কেন্দ্রগী এজুকেসন মন্ত্রী শ্রী রমেশ পোখ্রিয়াল ‘নিশঙ্ক’না ভারত সরকারনা শেল থাদদুনা চত্থবা ইকায় খুম্ননীংঙাই ওইরবা এ.এস.ই.এ.এন. পি.ঐচ.দি. ফেলোশিপ প্রোগ্রামগীদমক্তা খনগৎলবা এ.এস.ই.এ.এন. মেম্বর স্তেৎকী মহৈরোয়শিংদা ভর্চুএলগী খুত্থাংদা ঙসি ৱা ঙাংখ্রে অমসুং  লৈবাক অসিগী অৱাংবা থাক্কী তেক্নোলীজীগী ইন্সতিত্যুসন ওইরিবা আই.আই.তি. মহৈ তম্নবগীদমক্তা খনলকপদা মখোয়বু থাগৎপা ফোঙদোকখ্রে। এজুকেসনগী রাজ্য মন্ত্রী শ্রী সঞ্জয় ধোত্রেনা থৌরম অদুগী অথোয়বা মীথুংলেন ওইখি। এ.এস.ই.এ.এন. মেম্বর স্তেৎকী এম্বেসেদর অমসুং মীহুৎশিং; হাইয়র এজুকেসনগী সেক্রেতরী শ্রী অমিৎ খারে; এম.ই.এ.গী সেক্রেতরী (নোংপোক) মিস রিয়া গঙ্গুলী দাস; আই.আই.তি. দিল্লীগী দাইরেক্তর প্রোফঃ ভি. রামগোপাল রাও; মরী লৈনবা আই.আই.তি.শিংগী এ.এস.ই.এ.এন. কো-ওর্দিনেতর, আই.আই.তি.শিংগী দাইরেক্তরশিং অমসুং খনগৎলবা মহৈরোয়শিংসু থৌরম অদুদা শরুক য়াখি।

এ.এস.ই.এ.এন. মহৈরোয়শিংবু তরাম্না ওক্লদুনা কেন্দ্রগী এজুকেসন মন্ত্রীনা হায়খিবদা ভারত অমসুং এ.এস.ই.এ.এন. মেম্বর স্তেৎকী মরক্তা লৈনরিবা একাদমিক অমসুং রিসর্চকী থৌওংশিংগী মরী অসিনা নাকল অনিমক্তা কান্নবা পীগনি হায়খি। মসিনা নাৎ, কম্মর্স অমসুং অমগা অমগা শম্নবগী হীরমশিংদা লৈনরিবা মরীবু হেন্না চেৎশিনহনগনি হায়না মখা তানা হায়খি। এ.পি.এফ.পি.না ভারত অমসুং এ.এস.ই.এ.এন.গী তেক্নোলোজী অমসুং রিসর্চকী ওইনা একাদমিসিয়নশিং, রিসর্চ তৌবা মীওইশিং অমসুং সাইন্তিস্তশিংগী মরক্তা অচেৎপা মরী লৈনরিবা অসিগী ওইনসু থোঙ কয়া অমা হাঙগনি। মখোয়না পাঙথোক্লিবা রিসর্চ অমসুং অনৌবা কয়া পুথোক্লিবা অসিনা মালেম পুম্বগী মীওইবা খুন্নাইদা কান্নবা পুরক্নবা শিজিন্নগনি হায়না মহাক্না হায়খি।

