মাইক্রো, স্মোল অমসুং মেদিয়ম ইন্তর্প্রাইজেস মন্ত্রালয়

খাদিগী ই-মার্কেত পোর্তেল ভাইরেল চৎলে; ভারতমচাশিং লৈবাক অসিদা শাবা পোৎ-চৈশিং শীজিন্নবা হৌরে

Posted On: 09 SEP 2020 11:48AM by PIB Imphal

খাদি এন্দ ভিলেজ ইন্দস্ত্রি কম্মিসন(কে  ভি আই সি)গী ওনলাইন্দা পোৎ-চৈ য়োনবগী থবক অথুবদা ভারত শীনবা থুংনা পায়খৎলকপদগী কে.ভি.আই.সিগী ই-পোর্তেল- www.kviconline.gov.in/khadimask/ গী খুৎথাংদা খুৎহৈবশিংনা মখোয়গী পোৎথোকশিং য়োনবা ঙম্লে। চহি অসিগী জুলাই ৭দগী শুপ্নগী খাদি মাক্স ওনলাইন্দা য়োনবা হৌদোকখিবা অদুদগী মপুং ফারক্তুনা ঙসিদি পোৎথোক ১৮০ হেন্না য়োল্লে অমসুং অহেনবা কয়া য়োন্নবা থৌরাং তৌরি।

কে.ভি.আই.সিগী মতুংইন্না, পোৎথোকশিং অদুগী মনুংদা খুৎনা শাবা মুসলিন, সিল্ক, দেনিম অমসুং লশিংগী ফেব্রিক, রিতু বেরিগী য়ুনিসেক্স বিচার বাস্ত্রা, খাদিগী খুদাং ঘরি, খোইহি, হার্বেল অমসুং গ্রিন তি, মনা-মশিংদগী শুংবা হিদাক-লাংথকশিং অমসুং সাপোনশিং, পাপর, হঙ্গাম থাও অমসুং মনা-মশিংদগী পুথোকপা অকে-অমৌগী পোৎলমশিং য়াওরি। কে.ভি.আই.সিনা ওনলাইন্দা য়োল্লিবা পোৎলমশিং অসিদা নুমিৎ খুদিংগী য়ামদ্রবদা অনৌবা ১০ হাপচিল্লি অমসুং চহি অসিগী ওক্তোবর ২ ফাওবদা য়ামদ্রবদা পোৎথোক ১০০০ হাপচিন্নবা পান্দম থম্লি। তেল্লবা থা ২গী মনুংদা, কে.ভি.আই.সিনা মীওই ৪০০০ রোমদা পোৎ য়োনখ্রে।

কে.ভি.আই.সিগী চেয়রমেন, বিনাই কুমার সক্সেনানা হায়খি খাদিগী পোৎলমশিং ওনলাইন্দা য়োনবা অসিনা “শ্বাদেসি”দা ইনোৎ পীরে অমসুং লমদম অসিগী খুৎহৈবশিংগী ফিবম ফগৎহন্নবা পান্দম থম্লি। খাদিগী ই-মার্কেত পোর্তেল অসিনা ঐখোয়গী খুৎহৈবশিংদা মখোয়গী পোৎথোকশিং য়োন্নবা অহেনবা মফম অমা পীরে। মসি অত্মানির্ভর ভারত শেমগৎনবা খোঙথাং অমনি। কাংলুপ খুদিংমক্কী পোৎ লৈরিবশিংগী অপাম্বা অমসুং লৈবা ঙম্বগী ফিবম য়েংদুনা পোৎথোকশিংগী মমল লুপা ৫০দগী লুপা ৫০০০ ফাওবগী মনুংদা লৈরি।

মমাংদা খাদিগী পোৎথোকশিং দুকান খক্তদা য়োল্লম্বনি অমসুং রাজ্য খর খক্তদা পোৎথোকশিং উরম্বনি। অদুবু কে.ভি.আই.সিগী ই-পোর্তেল হাংদোকপদগী হৌজিক লৈবাক অসিগী কাচিন-কোয়া য়ৌনা পোৎথোকশিং ফংলে অমসুং মসিনা খাদিগী ইন্সতিতুৎশিংগী পোৎথোকশিং পুথোকপা হেনগৎলে অমসুং খুৎহৈবশিং শেন্থোক হেনগৎলে।

খাদিগী পোৎথোকশিং ওনলাইন্দা ফংলকপদা পোৎ লৈরবশিংসু অপেনবা পোক্লে। কনোত প্লেসতা লৈবা খাদি ইন্দিয়াগী দুকানদগী পোৎ চাং নাইনা লৈরিবা দিল্লিগী মীওই অমা অসামদা থবক মফম হোংখিবদা হায়রিবা পোৎথোকশিং অদু লৈবা ফংদে। অদুবু ই-মার্কেত প্লেতফোর্ম লাকপদগী মহাক্না পাম্বা পোৎশিং মহাক্না ওনলাইন্দা চেনবা য়ারে অমসুং মদু মহাক্কী থোঙজিলদা ফংলে ।

অন্দমান অমসুং নিকোবর ইথৎশিং, অরুনাচল প্রদেস, কেরলা, হিমাচল প্রদেস অমসুং জে অমসুং কে য়াওনা রাজ্য অমসুং য়ু.তি ৩১দগী কে.ভি.আই.সিনা ওনলাইন ওর্দরশিং ফংলে। পোৎলমশিং লেম্না য়ৌহল্লক্নবা খ্বাইদগী পীকপা শেনফম কে.ভি.আই.সিনা লুপা ৫৯৯দা লেপ্লে। স্পিৎ পোস্তকী খুৎথাংদা পোৎশিং য়েন্থোক্নবা কে.ভি.আই.সিনা পোস্তেল দিপার্তমেন্তনা য়ানবা অমা পুরক্লে।

কে.ভি.আই.সিনা মশাগী ওইনা ই-পোর্তেল শেমগৎলে অমসুং মসিনা লুপা করোর কয়াগী শেনফম কনবা ঙম্লে। মসিগী মান্নবা মওংদা কে.ভি.আই.সিনা মশাগী ওইবা পি.এম.ই.জি.পি ই-পোর্তেল শেমগৎলে অমসুং মসিনা ৱেবসাই শেমগৎপা অমসুং শেন্নবগী লুপা করোর ২০গী শেনফম কনবা ঙম্লে।

কে.ভি.আই.সিগী ওনলাইনদা য়োল্লিবা পোৎলমশিংগী মনুংদা নুপাগী মোদী কুরতা অমসুং মোদী জেক্কেত অমসুং পালাজো অমসুং নুপীগী ফিরোল য়াওরি। অতোপ্পা পোৎথোকশিংগী মনুংদা খাদি রুমাল, স্পাইসেস, হার্বেল নিম ৱুদ কোম্ব, শম্পু, অকে-অমৌগী পোৎলমশিং, শন্থি অমসুং শনয়ুংগী সাপোন, য়োগাগী ফিরোল, অমসুং খুদক্তা চাবা য়ারবা অচাপোৎশিং য়াওরি।

******



(Release ID: 1652585) Visitor Counter : 5