ভারতকী উপ রাস্ত্রপতি অমসুং রাজ্য সভা চেয়রমেন শ্রী এম. ভেঙ্কয়ানা মীয়ামদা কোরোনাভাইরস শন্দোরকপা অমসুং কোবিদ-১৯ লাইচৎ অসিগী মরমদা মথৌ তাবা ঈ-পাউ, নৈনবা অমদি মসিগী তোঙান তোঙানবা মশক মওংশিংগী মতাংদা মীৎয়েংশিং থমদুনা লাইচৎ অসি লান্থেংনবদা তংদু লৈতাদ্রবা মীয়ামগা খোঙবু ওইদুনা চৎমিন্নবগীদমক মিদিয়াবু থাগৎপা ফোঙদোকখ্রে‍।

ঙসি “মিদিয়া: আউর পার্তনর ইন কোরোনা তাইম্স” হায়না মিংথোনবা মহাক্কী ফেসবুক পোস্ততা, শ্রী নাইদুনা ভাইরস অসি শন্দোরকপদগী হৌরগা হৌখিবা থা খরসিদা মিদিয়ানা লৌরিবা থৌদাংগী মতাংদা মরীক চূম্বা ৱাফম থম্লদুনা মিদিয়া অমসুং মিদিয়া পর্সনশিংবু “লাইচৎ অসি থেংনবদা মীয়ামবু মপাঙ্গল কলহন্নবা পাউদমবা, খঙহনবগী মখোয়গী মরুওইবা থৌদাং য়াবগীদমক অমদি লাংফম মনুংসিদা থাজবা য়াবা খোঙবু অমা ওইনা ঐখোয়গী পুন্সিগী মরুওইবা শরুক অমা ওইনা লৈবগীদমক্তা” থাগৎখি‍। মীওইবনা লাংফম থেংনরবা মতমদা মদুগী মরম, ওইরকপা য়াবা, কয়াম কুইনা লৈগদবা অমদি কমদৌনা মদুদগী নান্থোক্কনি হায়বা ৱাফমশিং থিরকই, অমদি হায়রিবা ৱাফমশিংসি মীয়ামদা য়ৌহনবা হায়বসি মিদিয়াগী মথক্তা তারকই‍ হায়না মহাক্না হায়খি‍।

উপ রাস্ত্রপতিনা থমখিবা ৱাফমদা, মহীক অসি শন্দোরকপা অমদি লায়না অসি থেংনবদা মরম খঙনা ফিরেপ লৌননবা মীয়ামবু মপাঙ্গল কলহনবগী তঙাইফদ্রবা থৌদাং য়াবখক নত্তনা মিদিয়ানা মীৎয়েং শানবা পুৱারী নৈনবশিংনা শীজিন্ননবগীদমক লাইচৎ অসিগী চৈথাবা ওইনা থবক তৌই অমদি শেম শারিবশিংসিগী মতাংদা মীয়াম অমসুং লৈঙাক অনিগী মরক্তা থোং ওইনা শমজিন্নহল্লি‍। মহাক্না মখা তানা হায়খিবদা মিদিয়ানা লাইচৎ অসিগী তোঙান তোঙানবা মশক মওং, খুন্নাইগী তোঙান তোঙানবা সেক্সনশিংদা মসিনা মীবা চৈথেংগী মতাংদা নৈন-মীৎয়েং থমদুনা পার্লিয়ামেন্তরী ইনস্তিত্যুসনশিংদা য়েৎনবগী এজেন্দাসু শেম্মী‍।

মায়খুম উপ্পা, অমগা অমগা লাপথোক্নবা, খুৎ-শা তোয়না হামদোকপা, মচী ওইবা চীঞ্জাক চাবা, শাজেল চাং নাইনা তৌবা, পুক্নীং ৱাখল ফনা থমবনচিংবা ঙাকথোক্নবগী থৌরাংশিং মীয়ামদা শন্দোকপদা মিদিয়ানা পায়খৎখিবা অখন্নবা কেম্পেনগী মতাংদা মহাক্না পনখি‍।