মন্ত্রীনা মখা তানা হায়খিবদা হৌজিক চৎলিবা লায়চৎ অসিনা মালেম্বু তপথহল্লে হায়খি। আই.আই.তি.শিংনা লায়চৎ অসিগী মনুং অসিদসু মখোয়গী মমল নাইদ্রবা রিসর্চ অমসুং অনৌবা পুথোকপগী থৌওংশিং অসিনা লৈবাক্কী মতেং পাংদুনা মাই-পাকপগী অনৌবা ৱারী কয়া লেপ্তনা লৈহল্লিবা অসিদা য়াম্না হরাওবা ফাওই হায়না ফোঙদোকখি। এ.এস.ই.এ.এন. মেম্বর স্তেৎকী মহৈরোয়শিংনা মালেমগী খ্বাইদগী ফবা ইন্সতিত্যুসনশিংগী মনুং চল্লিবা আই.আই.তি.শিংদা মহৈ তম্বা ফংবগী খুদোংচাবা কয়া ফংলে। রিসর্চ প্রোগ্রামশিং অসিদা য়াওরিবা মহৈরোয়শিংদা মন্ত্রীনা য়াইফ পাউজেল পীখি। এ.এস.ই.এ.এন. মহৈরোয়শিংগী ওইনা শেম্লিবা আই.আই.তি. দিল্লীগী এ.এস.ই.এ.এন. পি.ঐচ.দি. ফেলোশিপ প্রোগ্রাম সেক্রেত্রিএৎ অসিদা এজুকেসন মন্ত্রালয়না মতেং কয়া পাংগনি।

এ.এস.ই.এ.এন. পি.ঐচ.দি. ফেলোশিপ প্রোগ্রাম অসি প্রধান মন্ত্রী শ্রী নরেন্দ্র মোদীনা এ.এস.ই.এ.এন. মেম্বর স্তেৎ পুম্নমক্কী লুচিংবা ১০গী মমাংদা ভারতকী গনতন্ত্র দিবস নুমিৎকা মাংওইননা জনুৱারি ২৫, ২০১৮দা লাওথোকখিবনি হায়না মন্ত্রীনা মিৎয়েং চঙলদুনা পাউদমখি। মহাক্না হায়খিবদা এ.পি.এফ.পি.গী মখাদা এ.এস.ই.এ.এন.গী মীওইশিং খক্তগী ওইবা ফেলোশিপ ১০০০ পীগনি হায়খি। মহাক্না মখা তানা হায়খিবদা এ.পি.এফ.পি. অসি মীরমগী লৈবাক্কী বেনিফিশরীশিংগীদমক্তা ভারত সরকারনা পায়খৎপা খ্বাইদগী চাউবা কেপাসিতী দিভেলপমেন্ত প্রোগ্রাম অমনি হায়খি। এ.এস.ই.এ.এন. পি.ঐচ.দি. ফেলোশিং অসিবু মখোয়না পি.ঐচ.দি. লোইশিল্লিবা মরী লৈনবা আই.আই.তি.শিংগী এলুম্নিনি ওইনা শক-খঙগনি হায়না মহাক্না হায়খি।

শ্রী পোখ্রিয়ালনা হায়খিবদা মসিগী প্রোগ্রাম অসিনা ভারতনা মতম পুম্বদা শেন্নরিবা অমসুং শেমগৎলিবা ‘ইতিথি দেবো ভবা’ অমসুং ‘ভাসুধাইভা কুতুম্বাকম’গী মঙলানগা লোয়নবা ‘সরভে ভবন্তু সুখিনাহ’গী চৎনবী অসিগী মশকসু তাক্লি হায়খি। মহাক্না হায়খিবদা ঐখোয়বু মালেমগা পুন্দুনা তুং লমচৎকীদমক্তা চৎপা পাম্মি হায়খি। মালেমগী ওইবা ৱাখল্লোন অমসুং থৌওংগা লোয়ননা ঐখোয়না মহৈ-তম্বীবগী লমফা মালেমগী হব অমা ওইহন্নবা খোঙফম চেৎলি হায়না মহাক্না মখা তানা হায়খি। এ.পি.এফ.পি. প্রোগ্রাম অসিনা কান্নবা খোঙথাং অমা ওইনা এজুকেসনবু মালেমগী থাক্তা পুরক্নবগী মাইকেদা খোঙদারি হায়না মহাক্না হায়খি।

