ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ
ଭାରତ-ଡେନମାର୍କ ଭର୍ଚୁଆଲ ଦ୍ୱିପାକ୍ଷିକ ଶିଖର ବୈଠକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ପ୍ରଦତ୍ତ ପ୍ରାରମ୍ଭିକ ମନ୍ତବ୍ୟ
Posted On:
28 SEP 2020 5:25PM by PIB Bhubaneshwar
ନମସ୍କାର, ମହାନୁଭବ!
ଆଜିର ଏହି ଭର୍ଚୁଆଲ ଶିଖର ବୈଠକ ମାଧ୍ୟମରେ ଆପଣଙ୍କ ସହିତ ବାର୍ତ୍ତାଳାପ କରିବାର ଅବସର ମୋତେ ମିଳିଛି । ସେଥିପାଇଁ ମୋ ମନ ଅତି ମାତ୍ରାରେ ପ୍ରସନ୍ନ । ସର୍ବ ପ୍ରଥମେ ଡେନମାର୍କରେ କୋଭିଡ଼-19 ଯୋଗୁ ହୋଇଥିବା କ୍ଷତି ପାଇଁ ମୁଁ ମୋର ସମ୍ବେଦନା ବ୍ୟକ୍ତ କରୁଛି । ଏହି ସଂକଟରୁ ଉଦ୍ଧାର ପାଇବା ସକାଶେ ଆପଣଙ୍କ କୂଶଳୀ ନେତୃତ୍ୱକୁ ମୁଁ ମଧ୍ୟ ଅଭିନନ୍ଦନ ଜଣାଉଛି ।
ସକଳ ବ୍ୟସ୍ତତା ଭିତରେ ଆପଣ ଏହି ବାର୍ତ୍ତାଳାପ ପାଇଁ ସମୟ ବାହାର କରିଛନ୍ତି, ଏହା ଆମର ପାରସ୍ପରିକ ସମ୍ପର୍କ ପ୍ରତି ଆପଣଙ୍କ ମନରେ ଥିବା ବିଶେଷ ଗୁରୁତ୍ୱ ଏବଂ ପ୍ରତିବଦ୍ଧତାକୁ ପ୍ରଦର୍ଶିତ କରୁଛି ।
ନିକଟରେ ଆପଣଙ୍କର ବିବାହ ସମ୍ପନ୍ନ ହୋଇଛି । ମୁଁ ଏଥିପାଇଁ ଆପଣଙ୍କୁ ମଙ୍ଗଳମୟ ଶୁଭକାମନା ଜଣାଉଛି ଏବଂ ଆଶା କରୁଛି ଯେ କୋଭିଡ଼-19 ଯୋଗୁ ଉତ୍ପନ୍ନ ସ୍ଥିତି ସୁଧୁରିବା ପରେ ଶୀଘ୍ର ଆପଣଙ୍କୁ ସପରିବାରେ ଭାରତରେ ସ୍ୱାଗତ କରିବାର ଅବସର ମିଳିବ । ମୋର ବିଶ୍ୱାସ ଯେ ଆପଣଙ୍କ କନ୍ୟା ଇଦା ଭାରତ ଭ୍ରମଣରେ ପୁଣି ଥରେ ଆସିବା ଲାଗି ଅବଶ୍ୟ ଉତ୍କଣ୍ଠିତ ଥିବ ।
କିଛି ମାସ ପୂର୍ବେ ଫୋନ ଯୋଗେ ଆମ ଭିତରେ ଅନେକ ସଫଳ କଥାବାର୍ତ୍ତା ହୋଇଥିଲା । ଆମେ ଅନେକ କ୍ଷେତ୍ରରେ ଭାରତ ଏବଂ ଡେନମାର୍କ ମଧ୍ୟରେ ସହଯୋଗ ବୃଦ୍ଧି ସଂପର୍କରେ ଚର୍ଚ୍ଚା କରିଥିଲେ ।
