ਇੱਕ ਵਿਲੱਖਣ ਪਹਿਲ ਦੇ ਤਹਿਤ ਪ੍ਰਧਾਨ ਮੰਤਰੀ ਸ਼੍ਰੀ ਨਰੇਂਦਰ ਮੋਦੀ ਰਾਸ਼ਟਰ–ਪੱਧਰੀ ‘ਫਿਟ ਇੰਡੀਆ ਸੰਵਾਦ’ ਦੌਰਾਨ ਫਿਟਨਸ ਉਤਸ਼ਾਹੀਆਂ ਤੇ ਹੋਰ ਸਬੰਧਿਤ ਨਾਗਰਿਕਾਂ ਨਾਲ ਗੱਲਬਾਤ ਕਰਨਗੇ। 24 ਸਤੰਬਰ, 2020 ਨੂੰ ‘ਫਿਟ ਇੰਡੀਆ ਮੁਹਿੰਮ’ ਦੀ ਪਹਿਲੀ ਵਰ੍ਹੇਗੰਢ ਦੇ ਜਸ਼ਨ ਮਨਾਉਣ ਲਈ ਰਾਸ਼ਟਰ–ਪੱਧਰ ਉੱਤੇ ਔਨਲਾਈਨ ਫਿਟ ਇੰਡੀਆ ਸੰਵਾਦ’ ਆਯੋਜਿਤ ਕੀਤਾ ਜਾ ਰਿਹਾ ਹੈ।

ਔਨਲਾਈਨ ਗੱਲਬਾਤ ਵਿੱਚ ਭਾਗੀਦਾਰ ਆਪਣੀ ਖ਼ੁਦ ਦੀ ਫਿਟਨਸ ਯਾਤਰਾ ਦੇ ਕਿੱਸੇ ਅਤੇ ਨੁਕਤੇ ਸਾਂਝੇ ਕਰਨਗੇ ਅਤੇ ਫਿਟਨਸ ਤੇ ਚੰਗੀ ਸਿਹਤ ਬਾਰੇ ਪ੍ਰਧਾਨ ਮੰਤਰੀ ਦੇ ਵਿਚਾਰ ਜਾਣ ਕੇ ਉਨ੍ਹਾਂ ਤੋਂ ਮਾਰਗ–ਦਰਸ਼ਨ ਲੈਣਗੇ। ਇਸ ਵਿੱਚ ਵਿਰਾਟ ਕੋਹਲੀ ਤੋਂ ਲੈ ਕੇ ਮਿਲਿੰਦ ਸੋਮਨ, ਰੁਜੁਤਾ ਦਿਵੇਕਰ ਅਤੇ ਹੋਰ ਫਿਟਨਸ ਉਤਸ਼ਾਹੀਆਂ ਸਮੇਤ ਅਜਿਹੀਆਂ ਬਹੁਤ ਸਾਰੀਆਂ ਸ਼ਖ਼ਸੀਅਤਾਂ ਭਾਗ ਲੈਣਗੀਆਂ।

ਕੋਵਿਡ–19 ਦੇ ਸਮੇਂ, ਫਿਟਨਸ ਤਾਂ ਜੀਵਨ ਦਾ ਹੋਰ ਵੀ ਅਹਿਮ ਪੱਖ ਬਣ ਗਈ ਹੈ। ਇਸ ਸੰਵਾਦ ਦੌਰਾਨ ਪੋਸ਼ਣ, ਤੰਦਰੁਸਤੀ ਤੇ ਫਿਟਨਸ ਦੇ ਹੋਰ ਬਹੁਤ ਸਾਰੇ ਪੱਖਾਂ ਬਾਰੇ ਫਲਦਾਇਕ ਗੱਲਬਾਤ ਹੋਵੇਗੀ, ਜੋ ਕਿ ਸਮੇਂ ਦੀ ਜ਼ਰੂਰਤ ਹੈ।

