এক্সিলেন্সীশিং

ইকাই খুম্নজরবা ইবুংঙো অমদি ইবেম্মা পুম্নমক,

হন্দক্কী চহী অসিদা ঐখোয়না য়ুনাইতেদ নেসন্স লিংখৎখিবগী ৭৫শুবা কুমওন থৌরম পাঙথোক্লি। থৌরম অসি য়ু.এন.না মীওইবগী খুনাই চাউখৎনবগীদমক লৌখৎপীখিবা থৌদাংশিংবু শকখঙনবা পাঙথোক্লিবনি। হায়রিবসিমক ঙসিগী মালেম অসিদা য়ু.এন.না লৌরিবা থৌদাংশিং অসি চুন্নরিব্রা অমসুং তুংদা হেন্না ফগৎহন্নবা করি তৌবা য়াবগে হায়বদু য়েংনবা তাঞ্জা অমসুনি।

এক্সিলেন্সীশিং,

অনীশুবা লাঞ্জাউগী হেক মতুংদা য়ুনাইতেদ নেসন্স লিংখৎপা মতমদা শরুক য়াখিবা লৈবাকশিংগী মনুংদা ভারতসু অমনি। মদুদগীদি অহোংবা কয়া অমা লাকখ্রে। ঙসিদি য়ু.এন.না মীহুৎ ওইরিবা লৈবাক ১৯৩ অমত্তা ওইনা পুশিল্লে। মীহুৎ ওইবসিগী মথক্তা, ওর্গনাইজেসনশিংগী আসাসু নোংম-নোংমগী চাউখৎলক্লি। অদুগা লৈবাক কয়াগী অপুনবসিদা শীংনবা কয়া অমসু লাক্লি।

এক্সিলেন্সীশিং,

হেক হৌবদগী, ভারতনা য়ু.এন.গী চাউখৎলোনগী ওইবা থবক থৌরম কয়াদা অমসুং ই.সি.ও.এস.ও.সি.দা মশক থোক্না শরুক য়াদুনা লাক্লি। ই.সি.ও.এস.ও.সি.গী অহানবা প্রসিদেন্তসু ভারত মচা ওইখি। ভারতনা ই.সি.ও.এস.ও.সি.গী এজেন্দাশিং, তুং কোইনা চাউখৎপা পুরক্নবগী পান্দম য়াওনা শেমগৎনবা হোৎনবদা মতেং পাংলি। ঙসিদি, ঐখোয়না লৈবাক অসিগী থাক্তা হোৎনবনা, এজেন্দা ২০২০ অমসুং তুং কোইনা চৎনবা য়াবা চাউখৎপগী পান্দম ফংনবা হোৎনবদা তোপ-তোপ্পা থৌদাং লৌরি। ঐখোয়না অতোপ্পা চাউখৎলক্লিবা লৈবাকশিংদসু মখোয়গী ওইবা তুং কোইনা চৎকদবা চাউখৎপগী পান্দম ফংনবা হোৎনবদা মতেং পাংলি।

এক্সিলেন্সীশিং,

মালেমগী মীওই মশীংগী শরুক তরুক্কী মনুংদা অমদি ভারত্তা লৈ। ঐখোয় মীশিং য়াম্বা অমসুং তারিবা থৌদাং অসি ৱাখলদা মুন্না লৈ। করিগুম্বা ভারতনা চাউখৎপগী হীরমশিংদা মায় পাকপা ঙম্লবদি, মালেমগী থাক্তসু শোইদনা পান্দম ওসি ফংনবা হোৎনবদা খম্ব্রাংননা চৎমিন্নগনি। অমসুং, ঐখোয়না 'সমাজগী অপুনবা' হায়বা খোংথাং অসি রাজ্যগী থাক্তা, লোকেল গবর্নমেন্ত, ঐখোয়গী সিবিল সোসাইতী, খুনাই অমসুং ঐখোয়গী মীয়ামগী থাক্তা লৌখৎলি।

