ପ୍ରତ୍ୟେକ ଦିନ ନିୟମିତ ଭାବେ କରୋନାରୁ ଆରୋଗ୍ୟ ଲାଭ କରୁଥିବା ରୋଗୀଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ ଗତ 24 ଘଣ୍ଟା ମଧ୍ୟରେ 57,381 ଜଣ ରୋଗୀ ସୁସ୍ଥ ହୋଇ ହସ୍ପିଟାଲରୁ ଘରକୁ ଫେରିଛନ୍ତି ।

ଏହିଭଳି ଅଧିକ ରୋଗୀ ଆରୋଗ୍ୟ ହେବା ଦୃଷ୍ଟିରୁ ଭାରତର ସୁସ୍ଥତା ହାର 70 ପ୍ରତିଶତ ପାର କରିଛି ଏବଂ କ୍ରମଶଃ ଅଧିକରୁ ଅଧିକ ରୋଗୀ ସୁସ୍ଥ ହେବାରେ ଲାଗିଛନ୍ତି । 32 ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଏହି ହାର ଶତକଡା 50ରୁ ଅଧିକ ରହିଛି । 12ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଆରୋଗ୍ୟ ସଂଖ୍ୟା ଜାତୀୟ ହାରଠାରୁ ମଧ୍ୟ ଅଧିକ ରହିଛି ।

ଅଧିକରୁ ଅଧିକ ରୋଗୀ ସୁସ୍ଥ ହୋଇ ହସ୍ପିଟାଲ ଓ ଘରୋଇ ଏକାନ୍ତବାସରୁ ମୁକ୍ତ ହେଉଥିବା ବେଳେ ମୋଟ ଆରୋଗ୍ୟ ରୋଗୀଙ୍କ ସଂଖ୍ୟା 18 ଲକ୍ଷ ଅତିକ୍ରମ କରି ଆଜି ଏହା 18,08,936ରେ ପହଞ୍ଚିଛି । ଏଥିଯୋଗୁଁ ସୁସ୍ଥ ରୋଗୀଙ୍କ ସଂଖ୍ୟା ସକ୍ରିୟ ରୋଗୀଙ୍କ ତୁଳନାରେ 11 ଲକ୍ଷରୁ ଅଧିକ ଅର୍ଥାତ ଆଜିସୁଦ୍ଧା 11,40,716ରେ ପହଞ୍ଚିଛି ।

କେନ୍ଦ୍ର, ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡିକରେ କୋଭିଡ ପରିଚାଳନାଗତ ସମନ୍ଵୟ ଯୋଗୁଁ ଏହି ସବୁଦିନିଆ ଆରୋଗ୍ୟ ହାର ବୃଦ୍ଧି ପାଇବାରେ ଲାଗିଛି ।

ଦେଶରେ ବର୍ତ୍ତମାନ 6,68,220 ଜଣ ସକ୍ରିୟ କରୋନା ଆକ୍ରାନ୍ତ ରହିଥିବା ବେଳେ ଏହା ମୋଟ ଆକ୍ରାନ୍ତଙ୍କ ଶତକଡା 26.45 ବୋଲି ଜଣାପଡିଛି । ସମସ୍ତ ସକ୍ରିୟ ରୋଗୀ ଡାକ୍ତରୀ ଚିକିତ୍ସାଧୀନ ଅଛନ୍ତି ।

