রিপব্লিক ওফ মোরিসসকী প্রধান মন্ত্রী ওইরিবা ইকাই খুম্নরবা প্রবিন্দ কুমার জুগনাথ, মোরিসসকী মন্ত্রীশিং অমসুং দিগনিতরীশিং, অথোইবা মীথুংলেনশিং পুম্নমকপু খুরুমজরি।

মায়ামদা ঐহাক্না ইকাই খুম্নবা উৎচরি। অহানবদা ঐহাক্না মোরিসসকী সরকার অমদি মীয়ামনা মালেমদা থোক্লি কোবিদ-১৯গী লায়চৎ অসি মপুং ফানা লাকশিনবগীদমক থাগৎপা ফোঙদোকচরি। ভারতনা মসিদা মতম তানা হীদাক সপ্লাই তৌদুনা অমসুং খঙজ-হৈজবা তাক্তুনা তেংবাংবা ঙমখিবা অসিদা ঐহাক্না নুংঙাইবা পোকই।

মরূপশিং, ঙসি ঐখোয়না ভারত অমদি মোরিসস অনিগী মরক্তা লৈরিবা মরূপ ওইবগী মরী অসি হেন্না ফগৎহনবা ঙমখ্রে। পোর্ত লুৱিসতা লৈরিবা অনৌবা সুপ্রিম কোর্তকী বিল্দিং অসি ঐখোয়না মতেং পাংনবা অমদি পুন্না হোৎনবগী খুদম অমনি। ঐখোয়গী দেমোক্রেতিক সিস্তেমশিংগী মরু ওইবা য়ুম্বীশিং ওইনা ঐখোয়গী তোঙান তোঙানবা জুদিসিয়রীশিং অসিবু ভারত অমসুং মোরিসসনা ইকাই খুম্নৈ। ফজরবা অনৌবা দলান লোয়ননা অনৌবা মওং অমসুং শারিবশিং অসি ইকাই খুম্নবগী খুদম অমনি। প্রোজেক্ত অসি পীরিবা মতমগী মনুংদা লোইশিনবা ঙম্বা অমসুং অহানবা থাদখিবা শেন্থংনা কোন্নখিবা অসিদা ঐহাক্না নুংঙাইবা পোকই।

থা খরগী মমাংদা প্রধান মন্ত্রী জুগনাথকা লোয়ননা ঐখোয়না পুন্না মরু ওইরিবা মেত্রো প্রোজেক্ত অমসুং খ্বাইদগী নৌবা হোস্পিতাল অমা শঙ্গাখি। প্রোজেক্তশিং অসিনা মোরিসস মীয়ামদা কান্নবা ফংহল্লিবা অসিদা ঐহাক্না নুংঙাইবা পোকই।

মরূপশিং, ভারতকী সাগর -–সেক্যুরিতী এন্দ গ্রোথ ফোর ওল ইন দি রিজনগী ৱাখল্লোনগী মরমদা অহানবা ফোঙদোকখিবা অদু মোরিসসতনি। মসিগী মরমদি ইন্দিয়ন ওসিন রিজনগী ওইবা ভারতকী খোঙথাং অসি লৌখৎনবা হোৎনবদা মোরিসসকীদমক খনখি। অমসুং ঙসিসু ভারতকী দিবেলপমেন্ত পার্তনর্শিপকী খোঙথাংদা মোরিসস য়াওহননিংখি।

মরূপশিং, মহাত্মা গান্ধীনা য়াম্না চুম্না হায়বীরম্মি মদুদি; ঐহাক্না মালেম পুম্বগীদমক খনবা পাম্মি। ঐহাক্না লৈবাকনিংলিবা অসিদা মীওইবু খুন্নাই অসি পুন্না ফাহনবা হায়বা অসি য়াওরি। মরম অসিনা ঐহাক্না ভারতবু শেবা তৌবা অসিদা মীওইবা খুন্নাইগী শেবা তৌবা য়াওরি। মসি ভারতকী ৱাখল্লোন অদুনি। ভারতনা চাউখৎপা পুরকপা পাম্মি অমদি অতোপ্পানা মখোয়গী চাউখৎনবা হোৎনবদা মথৌ তাবশিং অদুদা তেংবাং পীনিংঙি।

মরূপশিং, ভারতনা চাউখৎপা পুরক্নবা হোৎনবা অসিদা মরু ওইনা মীওইবগী খল্লি। ঐখোয়না মীওইবা খুন্নাইগী য়াইফনবা থবক তৌবা পাম্মি। ঐখোয়দা ইতিহাসনা তাকই মদুদি দিবেলপমেন্ত পার্তনর্শিপ ওইবগী মিংদা লৈবাক কয়া নমদুনা পার্তনর্শিপ ওইরিবা অদুগী মখাদা লৈহনখি। মসিনা কোলোনিএল অমসুং ইম্পেরিএল রুল থোক্লকহল্লি। মসিনা মালেমদা লান থোকহল্লি অমসুং মীওইবা খুন্নাইদা অৱাবা পীরি।

মরূপশিং, ইকাইখুম্নবা, জাতি কয়া পুন্না খুন্দামিনবা, তুংলমচৎকীদমক খনবা অমসুং সস্তেনেবল দিবেলপমেন্তগী ওইবা দিবেলপমেন্ত পার্তনর্শিপ খক ভারতনা থম্লি।

মরূপশিং, ভারতকী ওইনা চাউখৎপা পুরক্নবা মতেং পাংনবদা খ্বাইদগী মরু ওইবা ৱাখল্লোন অসি ঐখোয়গী পার্তনরশিংবু ইকাই খুম্নবা অসিনি। চাউখৎ থৌরাংগী ৱাখল্লোনশিং সিয়র তৌনবা অসিনা ঐখোয়গী অমত্তা ঙাইরবা পান্দমনি। মরম অসিননি ঐখোয়গী চাউখৎপা পুরক্নবা মতেং পীনবদা কন্দিসন অমত্তা হেক থমদ্রিবা। মসি রাজনিতীগী নত্রগা ললোন ইতিক্কী কান্নবা য়েংলা তৌবা নত্তে।

মরূপশিং, ভারতকী দিবেলপমেন্ত পার্তনর্শিপ অসি মখল য়াম্মি। কম্মর্সতগী হৌরগা কলচর, ইনর্জীদগী ইঞ্জিনীয়রিং, হেল্থতগী হাউশিং, আই.তি.দগী ইনফ্রাস্ত্রকচর, স্পোর্তসতগী সাইন্স, ভারতনা মালেম অসিদা লৈরিবা লৈবাকশিংগা পুন্না থবক পায়খৎমিনরি। ভারতনা অফঘানিস্তানগী পার্লিয়ামেন্তকী বল্দিং শাবদা মতেং পাংবা ঙম্বদা চাওথোকচৈ, নিগরদা মহাত্মা গান্ধী কনবেন্সন সেন্তর শাবদা য়াওবা অসিদা চাওথোকচৈ। ইমর্জেন্সী অমসুং ত্রোমা হোস্পিতাল অমা শাবগী খুত্থাংদা ঐখোয়না নেপালগী হেল্থ সর্ভিস ফগৎহনবা ঙম্বদা মতেং পাংবা অসিদা  নুংঙাইবা পোকই। স্রী লঙ্কাগী প্রোবিন্স মাপলদা ইমর্জেন্সী এমবুলেন্স সর্ভিস ফংহন্নবা হোৎনবদা মতেং পাংখিবা অসিদসু নুংঙাইবা পোকই।

ঐখোয়না নেপালগী পায়খৎমিনরিবা থাওগী পাইপ পুবগী প্রোজেক্ত অসিনা পেত্রোলিয়ম প্রদক্তশিং ফংহনবদা মতেং পাংবা ঙম্লগনি খনবদা নুংঙাই। অমসুং মসিগা মান্ননা মালদিবসকী ইথৎ কুনথ্রা-মরিদা থক্নবা ঈশিং অমসুং সেনিতেসন ফংহন্নবা হোৎনবদা মতেং পাংবা ফংবা অসিসু নুংঙাই। ঐখোয়না স্তেদিয়মশিং অমসুং অতোপ্পা খুদোংচাবশিং ফংহন্দুনা অফঘানিস্তান অমসুং গুয়ানাগুম্বা লৈবাকশিংদা ক্রিকেৎ অসি ফাওহন্ননবা মতেং পাংলি।

নহা ওইরিবা অফঘান ক্রিকেৎ তিম ভারত্তা ত্রেন তৌখিবা অসি মায় পাক্লকপা অসি উবদা হরাওবা পোকই। অসিগুম্না ঐখোয়না মালদিবসকী ক্রিকেৎ শানরোয়শীংগী তেলেন্ত য়ৌখৎপদা মতেং পাংলি।ভারতনা স্রী লঙ্কাগী অচৌবা হাউসিং প্রোজেক্ত অমদা চাউনা মতেং পাংবা অসি ঐখোয়গী চাওথোকচনিংঙাই ওইরি। ঐখোয়গী দিবেলপমেন্ত পার্তনর্শিপ অসিনা ঐখোয়গী পার্তনর ওইরবা লৈবাকশিংগী চাওখৎ থৌরাংদা মীৎয়েং চংলি হায়বা উৎলি।

মরূপশিং, ভারতনা অদোমগী হৌজিক ওইরিবা অসিদা খক মতেং পাংবগী চাওথোকচাবা নত্তে। ঐখোয়না অদোমগী নহাশিংগী অফবা তুংলমচৎ অমা পুরকপদা মতেং পাংবা ঙম্বা ওইজগে। মরম অসিনা চাওখৎ থৌরাংগী পুন্না হোৎনমিন্নবদা ত্রেনিং অমসুং স্কিল হেনগৎহনবা অসি মরু ওইবা শরুক অমা ওইরিবনি। মখোয়না ঐখোয়গী পার্তনর ওইরিবা লৈবাকশিংগী নহাশিংবু মরোমদোম লেপচবা ঙম্বা অমসুং তুংলমচৎ অসিবু অনৌবা মায়োলদা পুনবা হেন্না থৌনা লৈহনবা ঙম্লগনি।

মরূপশিং, সস্তেনেবল দিবেলপমেন্ত হায়বা অসি তুংলমচৎকীদমকনি। মীওইবগী অপাম্বশিং অমসুং থৌনা লিংজেলগা মহৌশাগা য়েংথিনবা য়ারোই। মরম অসিনা ঐখোয়না মীওইববু থৌনা হাপ্পীবা অমসুং মহৌশাবু য়োকখৎপা হায়বা অসিদা থাজবা থম্লিবনি। মসিগী ৱাখল্লোন অসিদা য়ুম্ফম ওইরগা, ভারতনা ইন্তর্নেস্নেল সোলর এলাইয়েন্সগুম্বা অনৌবা লোয়শঙশিং য়োকখৎপীরি। মীওইবনা পায়খৎলিবা থবক্কী খোঙজেল য়াংখৎনবা নুমিৎকী মঙালনা থৌজানবীবা ওইরসনু। ঐখোয়না দিজাস্তর রেজিলেন্ত ইনফ্রাস্ত্রকচর অমা শানবা কন্না চুংশিন্নরি। অনি অসিগী কান্নবশিং অসিনা ঈথৎকী লৈবাকশিংদা অখন্নবা কান্নবা ফংহনগনি। মালেমদা লৈরিবা মীয়াম্না হোৎনরিবশিং অসিদা পীরিবা মতেং অসি উবাদা নুংঙাইবা পোকই।

মরূপশিং, ঐহাক্না হায়রিবা কান্নরবশিং অসি মোরিসসকা অখন্নবা পার্তনরশিপ থম্বা অসিদা য়াওরি। মোরিসসকা ঐখোয়গা ইন্দিয়ন ওসিনগী ঈপাক অসি খক নত্তনা ঈগী মরী, নাৎ অমসুং লোল  অমত্তা ওইরি। ঐখোয়গী মরূপ ওইবগী মরী অসি য়েংহৌঙৈদগী হৌরক্তুনা তুংলমচৎ ফাওবা ঙাক্কনি। মোরিসসকী মীয়ামনা মায় পাকপদা ভারতনা চাওথোকচৈ। আপ্রাবাসি ঘাৎকী অশেং খুবমগী অখুবা লেম্বীদগী অনৌবা মোরিসসকী দলানশিং শাবা ঙমলকখিবা পুম্নমক অসি কন্না হোৎনবা অমসুং ইন্নোবেসন্না মায় পাকহনবনি। মোরিসসকী থৌনা লিংজেল অসি শীংথানিংঙাই ওই। ঐখোয়গী পার্তনর্শিপ অসি মতুংদা লাক্কদৌরিবা চহিশিংদা হেন্না অফবা পুরকপা ওইরসনু।

ভিভ লামিতে এন্ত্র লান্থ এ মোরিস

ভারত অমসুং মোরিসসকী মরী অমর ওইরসনু।

ভারত-মোরিসসকী মরূপ ওইবগী মরী অসি মতম কুইনা শাংনা চৎপা ওইরসনু।

থাগৎচরি।

*****