ଦେଶର 74ତମ ସ୍ୱାଧୀନତା ଦିବସ ପାଳନ ଅବସରରେ ପ୍ରଧାନମନ୍ତ୍ରୀ  ଶ୍ରୀ ନରେନ୍ଦ୍ର ମୋଦୀ ଆଜି ଦେଶବାସୀଙ୍କ ଉଦ୍ଦେଶ୍ୟରେ ଐତିହାସିକ ଲାଲକିଲ୍ଲା ଠାରୁ ଅଭିଭାଷଣ ପ୍ରଦାନ ବେଳେ କରୋନା ଯୋଦ୍ଧାଙ୍କ ସାହସକୁ ନମନ କରିଛନ୍ତି । ପ୍ରଧାନମନ୍ତ୍ରୀ ଶ୍ରୀ ମୋଦୀ ତାଙ୍କର ଭାଷଣ ପ୍ରସଙ୍ଗରେ କହିଛନ୍ତି, ଯେ ଏବେ ଦେଶରେ କୋଭିଡ଼-19 ମହାମାରୀ ଜାରି ରହିଥିବା ବେଳେ ଭାରତ ପର୍ଯ୍ୟାୟକ୍ରମିକ ତଥା ସକାରାତ୍ମକ ଆଭିମୁଖ୍ୟର ସହ ଏହା ବିରୋଧରେ ସଂଗ୍ରାମ ଜାରି ରଖିଛି । ଏହା ଦେଶକୁ “ଆତ୍ମନିର୍ଭର” ହେବାରେ ଯଥେଷ୍ଟ ମାତ୍ରାରେ ସହାୟକ ହୋଇପାରିଛି ବୋଲି ପ୍ରଧାନମନ୍ତ୍ରୀ ଉଲ୍ଲେଖ କରିଛନ୍ତି । ଦେଶର ଜନସାଧାରଣଙ୍କୁ ସ୍ୱାସ୍ଥ୍ୟ ସେବା ଯୋଗାଇ ଦେବାରେ କେନ୍ଦ୍ର ସରକାରଙ୍କ ସଫଳତା ସଂପର୍କରେ ଶ୍ରୀ ମୋଦୀ ସୂଚନା ଦେଇଛନ୍ତି ।

ପ୍ରଧାନମନ୍ତ୍ରୀ ଶ୍ରୀ ମୋଦୀ ତାଙ୍କର ଅଭିଭାଷଣରେ କରୋନା ମହାମାରୀରେ ଯେଉଁ ବ୍ୟକ୍ତିମାନେ ପ୍ରାଣ ହରାଇଛନ୍ତି ସେମାନଙ୍କର ଶୋକସନ୍ତପ୍ତ ପରିବାରବର୍ଗଙ୍କ ପ୍ରତି ଗଭୀର ସମବେଦନା ଜ୍ଞାପନ କରିଥିଲେ । ସେ କହିଥିଲେ ଯେ ଭାରତର କରୋନା ଯୋଦ୍ଧାମାନଙ୍କୁ ସେମାନଙ୍କର ନିସ୍ୱାର୍ଥପର ନିଷ୍ଠା ଓ ଶ୍ରମ ସକାଶେ ସଭିଏଁ ପ୍ରଶଂସା କରିବା ଉଚିତ । “ସେବା ପରମୋ ଧର୍ମଃ” ଆପ୍ତ ବାକ୍ୟକୁ ସେମାନେ ନିଜ କର୍ମ ଓ ନିଷ୍ଠା ବଳରେ ପ୍ରତିପାଦିତ କରିପାରିଛନ୍ତି । ସମଗ୍ର ଦେଶକୁ ନିର୍ଭର ପ୍ରତିଶ୍ରୁତି ପ୍ରଦାନ ପୂର୍ବକ ପ୍ରଧାନମନ୍ତ୍ରୀ କହିଲେ ଯେ “କରୋନା ବିରୋଧୀ ଲଢ଼େଇରେ ଆମେ ନିଶ୍ଚୟ ବିଜୟ ଲାଭ କରିବୁ । ଆମର ଦୃଢ଼ ମନୋବଳ ଏହି ବିଜୟ ପଥରେ ସହାୟକ ହେବ ।”

“ଆତ୍ମନିର୍ଭର ଭାରତ” ଉପରେ ଗୁରୁତ୍ୱ ଆରୋପ କରି ପ୍ରଧାନମନ୍ତ୍ରୀ କହିଲେ ଯେ ଦେଶ ଏବେ ଏହି ମନୋଭାବକୁ ନେଇ କୋଭିଡ଼-19 ବିରୋଧରେ ସଂଗ୍ରାମ କରୁଛି ଏବଂ ଏହା ଆମକୁ ଅନେକାଂଶରେ ସଫଳତା ପ୍ରଦାନ  କରିଛି । ଦେଶରେ ଏବେ ପିପିଇ କିଟ୍‌, ଏନ-95 ମାସ୍କ, ଭେଣ୍ଟିଲେଟର ଇତ୍ୟାଦି ପ୍ରସ୍ତୁତ କରାଯାଇପାରୁଛି ଯାହାକି ଘରୋଇ ଭାବେ ପୂର୍ବରୁ ଏତେ ଉତ୍ପାଦିତ ହେଉନଥିଲା । ଏହିସବୁ ସାମଗ୍ରୀର ଉତ୍ପାଦନ କ୍ଷମତା ବୃଦ୍ଧି “ସ୍ଥାନୀୟ ଉତ୍ପାଦନ ପାଇଁ ନାରା” କୁ ପ୍ରତିଧ୍ୱନିତ କରିଛି ।

ଲାଲକିଲ୍ଲାର ମଞ୍ଚ ଉପରୁ ଦେଶବାସୀଙ୍କୁ ଉଦ୍‌ବୋଧନ ଦେଇ ପ୍ରଧାନମନ୍ତ୍ରୀ କହିଲେ ଯେ ଦେଶରେ ଏବେ କୋଭିଡ଼ ନମୁନା ପରୀକ୍ଷା କ୍ଷମତାରେ ଯଥେଷ୍ଟ ଅଭିବୃଦ୍ଧି ହାସଲ କରାଯାଇପାରିଛି । ଦେଶରେ ପୂର୍ବରୁ ଏହି ଧରଣର ପରୀକ୍ଷା ସକାଶେ ମାତ୍ର ଗୋଟିଏ ପରୀକ୍ଷାଗାର ଥିବା ବେଳେ ତାହା ଏବେ 1400ରୁ ଅଧିକ ହୋଇପାରିଛି ଏବଂ ସେସବୁ ଦେଶର ବିଭିନ୍ନ ସ୍ଥାନରେ ବିସ୍ତାରିତ ହୋଇ ରହିଛି । ପୂର୍ବରୁ ଦେଶରେ ଦୈନିକ ମାତ୍ର 300 ନମୁନା ପରୀକ୍ଷା କରାଯାଉଥିବାବେଳେ ଏବେ ପ୍ରତି ଦିନ 7 ଲକ୍ଷରୁ ଅଧିକ ନମୁନା ପରୀକ୍ଷା କରାଯାଇପାରୁଛି । ଅତି କମ୍‌ ସମୟ ମଧ୍ୟରେ ଏଭଳି ସଫଳତା ଓ ଅଭିବୃଦ୍ଧି ହାସଲ କରାଯିବା ମଧ୍ୟ ଏକ ବିରାଟ ସଫଳତା ବୋଲି ପ୍ରଧାନମନ୍ତ୍ରୀ ଉଲ୍ଲେଖ କରିଛନ୍ତି ।

