ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ
ସୋଲାଙ୍ଗରେ ଅଭିନନ୍ଦନ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀଙ୍କ ଅଂଶଗ୍ରହଣ
• ହମିରପୁରଠାରେ 66 ମେଗାୱାଟର ଧୌଲସିଦ୍ଧ ଜଳବିଦ୍ୟୁତ ପ୍ରକଳ୍ପର ଘୋଷଣା
Posted On:
03 OCT 2020 5:41PM by PIB Bhubaneshwar
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ହିମାଚଳ ପ୍ରଦେଶର ସୋଲାଙ୍ଗ ଉପତ୍ୟକାରେ ଆୟୋଜିତ ଅଭିନନ୍ଦନ କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ । ଏଥିପୂର୍ବରୁ ସେ ବିଶ୍ୱର ସବୁଠୁ ଲମ୍ବା ଅଟଳ ସୁଡ଼ଙ୍ଗକୁ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିଥିଲେ ଏବଂ ହିମାଚଳ ପ୍ରଦେଶର ସିସୁଠାରେ ଆଭାର ସମାରୋହରେ ଅଂଶଗ୍ରହଣ କରିଥିଲେ ।
ସୁଡ଼ଙ୍ଗର ପରିବର୍ତ୍ତନକାରୀ ପ୍ରଭାବ
ଏହି ଅବସରରେ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ମନାଲି ପ୍ରତି ଅଟଳଜୀଙ୍କର ଏକ ସ୍ୱତନ୍ତ୍ର ଭଲ ପାଇବା ରହିଥିଲା ଏବଂ ଏହି ଅଞ୍ଚଳରେ ଭିତ୍ତିଭୂମି, ସଡ଼କ ଯୋଗାଯୋଗ ଓ ପର୍ଯ୍ୟଟନ ଉଦ୍ୟୋଗର ବିକାଶ ଲାଗି ସେ ଏହି ସୁଡ଼ଙ୍ଗ ନିର୍ମାଣ ପାଇଁ ନିଷ୍ପତ୍ତି ନେଇଥିଲେ ।
ଶ୍ରୀ ମୋଦୀ କହିଥିଲେ ଯେ ଅଟଳ ସୁଡ଼ଙ୍ଗ ହିମାଚଳ ପ୍ରଦେଶ, ଲେହ, ଲଦାଖ ଏବଂ ଜମ୍ମୁ ଓ କଶ୍ମୀରର ଲୋକମାନଙ୍କ ଜୀବନକୁ ବଦଳାଇ ଦେବ । ସେ କହିଥିଲେ ଯେ ଏହି ସୁଡ଼ଙ୍ଗ ସାଧାରଣ ଜନତାଙ୍କ ଚାପକୁ ହ୍ରାସ କରିଛି ଏବଂ ଏହା ବର୍ତ୍ତମାନ ଲହୌଲ ଓ ସ୍ପିତିକୁ ବର୍ଷ ବ୍ୟାପୀ ସଡ଼କ ଯୋଗାଯୋଗ ବ୍ୟବସ୍ଥା ଯୋଗାଇ ଦେବ । ଏହି ସୁଡ଼ଙ୍ଗ ଆଞ୍ଚଳିକ ଅର୍ଥବ୍ୟବସ୍ଥା ଓ ପର୍ଯ୍ୟଟନକୁ ପ୍ରୋତ୍ସାହନ ଦେବ ।
ସେ କହିଥିଲେ ଯେ ସେ ଦିନ ଆଉ ବେଶୀ ଦୂର ନାହିଁ ଯେତେବେଳେ ପର୍ଯ୍ୟଟକମାନେ କୁଲ୍ଲୁ-ମନାଲିରେ ସିଦ୍ଦୁ ଘିଅର ଜଳଖିଆ କରିବା ପରେ ଲୌହଲରେ ପହଞ୍ଚି ‘ଦୋ-ମାର’ ଓ ‘ଚିଲାଦେ’ର ମଧ୍ୟାହ୍ନ ଭୋଜନ କରିବେ ।
ହମିରପୁର ଠାରେ ଧୌଲସିଦ୍ଧ ଜଳବିଦ୍ୟୁତ ପ୍ରକଳ୍ପ