থৌরম অসিদা শরুক য়ারিবা মীয়ামদা ৱা ঙাংবদা শ্রী ধোত্রেনা ঐখোয়গা খা-নোংপোক এসিয়াগী লৈবাকশিংগা লৈনরিবা মরী অসি য়াম্না লিরবনি হায়না হায়খি। ঐখোয়গী থাইনগী ইপিক রমায়নগী ইথিল অসি এ.এস.ই.এ.এন. লৈবাকশিংগী নাৎকী হীরমশিংদা নীংথিজনা উবা ফংই। ঐখোয়গী লৈনরিবা মরী অসিগী মরা অসিসু ভগ্বানা বুধগী ৱারোলশিংগী খুত্থাংদা হেন্না চেৎশিনহল্লি। ঐখোয়না নাৎকী অমসুং পুৱারীগী ওইবা অচেৎপা মরীসু লৈনরি। এ.এস.ই.এ.এন. মহৈরোয়শিংনা ভারত্তা একাদমিক রিসর্চ তৌবগী থৌওং অমা হৌরকপা অসিনা ঐখোয়গী লৈনরিবা মরীশিং অসিবু হেন্না অমুক চেৎশিনহল্লগনি হায়না মহাক্না মখা তানা হায়খি। রিসর্চ তৌবা অমসুং অনৌবা থৌওং পাঙথোকপদা খুৎশম্নবা অসিনা নাকল অনিমক্তা কান্নবা পুরক্কনি।

মালেম পুম্বনা কোবিদ-১৯গা লান্থেংনরিঙৈ অসিদা ঐখোয়গী রিসর্চ ইন্সতিত্যুসনশিংনা কোরোনাগী মায়োক্তা লেপ্পা ঙম্নবা শেল য়াম্না চঙদবা ভেন্তিলেতর, তেস্তিং কিৎশিং, মাস্কনচিংবা কয়া অমা পুথোকপদা ঐখোয়বু তেংবাংলি হায়না মহাক্না মিৎয়েং চঙখি। মসিগী ফেলোশিপ প্রোগ্রাম অসিগী মখাদা খল্লবা ফেলো খুদিংমকপু আই.আই.তি.গী খ্বাইদগী ফরবা একাদমিসিয়ন অমসুং সাইন্তিস্তশিংগী লমজিং মখাদা পাঙথোক্কদবা মখোয়গী তুংগী রিসর্চ অমসুং অনৌবা থৌওং পাঙথোকপদা অফবা ওইয়ু হায়না মহাক্না য়াইফ পাউজেল পীখি। থৌরম অসিদা ৱা ঙাংবদা শ্রী খারেনা হায়খিবদা হন্দক্তা পুথোকখিবা অনৌবা এজুকেসন পোলিসী (এন.ই.পি.)-২০২০ অসিনা ভারতকী মহৈ-তম্বীবগী পথাপ্তা অনৌবা মওংদা শেমদোকপা অহোংবা অমা পুরক্কনি হায়খি। এন.ই.পি.না হাইয়র এজুএক্সন্দা রিসর্চ অমসুং অনৌবা থৌওং পাঙথোকপদা খুমাং চাউশিলহনবা অমসুং মহৈ-তম্বীববু মালেমগী থাক্তা পুরকপদা মিৎয়েং চঙলি। মসিগী পোলিসী অসিনা মীরমগী য়ুনিবর্সিতীশিংনা ভারত্তা কেম্পস হাংবগী অমসুং ওন্ন-তৈনবা থৌওংগীসু অয়াবা পীরে অমসুং থৌওং অসিনা ভারতপু মালেমগী লৌশিংগী শক্তি অমা ওইহনবদা তেংবাংগনি।

