গান্ধীনগর অমসুং অহমেদবাদকী খুঙ্গং ২০দগী তোখায়না লৈবা কুমহার খুন্নাইগী ইমুং ২০০মুক্না ঙসি তুং-কোইনা মশাবু থবক পীজবা ঙম্নবগীদমক্তা খাদি অমসুং ভিলেজ ইন্দস্ত্রীজ কম্মিসন (কে.ভি.আই.সি.)গী কুমহার সশাক্রিকরন য়োজনাগা খুৎশম্নবগী খোঙথাং অমা লৌখৎখ্রে। কেন্দ্রগী গৃহ মন্ত্রী শ্রী অমিৎ শাহনা গুজরাত্তা লৈবা মহাক্কী গান্ধীনগরগী পারলিয়ামেন্তরী কন্সতিত্বেন্সীগী মনুংদা লৈবা রনধেজা খুঙ্গংদা পাঙথোকপা থৌরম অমদা নই-দিল্লীদগী ভিদিও কনফরেন্সিংগী খুত্থাংদা চফু শানবা ইলেক্ত্রিক্কী চকা ২০০ অমসুং অতোপ্পা খুৎলাই কয়া ত্রেনিং ফংলবা মীওই ২০০দা য়েন্থোকখ্রে।

কে.ভি.আই.সি.না শকখঙলবা খুঙ্গং ২০গী মনুংদগী ১৫দি গান্ধীনগর জিলাগী মনুংদগীনি অমসুং অতোপ্পা খুঙ্গং ৫না অহমেদবাদ জিলাদগীনি। চফু শাবগী ইলেক্ত্রিক্কী চকা য়েন্থোকপা অসিনা মখোয়গী পোত্থোক পুথোকপা অমসুং চাগা হেনগৎহন্দুনা খুন্নাই অসিগী য়ামদ্রবদা মীওই ১২০০দা কান্নবা পীরগনি অমসুং মসি প্রধান মন্ত্রীগী মঙলান্নি।

শ্রী অমিৎ শাহনা হনী মিসন, কুমহার সশক্তিকরন য়োজনা, লেদর আর্তিসান ইম্পাৱরমেন্ত অমসুং প্রোজেক্ত দিগ্নি-তি.ই.এ.গুম্বা কে.ভি.আই.সি.গী মশানা-মশাবু থবক পীজবগী স্কিম কয়া অসিবু থাগৎপা ফোঙদোকখি। ইলেক্ত্রিক্কী চকাশিং অসি য়েন্থোকপা মতমদা গৃহ মন্ত্রীনা কে.ভি.আই.সি.না চফু শাবগী মতাংদা নুমিৎ ১০ নিগী ত্রেনিং পীরবা অমসুং ইলেক্ত্রিক্কী চকা অমসুং অতোপ্পা খুৎলাইশিং ফংলবা চফু শাবা মীওই মরিগা, মমিং ওইনা পল্লবদা সাইলেশভাই প্রজাপতি, ভারতভাই প্রজাপতি, অভনিবেন প্রজাপতি অমসুং জিগ্নেশভাই প্রজাপতি, ৱারী শানখি। মসিগী চফু শাবশিং অসিনা সরকারবু থাগৎখি অমসুং মসিগী থৌওং অসিনা অফবা পুন্সি মহিং অমা তানবা ঙমহনবতা নত্তনা “আত্মানির্ভর” ওইহনবদসু তেংবাংলগনি হায়খি।

শ্রী অমিৎ শাহনা ইলেক্ত্রিক্কী চকাশিং অসিনা চফু শাবা মীওইশিং অসিদা পোত্থোক পুথোকপদা হেনগৎহনবতা নত্তনা অনৌবা অমসুং ফজবা পোত্থোক কয়া শাদুনা দসেরা অমসুং দিৱালিগী কুমহৈ মনুংদা অফবা শেন্থোক তানবা ঙমহনগনি হায়খি। মহাক্না বেনিফিশরী খুদিংমক্না কুমহার সশক্তিকরন য়োজনা অসিদা য়ামদ্রবদা অতোপ্পা ইমুং ১০/১০ পুশিন্দুনা খুন্নাই অসিগী চাউখৎনবা হোৎনৌ হায়খি।

