କେନ୍ଦ୍ର ଶ୍ରମ ଓ ନିଯୁକ୍ତି ରାଷ୍ଟ୍ରମନ୍ତ୍ରୀ (ସ୍ୱାଧୀନ) ଶ୍ରୀ ସନ୍ତୋଷ କୁମାର ଗଙ୍ଗୱାରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଇଏସ୍ଆଇ କର୍ପୋରେସନର 182ତମ ବୈଠକରେ ଏହାର ସେବା ଯୋଗାଣ ବ୍ୟବସ୍ଥାରେ ସୁଧାର ପାଇଁ ତଥା କୋଭିଡ୍-19 ଦ୍ୱାରା ପ୍ରଭାବିତ ଶ୍ରମିକଙ୍କୁ ରିଲିଫ୍ ପ୍ରଦାନ ପାଇଁ କେତେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି । ବୈଠକ ସମୟରେ ନିମ୍ନଲିଖିତ ପ୍ରମୁଖ ନିଷ୍ପତ୍ତିଗୁଡ଼ିକ ନିଆଯାଇଛି:

ଇଏସ୍ଆଇସି ପକ୍ଷରୁ ଅଟଳ ବୀମିତ ବ୍ୟକ୍ତି କଲ୍ୟାଣ ଯୋଜନା ଅଧୀନରେ ଇଏସ୍ଆଇସି ସ୍କିମରେ କଭର ହେଉଥିବା ଶ୍ରମିକଙ୍କୁ ବେକାରୀ ଫାଇଦା ପ୍ରଦାନ କରାଯାଉଛି । ଇଏସ୍ଆଇ କର୍ପୋରେସନ ଏହି ସ୍କିମକୁ 30 ଜୁନ୍ 2021 ଯାଏଁ ଆଉ ଏକ ବର୍ଷ ପାଇଁ ସମ୍ପ୍ରସାରଣ କରିବାକୁ ନିଷ୍ପତ୍ତି ନେଇଛି । କୋଭିଡ୍-19 ମହାମାରୀ ଅବଧିରେ ନିଯୁକ୍ତି ହରାଇଥିବା ଶ୍ରମିକଙ୍କ ପାଇଁ ପୂର୍ବର ସର୍ତ୍ତାବଳି କୋହଳ ଏବଂ ରିଲିଫ୍ ପରିମାଣ ବୃଦ୍ଧି ପାଇଁ ଏଥିରେ ନିଷ୍ପତ୍ତି ହୋଇଛି । କୋହଳ ସର୍ତ୍ତାବଳି ଅଧୀନରେ ସମ୍ପ୍ରସାରିତ ରିଲିଫ୍ ପେମେଣ୍ଟ ଅବଧିକୁ 24-03-2020ରୁ 31-12-2020 ଯାଏଁ ବୃଦ୍ଧି କରାଯାଇଛି । ଏହା ପରଠାରୁ ଏହି ସ୍କିମ୍ ବାସ୍ତବ ଯୋଗ୍ୟତା ସର୍ତ୍ତାବଳି ସହ 01-01-2121ରୁ 30-06-2021 ଯାଏଁ ଉପଲବ୍ଧ ହେବ । 31-12-2020 ପରେ କୋହଳ ସର୍ତ୍ତାବଳିର ଆବଶ୍ୟକତା ଓ ଚାହିଦା ଅନୁସାରେ ଏହି ସର୍ତ୍ତାବଳିର ସମୀକ୍ଷା କରାଯିବ ।

ଏହି ରିଲିଫ୍ ପାଇଁ ଯୋଗ୍ୟତା ମାନଦଣ୍ଡକୁ ନିମ୍ନଲିଖିତ ଆଧାରରେ କୋହଳ କରାଯାଇଛି:

1. ସର୍ବାଧିକ 90 ଦିନ ବେକାରୀ ପାଇଁ ରିଲିଫ୍ ପେମେଣ୍ଟକୁ ପୂର୍ବର ହାରାହାରି ମଜୁରିର 25%ରୁ ବର୍ତ୍ତମାନ 50%କୁ ସମ୍ପ୍ରସାରଣ କରାଯାଇଛି ।

2. ପୂର୍ବରୁ 90 ଦିନ ବେକାର ହେବାପରେ ରିଲିଫ୍ ପ୍ରଦାନ କରାଯାଉଥିବା ବେଳେ ଏବେ ଏହାକୁ 30 ଦିନ ପରେ ପ୍ରଦାନ କରାଯିବ ।

3. ବୀମାଭୁକ୍ତ ବ୍ୟକ୍ତି ନିଜର ଦାବୀକୁ (କ୍ଳେମ) ସିଧାସଳଖ ଇଏସ୍ଆଇସି ଶାଖା କାର୍ଯ୍ୟାଳୟରେ ଦାଖଲ କରିପାରିବେ । ପୂର୍ବରୁ ଏହା ଶେଷ ନିଯୁକ୍ତିଦାତାଙ୍କ ଦ୍ୱାରା କ୍ଲେମ୍ ପ୍ରଦାନ ପାଇଁ ଦାଖଲ କରାଯାଉଥିଲା । ସେହିଭଳି ପେମେଣ୍ଟକୁ ସିଧାସଳଖ ବୀମାଭୁକ୍ତ ବ୍ୟକ୍ତିଙ୍କ ବ୍ୟାଙ୍କ ଖାତାରେ ପ୍ରଦାନ କରାଯିବ ।