মন্ত্রালয় অসিগী স্কিম ফোর প্রোমোসন ওফ একাদমিক অমসুং রিসর্চ কোল্লাবোরেসন (এস.পি.এ.আর.সি.)গী খোঙথাং অসিনা ভারতকী ওইবা খ্বাইদগী মকোক্তা লৈবা ইন্সতিত্যুসনশিং অমসুং অৱাংবা থাক্তা লৈবা মালেমগী ইন্সতিত্যুসনশিংগী মরক্তা খুৎশম্নবগী থৌওংবু পুক্নিং থৌগৎকনি হায়না শ্রী খারেনা হায়খি। নেস্নেল রিসর্চ ফাউন্দেসন অসি রিসর্চ তৌবগী থৌওংশিং, তেক্নোলোজী চাউখৎহনবা অমসুং তেক্নোলোজীনা লমজিংদুনা অনৌবা থৌওং পাঙথোকপদা পাকথোক-চাউথোকহনবগী মাইকৈদা য়াম্না তোঙানবা মতেং পীগদবা খোঙথাং অমনি অমসুং মসিনা অনৌবা ভারতকী মঙলানশিংবু মঙফাওনহনবদা য়াম্না তেংবাংগনি হায়না মহাক্না মখা তানা হায়খি। মহাক্না মহৈরোয়শিংদা য়াইফ পাউজেল কয়া পীখি।

রীপব্লিক ওফ ইন্দোনেসিয়াগী ঐচ.ই.এম্বেসেদর, সিধার্তো রেজা সুর্য়োদিপুরোনা হায়খি, “মসিনা  ভারত অমসুং এ.এস.ই.এ.এন. লৈবাকশিংগী মরক্তা লৈরিবা মহৈ-তম্বীবদা খুৎশম্নবগী অহাংবা লৈরিবা অসিবু মেনশিনবগী খ্বাইদগী ফরবা খোঙথাং অমনি। মসিনা মহৈ-তম্বীবা অমসুং এ.এস.ই.এ.এন. আই.তি. কেপাসিতীবু হেন্না ফগৎহনবগীদমক্তা ভারতনা পীবা খুদোল অমা ওইরগনি অমসুং ভারত অমসুং এ.এস.ই.এ.এন.গী খুৎশম্নববু হেন্না নকশিনহনবা অমসুং ঐখোয়গী মান্নবা ওইনা আই.আর. ৪.০দা দিজিতেলগী অহোংবা পুরকপদা ভারতনা শৌগৎপগী থৌওং ওইগনি”।

রীপব্লিক ওফ য়ুনিয়ন ওফ ম্যানমারগী ঐচ.ই.এম্বেসেদর মো ক্যাৱ আউংনা হায়খি, “মসিগী এ.এস.ই.এ.এন. পি.ঐচ.দি. ফেলোশিপ প্রোগ্রাম অসিনা এ.এস.ই.এ.এন.গী শরুক য়ারিবা মীওইশিংদা ভারত্তা অৱাংবা থাক্কী মহৈ-তম্বগী খুদোংচাবা ফংহনবতা নত্তনা মসিনা ভারত অমসুং এ.এস.ই.এ.এন. লৈবাকশিংগী মরক্তা মহৈ-তম্বগী পথাপ্পু হেন্না খুমাং চাউশিলহনবা অমসুং নাৎকী ওইবা হীরম কয়া লান্নবগী খুদোংচাবা অমসু পীরগনি”।

ফিলিপিন্সকী ঐচ.ই.এম্বেসেদর রামোন এস. বগৎশিং জে.আর.না মখোয়গী লৈবাক্কী হেরো দাঃ জোস পি. রিজালনা নহাশিং অসিনা ঐখোয়গী লৈবাক্কী তুংগী আশানি হায়না হায়খিবা অদুবু পনখি। মহাক্না হায়খিবদা মখোয়গী নহাশিংদা মগুন লৈবা মহৈ-মশিং তম্বীবা অসিনা মখোয়গী তুংগী আশাবু হেন্না মপাঙ্গল কনখৎহনবগী য়াম্না ফরবা পাম্বৈ অমনি হায়খি।

