তোপ তোপ্পা থৌরাং অমা ওইনা সেপ্তেম্বর ২৪, ২০২০দা ফিৎ ইন্দিয়া মুফমেন্তগী চহি অমা মপুং ফারকপগী থৌরম পাল্লন তৌনবা শিনবা লৈবাক পুম্বগী ওনলাইন ফিৎ ইন্দিয়া দাইলোগ অমদা প্রধান মন্ত্রী শ্রী নরেন্দ্র মোদীনা হকচাং ফনা থম্বা পামজবা মীওইশিং অমসুং প্রজাগা লোয়ননা ৱারী শাগনি।

ওনলাইন্দা ৱারী ৱাতাই শাবা অসিদা শরুক য়ারিবশিংনা মখোয় মশানা হকচাং ফনা থম্নবা হোৎনবগী ৱারীশিং অমসুং হীরম অসিগী পাউতাকশিং অদু ফোঙদোক্কনি অমরোমদা প্রধান মন্ত্রীনা হকচাং ফনা থম্নবগী মতাংদা মহাক্কী ওইবা ৱাখল্লোনশিং ফোঙদোক্কনি অমদি পাউতাকশিং পীগনি। অতোপ্পা হকচাং ফনা থম্বা পামজবা মীওইশিংগী মথক্তা শরুক য়াগদবশিংগী মরক্তা য়াওরিবশিং অদুদি বিরাত কোহলিদগী হৌরগা মিলিন্দ সোমন অমদি রুজুতা দিৱেকরনি।

কোবিদ-১৯গী তানফম অসিদা হকচাং ফনা থম্বা হায়বা অসি পুন্সিগী হেন্না মরু ওইবা হীরম অমা ওইরক্লি। দাইলোগ অসিদা মচি ওইবা চীঞ্জাক, ইশা ফবা অমসুং হকচাং ফনা থম্নবা অতোপ্পা তোঙান তোঙানবা হীরমশিংগী মতাংদা কান্নবা ৱারী ৱাতাই শাবা উবা ফংগনি।

ইকাই খুম্নরিবা প্রধান মন্ত্রীনা মীয়ামগী ওইবা ঈহৌ অমা ওইহনবা পামখিবা, ফিৎ ইন্দিয়া দাইলোগ অসি ভারত অসি তিঞ্জং কাইজংদবা লৈবাক অমা ওইহন্নবা লৈবাক অসিগী প্রজাশিংনা য়াওশিন্নহন্না লৌখৎপা থৌরাং অমনি। হকচাং ফনা লৈনবা নুংঙাইনা, অরাইবা অমদি শেল চংদবা মওংদা প্রজাশিংবু য়াওহনবনি অমদি মসিনা ভারত মচা খুদিংমক্কী পুন্সিদা হকচাং ফনা থম্বা অসি মরু ওইবা শরুক অমা লৌদুনা লমচৎ শাজৎকী ওইবা অহোংবা অমা পুরকপা হায়বা ফিৎ ইন্দিয়া মুফমেন্ত অসি মপুং ওইবা ৱাখল্লোনগী অপাম্বা অসিনা দাইলোগ অসিনা মপাঙ্গল কনখৎহনগনি।

মসি হৌদোকখিবগী হৌখিবা চহি অমা অসিদা ফিৎ ইন্দিয়া মুবমেন্তগী লুচিং মখাদা শিনখিবা থৌরম কয়ামরুমদা লম কয়ামরুমদগী মীওইশিং অমসুং লৈবাক্বী মফম খুদিংমক্তগী থৱাই য়াওনা শরুক য়াবা থেংনখ্রে। ফিৎ ইন্দিবা ফ্রীদম রন, প্লোগ রন, সাইক্লোথোন, ফিৎ ইন্দিয়া ৱীক, ফিৎ ইন্দিয়া স্কুল সর্তিফিকেৎ অমসুং অতোপ্পা প্রোগ্রাম কয়ামরুমদা মীয়ামগী অশেংবা ঈহৌ অমা ওইহন্দুনা মীওই করোর ৩.৫ হেনবনা পুন্না শরুক য়াবা উখ্রে।

লৈবাক শিনবা থুংবদগী হকচাং ফনা লৈবা পাম্বা মীওইশিংনা শরুক য়াগদবা ফিৎ ইন্দিয়া দাইলোগ অসিনা মখা তানা লৈবাক পুম্বগী ইহৌ অসি মাই পাকহনবদা প্রজাশিংদা মনা পীদুনা খোঙথাং অসি মপাঙ্গল কনখৎহল্লগনি।

সেপ্তেম্বর ২৪গী নুমিৎয়ুংবা পুং ১১.৩০দগী কনাগুম্বা অমহেক্তনা এন.আই.সি.গী লিঙ্ক https://pmindiawebcast.nic.in গী খুত্থাংদা ফিৎ ইন্দিয়া দাইলোগ শরুক য়াবা য়াগনি।  

******