4. ବୀମାଭୁକ୍ତ ବ୍ୟକ୍ତି ବେକାର ହେବା ପୂର୍ବରୁ ସର୍ବନିମ୍ନ 2 ବର୍ଷ ପାଇଁ ବୀମାଯୋଗ୍ୟ ନିଯୁକ୍ତି ପାଇଥିବେ ଏବଂ ବେକାର ହେବା ପୂର୍ବରୁ 78 ଦିନରୁ କମ୍ ଇଏସ୍ଆଇ ଅବଦାନ ଦେଇ ନ ଥିବେ ଏବଂ ବେକାର ହେବାର 2 ବର୍ଷ ପୂର୍ବରୁ ବଳକା 3ଟି ଅବଦାନ ଅବଧିର ଗୋଟିଏରେ ସର୍ବନିମ୍ନ 78 ଦିନ ଅବଦାନ ଦେଇଥିବେ ।

କୋଭିଡ୍-19 ପରିସ୍ଥିତିରେ ଇଏସ୍ଆଇସି ହସ୍ପିଟାଲଗୁଡ଼ିକରେ ଆଇସିୟୁ/ଏଚଡିୟୁ ସେବାକୁ ମଜଭୂତ କରିବା ଉଦ୍ଦେଶ୍ୟରେ ସମସ୍ତ ଇଏସ୍ଆଇସି ହସ୍ପିଟାଲରେ ଥିବା ମୋଟ ଶଯ୍ୟାର 10% ପର୍ଯ୍ୟନ୍ତ ଆଇସିୟୁ/ଏଚ୍ଡିୟୁ ସେବା ସ୍ଥାପନ ପାଇଁ ନିଷ୍ପତ୍ତି ହୋଇଛି ।

1. କୋଭିଡ୍-19 ମୁକାବିଲା ଉଦ୍ଦେଶ୍ୟରେ ସାଧାରଣ ଜନତାଙ୍କ ପାଇଁ ନିଜର ମେଡିକାଲ କେୟାର ଭିତ୍ତିଭୂମି ଯୋଗାଣ ସହ ଇଏସ୍ଆଇସି ଦ୍ୱାରା ଗ୍ରହଣ କରାଯାଇଥିବା ପଦକ୍ଷେପକୁ ବୈଠକରେ ଇଏସ୍ଆଇସି କର୍ପୋରେସନର ସଦସ୍ୟମାନେ ପ୍ରଶଂସା କରିଥିଲେ । ବର୍ତ୍ତମାନ ସୁଦ୍ଧା ସାରା ଦେଶରେ ପ୍ରାୟ 2600 ଏକାନ୍ତବାସ ଶଯ୍ୟା ଏବଂ ପାଖାପାଖି 1350 କ୍ୱାରେଂଟାଇନ୍ ଶଯ୍ୟା ସହ 23ଟି ଇଏସ୍ଆଇସି ହସ୍ପିଟାଲ ସମର୍ପିତ କୋଭିଡ୍-19 ହସ୍ପିଟାଲ ଭାବେ କାର୍ଯ୍ୟ କରୁଛି, ଯାହାକି ନିକଟସ୍ଥ ଅଂଚଳର ସାଧାରଣ ଜନତାଙ୍କୁ ସ୍ୱତନ୍ତ୍ର ଭାବେ କୋଭିଡ୍ ମେଡିକାଲ ସେବା ଯୋଗାଉଛି । ଏହାବ୍ୟତୀତ ଦେଶବ୍ୟାପୀ ଅନ୍ୟ ବଳକା ଇଏସ୍ଆଇସି ହସ୍ପିଟାଲରେ ପ୍ରାୟ 961 କୋଭିଡ୍ ଏକାନ୍ତବାସ ଶଯ୍ୟା ଉପଲବ୍ଧ ଅଛି । ଫଳରେ ଇଏସ୍ଆଇସି ହସ୍ପିଟାଲଗୁଡ଼ିକରେ ମୋଟ କୋଭିଡ୍ ଏକାନ୍ତବାସ ଶଯ୍ୟା ସଂଖ୍ୟା 3597ରେ ପହଞ୍ଚିଛି । ପୁନଶ୍ଚ ଏହି ହସ୍ପିଟାଲଗୁଡ଼ିକରେ ମୋଟ 555 ଆଇସିୟୁ/ଏଚଡିୟୁ ଶଯ୍ୟା ଏବଂ 2133 ଭେଂଟିଲେଟର ଉପଲବ୍ଧ କରାଯାଇଛି ।

