প্রধান মন্ত্রী শ্রী নরেন্দ্র মোদীনা 'নামমি গঙ্গে'  য়োজনা অমসুং 'অমরুৎ' য়োজনাগী মখাদা বিহারদা তোঙান-তোঙানবা প্রোজেক্ত কয়া শঙ্গাখ্রে। ঙসি শঙ্গাখিবা স্কিম মরিসিদা পত্না শহরগী বিউর অমসুং করম-লীচকতা সিৱরেজ ত্রিৎমেন্ত প্লান্ত অমসুং সিৱন অমসুং ছাপ্রাদা 'অমরুৎ' য়োজোনাগী মখাদা ঈশিংগা মরী লৈনবা প্রোজেক্তশিংনি। মসিগী মথক্তা, মুঙ্গর অমসুং জমালপুরদা ৱাতর সপ্লাই প্রোজেক্তশিং অমসুং মুজাফর্পুরদা নামমি গঙ্গেগী মখাদা রিবর ফ্রন্ত দিবেলপমেন্ত প্রোজেক্তশিংগী উরেপ উয়ুং তমখি।

প্রধান মন্ত্রীনা হায়খি মদুদি কোরোনাগী মতমদা ফাওবা, তোঙান-তোঙানবা চাউখৎ থৌরাংগী প্রোজেক্তশিং বিহারদা লেপ্পা লৈতনা লৌখৎখি।

মহাক্না বিহারগী লৌমীশিংদা কান্নবা পীগদবা ইনফ্রাস্ত্রকচর লিংনবগী লুপা করোর চাম্মরোমগী প্রোজেক্তশিং মতম খরগে মমাংদসু হৌদোকখি।

প্রধান মন্ত্রীনা ভারতকী মোদর্ন সিবিল ইঞ্জিনীয়রিংগী লমজিংবা সার এম. ভিসবেস্বর‍্যাবু নিংশিংদুনা পাঙথোকপা ইঞ্জিনীয়রশিংগী নুমিত্তা লৈবাক অসিদা চাউখৎ থৌরাং কয়াদা ইঞ্জিনীয়রশিংনা লৌরিবা থৌদাংশিংবু শিংথাখি। শ্রী মোদীনা হায়খি মদুদি লৈবাক অসিগী চাউখৎনবা হোৎনবদা বিহারনা ইঞ্জিনীয়র মিল্লিয়ন কয়া পুথোক্তুনা অচৌবা মতেং পাংলি।

শ্রী মোদীনা হায়খি মদুদি বিহার অসি পুৱারীগা শাগোন্নরবা শহর কয়াগী লম্নি অমসুং মসিদা চহী লিশিং কয়া লিরবা ইনাক খুল্লবা ইপা ইপুনা থম্বীরম্বা কয়া লৈ। নীংতম্লবা মতুংদা, বিহারবু মিনাই নাইথাংগী মতমদগী লৈরকপা চয়েৎনবা কয়া কোকহন্নবা হোৎনখিবা লুচিংবা কয়ানা পাল্লম্মি। মহাক্না মখা তারদুনা রাজ্য অসিদা চাউখৎলোন্দা নাকল নাম্ম খক্তমক য়েংদুনা শহরগী মফমশিংদা চাউখৎপা হন্থরকপা অমসুং খুঙ্গংগী ইনফ্রাস্ত্রকচর থুপচিল্লকপগী মমি তাখি।

প্রধান মন্ত্রীনা হায়খি মদুদি করিগুম্বা লৈঙাকপা মতমদা মশাগীতা খনবনা মাংদা থারক্লবদি অমসুং ভোৎকীদমক য়েংবা রাজনিতী লাক্লবদি হান্ননা শোত্থরবা অমসুং অৱাৎপা কয়ানা থল্লবা কাংলুপ্তমক ৱাহৌগনি। মহাক্না হায়খি মদুদি বিহারগী মীয়াম্না অৱাবা অসি ঈশিং অমসুং সিৱরেজ নীংথীনা লৈতবা মতমদগী চহী তরা অমুক খাঙদুনা লাকখ্রে। মহাক্না হায়খি মদুদি মীয়ামদা অমোৎপা ঈশিং পীথকপদগী লাইনা কয়া নাখ্রে অমসুং তাঞ্জরুবা শেল কয়া অমনা অনা লাইয়েংবদা লোইখ্রে। অসিগুম্বা ফিবম অসিদা, বিহারগী চাউরবা খুন্নাই কাংলুপ অমনা শেন্দোন, লাইনা, মতেং পাংবীনবা লৈতবা অমসুং লাইরিক্কী মঙাল ৱাৎপবু মখোয়গী পুন্সিদা তম্লম্লবনি খন্না য়াজখি।

