খ্বাইদগী নৌবা মহাক্কী মন কী বাৎকী ৱারোলদা, প্রধান মন্ত্রী শ্রী নরেন্দ্র মোদীনা ৱারী লিবীবগী মরুওইবশিংগী মতাংদা নৈনখি অমসুং মসি য়াম্না মরুওই হায়না অমুক্ক হন্না   হায়খ্রে।

প্রধান মন্ত্রীনা হায়খি মদুদি ৱারী লিবীবগী চৎনবী অসি মীওইবা খুন্নাইগী চাউখৎলোন লাকপদগী লোইনরক্লবা অরিবা চৎনবীনি অমসুং হায়খি, 'থৱাই অমা লৈরবদি, ৱারী অমা লৈরবনি'। মহাক্না ইমুংগী অহলশিংনা ৱারী লিবীবগী চৎনবীগী মরুওইবগী মতাংদা ঙাংখি। মহাক্না চত্থোকপদা অঙাংশিংগা ৱারী শানবা মতমদা মখোয়গী পুন্সিদা ফাগি জুগাইনা হেন্না চুপশিল্লি অমসুং ৱারীগী মরমদা থোইনা খঙদবগুম তৌবা থেংনখি।

লৈবাক অসিদা লৈরিবা ৱারী লিবা নত্ত্রগা কিসাগোইগী ইনাক খুল্লবা চৎনবীগী মতাংদা নৈনরদুনা প্রধান মন্ত্রীনা হায়খি মদুদি ভারত্তা হিতোপদেশ অমসুং পঞ্চাতন্ত্রগী চৎনবী য়োকখত্তুনা লাক্লি, মসি লৈতবা শা, উচেক অমসুং লাইরেম্বীগী মালংগী থোংদা লৌশিং পীবনি। মহাক্না 'কথা' হায়বা ধর্মগী ৱারী লিবগী অরিবা মওং পনখি, তমিল অমসুং কেরলাদা 'ভিল্লু পাৎ' কৌবা ঈশৈ অমসুং ৱারীগী অপুনবগী খুদম পনখি অমসুং কথপুতলিগী ফজরবা চৎনবীগী মতাংদা ঙাংখি। মহাক্না সাইন্স অমসুং সাইন্স-ফিক্সন্দা য়ুম্ফম ওইবা ৱারীশিং পাম্নরকপগী মতাংদসু পনখি।

প্রধান মন্ত্রীনা আই.আই.এম. এলুম্নস শ্রী অমর ব্যাসনা চলাইবা (Gathastory.in), মিস ভাইসলী ব্যাৱাহারে দেশপান্দেনা মরাথীদা লৌখৎপা, মিস শ্রীবিদ্যা বীর রাঘবন্না চেন্নৈদা ঐখোয়গী নাৎকা মরী লৈনবা ৱারীশিং খঙহন্নবা অমসুং শন্দোক্নবা হোৎনরিবা, মিস গীতা রামনুজন্না লৌখৎলিবা ‘kathalaya.org’, ইন্দিয়ন স্তোরীতেলিং নেৎৱার্ক, অমসুং শ্রী বিক্রম শ্রীধরনা বেঙ্গলুরুদা মহাত্মা গান্ধীগা মরী লৈনবা ৱারীশিংদা লৌখৎলিবা থবকশিং য়াওনা কিসাগোইগী আর্ত ফোর্ম মমিং চৎনবা হোৎনরিবা খোংথাংশিংবু থাগৎখি। গ্রুপ অসিনা নিংথৌ কৃষ্ণ দেব রাই অমসুং মহাক্কী মন্ত্রী তেনালী রামাগী মতাংদা উন্নবদা লিখি।

প্রধান মন্ত্রীনা ৱারী লিবশিংদা লৈবাক অসিগী অনৌবা চারোলশিংদা অফাওবা নুপা নুপীশিংগী পুন্সিগী মতাংদা ৱারী ওইনা চুন্নবা লম্বী পুথোক্নবা তকশিনখি। মহাক্না হায়খি মদুদি ৱারী লিবগী কলা অসি য়ুম খুদিংদা হিংহনগদবনি অমসুং অঙাংশিংদা অফবা ৱারী লিবীবা হায়বসি মীয়ামগী পুন্সিদা চঙদবা য়াদ্রবা শরুক অমা ওইহনগদবনি। মহাক্না চয়োল খুদিংগী, ইমুং মনুংগী মীওইশিংনা নুংশিবা, মীগী অৱাবা খঙবা, থৌনা লৈবা, কত্থোকপা, কিদবগী মতাংদা লৌখত্তুনা মীওইশিংনা হীরম অসিগী মতাংদা ৱারী অমমম লিনবা য়াই হায়না ফোংদোকখি। মহাক্না হায়খি মদুদি লৈবাক অসিনা অথুবদা নীং-খা তম্বগী ৭৫শুবা কুমওন য়ৌরক্লগনি অমসুং ৱারী লিবশিংদা মখোয়গী ৱারীশিংগী থোংদগী ইথিল পীনীংঙাই ওইবা নীংখা তম্বগী লান্থেংগী থৌদোকশিং শন্দোক্নবা পুক্নীং চিংশিনখি। মহাক্না ১৮৫৭দগী ১৯৪৭ ফাওবদা থোকখিবা মরুওইবা অমসুং ওইদবা থৌদোকশিং অনৌবা চারোলশিংদা মখোয়গী ৱারীগী থোংদা খঙহন্নবা হায়খি।

*****