(कोविड-19 संबंधी पत्र सूचना कार्यालयाद्वारे जारी बातम्‍या आणि सत्‍यता पडताळणी बातम्‍या समाविष्‍ट)

दिल्ली-मुंबई, 20 ऑगस्ट 2020

वाढत्या लोकसंख्येचे आव्हान पेलणे अवघड असल्यामुळे विकासाच्या प्रश्नांचे निराकरण करणे अधिकाधिक कठीण होत आहे, असे प्रतिपादन उपराष्ट्रपती वेंकैया नायडू यांनी आज केले. लोकसंख्याविषयक दोन अहवालांच्या आभासी प्रकाशन कार्यक्रमामध्ये नायडू बोलत होते. ‘आयएपीपीडी’च्यावतीने नवी दिल्लीमध्ये आज ‘भारतातल्या जन्म लिंग गुणोत्तराची स्थिती’ आणि ‘भारतामधल्या वृद्धांची लोकसंख्या: स्थिती आणि मदत प्रणाली’ या दोन विषयांचे निष्कर्ष अहवाल प्रसिद्ध करण्यात आले.

आरोग्य मंत्रालयाची कोविड-19 घडामोडींवरील माहिती :

• गेल्या 24 तासात 58,794 जणांच्या रोगमुक्तीसोबतच, भारतातील कोविड-19च्या रुग्णांच्या रोगमुक्तीचा दर 74% (73.91%) पर्यंत पोहचला. यावरून गेल्या काही महिन्यात रुग्णांचा बरे होण्याचा दर सतत गतीने वाढत आहे हे लक्षात येते.

भारताने 14 लाख (14,10,269) रोगमुक्तांची संख्या नोंदवली आहे, जी अजून बाधित असलेल्यांच्या (6,86,395 जे अजून वैद्यकीय देखरेखीखाली आहेत) संख्येहून कितीतरी जास्त आहे. रोगमुक्तांची ही विक्रमी संख्या देशातील वास्तविक रुग्णांची संख्या कमी झाल्याची खात्री दर्शवते. म्हणजेच आता बाधित असलेल्यांची एकूण संख्या कमी होऊन एकूण बाधित झालेल्यांच्या संख्येच्या 24.19% एवढीच आहे. वैद्यकीय चाचण्यांमधून आजाराची निश्चिती, देखरेख आणि संसर्ग-संपर्काचा माग काढणे याशिवाय कोविड-19च्या रुग्णांवर वेळच्यावेळी योग्य उपचार यामुळे जागतिक सरासरीच्या तुलनेत मृत्यूदर खाली आलाच, एवढेच नव्हे तर तो सातत्याने कमी कमी होत जात आहे, (आताचा आकडा 1.89%). याशिवाय जीवरक्षक प्रणालीवर असणाऱ्या बाधित रुग्णांचे प्रमाणही कमी आहे.

• सातत्यपूर्ण कामगिरी करत, भारताने कोविडच्या दैनंदिन चाचण्यांमध्ये एक नवीन उच्चांक नोंदवला आहे. प्रथमच एकाच दिवसात 9 लाखाहून अधिक कोविड चाचण्या घेण्यात आल्या आहेत. गेल्या 24 तासांत 9,18,470 कोविड चाचण्या करण्यात आल्या. दररोज 10 लाख नमुने तपासण्याच्या निर्धाराच्या दिशेने अभूतपूर्व वाढ होण्याची भारताला आशा आहे. या कामगिरीमुळे एकूण चाचण्यांची संख्या 3.25 कोटींपेक्षा जास्त (3,26,61,252) झाली आहे.
• केंद्रीय आरोग्य व कुटुंब कल्याण मंत्री डॉ. हर्ष वर्धन यांनी ईट राईट चॅलेंजचा भाग म्हणून भारतीय अन्न सुरक्षा आणि मानक प्राधिकरणाने (एफएसएसएआय) आयोजित केलेल्या ऑनलाईन मार्गदर्शन कार्यशाळेचे अध्यक्षपद भूषविले. त्यांनी यावेळी देशभरात ‘ईट राईट इंडिया’ उपक्रम राबविण्यासाठी विविध भागधारकांना मदत करण्यासाठी एफएसएसएआयचे ‘ईट राइट इंडिया’ हँडबुक आणि eatrightindia.gov.in ही वेबसाइट देखील सुरू केली.