 “কুমহার (প্রজাপতি) খুন্নাইবু মখোয়গী সোসিও-ইকোনোমিক্কী ফিভমশিং অসি ফগৎহন্নবা মপাঙ্গল হাপ্পা হায়বসি ঐখোয়গী প্রধান মন্ত্রীগী মঙলান অমনি। কে.ভি.আই.সি.গী কুমহার সশক্তিকরন য়োজনা অসি চফু শাবশিংনা মখোয়গী চফু শাবগী চৎনবীবু ঙাক্তুনা থম্বতা নত্তনা মখোয়গী মফমশিংদা মশানা-মশাবু থবক পীজদুনা “আত্মানির্ভর” ওইহন্নবা পান্দম থম্বনি। নহাশিংনা চফু শাবগী শিনফম পায়খত্তুনা লৈবাক শিনবা থুংনা শন্দোকহনবা অসি য়াম্না মরু ওইবনি”, হায়না শ্রী অমিৎ শাহনা হায়খি।

মহাক্না হায়খিবদা সরকারনা মখোয়গী পোত্থোকশিং অসি য়োন্নবা ইন্দিয়ন রেলৱেগা খুৎশম্নবগী থবকশিং য়াওনা পোৎ য়োনবা য়ানবা অতোপ্পা লম্বী কয়া অমা শেম্লি হায়খি। “ইন্দিয়ন রেলৱেজনা চানবা অমসুং থক্নবা য়োনবদা লৈবাক্না শাবা পাত্র খক্তা শিজিন্নহন্নবা রেলৱে স্তেসন ৪০০ খন্দোকখ্রবনি। চফু শাবশিং অসিগী পোৎ য়োনফম হেনগৎনবা ঐহাক্না রেলৱেগী মন্ত্রীদা অসিগুম্বা রেলৱে স্তেসনশিংগী মশিং হেনগৎহন্নবা হায়গনি”, হায়না হায়খিবগা লোয়ননা মখোয়না মখোয়গী পোত্থোকশিং রেলৱে স্তেসনশিংদা য়োন্ননবা অপুনবা কাঙলুপ খরা শেম্নবসু হায়খি।

কে.ভি.আই.সি.গী চেয়রমেন শ্রী বিনয় কুমার সক্সেনানা হায়খিবদা লায়রবা অমসুং তোখায়না তাবা খুন্নাইশিংগী অফবগীদমক্তা পায়খৎপা থবক খুদিংগীদি মহাক অদুমক লেংদনা লৈগনি হায়খি।

শ্রী সক্সেনানা হায়খিবদা হৌজিক ফাওবদা ইলেক্ত্রিক্কী চকা ১৮,০০০ হেনবা লৈবাক শিনবা থুংনা য়েন্থোকখ্রে অমসুং মসিদগী মীওই ৮০,০০০মুক কান্নবা ফংখ্রে হায়খি। চফু শাবশিংনা হান্না থাদা চাংচত্তা লুপা ৩০০০ তাল্লম্বা অদুদগী সশক্তিকরন য়োজনানা তেংবাংদুনা হৌজিক্তি থাদা চাংচৎকী ওইনা লুপা ১০,০০০ তানবা ঙমহল্লে হায়খি।

পনবা য়াবদি, গুজরাতকী মফম কয়া, মরু ওইনা কুৎচ অমসুং সাউরাস্ত্রা, অসি চফু শাবগী চৎনবীগীদমক্তা মমিং চৎলি। ইং ২০১৮দা সশক্তিকরন য়োজনা অসি হেক হৌদোকখিবদগী কে.ভি.আই.সি.না গুজরাত্তা চফু শাবা মীওই চাউরাক্না ৮০০দা ত্রেনিং পীখ্রে। কে.ভি.আই.সি.না মখোয়শিংদা ইলেক্ত্রিক্কী চকাশিং অমসুং লৈখোম তোৎনা ব্লঞ্জর মেছিনশিংসু য়েন্থোকখ্রে। মসিনা চফু শাবগী থৌওংদা য়াম্না ৱাবা ওইহন্দনা পোত্থোক পুথোকপগী চাং অসি শরুক ৩-৪গী চাংদা হেনগৎহল্লি।

*****