লম্বী তাকপদা তেংবাংবগী পথাপ অমা ওইগদবা দি.জি.এল.এল.গী ইন্দিয়ন নেভী অমসুং এন.সি.ভি.তি.এস.কী নেস্নেল মেরিতাইম দোমেন এৱিয়রনেস প্রোগ্রাম্বু থবক ওইনা পাঙথোকপা অসি ভারতকী ভি.তি.এস. সোফৱেয়র অসি অহোংবা মমলদা ফংলবনিনা লায়রগনি।

শিপ্পিং মন্ত্রালয়না লমদমসিদা শাজবা সোফৱেয়রগী সোল্যুসন অসিবু হেন্না চাউখৎহন্নবা আই.আই.তি., চেন্নৈদা লুপা করোর ১০ পীথখ্রে।

শিপ্পিং মন্ত্রালয়গী সেনিয়র ওফিসিএলশিং, মরু ওইবা হিথাংফমশিংগী চেয়রপর্সনশিং অমসুং আই.আই.তি. চেন্নৈগী মীহুৎশিংসু থৌরম অসিদা ভর্চুএলগী খুত্থাংদা শরুক য়াখি।

**********