ভিএৎনামগী ঐচ.ই. এম্বেসেদর, ফম সনহ চাউ’সনা হায়খি, “ এ.এস.ই.এ.এন. পি.ঐচ.দি. ফেলোশিপ প্রোগ্রাম অসিনা ইন্দো-এসিয়ান ইন্তেলেকচুএল সোলিদারিতীগী মপাঙ্গল লৈরবা খুদম অমা ওইরগনি মরমদি প্রোগ্রাম অসিনা এসিয়াগী মকোক থোঙলবা তেক্নোলোজীগী ইঞ্জিন্যারগী চারোন-শুরোন অমবু মমিং চৎলবা ইন্দিয়ন ইন্সতিত্যুৎ ওফ তেক্নোলোজীদা মহৈ তম্বদা তেংবাংগনি”।

রোয়াল থাই ইম্বেসীগী চার্জ দি. এফাইরস, শ্রী থিরাপথ কোংকোলনাবিন্না হায়খি, “এ.এস.ই.এ.এন. পি.ঐচ.দি. ফেলোশিপ প্রোগ্রাম অসিনা সোসিও-কলচরেল-পিল্লর (এ.এস.ই.এ.এন. অমসুং ভারতকী মরী) গী মনুংদা থম্বা পান্দম অসিবু নীংথিনা ফংনবা হোৎনৈ অমসুং পান্দম অদুদি হ্যুমেন রিসোর্স দিভেলপমেন্ত খুমাং চাউশিলহনবা অমসুং পীপল-তু-পীপল কন্তেক্তনি”।

এ.পি.এফ.পি.গী মতাংদা ৱাফম ফোঙদোক্লদুনা সিঙ্গাপোরগী হাই কম্মিস্নর ঐচ.ই. সাইমন ৱোংনা হায়খি, “এ.এস.ই.এ.এন. অমসুং ভারতকী নহা ওইরিবা মহৈ-হৈবা মীওইশিংবু নকশিন্না পুশিল্লক্তুনা এ.এস.ই.এ.এন. পি.ঐচ.দি. ফেলোশিপ প্রোগ্রাম অসিনা এ.এস.ই.এ.এন.-ভারতকী নীংথিরবা মরী অসিবু হেন্না কনশিনহল্লগনি অমসুং ঐখোয়গী পুৱারী ওইরবা মীওই অমগা অমগগী মরক্তা লৈনরিবা মরীশিং অসিবু তেক্ত-কায়দনা লেপ্তনা লৈহনবদা তেংবাংগনি। ঐহাক্না ভারত সরকারবু মখোয়গী পুকচেল চাউবা অসিগীদমক্তা থাগৎচরি অমসুং এ.এস.ই.এ.এন. পি.ঐচ.দি. ফেলোশিংবু মখোয়গী মাই-পাকপা অসিগীদমক্তা থাগৎপা ফোঙদোক্লি”।

আই.আই.তি. দিল্লীগী দাইরেক্তর প্রোফঃ ভি. রামগোপাল রাওনা হায়খিবদা এ.এস.ই.এ.এন. পি.ঐচ.দি. প্রোগ্রাম অসিনা লমদম অসিগী অনৌবা মওং পুরক্কদবা থৌওং অমা ওইগনি হায়খি। মসিনা এ.এস.ই.এ.এন. মহৈরোয়শিংবু ভারতকী খাইদগী ফরবা ইন্সতিত্যুসনশিং অমসুং খ্বাইদগী ৱাখল লৈরবা মীওই খরদগী মহৈ তম্বা ফংবদা পুক্নিং থৌগৎকনি। মসিনা ঐখোয়গী একাদমিক ইন্সতিত্যুসনশিংদা য়াম্না তঙাই ফদ্রবা অমা ওইরিবা নাৎকী ওইবা তোঙান তোঙানবা মওং লৈবা ফিভম্বু পুরকপা ঙমগনি অমসুং মসিনা ভারতকী লুক ইস্ত পোলিসীগী মনুং চল্লি। থবক-থৌরম অসিদা য়াওরিবা মীওই খুদিংদা মসিনা কান্নবা পীগনি হায়না মহাক্না মহা তানা হায়খি।

******