ସ୍ୱାଧୀନତା ଦିବସ ପାଳନ ଅବସରରେ ଦେଶବାସୀଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ ଶ୍ରୀ ମୋଦୀ ଉଲ୍ଲେଖ କରିଛନ୍ତି ଯେ କରୋନା ଟୀକାର ବିକାଶ ନିମନ୍ତେ ଭାରତ ତା’ର ରଣନୀତି ପ୍ରସ୍ତୁତ କରିଛି । ଦେଶର ବୈଜ୍ଞାନିକମାନେ ଏ ଦିଗରେ କାର୍ଯ୍ୟ ଆରମ୍ଭ କରି ସାରିଛନ୍ତି ଏବଂ ସେମାନଙ୍କର ମନୋବଳ ବେଶ ଦୃଢ଼ ରହିଛି । ବର୍ତ୍ତମାନ, ତିନୋଟି ଟୀକାର ବିକାଶ ବିଭିନ୍ନ ପରୀକ୍ଷଣ ପର୍ଯ୍ୟାୟରେ ରହିଛି । ଯେତେ ଶୀଘ୍ର ବୈଜ୍ଞାନିକ ମାନେ ଏଥିପାଇଁ ସମ୍ମତି ପ୍ରଦାନ କରିବେ ତାହାର ବିପୁଳ ଉତ୍ପାଦନ ଆରମ୍ଭ କରାଯିବ । ଏହି ଟୀକାର ଉତ୍ପାଦନ ଏବଂ ବିତରଣ ସକାଶେ ଏକ ସୁଚିନ୍ତିତ ବ୍ଲୁପ୍ରିଣ୍ଟ୍‌ ପ୍ରସ୍ତୁତ ହୋଇସାରିଛି ବୋଲି ପ୍ରଧାନମନ୍ତ୍ରୀ ସୂଚନା ପ୍ରଦାନ କରିଥିଲେ ।

ପ୍ରଧାନମନ୍ତ୍ରୀ ତାଙ୍କର ଅଭିଭାଷଣରେ ଉଲ୍ଲେଖ କରିଥିଲେ ଯେ ଦେଶରେ ମେଡ଼ିକାଲ ଶିକ୍ଷା ଓ ସ୍ୱାସ୍ଥ୍ୟ ଭିତ୍ତିଭୂମିର ସୁଦୃଢ଼ୀକରଣ ନିମନ୍ତେ ସରକାର ତାଙ୍କର ଦକ୍ଷତାର ସର୍ବାଧିକ ସଂପ୍ରସାରଣ  କରିଛନ୍ତି । ଦେଶରେ ନୂଆ ନୂଆ ଏମ୍ସ ଏବଂ ମେଡ଼ିକାଲ କଲେଜମାନ ସ୍ଥାପନ କରାଯାଉଛି ଯାହା ମେଡ଼ିକାଲ ଭିତ୍ତିଭୂମିକୁ ସୁଦୃଢ଼ କରିବାରେ ସହାୟକ ହେବ । ଏବେ ଦେଶରେ 45 ହଜାରରୁ ଅଧିକ ଏମବିବିଏସ ସିଟ୍‌ ଏବଂ ଏମଡ଼ି ସିଟ୍‌ ଉପଲବ୍ଧ ରହିଛି । ଆୟୁଷ୍ମାନ ଭାରତର ସ୍ୱାସ୍ଥ୍ୟ ଓ ନିରାମୟ କେନ୍ଦ୍ର (ଏଚଡ଼ବ୍ଲୁସି)ର ଭୂମିକାକୁ ପ୍ରଶଂସା କରି ପ୍ରଧାନମନ୍ତ୍ରୀ କହିଲେ କରୋନା ମହାମାରୀ ସଂକ୍ରମଣ ବେଳେ ଏହି ସ୍ୱାସ୍ଥ୍ୟକର୍ମୀମାନେ ଅଣ କୋଭିଡ଼ ସ୍ୱାସ୍ଥ୍ୟ ସେବା ଯୋଗାଇ ଦେବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି ।

ଏହି ଅବସରରେ ଜାତୀୟ ଡିଜିଟାଲ ସ୍ୱାସ୍ଥ୍ୟ ମିଶନର ଶୁଭାରମ୍ଭ କରି ପ୍ରଧାନମନ୍ତ୍ରୀ କହିଲେ ଯେ ଏକ ଅଭିନବ ସ୍ୱାସ୍ଥ୍ୟ ଆଇଡ଼ି ମାଧ୍ୟମରେ ଦେଶର ପ୍ରତ୍ୟେକ ନାଗରିକଙ୍କୁ ପ୍ରତ୍ୟେକ ରୋଗ ସଂପର୍କୀତ ବିସ୍ତୃତ ସୂଚନା, ଏହାର ପରୀକ୍ଷଣ- ଲକ୍ଷଣ ଚିହ୍ନଟ, ରିପୋର୍ଟ ଏବଂ ଔଷଧୀୟ ଉପଚାର ଇତ୍ୟାଦି ସଂପର୍କରେ ସମସ୍ତ ସୂଚନା ଉପଲବ୍ଧ ହେବ ।

**********