ঐখোয়গী মোতোদি, 'সবকা সাথ, সবকা বিকাস, সবকা ভিশ্বাস' হায়বসি – 'ঐখোয় অপুনবা ওইনা মীয়ামগী থাজবগা লোইননা মীপুম খুদিংমক্কী চাউখৎনবগীদমক' হায়বনি। মসিনা এস.দি.জি.গী কনা অমত্তবু নাথৈদবা হায়বা মরুওইবা পান্দম অসিগা চৎমিন্নৈ। মচি ওইবা চীঞ্জাক, হকশেলগী এদ্যুকেসন, মৈ নত্ত্রগা য়ুম্বু ওইরো – ঐখোয়না ঐখোয়গী পুম্নমকপু কোনশিনবা হায়বা থৌরাংশিংগী মখাদা চাউনা মায় পাকপা পুরক্লি।

এক্সিলেন্সীশিং, হৌখিবা চহীদা, ঐখোয়না ঐখোয়গী লৈবাক্কী মপা ওইরিবা মহাত্মা গান্ধীগী ১৫০শুবা মপোক নুমিৎ পালন অদু ঐখোয়গী খুঙ্গং লাখ তরুক্তা সেনিতেসন মতীক চানা পীবীদুনা পাঙথোকখি।

চহী মঙাগী মনুংদা ঐখোয়না ইমুং মিল্লিয়ন ১১০দা অমাংশঙ শাবীখি, মসিনা ঐখোয়গী খুঙ্গংগী সেনিতেসন কোনশিনবগী চাং অসি চাদা ৩৮দগী চাদা ১০০ য়ৌখি। ঐখোয়গী পাক শন্না মীয়াম্বু ৱাখল তাহন্নবা থৌরাংশিংনা ঐখোয়গী নুপী খুনাইবু মপাঙ্গল কলহনলি। ইলিমেন্তরী অমসুং সেকেন্দরী এদ্যুকেসন্দা নুপী নুপা মান্নবা থাক্তা লৈরে। ভারতকী খুঙ্গংগী মফমশিংদা লৈরিবা নুপী মিল্লিয়ন ৭০রোমদি ঐখোয়গী লাইবিলিহুদ মিসনগী মখাদা সেল্ফ হেল্প গ্রুপকী শরুক অমা ওইরে। মখোয়না পুন্সি অমসুং হিংবগী লম্বীবু পাক চাউনা শেমদোক্লি। ঐখোয়গী লোকেল গবর্নেমেন্তকী মীহুৎশিংগী মরক্তা নুপী মিল্লিয়ন অমরোম য়াওরি, মখোয়না শরুক য়ামিন্নদুনা চাউখৎপা পুরকমিন্নবগী থবক্তা লুচিংলি। হৌখিবা চহী তরুক্লোমসিদা, ঐখোয়না বেঙ্ক একাউন্ত লৈজদবা মীওই মিল্লিয়ন ৪০০ রোমগী বেঙ্ক একাউন্ত হাংবীখ্রে, মসিগী মনুংদগী মিল্লিয়ন ২২০রোম্না নুপীশিংগী ওইরি। ঐখোয়না শেলথুমদা তেক্নোলোজীগী উপাই শীজিন্নরি। হায়রিবসি য়ুনিক আইদেন্তিতী নম্বর, বেঙ্ক একাউন্ত, অমসুং মোবাইল কন্নেক্সন হায়বা মচাক অহুম অসিদা য়ুম্ফম ওইবনি। মসিনা ঐখোয়দা মীওই মিল্লিয়ন ৭০০ রোমদা দোল্লার বিল্লিয়ন ১৫০ রোম দাইরেক্ত বেনিফিৎ ত্রান্সফর তৌবা য়াহনখ্রে। ঐখোয়গী ফুদ সেক্যুরিতী প্রোগ্রাম্না মীওই মিল্লিয়ন ৮১৩ য়ৌনা কান্নবা ফংহনখ্রে।