ହସ୍ପିଟାଲରେ ଉପଯୁକ୍ତ ଉପଚାର, ଘରୋଇ ଏକାନ୍ତବାସର ତଦାରଖ, ଅମ୍ଳଜାନ ସହାୟତା, ରୋଗୀମାନଙ୍କ ପାଇଁ ଆମ୍ବୁଲାଂଶ ସେବାର ସଫଳ ପ୍ରୟୋଗ, କୋଭିଡ ରୋଗୀଙ୍କ ଚିକିତ୍ସା ଦାୟିତ୍ଵରେ ଥିବା ଚିକିତ୍ସକମାନଙ୍କୁ ଏମ୍ସ ବିଶେଷଜ୍ଞମାନଙ୍କ ପକ୍ଷରୁ ଦିଆଯାଉଥିବା ପରାମର୍ଶ ଯୋଗୁଁ ରୋଗୀ ପରିଚାଳନା ଓ ଚିକିତ୍ସା ବ୍ୟବସ୍ଥାରେ ଯଥେଷ୍ଟ ଉନ୍ନତି ପରିଲକ୍ଷିତ ହୋଇଛି । ଏଥିପାଇଁ ମୃତ୍ୟୁହାର ମଧ୍ୟ ବିଶ୍ଵର ଅନ୍ୟାନ୍ୟ ଦେଶ ତୁଳନାରେ ଯଥେଷ୍ଟ କମ ରହିଛି । ଏହା ନିୟମିତ ଭାବେ ହ୍ରାସ ପାଇ ବର୍ତ୍ତମାନ 1.94 ପ୍ରତିଶତରେ ରହିଛି ।

ପରୀକ୍ଷା, ଚିହ୍ନଟ ଓ ଚିକିତ୍ସା ରଣନୀତିର ସଫଳତା ଯୋଗୁଁ ଗତ 24 ଘଣ୍ଟା ମଧ୍ୟରେ 8,68,679 ନମୁନା ପରୀକ୍ଷା କରାଯାଇଛି । ଏହାକୁ ମିଶାଇ ଏପର୍ଯ୍ୟନ୍ତ ମୋଟ 2.85 କୋଟିରୁ ଅଧିକ ନମୁନା ପରୀକ୍ଷା କରାଯାଇଛି ।

ସାମଗ୍ରିକ ସଂକ୍ରମଣ ପରିଚାଳନା ଫଳସ୍ଵରୂପ ଦେଶରେ ନମୁନା ପରୀକ୍ଷାଗାର ସଂଖ୍ୟାରେ ମଧ୍ୟ ବୃଦ୍ଧି ଘଟିଛି । 968ଟି ସରକାରୀ ଓ 497ଟି ଘରୋଇ ଏହିପରି ସମୁଦାଯ 1465ଟି ପରୀକ୍ଷାଗାରରେ ନମୁନା ପରୀକ୍ଷଣ କରାଯାଉଛି ।

କୋଭିଡ ଜନିତ ସମସ୍ତ ପ୍ରକାର ବୈଷୟିକ ପ୍ରସଙ୍ଗରେ ନିର୍ଭୁଲ ଏବଂ ସର୍ବଶେଷ ତଥ୍ୟ, ନିର୍ଦ୍ଦେଶାବଳୀ ଓ ପରାମର୍ଶ ପାଇଁ ଭିଜିଟ୍‌ କରନ୍ତୁ: https://www.mohfw.gov.in/ and @MoHFW_INDIA ।

କୋଭିଡ୍‌ ସଂକ୍ରାନ୍ତ ବୈଷୟିକ ପ୍ରଶ୍ନ ପଠାଇବା ପାଇଁ covid19[at]gov[dot]in ଏବଂ ଅନ୍ୟାନ୍ୟ ପ୍ରଶ୍ନ ncov2019[at]gov[dot]in and @CovidIndiaSeva ।

କୋଭିଡ-19 ସଂକ୍ରାନ୍ତ କୌଣସି ପ୍ରଶ୍ନ ମଧ୍ୟ ସ୍ୱାସ୍ଥ୍ୟ ଓ ପରିବାର ମନ୍ତ୍ରଣାଳୟର ହେଲ୍‌ପଲାଇନ ନଂ – +91-11-23978046 କିମ୍ବା 1075 (ନିଃଶୁଳ୍କ)କୁ ପଚରା ଯାଇପାରିବ ।

ରାଜ୍ୟଗୁଡିକର ହେଲ୍‌ପଲାଇନ ନଂ: https://www.mohfw.gov.in/pdf/ coronvavirushelplinenumber.pdf ରେ ଉପଲବ୍ଧ ।

*********