প্রধানমন্ত্রীগী লোইশঙ
লৈবাক অনিগী ভর্চুএল মীফমদা ভারত-শ্রী লঙ্কাগী অপুনবা ৱারোল
Posted On:
26 SEP 2020 6:21PM by PIB Imphal
১. ঙসি ভারতকী প্রধান মন্ত্রী শ্রী নরেন্দ্র মোদী অমসুং শ্রী লঙ্কাগী প্রধান মন্ত্রী মহিন্দ্র রাজপাকসা ভর্চুএল মীফম অমা পাংথোকখ্রে অমসুং মখোয়না নাকল অনিগী মরীশিং অমসুং লমদম অসিগী অমসুং মালেমগী ওইবা ৱাফমশিং খন্নখ্রে।
২. ২০২০গী অগস্তদা শ্রী লঙ্কাদা পাংথোকখিবা সংসদকী মীখলশিংদা য়াম্না চাউনা মাইপাক্তুনা মহাক্না প্রধান মন্ত্রীগী ওফিস পায়বদা প্রধান মন্ত্রী মোদীনা প্রধান মন্ত্রী রাজপাকসা থাগৎখি। য়াইফ-পাউজেল পীরকপগীদমক প্রধান মন্ত্রী মহিন্দ্র রাজপাকসানা মহাক্কী থাগৎপা ফোঙদোকখি অমসুং প্রধান মন্ত্রী মোদীগা লোয়ন্না পুন্না থবক তৌমিন্ননবা মহাক্কী অপাম্বা অদু ফোঙদোকখি।
৩. ২০১৯গী নবেম্বর অমসুং ২০২০গী ফেবুৱারিদা রাস্ত্রপতি রাজাপাকসা অমসুং প্রধান মন্ত্রী মহিন্দ্রা রাজপাকসানা মাইপাক্না ভারত্তা লাক্লম্বা খোঙচৎশিং অদু লুচিংবা অনিনা হন্না নিংশিংখি। হায়রিবা খোঙচৎশিং অদুনা তুংগী মরীগী রাজনিতিগী মাইওন অমসুং পান্দমশিং ময়েক শেংনবা তাক্লে।
৪. লমদম অসিগী লৈবাকশিংগী মরক্তা মতেং পাংনবা অমসুং অমনা অমবু শৌগৎনবা হায়বা পান্দম অসিগী মখাদা কোবিদ-১৯ লাইচৎ থেংন্নবা প্রধান মন্ত্রী নরেন্দ্র মোদীনা উৎখিবা অকনবা লুচিংবগী গুনশিং অদু প্রধান মন্ত্রী মহিন্দ্র রাজপাকসানা থাগৎখি। হৌজিক ওইরিবা ফিবম অসিনা নাকল অনিগী মরীশিং হেন্না ফগৎহন্নবা অনৌবা খুদোংচাবা অমা পীরে হায়না লুচিংবা অনিমক্না য়ানখি। কোবিদ-১৯ লাইচৎ লাকশিন্নবা ভারত অমসুং শ্রী লঙ্কা পুন্না থবক তৌমিন্নবদা লুচিংবা অনিনা হরাওবা ফোঙদোকখি। লাইচৎ অসিনা হকশেল অমসুং শেন-থুমগী লমদা পীরিবা চৈথেং হন্থহন্নবা শ্রী লঙ্কাদা পাংবা য়াবা মতেং মখা তানা পাংগনি হায়না প্রধান মন্ত্রী মোদীনা অমুক হন্না থাজবা পীখি।
৫. নাকল অনিগী মরীশিং মখা তানা ফগৎনবা লুচিংবা অনিনা মখাগীশিং অসি য়ানরে:
(ক) তেরোরিজম অমসুং দ্রগ পুথোক-পুশিন তৌবা থিংনবা ইন্তিলিজেন্স, ই-পাউ পীনবা, দি-রেদিকেলাইজেসন অমসুং ত্রেনিংগী হিরমশিংদা মতেং পাংনবা হেনগৎহনবা।
