প্রধান মন্ত্রী শ্রী নরেন্দ্র মোদীনা লৌরোক্তা পীরিবা মিনিমম সপ্পোর্ত প্রাইস (এম.এস.পি.) অসিবু মুথৎপা পাম্মি হায়না ওপোজিসন্না হায়রক্লিবা অসিবু অকনবা মওংদা য়ানিংদবা ফোঙদোকপা ওইনা কেন্দ্রগী মন্ত্রী দাঃ জিতেন্দ্র সিংহনা হৌজিক হায়নরিবা অসিগী মতাংদা মশিং অমসুং খুদম পীরদুনা ঙসি হায়খিবদা লৌরোক্তা পীরিবা এম.এস.পি. অসি মোদী সরকারনা হৌখিবা চহি ৬কী মনুংদা তাঙ্কক নায়না ৱাংখৎহনখিবনি হায়খ্রে।

লৌউবশিং, সর্পঞ্চশিং, পঞ্চশিং অমসুং কথুৱা, জম্মু অমসুং কশ্মির জিলাগী ব্লোক নাগ্রীগী মফমশিংগী থৌমীশিংগা ঙসি ৱারী শাবদা দাঃ জিতেন্দ্র সিংহনা হায়খিবদা মখোয়না হায়রিবা ৱারোলশিং অসিবু চুম্মি হায়না তাক্নবা ৱারোল নত্ত্রগা মশিং অমত্তা লৈতে অমসুং মসিগী থৌওং অসি প্রধান মন্ত্রী শ্রী নরেন্দ্র মোদীনা লৌখিবা অনৌবা অহোংবা পুরক্কদবা ৱারেপ অদুগী মশক থিহন্নবা পাঙথোকপা থৌওংনি হায়খ্রে। মহাক্না হায়খিবদা মসিগী মরম অসিনা হায়রিবা ইথিল লৈবা কেম্পেন অসিবু মীয়ামগী থাক্তা থেংনবগী থৌদাং অসি ঐখোয়না লৌফম থোকই অমসুং মীওই অমা হেক্তনা চুম্মি নত্ত্রগা লাল্লি হায়বা ঙম্নবা মীয়াম অমসুং লৌউবশিংদা তসেংবা ৱারোল নত্ত্রগা মশিং খঙহনবগী তঙাই ফদবা লৈরে হায়খি।

মহাক্কী ৱাফম অসিবু হেন্না কুপ্তহনবা ওইনা দাঃ জিতেন্দ্র শিংহনা খুদম ওইনা মশিং কয়া পীখি। মখোয়শিং অদুদি ইং ২০১৫-১৬তা ফৌগী ক্বিন্তল অমগী এম.এস.পি. অসি লুপা ১৪১০ ওইরম্বদগী ইং ২০১৬-১৭তা লুপা ২৪৭০দা হেনগৎখি; মখা তাবা ওইনা ইং ২০১৭-১৮দা লুপা ১৫৫০দা হেনগৎখি অমসুং ইং ২০১৮-১৯দা লুপা ১৭৫০দা হেনগৎখি; অমুক মখা তানা ইং ২০১৯-২০দা লুপা ১৮১৫দা হেনগৎখি অমসুং অরোইবা ওইনা ইং ২০২০-২১দা লুপা ১৮৬৮দা হেনগৎখি।

মসিগা মান্নবা ওইনা মহাক্না হায়খিবদা গেহুগী ক্বিন্তল অমগী এম.এস.পি. অসিসু ইং ২০১৫-১৬তা লুপা ১৫২৫, ইং ২০১৫-১৬তা লুপা ১৬২৫, ইং ২০১৭-১৮দা লুপা ১৭৩৫, ইং ২০১৮-১৯দা লুপা ১৮৪০ অমসুং ইং ২০১৯-২০দা লুপা ১৯২৫ ওইখি। বদামগী ওইনা ক্বিন্তল অমগী এম.এস.পি. অসি ইং ২০১৫-১৬তা লুপা ৪০৩০, ইং ২০১৫-১৬তা লুপা ৪২২০, ইং ২০১৭-১৮দা লুপা ৪৪৫০, ইং ২০১৮-১৯দা লুপা ৪৮৯০ অমসুং ইং ২০১৯-২০দা লুপা ৫০৯০ অমসুং হৌজিক চৎলিবা চহি অসিদা লুপা ৫২৭৫ ওইখি। মহাক্না হায়খিবদা পরিং অসি য়াম্না শাঙই অদুবু মসিগা মান্নবা মওং অসি সোয়াবীন অমসুং গ্রাম্নচিংবা অতোপ্পা পোত্থোকশিংদসু উবা ফংগনি হায়খি।

মমাংগী সরকারদা ৱা ঙাংবা ওইনা দাঃ জিতেন্দ্র সিংহনা হায়খিবদা মখোয়গী লুচিংবশিংনা অহানবা ওইনা হায়গদবা অসি য়ু.পি.এ.গী লৈঙাক্কী মতমদা পোৎ লৈবগী চাং অসিনা হৌজিক্কী এন.দি.এ.গী লৈঙাক্কী মতমদগী হেন্না তারিবা করিগীনো হায়বা অসিনি। খুদম অমা পীরদুনা মহাক্না হায়খিবদা য়ু.পি.এ. লৈঙাক্কী মনুংগী ইং ২০০৯দগী ২০১৪ ফাওবদা গেহু লৈবগী চাং অসি মেত্রিক তোন লাখ ১৩৯৫নি অমসুং মসিগী মতুং তারকপা এন.দি.এ.-১গী লৈঙাক্কী ইং ২০১৪দগী ১৯ ফাওবদা মসিগী চাং অসি হেনগত্তুনা মেত্রিক তোন লাখ ১৪৫৭ য়ৌখি হায়খি।

অচুম্বা অসি ঐখোয়গী মাইকৈদা লৈ হায়না দাঃ জিতেন্দ্র সিংহনা হায়রদুনা ঐখোয়না ওপোজিসনগী থৌওং অসিবু অচুম্বা ৱাখল্লোন অমসুং মপুং ওইবা থাজবা থমদুনা থেংনগদবনি হায়খি।

ঙসিগী ৱারী শাবগী থৌরম অদুদা শরুক য়াখিবশিংগী মনুংদা সর্পঞ্চ তারা চান্দ, পঞ্চ কুল্ভুশন সিংহ, লৌউবা তারা চান্দ, সাইনি অমসুং চত্তর সিং, নহাগী লুচিংবা গৌরব শর্মা অমসুং অতোপ্পশিংনি। থৌরম অসি লোক সভা কন্সতিত্বেন্সী ইন-চার্জ সঞ্জিব শর্মনা কথুৱাগী বি.জে.পি.গী প্রসিদেন্ত রঘুনন্দন শিং অমসুং জনক ভারতিগী একজেক্যুতিব মেম্বরগা লোয়ননা পাঙথোকখিবনি।

<><><><><><>