ହମିରପୁର ଠାରେ 66 ମେଗାୱାଟ କ୍ଷମତାବିଶିଷ୍ଟ ଧୌଲସିଦ୍ଧ ଜଳ ବିଦ୍ୟୁତ ପ୍ରକଳ୍ପ ନିର୍ମାଣ କରିବା ଲାଗି ପ୍ରଧାନମନ୍ତ୍ରୀ ଘୋଷଣା କରିଥିଲେ । ସେ ଉଲ୍ଲେଖ କରିଥିଲେ ଯେ ଏହା ସ୍ଥାନୀୟ ଅଞ୍ଚଳରେ ବିଦ୍ୟୁତ ସେବା ଯୋଗାଇବା ସହିତ ସ୍ଥାନୀୟ ଯୁବକମାନଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି କରିବ ।
ଦେଶରେ ଆଧୁନିକ ଭିତ୍ତିଭୂମି ବିଶେଷ କରି ଗ୍ରାମୀଣ ସଡ଼କ, ରାଜପଥ, ବିଦ୍ୟୁତ ପ୍ରକଳ୍ପ, ରେଳ ସଂଯୋଗ ଏବଂ ବିମାନ ସଂଯୋଗ ଆଦି ନିର୍ମାଣ ପାଇଁ ସରକାରଙ୍କ ପ୍ରୟାସରେ ହିମାଚଳ ପ୍ରଦେଶ ଏକ ଗୁରୁତ୍ୱପୂର୍ଣ୍ଣ ଅଂଶୀଦାର ଭାବେ ରହିଛି ବୋଲି ସେ କହିଥିଲେ ।
ହିମାଚଳ ପ୍ରଦେଶରେ ଭିତ୍ତିଭୂମି ବିକାଶ
ପ୍ରଧାନମନ୍ତ୍ରୀ କହିଥିଲେ ଯେ କିରତପୁର-କୁଲ୍ଲୁ-ମନାଲି ସଡ଼କ କରିଡର, ଜିରାକପୁର-ପରୱାନୁ-ସୋଲାନ-କୈଥଲିଘାଟ ରୋଡ କରିଡର, ନାନଗାଲ ଡ୍ୟାମ-ତଲୱାରା ରେଳ ମାର୍ଗ, ଭାନୁପାଲି-ବିଳାସପୁର ରେଳ ମାର୍ଗର କାମ ଖୁବ ଦ୍ରୁତ ଗତିରେ ଜାରି ରହିଛି । ଯଥାଶୀଘ୍ର ସମ୍ବବ ଏସବୁ ପ୍ରକଳ୍ପର କାମ ଶେଷ ହେବ ଏବଂ ହିମାଚଳ ପ୍ରଦେଶର ଲୋକମାନେ ଏଗୁଡ଼ିକର ସେବା ପାଇପାରିବେ ।
ସେ କହିଥିଲେ ଯେ ମୌଳିକ ଆବଶ୍ୟକତା ବ୍ୟତୀତ ଲୋକମାନଙ୍କ ଜୀବନକୁ ଆରାମଦାୟକ କରିବା ଲାଗି ସଡ଼କ, ରେଳ, ବିଦ୍ୟୁତ, ମୋବାଇଲ ଏବଂ ଇଣ୍ଟରନେଟ ସଂଯୋଗ ଆଦି ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।
ଦେଶର 6ଲକ୍ଷ ଗ୍ରାମରେ ଅପ୍ଟିକାଲ ଫାଇବର ବିଛାଇବା ନିମନ୍ତେ ସରକାରଙ୍କ କାର୍ଯ୍ୟକ୍ରମ ବିଷୟରେ ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ । ଯାହାକି ଚଳିତ ବର୍ଷ ଅଗଷ୍ଟ 15 ତାରିଖସୁଦ୍ଧା 1000 ଦିନ ମଧ୍ୟରେ ସମ୍ପୂର୍ଣ୍ଣ ହୋଇଛି ।
ସେ କହିଥିଲେ ଏହି ପ୍ରକଳ୍ପ ଅଧୀନରେ, ଗାଁ ଏବଂ ପରିବାରଗୁଡ଼ିକୁ ୱାଇଫାଇ ହଟସ୍ପଟ ଯୋଗାଇ ଦିଆଯିବ ଏବଂ ସେମାନେ ଇଣ୍ଟରନେଟ ସଂଯୋଗ ପାଇବାରେ ସକ୍ଷମ ହୋଇପାରିବେ । ଏହା ସହିତ ହିମାଚଳ ପ୍ରଦେଶର ଲୋକମାନେ ବିଶେଷ ଲାଭ ପାଇପାରିବେ । ପିଲାମାନଙ୍କର ପାଠପଢ଼ା, ଔଷଧ ଏବଂ ପର୍ଯ୍ୟଟନ ସବୁଦୃଷ୍ଟିରୁ ଏହା ଲାଭଦାୟକ ହେବ ।