(খ) শ্রী লঙ্কা সরকার অমসুং মীয়াম্না মশক খঙদোক্লবা মরুওইবা হিরমশিংদা চাউখৎ-থৌরাংগী থবক হেনগৎহন্নবা মখা তানা মতেং পীনবা অমসুং ২০২০-২০২৫ ফাওবগী মনুংদা হায় ইম্পেক কমুনিতি দিবলপমেন্ত প্রোজেকস(ঐচ আই সি দি পি) পায়খৎনবা মেমোরেন্দম ওফ অন্দর্সতেন্দিংগী মখাদা ইথৎ অসি শীনবা থুংনা থবকশিং পায়খৎপা।
(গ) ২০১৭গী মেদা প্রধান মন্ত্রী মোদীগী শ্রী লঙ্কা খোঙচৎ মনুংদা য়ুম ১০,০০০ শানবা লাউথোকখিবা অদু অথুবা শাবা লোইশিন্নবা পুন্না থবক তৌমিন্নবা।
(ঘ) লৈবাক অনিগী মরক্তা ললোন-ইতিক অমসুং শেন থাদবা হেনগৎহন্নবা ফিবম অমা শেমগৎপা অমসুং কোবিদ-১৯ লাইচৎকী শিংনবশিং য়েংলগা সপ্লাই চেনগী থবকশিং হেন্না ফগৎহনবা।
(ঙ) নাকল অনিগী য়ানচেশিং অমসুং এম.ও.য়ুশিংগী মতুংইন্না হিথাংফমশিং অমসুং ইনর্জিগী হিরমশিং য়াওনা ইনফ্রাস্ত্রকচর অমসুং লম্বী-থোংগী প্রোজেকশিং অথুবদা থবক হৌনবা থবক পায়খৎপা অমসুং লৈবাক অনিগী মরক্তা নাকল অনিমক কান্নবা ফংগদবা চাউখৎ-থৌরাংগী থবকশিং মতেং পীনবা।
(চ) ভারত্তগী য়ু.এস দোল্লর মিল্লিয়ন ১০০গী লাইন ওফ ক্রেদিৎকী মখাদা সোলার প্রোজেকশিংদা মিৎয়েং থমদুনা রিনিউএবল ইনর্জিদা মতেং পীনবা হেনগৎহনবা।
(ছ) লৌউ-শিংউ, শা-শন লোইবা, সাইন্স অমসুং তেক্নোলোজি, হকশেল অমসুং অয়ুস(য়ুনানি, সিদধা অমসুং হোমিওপেথি)গী হিরমশিংদা তেক্নিকেলগী মতেং পীনবা হেনগৎহনবা অমসুং লৈবাক অনিমক্কী মীয়ামগী তৌবা ঙম্বশিং খঙদুনা শীনফম অসিদা থবক তৌরিবশিংদা ত্রেনিং পীদুনা লৌশিং হেনগৎহনবা।
(জ) সভেত্যগী মরীশিং অমসুং বুদ্ধিজম, অয়ুর্বেদা অমসুং য়োগাগী লমদা লৈরিবা খুদোংচাবশিং থিদোক্তুনা মীগা-মীগা লৈনবা মরীশিং মখা তানা মপাঙ্গল কনখৎহনবা হোৎনবা। বুদ্ধিজমগী মরুওইবা খঙদুনা হন্দক ইন্তরনেসনেল এয়রপোর্ত ওইনা লাউথোকখ্রবা শেংলবা সহর কুসিনগরদা ইন্তরনেসনেল ফ্লাইত হৌদোকপদা শ্রী লঙ্কাদগী বুদ্ধিস্ত লাইনিংবা মীহুৎ কাংবু অমা লাক্নবা ভারতনা খুদোংচাবা পীগনি।
(ঝ) কোবিদ-১৯কী শিংনবশিং অসি খঙজিন্দুনা লৈবাক অনিগী মরক্তা চৎথোক-চৎশিন অমুক হৌনবা অথুবদা এয়র ববল অমা হৌদোকপা অমসুং চৎথোক-চৎশিন ফগৎহন্দুনা তুরিজমগী খুদোংচাবা পীবা অমসুং দরকার ওইবা চেকশিন-থৌরাংশিং লৌগৎপা।
(ঞ) হৌজিক লৈরিবা ফ্রেমৱার্কশিংগী মতুংইন্না চাংনাইনা ৱারি শানদুনা অমসুং নাকল অনিগী চেন্নেলশিংগী খুৎথাংদা ঙামীশিংগা মরী লৈনবা ৱাফমশিং লোইশিন্নবা মখা তানা ৱারি শানবা অমসুং য়ু.এন স্তেনেবল দিবলপমেন্ত গোলশিং য়াওনা পান্দমশিং শরুক য়ামিন্নবা।
