কেন্দ্ৰীয় শিক্ষামন্ত্ৰী শ্ৰী ৰমেশ পোখৰিয়াল ‘নিশংকে ভাৰত চৰকাৰৰ দ্বাৰা পুঁজি যোগান ধৰা প্ৰতিষ্ঠিত ‘আছিয়ান পিএইচডি ফেল’শ্বিপ প্ৰগ্ৰেম’(এপিএফপি)ৰ বাবে আছিয়ানৰ সদস্যৰাষ্ট্ৰসমূহৰ পৰা বাছনি কৰা ছাত্ৰ-ছাত্ৰীসকলক আজি ভাৰ্চুৱেলী সম্বোধন কৰাৰ লগতে তেওঁলোকক প্ৰতিষ্ঠিত কাৰিকৰী প্ৰতিষ্ঠান আইআইটি বাছনি কৰাৰ বাবে অভিনন্দন জ্ঞাপন কৰে৷ কেন্দ্ৰীয় শিক্ষা বিভাগৰ ৰাজ্যিক মন্ত্ৰী শ্ৰী সঞ্জয় ধোত্ৰেই অনুষ্ঠানত সন্মানীয় অতিথি হিচাপে উপস্থিত থাকে৷ আছিয়ান সদস্য ৰাষ্ট্ৰসমূহৰ ৰাষ্ট্ৰদূত আৰু প্ৰতিনিধিবৰ্গ; উচ্চ শিক্ষা সচিব শ্ৰী অমিত খাৰে; বিদেশ মন্ত্ৰালয়ৰ সচিব(প্ৰাক্তন) শ্ৰীমতী ৰিৱা গাংগুলী দাস; আইআইটি দিল্লীৰ সঞ্চালক অধ্যাপক বি ৰামগোপাল ৰাও; আইআইটি প্ৰতিষ্ঠানসমূহৰ পৰা আছিয়ান সমন্বয়ক, আইআইটিৰ সঞ্চালক আৰু বৃত্তিৰ বাবে বাছনিকৃত শিক্ষাৰ্থীসকলে এই কাৰ্যসূচীত অংশগ্ৰহণ কৰে৷

আছিয়ান দেশসমূহৰ শিক্ষাৰ্থীসকলক আদৰণি জনায় কেন্দ্ৰীয় শিক্ষামন্ত্ৰীয়ে কয় যে ভাৰত আৰু আছিয়ান সদস্য ৰাষ্ট্ৰসমূহৰ মাজত শৈক্ষিক আৰু গৱেষণাৰ ক্ষেত্ৰত পাৰস্পৰিক সম্পৰ্ক উভয়ৰে বাবে লাভজনক৷ তেওঁ কয় যে এই ব্যৱস্থাই সংস্কৃতি, বাণিজ্য আৰু সম্পৰ্ক তিনিওটা স্তৰত পাৰস্পৰিক সম্পৰ্কক অধিক শক্তিশালী কৰিব৷  এপিএফপিয়ে ভাৰত আৰু আছিয়ানৰ শিক্ষাবিদ, গৱেষক আৰু বৈজ্ঞানিকসকলৰ বাবে প্ৰযুক্তিগত আৰু গৱেষণাৰ ক্ষেত্ৰত থকা সাদৃশ্যৰ বাবে কেতবোৰ নতুন সম্ভাৱনা গঢ় দিব৷ তেওঁলোকৰ দ্বাৰা কৰা গৱেষণা আৰু আৱিস্কাৰসমূহৰ ব্যৱহাৰ বিশ্বজুৰি মানৱজাতিৰ উন্নতিৰ বাবে কৰিব পৰা যাব৷

শ্ৰী নিশংকে কয় যে ক’ভিড মহামাৰীৰ বাবে বিশ্বৰ গতি স্তিমিত হৈছে৷ কিন্তু এইটো সুখৰ কথা যে এই পৰিস্থিতিতো আইআইটিসমূহ কেতিয়াও বন্ধ হোৱা নাই আৰু একেৰাহে নিজৰ মূল্যবান গৱেষণা আৰু আৱিষ্কাৰেৰে দেশৰ সহায় কৰি এই মহামাৰীৰ মাজতো নতুন সফলতাৰ কাহিনী  ৰচনা কৰিছে৷  আছিয়ানৰ সদস্য দেশসমূহৰ ছাত্ৰ-ছাত্ৰীসকলৰ বিশ্বৰ সৰ্বশ্ৰেষ্ঠ প্ৰতিষ্ঠানসমূহৰ অন্যতম আইআইটিত অধ্যয়ন কৰাৰ সুযোগ লাভ কৰিছে৷ তেওঁ শিক্ষাৰ্থীসকলক তেওঁলোকৰ গৱেষণামূলক কাৰ্যসূচীসমূহৰ বাবে শুভকামনা জনায়৷ শিক্ষা মন্ত্ৰালয়ে আছিয়ানৰ শিক্ষাৰ্থীসকলৰ বাবে আইআইটি দিল্লীত বিশেষভাৱে গঠিত আছিয়ান পিএইচডি ফেল’শ্বিপ কাৰ্যসূচীৰ সচিবালয়ক সহায় কৰিব৷

শিক্ষামন্ত্ৰীগৰাকীয়ে কয় যে প্ৰধানমন্ত্ৰী নৰেন্দ্ৰ মোদীয়ে ২০১৮ৰ ২৫ জানুৱাৰীত গণৰাজ্য দিৱসৰ প্ৰাকসন্ধ্যা সকলো সদস্য ৰাষ্ট্ৰৰ নেতৃবৰ্গৰ উপস্থিতিত আছিয়ান পিএইচডি ফেল’শ্বিপ কাৰ্যসূচীৰ ঘোষণা কৰে৷ তেওঁ কয় যে এপিএফপিৰ অধীনত ১,০০০ ফেল’শ্বিপ বিশেষকৈ আছিয়ান নাগৰিকসকলক প্ৰদান কৰা হ’ব৷  তেওঁ লগতে কয় যে এপিএফপি বিদেশী হিতাধিকাৰীসকলৰ বাবে ভাৰত চৰকাৰৰ দ্বাৰা আৰম্ভ কৰা সৰ্ববৃহৎ সক্ষমতা বিকাশ কাৰ্যসূচী৷

শ্ৰী পোখৰিয়ালে কয় যে এই কাৰ্যসূচীয়ে ‘বসুধৈৱ কুটুম্বকম’  আৰু ‘অতিথি দেৱো ভৱ‘এই দুটা দৃষ্টিভংগীক প্ৰদৰ্শিত কৰাৰ লগতে ই ‘সৰ্বে ভৱন্তু সুখীন’ৰ সংস্কৃতিক পৃষ্ঠপোষকতা কৰি আগুৱাই গৈছে৷ তেওঁ কয় যে আমি বিশ্ববাসীৰ সৈতে আগুৱাই যাব বিচাৰো৷ এক বৈশ্বিক মনোভাৱ আৰু দৃষ্টিকোণেৰ লগতে আমি ভাৰতৰ শিক্ষাৰ খণ্ডক বিশ্বৰ কেন্দ্ৰস্থল হিচাপে বিকশিত কৰিব বিচাৰো৷ এপিএফপি কাৰ্যসূচী শিক্ষাৰ আন্তঃৰাষ্ট্ৰীয় দিশত গ্ৰহণ কৰা এক ইতিবাচক পদক্ষেপ৷

অনুষ্ঠানত ৰাজ্যিক শিক্ষা মন্ত্ৰী শ্ৰী ধোত্ৰেই কয় যে দক্ষিণ পুব এছিয়াৰ দেশসমূহৰ সৈতে আমাৰ সম্বন্ধ বহু পুৰণি৷ আমাৰ প্ৰাচীন মহাকাব্য ৰামায়ণৰ প্ৰভাৱ আছিয়ান দেশসমূহৰ সাংস্কৃতিক পৰিৱেশত যথেষ্ট ভালদৰে দেখা যায়৷ আমাৰ মাজত এক শক্তিশালী সাংস্কৃতিক আৰু ঐতিহাসিক সম্পৰ্ক আছে৷ তেওঁ কয় যে আছিয়ানৰ শিক্ষাৰ্থীসকলৰ বাবে শৈক্ষিক গৱেষণা যাত্ৰাৰ এই আৰম্ভণিয়ে আমাৰ সম্পৰ্কক আৰু অধিক শক্তিশালী কৰিব৷

অনুষ্ঠানত সদস্যৰাষ্ট্ৰ ক্ৰমে ইণ্ডোনেছিয়া, ম্যানমাৰ, ফিলিপাইনছ, ভিয়েটনাম, থাইলেণ্ড আৰু ছিংগাপুৰৰ ৰাষ্ট্ৰদূত আৰু উচ্চায়ুক্তসকলৰ লগতে আইআইটি দিল্লীৰ সঞ্চালকে ভাষণ আগবঢ়ায়৷

******

MC/AKJ/AK/DB