হৌজিক হৌজিক লৈরিবা কোবিদ-১৯ লাইচৎ অমসুং ভারতনা অমুক্তদা অমসুং থৌনা ফনা লৈবাক অসিবু "আত্মনির্ভর" ওইনবা হোৎনরিবা অসিনা লৈবাক অসিনা মনীং তমখিবগী চহী ৭৪শুবা পালন থৌরমগী ৱারোলদা হকশেলগী লমদা কেন্দ্র সরকার অসিনা মাই পাক্না পাঙথোকখিবা থবকশিং পল্লদুনা ফোংদোকখি।

লাইনা অসিনা মরম ওইদুনা লৈখিদ্রবশিংগী ইমুং মনুংগী অৱাবদা শরুক য়ারদুনা মহাক্না হায়খি মদুদি ভারতকী কোরোনা লান্মীশিং অসি "সেবা পর্মো ধর্ম" হায়বসিমক খুদম ওইনা উৎপীবগীদমক থাগৎফম থোকই। প্রধান মন্ত্রীনা লৈবাক মীয়ামদা থাজবা পীরদুনা হায়খি মদুদি "ঐখোয়না কোরোনাদগী শোইদনা মাই পাক্কনি। 'অচেৎপা ৱাখল্লোন'না মাই পাকপগী লম্বীদা শোইদনা পুগনি।"

কোবিদ-১৯গী মরকসিদা মরোমদোম লেপ্পা ঙম্না হোৎনবগী ৱাখল্লোন মাই পাক্না শাগৎপা ঙমখিবা লৈবাক অসিগী 'আত্মনির্ভর ভারত'কী থৌনাবু মহাক্না পনখি। মহাক্না হায়খি মদুদি লৈবাক অসিনা পি.পি.ই. কিৎ, এন.৯৫ মাস্ক, ভেন্তিলেতর অসিনচিংবা কয়া শাজবা ঙম্লে, হায়রিবশিং অসি মমাংদদি লমদম অসিদা শারমদবনি। অসিগুম্বা মালেমগী থাক্তা লৈবা পোত্থোকশিং পুথোকপা ঙম্বগী কেপাসিতী হেনগৎলক্লিবসি মহাক্কী "ভোকেল ফোর লোকেল"দা নিন্দুনা লৈখি।

লাল কিলাগী ফম্বাক্তগী ঙসি ৱা ঙাংলদুনা প্রধান মন্ত্রীনা লৈবাক অসিদা "লেব অমখক্তং লৈরম্বদগী লৈবাক শীনবা থুংনা লেব ১৪০০ ফাওবা লৈখৎলক্তুনা কোবিদ তেস্ত তৌবা ঙম্বগী থাক ৱাংখৎলক্লিবসি পনখি। ঐখোয়না মমাংদা নোংমদা তেস্ত ৩০০তমক তৌবা ঙম্লম্মি; ঙসিদি ঐখোয়না নোংমদা তেস্ত লাখ ৭তগী হেন্না তৌরে। হায়রিবসি য়াম্না তেনবা মতমদা ফংবা ঙমখি" হায়না মহাক্না মখা তাখি।

মহাক্না নীংখা তমখিবা নুমিত্তা মীয়ামদা ৱারোল পীবদা, প্রধান মন্ত্রীনা কোরোনাগী তিকা ভারতনা পুথোক্নবা থৌরাং তৌরিবসিবুসু পনখি। মহাক্না হায়খি মদুদি সাইন্তিস্তশিংনা মিসন অসি মাই পাক্নবগীদমক অচেৎপা ফিরেপ অমগা লোইননা হোৎনরি। হৌজিক্কী ওইনদি, তিকা অহুমখক তেস্ত তৌবগী তোঙান-তোঙানবা তাংকক্তা লৈরে। সাইন্তিস্তশিং ইঙ্গিৎ অমহেক পীরকপগা পাক্তক্ননা শাবগী থবক পায়খৎলগনি। তিকা অসিবু পুথোকপগী অমসুং য়েন্থোক্নবগী ব্লুপ্রিন্ত অমসু শেম্লে হায়না মহাক্না ফোংদোকখি।

লৈবাক অসিনা মেদিকেল এজুকেসন অমসুং হেলথ ইনফ্রাস্ত্রকচরদা মপাঙ্গল হেনগৎনবগীদমক হোৎনরিবসিবু পল্লদুনা প্রধান মন্ত্রীনা হায়খি মদুদি অনৌবা এইমস অমসুং মেদিকেল কোলেজশিংনা লৈবাক অসিগী মেদিকেল ইনফ্রাস্ত্রকচর মপাঙ্গল কনখৎহল্লগনি। ঐখোয়না এম.বি.বি.এস. অমসুং এম.দি. কোর্সশিংদা সিৎ ৪৫,০০০ অমগা হাপকৎলে। প্রধান মন্ত্রীনা অয়ুশ্মন ভারত হেলথ অমসুং ৱেলনেস সেন্তরশিংনা লাইচৎ মনুংদা কোবিদ নত্তবা অনাবশিংবু লাইয়েংবগী লৌরিবা থৌদাং অসিবু থাগৎপা ফোংদোকখি। ঐচ.দব্ল্যু.সি. লাখ ১.৫কী মংলান অমা শাগৎলিবসিগী মনুংদগী অহুম থোকপগী মনুংদা অমদি এক্তিব ওইরে হায়না মহাক্না হায়খি। অয়ুশ্মন ভারত প্রধান মন্ত্রী জন অরোগ্যা য়োজনা (পি.এম.জে.এ.ৱাই.)না হকশেলগী সেক্তরদা সর্বিস পীবগী মপাঙ্গল হেনগৎহল্লগনি হায়বগী থাজবা থমখি।

নেস্নেল দিজিতেল হেলথ মিসন লাউথোক্লদুনা প্রধান মন্ত্রীনা হায়খি মদুদি অখন্নবা হেলথ আই.দি. অমা লৈবাক মীয়াম পুম্নমক্তা পীগনি মসিনা লাইনা, দাইগ্নোস্তিক্স, রিপোর্ত, মেদিকেসন অসিনচিংবগী ঈ পাউশিং আই.দি. অমখক্তদা কম্মন দেতাবেজ অমগী খুথাংদা য়াওগনি।

*****