মখোয় মশামক খুদোংচাদবা ফীভম কয়া মায়োক্নজরবসু মীয়ামদা ঈ-পাউ য়ৌহনবগী পান্দম অদু ফংনবা হোৎনবগী মিদিয়াগী ইচঙ থৌবা ৱাখল্লোন অদুবু শ্রী নাইদুনা থাগৎখি‍। মহাক্না হায়, “অথিংবা কয়ানা মরম ওইরগা শেন্মিৎলোন হন্থরকপগা লোয়ননা এদভরতাইজমেন্ততগী লাকপা শেনফম কংশিল্লকখি‍। থবক তৌবগী পাক চাউবা শেমদোক শেমজিন তৌবা মথৌ তারকই অমদি মশিং য়াম্লবা পাউমী কয়া তলব হন্থনা ফংলি‍। অদুম ওইনমক, খ্বাইদগী মথৌ তাবা তানফমসিদা মিদিয়ানা মীয়ামবু মপাঙ্গল কলহনবগী থৌদাং অদুদি লেপ্পা নাইদনা চঙশিল্লি‍।” পাউ-চেবু ভাইরস পুবা অমা ওইনা উনরকপদগী প্রিন্ত মিদিয়াগী হার্দ কোপীশিং য়েন্থোকপা ৱাৎপগী ৱাফমসু মহাক্না পনখি‍।

প্রিন্ত মিদিয়াগী মতাংদা ৱাফমশিং থম্লদুনা, শ্রী নাইদুনা হায়, “ঐনা প্রিন্ত মিদিয়াবু হেন্না কুপথনা ইন্নদুনা চৎলি‍। কোরোনা ভাইরস অমসুং ওইরক্লিবা লাইচৎ অসিগী মতাংদা ইরিবা মফম অসি লানগী মতমদা পীবা পাউগী মফমদগী য়াম্না হেল্লি‍। অনৌবা ৱাখল্লোনগী ওইবা মফমশিং পুথোরক্তুনা ঈ –পাউ তানিংবনা খৌগংলবা মীয়ামদা পাউ য়ৌহনবগী থবক লেপ্তনা চত্থরি‍। লাইনা অসিগী মতাংদা অমদি মসিগী চৈথেংগী মতাংদা পাক শন্না নৈনদুনা পান্দম অমগী মখাদা চঙশিল্লি‍।”

অদুম ওইনমক শ্রী নাইদুনা তেলিভিজনগী সেক্সন খরগী মতাংদা চেকশিনৱা থম্লদুনা ফোঙদোকখিবদা মখোয়না ফীভম অসিবু কা হেন্না চাউথোক্না উহনবগী থৌওং চত্থরোইদবনি মরমদি মিপাইবা পোকহনবনা হান্ননা চরাংনরগা লৈরবা মীয়ামগী পুক্নীং ৱাখলবু হেন্না ফীভম চাহল্লক্লোই‍। মহাক্না নেত শীজিন্নরিবা মীওইশিদা সোসিএল মিদিয়াবু ওইদ-পাদবা ৱাফমশিং শন্দোকপগী মহুত্তা মহীক অসিগী মতাংদা লায়না অসিগী মতাংদা অমদি মসি লায়েংবগী মতাংদা অচুমবা ঈ-পাউ শন্দোক্নবা ওইনা শীজিন্ননবা ৱাফম থমখি‍।

মায়খুম উপ্পা পাউমীশিংনা লংফৈ চৎপা শিন্মীশিংনা ময়ুমদা হনবদা থেংনরিবা অৱাবশিং অসিগুম্বা মীয়াম্না থেংনরিবা ফীভমশিং মায়খুম হাংদোক্তুনা উৎনবা হোৎনরি অমদি থৌওংদুদা মখোয় খরসু লায়না অসি নারক্তুনা খরা অমদি মপুন্সি লোয়মখিবসু য়াওরি‍ হায়বা ৱাফম মহাক্না থমখি‍। মহাক্না অসিগুমবা ইচঙ থৌরবা পাউমীশিংদা শর্দ্ধাঞ্জলি কৎলদুনা মখোয়গী অৱাবা তাহৌরবা ইমুং মনুংশিংদা নুংঙাইতবা ফোঙদোকখি‍।

মিদিয়ানা লৌরিবা ইচঙ থৌবা অমদি পান্দমলৈবা থৌদাং অসি য়াওদনদি লাইচৎ অসি লান্থেংনবদা অহোবা অমা লৈরমগনি হায়না উপ রাস্ত্রপতিনা থমখি‍। মিদিয়াগী এজেন্দা শেমবগী থৌদাংগী মতাংদা পল্লদুনা, শ্রী নাইদুনা হায়, “লাইচৎ অসিগী তোঙান তোঙানবা মওক মওংশিং পুথোক্তুনা হায়রিবশিং অসু অচুম্বা ৱাফম অমদি নৈনদুনা পুথোকপা ৱাফমশিং খোৎচিন্দুনা মিদিয়ানা ঐখোয়গী পার্লিয়ামেন্তরী ইনস্তিত্যুসনশিংদা লাইচৎ অসিগী মেনেজমেন্তকী মতাংদা য়েৎনবা অমদি খন্ন-নৈনবশিংগী এজেন্দা শেম্লি‍। মরী লৈনবা ৱাফমশিং পুখৎপদা মিদিয়া রিপোর্তশিং মরুওইবা লীখুন ওইনা শীজিন্নরি‍।”