ঐখোয়গী 'মীপুম খুদিংমক্কী য়ুম' হায়বা থৌরাং অসিনা ২০২২ ফাওবদা ভারতনা মনিং তম্বা লৈবাক অমা ওইরকপগী ৭৫ শুবা চহী মপুং ফারকপদা ভারত মচা খুদিংমক্কী অফবা য়ুমগী মখাদা লৈহনগনি। মতমদুদা য়ূম অনৌবা মিল্লিয়ন ৪০রোম মসিগী থৌরাং অসিগী মখাদা শাগনি – হায়রিবসি অতোপ্পা লৈবাকশিংদা লৈরিবা অপুনবা য়ুম মশীংদগী হেনলিবনি। ঙসিদি, ঐখোয়গী 'অয়ুশ্মন ভারত' থৌশিলনা মীওই মিল্লিয়ন ৫০০ রোম কোনশিল্লদুনা  মালেমদা খ্বাইদগী চাউবা হকশেলগী প্রোতেক্সন প্রোগ্রাম অমা ওইরে। কোবিদকা লান্থেংনবা মতমদা, ঐখোয়গী মখোংদগী হৌবা হেলথ সিস্তেম অসিনা ভারতপু মালেমদা খ্বাইদগী নাবা ফবগী চাং ৱাংবা লৈবাক অমা ওইহল্লি। তি.বি.বুসু ২০২৫ ফাওবগী মনুংদা মুথৎনবা পান্দম থমদুনা ঐখোয়না চঙশিল্লি। অতোপ্পা চাউখৎলক্লিবা লৈবাকশিংনা ভারতকী চাউখৎলোনগী পাক চাউবা অমসুং মায় পাকপগী ৱারীসিদগী তমশিনবা কান্নগনি। তেক্নোলোজী অমসুং অনৌবা কয়া অমসু শীজিন্নরি। মসিনি গ্লোবেল সাউথকা অপুনবা ওইনা চৎমিন্নদুনা ভারতনা মরা চেৎপা মশাগী ওইবা চাউখৎলোন অমা পুরকপা হায়বদু।

এক্সিলেন্সীশিং,

ঐখোয়না চাউখৎপগী খোংজেলদা চঙশিল্লিবসিগী মরক্তা, ঐখোয়না ঐখোয়গী প্লানেৎ অসিগী লৈরিবা থৌদাংবুসু কাউদে। হৌখিবা চহী খরসিদা, ঐখোয়না চহী অমদা কার্বোন থাদোকপগী চাং তন মিল্লিয়ন ৩৮ লোম হন্থহনখ্রে। হায়রিবসি, ঐখোয়গী খুঙ্গংশিংদা ইলেক্ত্রিক্কী মৈ পীবীদুনা, লাইরবা ইমুং মিল্লিয়ন ৮০দা চাক থোংনবা ফ্যুল পীবীদুনা, অমসুং মৈ চাদবা খোংথাং কয়া হৌদোক্তুনা ঙমখিবনি। ঐখোয়না রিন্যুএবল ইনর্জী গিগাৱাৎ ৪৫০ লিংখত্তুনা অমসুং শিথরবা লম হেক্তর মিল্লিয়ন ২৬পু ২০৩০ ফাওবদা হিংগৎহন্নবগী পান্দম থম্লি। অপুনবা ওইনা হিংমিন্নবগী লিরবা চৎনবী অমা লৈজরকই। ঐখোয়না লুবা নানবগী খ্বাইদগী চাউবা কেম্পেনশিংগী মনুংদা অমা হৌদোকখ্রে অমসুং অমুক্তং শীজিন্নরগা লংথোক্কদবা প্লাস্তিকশিং শীজিন্নবগী চাংসু হন্থনবা পুক্নিং থৌগৎলি। অন্তর্জাতীগী থাক্তা, ইন্তর্নেসনেল সোলার এলাইএন্স লিংখৎনবগী ঐখোয়না লৌখৎলিবা খোংথাং অসি অইং অশাগী খল কাইহন্দনবা হোৎনরকপগী থবক অমনি। মসিগা মান্ননা, কোলিসন ফোর দিজাস্তর রেজিলেন্স ইনফ্রাস্ত্রকচরনা মরী লৈনবা স্তেকহোল্দরশিংবু অপুনবা ঐনা চঙশিনমিন্ননবা পুনশিলহল্লি। ঐখোয়গী লম অসিদদি ঐখোয়না মতম চুপ্পদা মাঙজিল থনবা হোৎনজবগীদমক চাউথোকপা পোকচৈ, অৱাবা তারবদা মতেং পাংবা মরুপ অমা হায়বদু ওইদুনা। য়ুহা হাববু ওইরো, সাইক্লোন নত্ত্রগা অতোপ্পা মহৌশাগী ওইবা নত্ত্রগা মীওইবনা শেম্বা খুদোংথীববু ওইরো, ভারতনা খোংজেল থুনা অমসুং অপুনবগী ৱাখল্লোনগা লোইননা অতম চুপ্পদা হোৎনরি। ঐখোয়না অপুনবা ওইনা কোবিদ-১৯ লান্থেংননবা হোৎনরিবসিদা, ঐখোয়না লৈবাক ১৫০ হেনবদা হিদাক লাংথক অমসুং অতোপ্পা মতেং কয়া অমা পাংলি। ঐখোয়না সার্ক কোবিদ ইমর্জেন্সী ফন্দসু ঐখোয়গী য়ুম্লোন্নবা লৈবাকশিংদা শেম্নবা হোৎনরি।

