পোর্ত ব্লেয়ারগী বীর সাবার্কর ইন্তরনেসেল এয়রপোর্ত অথুবদা অনৌবা তর্মিনেল বিল্দিং লৈরগনি। এয়রপোর্ত অসিদা হৌজিক চহি অমদা পেসেঞ্জর লাখ ১৮ হেন্দল তৌবা ঙম্লি। পেসেঞ্জর হেনগৎলকপগী মতুংইন্না, এয়রপোর্ত ওথোরিতি ওফ ইন্দিয়ানা লুপা করোর ৭০০ চঙনা অনৌবা ইন্তেগ্রেতেদ তর্মিনেল বিল্দিং শাগৎপা হৌরে।

অপুনবা লম ইসক্বার মিতর ৪০,৮৩৭দা শেমগৎলিবা অনৌবা তর্মিনেল বিল্দিং অসিনা মী খ্বাইদগী চিনবা মতমদা পেসেঞ্জর ১২০০ হেন্দল তৌবা ঙমগনি অমসুং চহিদা পেসেঞ্জর লাখ ৫০ চৎথোক-চৎশিন তৌবা য়াগনি। অনৌবা তর্মিনেল বিল্দিং অসিদা লৈনুং, অপ্পর গ্রাউন্দ অমসুং অহানবা মথোল য়াওরি। লৱার গ্রাউন্দ অসি থুংলবা অমসুং পাইখিবগী অমসুং থবক কয়া পাংথোকফম ওইনা শীজিন্নগনি, অপ্পর গ্রাউন্দ মথোলনা পাইখিগদবা পেসেঞ্জরশিংগী চঙলকফম ওইনা অমসুং থুংলবা পেসেঞ্জরশিংগী থোকফম ওইনা শীজিন্নগনি অমসুং অহানবা মথোলনা ইন্তরনেসনেল পেসেঞ্জরশিংগী ঙাইফম ওইনা শীজিন্নগনি।

মালেম থাক্কী বিল্দিং অসি মপুংফানা এয়র কন্দিসনগী খুদোংচাবা য়াওরে অমসুং চেক-ইন কাউন্তর ২৮, পেসেঞ্জর বোর্দিং ব্রিজ ৩, ইন-লাইন স্কেন সিস্তেম য়াওবা কনভেয়র বেল্ত মঙা, অফবা মখলগী মৈহৌ-লাংপোক থেংন্নবা খুদোংচাবশিং য়াওরে। এয়রপোর্তকী সহর থংবা শরুক্তা কার, তেক্সি অমসুং বসশিং থানবা মফমশিং ফজনা শেমগৎকনি।

মহৌশাদগী ইথিল লৌদুনা তর্মিনেলগী দিজাইন অসি সমুদ্র অমসুং ইথৎশিং উৎপা কোঙগ্রেংগী মওংনি। অনৌবা তর্মিনেল বিল্দিং অসিদা মিতর ১২০গী কলম য়াওদবা স্পান অনিনা শাবা মিতর ২৪০গী স্পান অমা স্তিলগী কলমশিংনা শৌগৎলি, মসিনা য়ুম্বী য়াওদবা অচৌবা থুংলবা অমসুং পাইখিবগী হোল শেমগৎপা ঙমগনি। তর্মিনেল বিল্দিং অসিগী চাদা ১০০ অতিয়াগী মঙালশিংদগী মঙাল ফংহনগনি। অকোনবা কেবল নেত গ্লেজিংনা তর্মিনেল বিল্দিং অসি কোইশিনগনি। পোর্ত ব্লেয়ার এয়রপোর্ততা অসিগুম্বা অচৌবা থবক অমা পায়খৎপা মসিনা অহানবনি।

প্রোজেক অসিগী চাদা ৬৫ হেন্না লোইশিল্লে অমসুং পোর্ত ব্লেয়ারগী অনৌবা তর্মিনেল বিল্দিং অসি মথং চহি ২০২১গী ময়াইদা হাংদোক্নবা থৌরাং তৌরি।

*****