মিদিয়াদা থম্লকপা কম্মেন্ত খরগী মতাংদা থয়াইননা পল্লদুনা, রাজ্য সভাগী চেয়রমেন শ্রী নাইদুনা হায়খিবদা লাইচৎ অসিদা মায় ওনশিনবগী মওং মতৌ অসিদা পার্লিয়ামেন্তরী স্ক্রুতিনী হৌরে‍।

শ্রী নাইদুনা হায়, “লমদমসিগী মনুংদা নোংথক্কী লমবীদা চত্থোক চৎশিন তৌবদা অথিংবা লৌথোকখিবদগী অমদি রেলদা চৎপদগী খরা হন্থবা চাংদা অথিংবা লৌথোকখিইবদগী পার্লিয়ামেন্তকী হাউস অনিমক্কী দিপার্তমেন্তকা মরী লৈনবা স্তেন্দিং কম্মিতীশিংগী মীফম থা অসিদগী মখা চত্থবা হৌরে‍। মখোয়না লাইচৎ অসিগী মেনেজমেন্তকী তোঙান তোঙানবা মশক মওংশিং অমদি মদুগী মহৈশিংগী মতাংদা য়েংশিনবগী থবক হৌরে‍। মসিনা তাকপদি লৈবাকসিগী খ্বাইদগী ৱাংবা লেজিসলেচরগী অকোনবা মীফমগী থা অহুম মখায়গী মতুংদা লাইচৎ অসিদা মায় ওনশিল্লিবসিগী মওং মতৌগী মতাংদা মথৌ তাবা পার্লিয়ামেন্তরী স্ক্রুতিনি হৌরে হায়বনি‍। মসিদগী হেন্না তেনবা মতম অমা পীবদি লৈবাকসিদা ওইরক্লিবা ফীভমসিনা ওইথোক্লম্লোই‍।”

(কম্মিতী ওন হোম এফ্যার্সনা চয়োলসিদা হোম সেক্রেতরীনা পীখৎলকপা মচাকশিংদা য়ুম্ফম ওইদুনা লাইচৎ অসি মেনেজ তৌবগী তোঙান তোঙানবা মশক মওংশিং য়েংশিনখ্রে‍। লাইচৎ অসি মায়োক্লনবগী নোদেল মিনিস্ত্রী অসি হোম মিনিস্ত্রীনা ওইরি‍। মমাঙগী চয়োলদা কম্মিতী ওন সাইন্স এন্দ তোক্নোলোজীনা লাইচৎ অসিগী মতাংদা থিজিন হুমজিনবগী অমদি সাইন্তিফিক ওইবা শেম শারিবশিংগী মতাংদা য়েংশিনখি‍। হায়রিবা মীফমশিংদু পুং অহুমগী মথক্তা লোয়না শাংখি‍।)

এম.পি.শিংনা লাংফমগী পুংফম অসিদা মখোয়গী মীয়ামগা লোয়ননা লৈমিন্ননিংবদগী পার্লিয়ামেন্তকী ব্জেত মীফম হান্না থাবা মতমদগী নুমিৎ খরা ঙনখৎনা মার্চ ২৩দা সিনে দাই ওইনা লোইশিনখি অমদি পার্লিয়ামেন্ত অসি অকোনবা মীফমদগী থা তরুক্কী মনুংদা অমুক হন্না মীফম ফমবা মথৌ তাই হায়বা ৱাফম শ্রী নাইদুনা নীংশিংখি‍।

চেয়রমেন অদুনা ফোঙদোকখিবদা মহাক অমসুং লোক সভাগী স্পীকর শ্রী ওম বিরলানা পার্লিয়ামেন্তরী কম্মিতীশিংগী মীফম অমুক হন্না য়াহন্নবা ৱাফম অমদি কোরোনানা মরম ওইরগা সোসিএল দিস্তেন্সিংগী চৎনপথাপশিংগী মতুং ইন্না এম.পি.শিংগী ফমফম অমদি শরুক য়াবগী মওং অসি মমুৎ তানা নৈনদুনা থৌরাং য়াৎপা মথৌ তাবনা পার্লিয়ামেন্তকী নোংজু মীফমগী মতাংদা কয়ারক হন্না খন্ন-নৈনখি‍।

পার্লিয়ামেন্তকী নোংজু মীফম পাঙথোক্নবগীদমক লৈঙাক অসিনা প্রিসাইদিং ওফিসর অনিগা ইকুই কুইদনা ৱারী শান্নখ্রে হায়না শ্রী নাইদুনা মখা তানা ফোঙদোকখ‍ি‍।

****