ଏହା ପ୍ରସନ୍ନତାର ବିଷୟ ଯେ ଆଜି ଆମେ ଏହି ଭର୍ଚୁଆଲ୍ ଶିଖର ବୈଠକ ମାଧ୍ୟମରେ ସେହି ସବୁ ପ୍ରୟାସକୁ ନୂତନ ଦିଶା ଓ ଗତି ପ୍ରଦାନ କରିବା । ମୁଁ ଯେତେବେଳେ ଗୁଜରାଟର ମୁଖ୍ୟମନ୍ତ୍ରୀ ଥିଲି, 2009 ମସିହାଠାରୁ, ଭାଇବ୍ରାଣ୍ଟ ଗୁଜରାଟ ଶିଖର ସମ୍ମିଳନୀ ନିୟମିତ ଭାବେ ଅନୁଷ୍ଠିତ ହୋଇ ଆସୁଛି । ସେଥିପାଇଁ ଡେନମାର୍କ ପ୍ରତି ମୋର ବିଶେଷ ଧ୍ୟାନ ରହି ଆସିଛି । ମୁଁ ଦ୍ୱିତୀୟ ଭାରତ- ନୋର୍ଡିକ୍ ଶିଖର ସମ୍ମିଳନୀର ଆୟୋଜନ କରିବା ସକାଶେ ଆପଣଙ୍କ ପ୍ରସ୍ତାବ ପାଇଁ ଆପଣଙ୍କ ନିକଟରେ କୃତଜ୍ଞ । ସ୍ଥିତି ସୁଧୁରିବା ପରେ ଡେନମାର୍କ ଆସିବା ଏବଂ ଆପଣଙ୍କ ସହ ସାକ୍ଷାତ କରିବାର ସୌଭାଗ୍ୟ ମୋତେ ମିଳିବ ଏବଂ ଆମେ ପାରସ୍ପରିକ ସମ୍ପର୍କ ବୃଦ୍ଧି ଘେନି ଆଲୋଚନା କରିବା ।
ମହୁନୁଭବ,
ବିଗତ କିଛି ମାସର ଘଟଣାକ୍ରମ ଏହା ସ୍ପଷ୍ଟ କରିଛି ଯେ ଆମମାନଙ୍କ ଭଳି ସମଭାବାପନ୍ନ ରାଷ୍ଟ୍ର, ଯାହା ନୀତି ଭିତ୍ତିକ, ସ୍ୱଚ୍ଛ, ମାନବିକତା ଏବଂ ଗଣତାନ୍ତ୍ରିକ ମୂଲ୍ୟବୋଧ ଭଳି ଚିନ୍ତାଧାରାରେ ସମାନ ଭାବେ ବିଶ୍ୱାସୀ, ଏକତ୍ର ମିଶି କାମ କରିବା ଜରୁରି ।
କରୋନା ପ୍ରତିଷେଧକ ଟୀକା ବିକାଶରେ ଆମ ସମଭାବାପନ୍ନ ରାଷ୍ଟ୍ରମାନଙ୍କ ମଧ୍ୟରେ ସହଯୋଗ ସ୍ଥାପନ ଦ୍ୱାରା ହିଁ ଏଭଳି ବୈଶ୍ୱିକ ମହାମାରୀରୁ ମୁକ୍ତି ପାଇବାର ଅବସର ମିଳିପାରିବ । ଏହି ମହାମାରୀ ସମୟରେ, ଭାରତର ଫାର୍ମା ଉତ୍ପାଦନ କ୍ଷମତା ସଂପୂର୍ଣ୍ଣ ବିଶ୍ୱ ପାଇଁ ଉପଯୋଗୀ ରହିଛି । ଆମେ ଏହି ପ୍ରୟାସ ପ୍ରତିଷେଧକ ଟୀକା କ୍ଷେତ୍ରରେ ମଧ୍ୟ ଆପଣାଇଛୁ ।
ଆମର “ଆତ୍ମନିର୍ଭର ଭାରତ” ଅଭିଯାନର ମଧ୍ୟ ଏହି ପ୍ରୟାସ ଯେ ପ୍ରମୁଖ ଆର୍ଥିକ କ୍ଷେତ୍ରରେ ଭାରତର କ୍ଷମତା ବୃଦ୍ଧି ପାଉ ଏବଂ ତାହା ସମଗ୍ର ବିଶ୍ୱ ଲାଗି ମଧ୍ୟ କାର୍ଯ୍ୟ କରୁ ।