2. ଫରିଦାବାଦ୍ (ହରିୟାଣା), ସନଥ ନଗର, ହାଇଦ୍ରାବାଦ (ତେଲଙ୍ଗାନା), ଗୁଲବର୍ଗ (କର୍ଣ୍ଣାଟକ) ଇଏସ୍ଆଇସି ମେଡିକାଲ କଲେଜ ଆଣ୍ଡ ହସ୍ପିଟାଲ୍ସ ଏବଂ ଇଏସ୍ଆଇସି ପିଜିଆଇଏମ୍ଏସ୍ଆର୍, ବସାଇଦରାପୁର (ଦିଲ୍ଲୀ)ରେ ଆଇସିଏମ୍ଆର୍ ଅନୁମୋଦିତ ଇନ୍-ହାଉସ୍ କୋଭିଡ୍-19 ଲ୍ୟାବ ପରୀକ୍ଷଣ ସେବା ଆରମ୍ଭ ହୋଇଛି ।

3. ଫରିଦାବାଦ (ହରିୟାଣା) ଏବଂ ସନଥ ନଗର, ହାଇଦ୍ରାବାଦ (ତେଲଙ୍ଗାନା) ଇଏସ୍ଆଇସି ମେଡିକାଲ କଲେଜ ଆଣ୍ଡ ହସ୍ପିଟାଲରେ ପ୍ଲାଜମା ଥେରାପୀ ଚିକିତ୍ସା ଯୋଗାଇ ଦିଆଯାଉଛି ।

4. ଦିଲ୍ଲୀ/ଏନସିଆର ଅଂଚଳରେ ଥିବା ସମସ୍ତ ବୃହତ ଇଏସ୍ଆଇସି ହସ୍ପିଟାଲରେ ରାପିଡ୍ କୋଭିଡ୍-19 ଆଣ୍ଟିଜେନ ପରୀକ୍ଷା ଆରମ୍ଭ ହୋଇଛି ।

5. ବୀମାଭୁକ୍ତ ବ୍ୟକ୍ତି ଓ ସେମାନଙ୍କ ପରିବାର ସଦସ୍ୟଙ୍କୁ ଚୁକ୍ତିବଦ୍ଧ ହସ୍ପିଟାଲରେ ଅଣ-କୋଭିଡ୍ ମେଡିକାଲ ସେବା ଯୋଗାଇବା ପାଇଁ ବିକଳ୍ପ ବ୍ୟବସ୍ଥା କରାଯାଇଛି ।

ଉପରୋକ୍ତ ବିଷୟ ବ୍ୟତୀତ ବୀମାଭୁକ୍ତ ବ୍ୟକ୍ତି ଓ ସେମାନଙ୍କ ହିତାଧିକାରୀଙ୍କୁ ସେବା/ଫାଇଦା ପ୍ରଦାନ ସହ ଅନ୍ୟ ପ୍ରଶାସନିକ ପ୍ରସଙ୍ଗରେ ସୁଧାର ଆଣିବା ଉଦ୍ଦେଶ୍ୟରେ ପ୍ରାୟ 30ଟି ଅନ୍ୟ ଏଜେଣ୍ଡା/ରିପୋର୍ଟିଂ ବିଷୟ ଉପରେ ବୈଠକରେ ଆଲୋଚନା ଓ ଅନୁମୋଦନ ହୋଇଥିଲା ।

ନିଯୁକ୍ତିଦାତାଙ୍କ ପ୍ରତିନିଧି, କର୍ମଚାରୀଙ୍କ ପ୍ରତିନିଧି, ପେସାଦାର ବିଶେଷଜ୍ଞ ଓ ରାଜ୍ୟ ସରକାରଙ୍କ ପ୍ରତିନିଧି ସମେତ କର୍ପୋରେସନର ପ୍ରାୟ 60 ଜଣ ସଦସ୍ୟ ଭିଡିଓ କନ୍ଫରେନ୍ସିଂ ଜରିଆରେ ବୈଠକରେ ଅଂଶଗ୍ରହଣ କରିଥିଲେ । ବୈଠକରେ ଅଂଶଗ୍ରହଣ କରିଥିବା ଅନ୍ୟ ସଦସ୍ୟମାନେ ହେଲେ, ଶ୍ରୀ ହୀରାଲାଲ ସମରିୟା, ସଚିବ, ଶ୍ରମ ଓ ନିଯୁକ୍ତି ମନ୍ତ୍ରାଳୟ, ଶ୍ରୀ ରାମ କୃପାଳ ଯାଦବ, ସାଂସଦ, ଶ୍ରୀମତୀ ଡୋଲା ସେନ୍, ସାଂସଦ, ଶ୍ରୀମତୀ ଅନୁରାଧା ପ୍ରସାଦ, ମହାନିର୍ଦ୍ଦେଶକ ଏବଂ ମିସ୍ ଶିବାନୀ ସ୍ୱାଇଁ, ଏସ୍ଆଣ୍ଡଏଫ୍ଏ, ଶ୍ରମ ଓ ନିଯୁକ୍ତି ମନ୍ତ୍ରାଳୟ ।

**********