ਮਾਣਯੋਗ ਪ੍ਰਧਾਨ ਮੰਤਰੀ ਆਪਣੀ ਦੂਰ–ਦ੍ਰਿਸ਼ਟੀ ਅਨੁਸਾਰ ‘ਫਿਟ ਇੰਡੀਆ ਸੰਵਾਦ’ ਨੂੰ ਇੱਕ ਲੋਕ–ਮੁਹਿੰਮ ਬਣਾਉਣਾ ਚਾਹੁੰਦੇ ਹਨ ਅਤੇ ਇਹ ਭਾਰਤ ਨੂੰ ਇੱਕ ‘ਫਿਟ ਰਾਸ਼ਟਰ’ ਬਣਾਉਣ ਦੀ ਯੋਜਨਾ ਉਲੀਕਣ ਲਈ ਦੇਸ਼ ਦੇ ਨਾਗਰਿਕਾਂ ਨੂੰ ਸ਼ਾਮਲ ਕਰਨ ਦਾ ਇੱਕ ਹੋਰ ਯਤਨ ਹੈ। ‘ਫਿਟ ਇੰਡੀਆ ਮੁਹਿੰਮ’ ਦਾ ਬੁਨਿਆਦੀ ਸਿਧਾਂਤ ਹੀ ਇਹੋ ਹੈ ਕਿ ਮਜ਼ੇ ਲੈਂਦਿਆਂ, ਆਸਾਨ ਤੇ ਬਿਨਾ ਖ਼ਰਚੇ ਵਾਲੇ ਤਰੀਕਿਆਂ ਨਾਲ ਨਾਗਰਿਕਾਂ ਨੂੰ ਸ਼ਾਮਲ ਕੀਤਾ ਜਾਵੇ, ਜਿਸ ਵਿੱਚ ‘ਫਿਟ ਰਹਿਣਾ ਹੈ’ ਅਤੇ ਇੰਝ ਲੋਕਾਂ ਦੇ ਵਿਵਹਾਰ ਵਿੱਚ ਤਬਦੀਲੀ ਲਿਆਉਣਾ ਹੈ, ਜਿਸ ਨਾਲ ਫਿਟਨਸ ਹਰੇਕ ਭਾਰਤੀ ਦੇ ਜੀਵਨ ਦਾ ਇੱਕ ਲਾਜ਼ਮੀ ਅੰਗ ਬਣ ਸਕੇ ਅਤੇ ਇਹ ਸਭ ਇਸ ਸੰਵਾਦ ਜ਼ਰੀਏ ਮਜ਼ਬੂਤ ਹੋਵੇਗਾ।

ਪਿਛਲੇ ਇੱਕ ਸਾਲ ਦੌਰਾਨ, ਇਸ ਦੀ ਸ਼ੁਰੂਆਤ ਤੋਂ ਹੀ ‘ਫਿਟ ਇੰਡੀਆ ਮੁਹਿੰਮ’ ਦੇ ਬੈਨਰ ਹੇਠ ਵਿਭਿੰਨ ਸਮਾਰੋਹ ਆਯੋਜਿਤ ਕੀਤੇ ਗਏ ਹਨ ਅਤੇ ਪੂਰੇ ਦੇਸ਼ ਦੇ ਹਰ ਵਰਗ ਦੇ ਲੋਕਾਂ ਨੇ ਬਹੁਤ ਉਤਸ਼ਾਹ ਨਾਲ ਇਨ੍ਹਾਂ ਵਿੰਚ ਭਾਗ ਲਿਆ ਹੈ। ‘ਫਿਟ ਇੰਡੀਆ ਫ਼੍ਰੀਡਮ ਰਨ’, ਪਲੌਗ ਰਨ, ਸਾਈਕਲੋਥੌਨ, ਫਿਟ ਇੰਡੀਆ ਵੀਕ, ਫਿਟ ਇੰਡੀਆ ਸਕੂਲ ਸਰਟੀਫ਼ਿਕੇਟ ਅਤੇ ਹੋਰ ਵਿਭਿੰਨ ਪ੍ਰੋਗਰਾਮਾਂ ਵਿੱਚ ਕੁੱਲ ਮਿਲਾ ਕੇ 3.5 ਕਰੋੜ ਤੋਂ ਵੱਧ ਲੋਕਾਂ ਨੇ ਹਿੱਸਾ ਲਿਆ, ਸੱਚਮੁਚ ਇਸ ਨੂੰ ਜਨ ਅੰਦੋਲਨ ਬਣਾਇਆ।

‘ਫਿਟ ਇੰਡੀਆ ਸੰਵਾਦ’ ਵਿੱਚ ਸਮੁੱਚੇ ਦੇਸ਼ ਦੇ ਫਿਟਨਸ ਉਤਸ਼ਾਹੀ ਹਿੱਸਾ ਲੈਣਗੇ, ਇਸ ਨਾਲ ਇਹ ਦੂਰ–ਦ੍ਰਿਸ਼ਟੀ ਹੋਰ ਮਜ਼ਬੂਤ ਹੋਵੇਗੀ ਕਿ ਇਹ ਨਾਗਰਿਕ ਹੀ ਹਨ ਜਿਨ੍ਹਾਂ ਸਿਰ ਰਾਸ਼ਟਰਵਿਆਪੀ ਮੁਹਿੰਮ ਦੀ ਸਫ਼ਲਤਾ ਦਾ ਸਿਹਰਾ ਬੰਨ੍ਹਣਾ ਚਾਹੀਦਾ ਹੈ।

24 ਸਤੰਬਰ ਨੂੰ ਦੁਪਹਿਰ 11:30 ਵਜੇ ਕੋਈ ਵੀ ਐੱਨਆਈਸੀ ਲਿੰਕ https://pmindiawebcast.nic.in  ਰਾਹੀਂ ‘ਫਿਟ ਇੰਡੀਆ ਸੰਵਾਦ’ ਵਿੱਚ ਸ਼ਾਮਲ ਹੋ ਸਕਦਾ ਹੈ

*****

ਵੀਆਰਆਰਕੇ/ਐੱਨਬੀ