ପ୍ରଧାନମନ୍ତ୍ରୀ କହିଥିଲେ ଯେ ଲୋକମାନଙ୍କ ପାଇଁ ସହଜ ଜୀବନ ଧାରଣ ସୁନିଶ୍ଚିତ କରିବା ଏବଂ ସେମାନଙ୍କୁ ସେମାନଙ୍କର ଅଧିକାରର ସମ୍ପୂର୍ଣ୍ଣ ଲାଭ ପ୍ରଦାନ କରିବା ଲାଗି ସରକାର ନିରନ୍ତର ଭାବେ ପଦକ୍ଷେପ ଗ୍ରହଣ କରୁଛନ୍ତି । ଅଧିକାଂଶ ସରକାରୀ ସେବା ଯେପରିକି ଦରମା, ପେନସନ, ବ୍ୟାଙ୍କିଙ୍ଗ ସେବା, ବିଦ୍ୟୁତ ଓ ଟେଲିଫୋନ ବିଲ ଆଦିର ଡିଜିଟାଲକରଣ ହୋଇସାରିଛି। ସେ କହିଥିଲେ ଯେ ଏପରି ସଂସ୍କାର ସମୟ ଓ ଅର୍ଥ ସଞ୍ଚୟ କରିବା ସହିତ ଦୁର୍ନୀତିର ମୂଳୋତ୍ପାଟନ କରିପାରୁଛି ।
ଏପରିକି କରୋନା ସମୟରେ ମଧ୍ୟ ଶହ ଶହ କୋଟି ଟଙ୍କା ହିମାଚଳ ପ୍ରଦେଶର 5 ଲକ୍ଷରୁ ଅଧିକ ପେନସନଭୋଗୀ ଏବଂ ପାଖାପାଖି 6 ଲକ୍ଷ ହିତାଧିକାରୀଙ୍କ ଜନଧନ ଆକାଉଣ୍ଟରେ ପହଞ୍ଚି ପାରିଛି ।
କୃଷି ସଂସ୍କାର
ସଦ୍ୟ କୃଷି ସଂସ୍କାରକୁ ବିରୋଧ କରୁଥିବା ଲୋକମାନଙ୍କୁ ସମାଲୋଚନା କରି ପ୍ରଧାନମନ୍ତ୍ରୀ କହିଥିଲେ ଯେ ଏହି ସଂସ୍କାର କେବଳ ସେହି ଲୋକମାନଙ୍କୁ ଅସନ୍ତୁଷ୍ଟ କରୁଛି ଯେଉଁମାନେ ନିଜସ୍ୱ ରାଜନୈତିକ ସ୍ୱାର୍ଥକୁ ଦେଖୁଥିଲେ । ଏପରି ଲୋକମାନେ ଏଥିପାଇଁ ଅସନ୍ତୁଷ୍ଟ ରହିଛନ୍ତି କାରଣ ଏହା ସେମାନଙ୍କ ଦ୍ୱାରା ସୃଷ୍ଟି କରାଯାଇଥିବା ମଧ୍ୟସ୍ଥ ଓ ଦଲାଲି ବ୍ୟବସ୍ଥାର ଉଚ୍ଛେଦ କରିବ ।
ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ କିପରି ଭାବେ କୁଲ୍ଲୁ, ଶିମଲା ଓ କିନ୍ନୌରରୁ ସେଓ କିଲୋପ୍ରତି ମାତ୍ର 40-50 ଟଙ୍କାରେ କିଣାଯାଇ ଶେଷ କ୍ରେତାଙ୍କୁ 100-150 ଟଙ୍କାରେ ବିକ୍ରି କରାଯାଉଛି । ଏହାଦ୍ୱାରା କୃଷକ କିମ୍ବା କ୍ରେତା କେହି ଲାଭବାନ ହେଉନାହାନ୍ତି । କେବଳ ସେତିକି ନୁହେଁ ସେଓ ଉତ୍ପାଦନ ଋତୁରେ ଅଧିକ ଫଳ ହେଉଥିବା ସମୟରେ ଦର ଅତ୍ୟଧିକ ହ୍ରାସ ପାଇଲେ ଏହାଦ୍ୱାରା କ୍ଷୁଦ୍ର ଚାଷୀମାନେ ବିଶେଷ ଭାବେ କ୍ଷତିଗ୍ରସ୍ତ ହୋଇଥାନ୍ତି । କୃଷି କ୍ଷେତ୍ରର ବିକାଶ ନିମନ୍ତେ ଆଇନରେ ଐତିହାସିକ ସଂସ୍କାର ଅଣାଯାଇଛି ବୋଲି ସେ କହିଥିଲେ । ବର୍ତ୍ତମାନ କ୍ଷୁଦ୍ର ଚାଷୀମାନେ ଚାହିଁଲେ ସମ୍ପୂର୍ଣ୍ଣ ସ୍ୱାଧୀନ ଭାବେ ସେମାନଙ୍କର ଏକ ସଂଘ ଗଠନ କରିପାରିବେ ଏବଂ ଦେଶର ଯେକୌଣସି ସ୍ଥାନରେ ଯେକୌଣସି ଲୋକକୁ ସେଓ ବିକ୍ରି କରିପାରିବେ ।
ପିଏମ କିସାନ ସମ୍ମାନ ନିଧି
ପ୍ରଧାନମନ୍ତ୍ରୀ କହିଥିଲେ ଯେ ସରକାର କୃଷକମାନଙ୍କ ଆୟ ବୃଦ୍ଧି ଲାଗି ପ୍ରତିଶ୍ରୁତିବଦ୍ଧ । ପିଏମ କିସାନ ସମ୍ମାନ ନିଧି ଅନ୍ତର୍ଗତ ବର୍ତ୍ତମାନ ସୁଦ୍ଧା ପାଖାପାଖି 1 ଲକ୍ଷ କୋଟି ଟଙ୍କା କୃଷକମାନଙ୍କ ଆକାଉଣ୍ଟରେ ଜମା କରାଯାଇସାରିଲାଣି । ଏହାଦ୍ୱାରା ଦେଶର ପ୍ରାୟ 10.25 କୋଟି କୃଷକ ପରିବାର ଲାଭବାନ ହୋଇଛନ୍ତି । ଏମାନଙ୍କ ମଧ୍ୟରେ ହିମାଚଳ ପ୍ରଦେଶର 9 ଲକ୍ଷ କୃଷକ ପରିବାର ରହିଛନ୍ତି, ଏମାନଙ୍କୁ ପାଖାପାଖି 1 ହଜାର କୋଟି ଯୋଗାଇ ଦିଆଯାଇସାରିଛି ।
ପ୍ରଧାନମନ୍ତ୍ରୀ କହିଥିଲେ ଯେ ବର୍ତ୍ତମାନ ପର୍ଯ୍ୟନ୍ତ ଦେଶର ଅଧିକାଂଶ କ୍ଷେତ୍ରରେ ମହିଳାମାନଙ୍କୁ କାମ କରିବାର ଅନୁମତି ମିଳୁନଥିଲା କିନ୍ତୁ ନିକଟରେ ଶ୍ରମ ଆଇନରେ ସଂସ୍କାର ଅଣାଯାଇ ଏଥିପାଇଁ ଅନୁମତି ଦିଆଯାଇଛି । ବର୍ତ୍ତମାନ ମହିଳାମାନେ କାମ କରିବାର ସମାନ ଅଧିକାର ପାଇପାରିବେ ଏବଂ ପୁରୁଷଙ୍କ ଭଳି ସମାନ ଦରମା ପାଇବାକୁ ହକଦାର ହେବେ ।
ପ୍ରଧାନମନ୍ତ୍ରୀ କହିଥିଲେ ଯେ ଦେଶର ପ୍ରତ୍ୟେକ ନାଗରିକମାନଙ୍କ ଆତ୍ମବିଶ୍ୱାସକୁ ଜାଗ୍ରତ କରିବା ଏବଂ ଏକ ଆତ୍ମନିର୍ଭର ଭାରତ ନିର୍ମାଣ ଲାଗି ସଂସ୍କାର ପ୍ରକ୍ରିୟା ଜାରି ରହିବ ।
ସେ କହିଥିଲେ ଦେଶ ଏବଂ ହିମାଚଳ ପ୍ରଦେଶର ପ୍ରତ୍ୟେକ ଯୁବକଙ୍କ ସ୍ୱପ୍ନ ଓ ଆକାଂକ୍ଷାକୁ ପୂରଣ କରିବା ଲାଗି ସରକାର ପ୍ରାଥମିକତା ଦେଉଛନ୍ତି ।
**********
(Release ID: 1661457)
Visitor Counter : 226
Read this release in:
English
,
Urdu
,
Marathi
,
Hindi
,
Assamese
,
Bengali
,
Manipuri
,
Punjabi
,
Gujarati
,
Tamil
,
Telugu
,
Kannada
,
Malayalam