(ট) ওফিসিএলশিং চৎথোক-চৎশিন তৌনদুনা, সমুদ্রগী শরুক ঙাক-শেনগী লমদা মতেং পাংনদুনা নাকল অনিগী লান্মীশিংগী মরক্তা মতেং পীনবা হেনগৎহনবা অমসুং ঙাক-শেনগী হিরমশিংদা শ্রী লঙ্কাদা মতেং পাংবা হেনগৎপা।
৬. লৈবাক অনিগী মরক্তা লৈনরিবা বুদ্ধিস্তকী মরীশিং ফগৎহন্নবা য়ু.এস দোল্লর মিল্লিয়ন ১৫গী মতেং পাংগনি হায়না প্রধান মন্ত্রী মোদীনা লাউথোকখিবা অদু প্রধান মন্ত্রী রাজপাকসানা তরাম্না ওকখি। মতেং অদুনা বুদ্ধিজমগী লমদা লৈবাক অনিগী মরক্তা লৈনরিবা মীগা-মীগা লৈনবা মরীশিং চেৎশিনহনগনি লোয়ন্না বুদ্ধিস্ত মোনাস্ত্রিশিং শাগৎপা/শেমজিনবা, ত্রেনিং পীবা, কলচরগী থৌরমশিং পীথোক-পীশিন তৌনবা, আর্কিওলোজিগী মতেং পাংনবা, বুদ্ধগী রেলিকশিং লৈবাক অমদগী লৈবাক অমদা উৎপা, বুদ্ধিস্ত অখঙ-অহৈশিংগী মরক্তা তাথোক-তাশিনগী থবকশিংদা শেন্থং অসিনা মতেং পাংগনি।
৭. অপুনবা শ্রী লঙ্কা অমগী মনুংদা তামিল মীয়ামদা মান্নবা, অচুম্বা,শান্তি অমসুং ইকায়খুম্নবা ফংহন্নবা প্রধান মন্ত্রী মোদীনা শ্রী লঙ্কা সরকারদা তকশিনখি। শ্রী লঙ্কাগী সংবিধানদা ১৩সুবা এমেন্দমেন্ত পাংথোক্তুনা ৱাখল তামিন্নবগী থবকশিং পায়খৎনবা তকশিনখি। তামিলশিং য়াওনা ইথিনিক কাংলুপশিংগী অনিংবশিং থবক ওইনা পাংথোক্নবা শ্রী লঙ্কানা থবক তৌগনি হায়না প্রধান মন্ত্রী রাজপাকসানা থাজবা পীখি অমসুং হায়রিবা থবকশিং অসি শ্রী লঙ্কাগী মীয়ামগী অনিংবা অমসুং সংবিধানগী প্রোবিজনশিংগী মতুংইন্না ফংহন্নবা হোৎনগনি।
৮. সার্ক, বিমসতেক, আইওরা অমসুং য়ুনাইতেৎ নেসন্সকী থবকশিংগী মনুংদা লমদম অসিগী অমসুং মালেমগী ৱাথোকশিংদা পুন্না থবক তৌমিন্নবা হেনগৎলকপা অসি লুচিংবা অনিনা খঙজিনখি।
৯.খা এসিয়া অমসুং খা নোংপোক এসিয়া লমদম মতেং পীন্নবা বিমসতেক অসি মরুওইবা মফম অমনি হায়বা খঙলদুনা, শ্রী লঙ্কানা চিয়রমেন ওইদুনা পাংথোক্কদৌরিবা বিমসতেক মীফম মাইপাকপা অমা ওইনবা পুন্না থবক তৌমিন্নবা হায়না লুচিংবা অনিনা য়ানখি।
১০. ২০২১-২০২২ তার্মগীদমক য়ু.এন সেকুরিতি কাউন্সিলদা নন-পর্মনেন্ত মেম্বর অমা ওইনবা ভারতকী মীখলদা মালেমগী লৈবাকশিংনা শৌগৎলকপদা প্রধান মন্ত্রী মহিন্দ্র রাজপাকসানা প্রধান মন্ত্রী নরেন্দ্র মোদী থাগৎখি।
*****
(Release ID: 1659414)
Visitor Counter : 230
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam