ঙাকশেল মন্ত্রী শ্রী রাজনাথ সিংহনা ঙাকশেলগী রাজ্য মন্ত্রী শ্রী শ্রিপদ নায়ক, চীফ ওফ দিফেন্স স্তাফ অমসুং মিলিতরী এফিয়ার্স বিভাগকী সেক্রেতরী জেনেরেল বিপিন রাৱৎ, চীফ ওফ আর্মী স্তাফ জেনেরেল এম.এম. নরাবানে, চীফ ওফ নেভেল স্তাফ এদমিরেল করম্বির সিংহ অমসুং চীফ ওফ এয়র মার্শেল আর.কে.এস. ভদুরিয়ানা ভারতনা ‘ওপরেসন বিজয়’গী মখাদা মায় পাকখিবা অমসুং কারগিলগী খুৎ-থোক্নবা হায়নসু খংনবা থৌদোক অদু নীংশিংবা ওইনা নেস্নেল ৱার মেমোরিএলদা পাংথোকপা কারগিল বিজয় দিবসকী ২১শুবা চহিগী থৌরমদা  থৱাই থাখ্রবা লান্মীশিংদা ইকায় খুম্নবা উৎখ্রে। ইন্দিয়ন আর্ম্দ ফোর্সনা ইং ১৯৯৯গী জুলাই ২৬তা মায় পাকখিবা অসি ভারতকী রাজনিতী, মিলিতরী অমসুং দিপ্লোমেতিক ওইবা থবকশিংগী শাংলবা ৱারী অমা ওইরি। লৈবাক অসিনা নুমিৎ অসি চাউথোক্না অমসুং ইথিল য়াওনা পাংথোক্লি।

ঙাকশেলগী মন্ত্রীনা ৱার মেমোরিএল অসিগী বিজিতর বুক্তা অসুম্না ইখি, “ঙসিগী কারগিল বিজয় দিবসকী নুমিৎসিদা য়েক্নবগী মায়োক্তগী ইমা লৈবাক অসিবু কন্নবা হোৎনবদা থৱাই থাখিবা ভারতকী আর্ম্দ ফোর্সকী থৌনা ফরবা লান্মীশিংগী মফমদা ইকায় খুম্নবা উৎলি। লৈবাক অসিনা ঐখোয়গী অথৌবশিং অসিগী মথৌনা, মরিংজেল, তুং হন্দবা অমসুং ৱাখল চেৎপবু মতম পুম্বদা নিংশিংদুনা লৈরগনি অমসুং মখোয়গী কত্থোকপগী থৌওংশিং অসুনা ইথিল পীদুনা ঐখোয়না মাং থানা চৎকনি”। মহাক্না হায়খিবদা কারগিল বিজয় দিবস অসি শুপ্নগী নুমিৎ অমখক্তা নত্তে তৌবতবু লৈবাক অসিগী লান্মীশিংগী মথৌনা অমসুং মরিংজেলবু ইকায় খুম্নবা উৎপনি হায়খি।

থৌনা ফরবা ভারতকী লান্মীশিংনা থেংনবা ঙম্লোইদবা মানবা খুদোংচাদবা কয়া, মীওইবনা হিংবদা ৱাগদবা মফম ওইবা, শাথিনা ইংবা অমসুং চোৎপা অইং অশাগী ফিভম ওইবা অমসুং য়েক্নবা অৱাংবা মফমদা লৈশিনখিবা মওংদা লৈখিবা খুৎ-থোক্নবগী থৌদোক অদুবু ইন্দিয়ন এয়র ফোর্সনা নোংথক্তগী ঙাক্লৌ পীবা তেংবাংদগী মায় পাকপা ঙমখি।  মসিগী নীংশিংনীংঙাই ওইরবা থৌদোক অসিগী হরাওবা ফোংদোকপা অমসুং অথৌবা ওইখ্রবা লান্মীশিংবু নীংশিংবা ওইনা লৈবাক শিনবা থুংনা হীরম কয়াগা লোয়ননা থৌরম কয়া পাংথোক্লি।

দিফেন্স সেক্রেতরী দাঃ অজয় কুমার অমসুং ঙাকশেল মন্ত্রালয়গী অতোপ্পা সিবিল অমসুং মিলিতরীগী সেনিয়র ওফিসিএলশিংনা থৌরম অদুদা শরুক য়াখি।

***