প্রধান মন্ত্রীনা হায়খি মদুদি হৌখিবা চহী খরসিদা সিস্তেম অসিবু মনিং হন্দোক্নবা অমসুং খ্বাইদগী শোকহল্লবা মীওই কাংলুপ্তা থাজবা অমুক নৌনা হাপ্নবা হোৎনদুনা লাকখি। নুপীমচাশিংদা লাইরিক তম্বীবনা মরুওইবা থম্বা, পঞ্চায়তী রাজ য়াওনা লোকেল বোদীশিংদা শোত্থরবা কাংলুপ শরুক য়াহনবগী চাং হেনগৎলক্লি অমসুং মখোয়গী থাজবসু হেনগৎলক্লি। ২০১৪দগী হৌদুনা, ইনফ্রাস্ত্রকচরগা মরী লৈনবা স্কিম পুম্নমক গ্রাম পঞ্চায়ৎ অমসুং লোকেল বোদীশিংদা শিন্নখ্রে। হৌজিক্তি থবক ওইনা পায়খৎনবগী প্লান তৌবা, স্কিম অদুবু ঙাকশেনবদগী হৌদুনা লোকে বোদীশিং অসিনা মখোয়দা করি ৱাৎলিবগে হায়বদু য়েংশিঞ্জবা ঙম্লে অমসুং মসিনা মরম ওইদুনা বিহারগী শহরশিংদা থক্নবা ঈশিং অমসুং সিৱরগুম্বা তঙাইফদবা খুদোংচাবশিং লেপ্পা লৈতনা চাউখৎলক্লি।

প্রধান মন্ত্রীনা হায়খি মদুদি হৌখিবা চহী ৪-৫ অসিদা, বিহারগী শহর ওইবা মফমশিংদা লৈবা ইমুং লাখ কয়াদা মিসন অমরুৎ অমসুং রাজ্য সরকারগী স্কিমশিংগী মখাদা থক্নবা ঈশিং ফংহনখ্রে। লাক্কদবা চহীশিংদসু, বিহারনা লৈবাক অসিগী ইমুং খুদিংমক্তা পাইপকী ঈশিং ফংহনগদবা রাজ্যশিংগী মনুং চনগনি। বিহারগী মীয়াম্না লেপ্পা লৈতনা কোরোনাগী লাংফম মরক্তা পান্দম অসি ফংনবা হোৎনখি। মহাক্না হায়খি, প্রধান মন্ত্রী গরীব কল্যান রোজগার ওভিয়ান্না ইমুং লাখ ৫৭ হেনবদা হৌখিবা থা খরসিদা  বিহারগী খুঙ্গংশিংদা ঈশিং ফংহনখ্রে, হায়রিবসি অতোপ্পা রাজ্যশিংদগী বিহারদা হল্লকখিবা মাইগ্রেন্ত লেবরশিংনা শুবীবদগীনি।

প্রধান মন্ত্রীনা হায়খি মদুদি জল জীবন মিসন্না অসিগুম্বা শুবা নোম্বা কঞ্জবা বিহারগী মরুপশিংগীদমক কত্থোক্লি। হৌখিবা চহী অমরোমসিদা, লৈবাক অসিগী মফম কয়াদা জল জীবন মিসনগী মখাদা ঈশিংগী কন্নেক্সন করোর অনী হেন্না ফংহনখ্রে। ঙসিদি, নুমিৎ খুদিংগী ইমুং লাখ অমা হেনবদা ঈশিংগী পাইপকী কন্নেক্সন পীরি। অরুবা ঈশিংনা লাইরবশিংগী পুন্সি ফগৎহনবদা নত্তনা অরুবা লাইনা কয়াদগীসু ঙাকথোকপী। মহাক্না হায়খি মদুদি শহরগী মফমশিংদসু বিহারদা লৈবা ইমুং লাখ ১২ রোমদা অমরুৎ য়োজনাগী মখাদা খোংজেল য়াংনা অরুবা ঈশিং পীরি অমসুং ইমুংশিং অসিগী মনুংদা লাখ ৬তি মাংজৌননা ঈশিং ফংহনখ্রে।