এক্সিলেন্সীশিং,

মতম কুইনা চৎপা য়াবা শান্তি অমসুং চাউখৎপা পুরকপা হায়বসি মলতিলেতরিএলিজম্না ওইগনি হায়বসি ভারতনা চেৎনা থাজৈ। মালেম ইমাগী আর্থকী মচা মশুশিং ঐনা, ঐখোয়না ঐখোয় খুদিংমক্তা তারিবা খুদোংথীবশিং অসি লোইশিন্নবা অমসুং ঐখোয়গী অপুনবা পান্দম ফংনবগীদমক পুন্না হোৎনমিন্নগদবনি। অদুমওইনমক, মলতিলেতরিএলিজম হায়বসিনা হৌজিক হৌজিক্কী মালেম অসিগী মহ্নুৎ মহুৎ শিন্নবা হোৎনগদবনি। শেমদোক্লবা মলতিলেতরিএলিজম অমসুং শেমদোক্লবা য়ুনাইতেদ নেসন্স খক্তনা মীওইবা খুনাইনা তাল্লিবা পান্দম অসি ফংবা ঙমগনি। ঙসি, য়ুনাইতেদ নেসন্সনা চহী ৭৫ মপুং ফারকপসিদা ঐখোয় খুদিংমক্না মালেমগী থাক্তা লৈরিবাই মলতিলেতরেল সিস্তেম অসি শেমদোকমিন্ননবা ৱাশক লৌমিন্নরসি। মসিগী চুন্না মশক হেনগৎনবা, কান্নবা হেনগৎনবা, অমসুং মীওইবগীদমক লেপ্পা গ্লোবেলাইজেসনগী অনৌবা মখলদা য়ুম্ফম ওইনা শেম্নবা।  য়ুনাইতেদ নেসন্স অসি অহানবদদি অনীশুবা লাঞ্জাউগী অশাওবনা শেমখিবনি। ঙসিদি, লাইচৎ অমগী শিংনবনা মসিগী অনৌবা মপোক অমা অমসুং শেমদোক্নবগী তাঞ্জা অমা পিরে। ঐখোয়না খুদোংচাবা অসিবু মাংহনলোইসি।

এক্সিলেন্সীশিং,

অসিগুম্বা য়াম্না মরুওইরবা মতম অসিদা ভারতপু য়ুনাইতেদ নেসন্সকী সেক্যুরিতী কাউন্সিলদা খনবীরে। মালেমগী অমত্তা ওইবগী লীপুন কায়দনবগীদমক, সোসিও ইকোনোমিক ইক্বিতী ফগৎনবা, অমসুং মহৌশাগী খল কায়দনবা ঐখোয়না পান্দম থদুনা থমদুনা হোৎনরিবসিদা ভারতনা য়ু.এন.গী এজেন্দাশিংদা মপুং ফানা শৌগত্তুনা অচৌবা থৌদাং লৌগনি হায়না থমজরি।

নমস্কার।

পুম্নমকপু থাগৎচরি।

***