ଏହି ଅଭିଯାନ ଅଧୀନରେ ଆମେ ସାମଗ୍ରିକ ସଂସ୍କାର ଉପରେ ଜୋର ଦେଉଛୁ । ନିୟନ୍ତ୍ରଣ ଓ ଟିକସ କ୍ଷେତ୍ରରେ ସଂସ୍କାର ଦ୍ୱାରା ଭାରତରେ କାର୍ଯ୍ୟ କରୁଥିବା କମ୍ପାନୀମାନଙ୍କୁ ଅନେକ ଫାଇଦା ମିଳିପାରିଛି । ଅନ୍ୟାନ୍ୟ କ୍ଷେତ୍ରରେ ମଧ୍ୟ ସଂସ୍କାର ପ୍ରକ୍ରିୟା ନିରନ୍ତର ଭାବେ ଚାଲୁ ରହିଛି । ନିକଟରେ କୃଷି ଏବଂ ଶ୍ରମ କ୍ଷେତ୍ରରେ ମହତ୍ତ୍ୱପୂର୍ଣ୍ଣ ସଂସ୍କାର ଘଟାଯାଇଛି ।
ମହାନୁଭବ,
କୋଭିଡ଼-19 ଆମକୁ ଦେଖାଇ ଦେଇଛି ଯେ ବୈଶ୍ୱିକ ଯୋଗାଣ ଶୃଙ୍ଖଳର କୌଣସି ଗୋଟିଏ ଉତ୍ସ ଉପରେ ଅତ୍ୟଧିକ ନିର୍ଭର କରିବାରେ ବିପଦ ରହିଛି ।
ଆମେ ଜାପାନ ଏବଂ ଅଷ୍ଟ୍ରେଲିଆ ସହିତ ମିଶି ଯୋଗାଣ ଶୃଙ୍ଖଳ ବିବିଧିକରଣ ଏବଂ ସହନଶୀଳତା ଦିଗରେ କାର୍ଯ୍ୟ କରୁଛୁ । ଅନ୍ୟ ସମଭାବାପନ୍ନ ରାଷ୍ଟ୍ର ମଧ୍ୟ ଏହି ପ୍ରୟାସରେ ସାମିଲ ହୋଇପାରିବେ ।
ଏ ସମ୍ବନ୍ଧରେ ମୋର ଧାରଣା ଯେ ଆମର ଏହି ଭର୍ଚୁଆଲ୍ ଶିଖର ସମ୍ମିଳନୀ କେବଳ ଭାରତ- ଡେନମାର୍କ ସମ୍ପର୍କ ପାଇଁ ଉପଯୋଗୀ ସିଦ୍ଧ ହେବନାହିଁ, ଅପରନ୍ତୁ ବୈଶ୍ୱିକ ଆହ୍ଵାନଗୁଡ଼ିକ ପ୍ରତି ମଧ୍ୟ ଏକ ନୂତନ କାର୍ଯ୍ୟପନ୍ଥା ସୃଷ୍ଟି କରିବାରେ ସହାୟକ ହୋଇପାରିବ ।
ମହାନୁଭବ, ମୁଁ ପୁଣି ଥରେ ଆପଣ ଏହି ସମ୍ମିଳନୀରେ ଭାଗ ନେବାକୁ ସମୟ ଦେଇଥିବାରୁ ବହୁତ ବହୁତ ଧନ୍ୟବାଦ ଜଣାଉଛି । ଏବେ ମୁଁ ଆପଣଙ୍କୁ ନିଜର ପ୍ରାରମ୍ଭିକ ବକ୍ତବ୍ୟ ଉପସ୍ଥାପନ କରିବାକୁ ଆମନ୍ତ୍ରଣ ଜଣାଉଛି ।
**********
(Release ID: 1659855)
Visitor Counter : 152
Read this release in:
English
,
Urdu
,
Marathi
,
Hindi
,
Bengali
,
Manipuri
,
Assamese
,
Punjabi
,
Gujarati
,
Tamil
,
Telugu
,
Kannada
,
Malayalam