প্রধান মন্ত্রীনা হায়খি মদুদি শহরদা খুন্দারকপগী চাং অসি কা হেন্না হেনগৎলক্লি অমসুং অর্বানাইজেসন হায়বসি হৌজিক্তি অশেংবা ওইরক্লে অদুবু চহী কয়াগী মমাংদগী হৌনা অর্বানাইজেসন হায়বসি খুরৌনি হায়না খল্লম্বনি। অর্বানাইজেসনবু শৌগৎলম্বা বাবা সাহেব অম্বেদকরনা হায়রম্বা ৱাফম পল্লদুনা প্রধান মন্ত্রীনা হায়খি অম্বেদকরনা অর্বানাইজেসন অসি সমস্যা অমনি হায়না লৌখিদে, লাইরবদগী লাইরবা কয়ানা কান্নবা ফংজবা য়াবা শহর অদুদি পুন্সিবু হেন্না ফগৎহনগদবা লম্বী হাংবনি। মহাক্না মখা তারদুনা হায়খি মদুদি, শহরশিং অসি মীয়াম পুম্বদা মরুওইনা ঐখোয়গী নহাশিংদা মমাং থানা চৎপা য়ানবগী খুদোংচাবা অমা পীনবা হোৎনগদবনি। ইমুং খুদিংমক্না চাউখৎনা নুংঙাই য়াইফনা হিংবা ঙম্বা শহর লৈহনগদবনি। শহর অমা হায়বসি লাইরবা, লৈজদ্রবা, নুপী অঙাং পুম্নমকপু ইকাই খুম্নবীবা মফম অমা ওইগদবনি।

প্রধান মন্ত্রীনা হায়খি মদুদি ঐখোয়না লৈবাক অসিদা ঙসিদি অনৌবা অর্বানাইজেসন অমা থেংনরে অমসুং শহরশিং অসিগী মরুওইবশিং ঙসিদি খঙনরে। চহী খরগী মমাংদদি অর্বানাইজেসন হায়রগা অখন্নবা শহর খরগী মফম খরখক্তা চাউখৎপদুবু খঙনরম্মি। অদুবু হৌজিক্তি ৱাখল্লোন্দু হোংলে। অমসুং বিহারগী মীয়াম্না মখোয়গী পুন্সিবু ভারতকী অনৌবা অর্বানাইজেসন্দা মতেং চাউনা পাংলে। মহাক্না হায়খি মদুদি, শহর অমা শেমগৎপা মতমদা হৌজিক্কী করি ৱাৎলি হায়বা নত্তনা তুংদা করি ৱাৎলক্কদবা, আত্মনির্ভর বিহারগীদমক, আত্মনির্ভর ভারতকীদমক য়েংগদবনি। মসিগী ৱাখল্লোন অসিগা লোইননা, অমরুৎ মিসনগী মখাদা, বিহারগী শহর কয়া শেমগৎনবগীদমক মরুওইবা মীৎয়েং কয়া অমা থম্লি।

শ্রী মোদীনা হায়খি মদুদি বিহারদা, এল.ই.দি. স্ত্রীৎ লাইৎ লাখ ৪.৫ হেন্না ম্যুনিসিপাল বোদী ১০০ হেনবদা থানখ্রে। মসিগী মরম্না, লম্বী শোরোক অমসুং অপীকপা শহরশিং ফগৎলক্লি, করোর কয়াগী মৈ তুংশিনবা ঙম্লে অমসুং মীয়ামগী পুন্সি ফগৎপা হেল্লক্লি। মহাক্না হায়খি মদুদি রাজ্য অসিগী অচৌবা অমসুং মরুওইবা শহর ২০দি গঙ্গা তুরেলগী তোর্বান্দা লৈ। গঙ্গা তুরেল লু নালহনবা, গঙ্গাগী ঈশিং শেংহনবনা শহর অসিদা লৈরিবা মীয়ামদা হকথেংননা কান্নবা পীগনি। গঙ্গা তুরেলবু লু নালহন্নিংবগী ৱাখল্লোন অসিগা লোইননা লুপা করোর ৬০০০ হেনবগী প্রোজেক্ত ৫০ হেন্না বিহারগীদমক কাইথোক্লে। মহাক্না হায়খি মদুদি সরকার অসিনা ৱাতর ত্রিৎমেন্ত প্লান্ত কয়া লিংখত্তুনা গঙ্গা তুরেলগী তোর্বান্দা লৈবা শহরশিংদা, নলাদগী অমোৎপা ঈশিং গঙ্গা তুরেলদা তাশিনবদগী থিংনবা হোৎনরি।

মহাক্না হায়খি মদুদি বিউর অমসুং করাম-লিচ্চাক্কী পত্নাদা ঙসি শঙ্গারিবা স্কিম অসিনা লমদম অসিগী মীওই মিল্লিয়ন কয়াদা কান্নবা পীরগনি। মসিগা লোইননা গঙ্গাগী মপান্দা লৈবা খুঙ্গংশিংসু 'গঙ্গা গ্রাম' ওইনা শেমগৎলি।

*****