इतर अपडेट्स:

• 100% आपत्कालीन कर्ज हमी योजना (ECLGS) या भारत सरकारचे पाठबळ असलेल्या योजने अंतर्गत सार्वजनिक आणि खासगी क्षेत्रातील बँकांनी 18 ऑगस्ट 2020 पर्यंत 1.5 लाख कोटी रुपयांपेक्षा जास्त कर्जे मंजूर केली आहेत. यापैकी 1 लाख कोटींची कर्जे याआधीच वितरित झाली आहेत. ECLGS म्हणजेच आपत्कालीन कर्ज हमी योजना ही आत्मनिर्भर भारत योजनेचा भाग म्हणून सरकारने घोषित केली होती. covid-19 लॉकडाऊनमुळे होणारी प्रचंड हानी आटोक्यात आणण्यासाठी विविध क्षेत्राला खास करून लघु, सूक्ष्म व मध्यम क्षेत्रातील उद्योगांना कर्ज पुरवणे अशी ही योजना आहे.
• कोविड-19 मुळे बसलेल्या धक्क्यातून उभारी मिळावी या हेतूने विशेष परिपूर्णता मोहिम राबवली जात आहे. याद्वारे किसान क्रेडिट कार्ड (KCC) द्वारे शेतकऱ्यांना सवलतीच्या दरात कर्ज उपलब्ध करून दिले जात आहे. 17.08.2020 पर्यंत 1.22 कोटी किसान क्रेडिट कार्डस मंजूर झाली आहेत. त्यांची एकूण कर्ज मर्यादा 1,02,065 कोटी रुपये आहे. यामुळे ग्रामीण अर्थव्यवस्था उभारी धरेल आणि कृषी क्षेत्राच्या विकासाला गती येईल.
• श्रम आणि रोजगार मंत्रालयाचे संलग्न कार्यालय असलेल्या श्रम विभागाचा अधिकृत लोगो आज नवी दिल्लीत श्रम शक्ती भवन येथे श्रम आणि रोजगार राज्यमंत्री (स्वतंत्र कार्यभार) संतोषकुमार गंगवार यांनी प्रसिद्ध केला. श्रम विभागाची कल्पना आणि उद्दिष्टे दृश्य स्वरूपात पोहचवण्यासाठी हा लोगो तयार करण्यात आला असून या कार्यक्रमाला श्रम आणि रोजगार मंत्रालयाचे सचिव हीरालाल समारिया, आणि श्रम विभागाचे महासंचालक डी. पी. एस नेगी, मंत्रालयाचे वरिष्ठ अधिकारी उपस्थित होते.
• आपली संपूर्ण आरोग्य यंत्रणा ही देशासाठी अभिमानाचा विषय ठरली असून जागतिक सहकार्य आणि व्यापार या आघाड्यांवर भारत हा विश्वासार्ह जोडीदार होऊ शकतो हे जगाच्या दृष्टीस पडले आहे, असे प्रतिपादन व्यापार आणि वाणिज्य मंत्री पियुष गोयल यांनी केले. ते CII च्या बाराव्या वैद्यकीय-तंत्रज्ञान जागतिक शिखर परिषदेत आज बोलत होते.
• कार्बन शोषण, उपयोगिता आणि साठवणुकीसंदर्भात (सीसीयूएस) उपयोजित संशोधनात रस असणार्‍या संशोधकांना आता जागतिक हवामान बदलाच्या वाढत्या समस्येचे निराकरण करण्यासाठी त्यांचे तंत्रज्ञान आणि संशोधन कार्य वेगवान आणि परिपक्व करण्याची मोठी संधी आहे.

महाराष्ट्र अपडेट्स :

राज्यात 1.60 लाख कोरोना रुग्ण असले तरी, अनलॉक उपाययोजनांतर्गत राज्य रस्ते परिवहन महामंडळाने आज सकाळपासून आपली सेवा सुरु केली, मुंबईहून सकाळी 7 वाजता शिवनेरी बस पुण्यासाठी रवाना झाली. राज्यात सर्वदूर साजरा केल्या जाणाऱ्या गणेशोत्सवाच्या दोन दिवस अगोदरच राज्य सरकारने आंतर-जिल्हा बससेवा सुरु केली. पुण्यात नुकत्याच सेरो-सर्वेक्षणात आढळून आले आहे की, पाच उच्च-बाधित क्षेत्रातील रहिवाशांमध्ये कोरोना संक्रमणाविरोधात प्रतिपिंडे (अँटीबॉडीज) तयार झाल्या आहेत. त्यानुसार, भारतीय विज्ञान शिक्षण संस्था आणि संशोधन आधारीत सर्वेक्षणानुसार, विषाणूबद्दल मानवी शरीराची प्रतिक्रिया समजून घेण्याच्या प्रयत्नातून ‘निष्क्रिय करणारी प्रतिपिंडे’ शोधण्यासाठी अभ्यास सुरू केला आहे. अशा प्रकारचे हे कदाचित देशातील पहिलेच सर्वेक्षण असेल.

FACT CHECK

* * *

M.Chopade/S.Thakur/D.Rane

सोशल मिडियावर आम्हाला फॉलो करा@PIBMumbai    /PIBMumbai    /pibmumbai  pibmumbai[at]gmail[dot]com