কোবিদ-১৯ লাইচৎ মনুংদা মীয়ামগী মতেং পাংলিবা বরানাসীদা লৈবা তোঙান-তোঙানবা এন.জি.ও.শিংগা ভিদিও কনফরেন্সকী খুৎথাংদা ঙসি প্রধান মন্ত্রী শ্রী নরেন্দ্র মোদীগা ৱারী শানখ্রে।

হৌজিক কোরোনা লাইচৎ মনুংদা থৱায় য়াওনা মীয়ামগী থবক তৌবগীদমক শেংলবা অমসুং য়াইফরবা সহর বরানাসীগী মীয়াম্বু প্রধান মন্ত্রীনা থাগৎখি।

প্রধান মন্ত্রীনা হায়খি থৌনা লৈনা মীয়ামগী থবক তৌনিংবা ৱাখল্লোন অমগা লোয়ননা লায়রবশিং কমদৌনা মীয়াম্না মতেং পাংলিবগে হায়বগী মতাংদা মহাক লেপ্তনা পাউ ফংলি। লায়না শন্দোরকপা ঙাকথোক্নবা পায়খৎলিবা থবকশিং, তোঙান-তোঙানবা হোস্পিতালশিংগী ফিবমশিং, ক্বারেনতাইনগী থবকশিং অমসুং শিন্মীশিংগী য়াইফনবা থবকশিংগী মতাংদা মহাক পাউ ফংলে।

প্রধান মন্ত্রীনা হায়খি মা অন্নপুরনা অমসুং বাবা বিশ্বনাথকী থৌজাল ফংলবা সহর ওইবনা কাসিদা লৈবা মীওই অমতা চারা হেল্লগা অহিং তুম্লোই হায়বগী মমাংঙৈগী থাজনবা অমা লৈরি। লায়রবশিংগী য়াইফনবা থবক তৌনবা ঈশ্বরনা ঐখোয় খুদিংমক শীজিন্নবা অসি পুম্নমক্কী য়াইফবনি।

মহাক্না হায়খি শেংলবা সহর অসিদা লাইনিং-লাইশোনগী তোঙান-তোঙানবা থবকশিং লেপ্লবসু, কোরোনা থেংনবা, লায়রবশিংদা চানবা অমসুং মেদিকেলগী মতেং পাংবদা ঐখোয় কনাগুম্বা অমতগী মনিংদা লৈতে হায়বা বরানাসীগী মীয়াম্না উৎলে। সরকার অমসুং লোকেল এদমিনিস্ত্রেসন বোদিশিংগা খুৎশম্নদুনা থবক তৌনমিন্নবগীদমক প্রধান মন্ত্রীনা এন.জি.ওশিং থাগৎখি।

প্রধান মন্ত্রীনা হায়খি অতেনবা মতমগী মনুংদা চীঞ্জাক ফংহন্নবা হেল্পলাইনশিং হাংদোকখি অমসুং মীয়ামগী চাকশঙ কয়া হাংদোকখি , দেতা সাইন্সকী মতেং লৌখি, বরানাসী স্মার্দ সিতিগী কন্ত্রোল অমসুং কমান্দ সেন্তর মপুংফানা শীজিন্নখি , লায়রবশিং মতেং পাংনবা মী খুদিংমক থৌরাং তৌদুনা লৈখি। চীঞ্জাক য়েন্থোক্নবা গারিশিং পুথোক্তুনা কমদৌনা পোস্তেল দিপার্তমেন্তনা দিস্ত্রিক এদমিনিস্ত্রেসন মতেং পাংখিবগে হায়বা মহাক্না শন্দোক্না পাউদমখি। সাধু কবিরদাস পল্লদুনা মোদীনা হায়খি মশাগী ওইজবা থিদনা অহিং-নুংথিল মতেং পাংলিবা মীওই অমনা তৌরিবা থবক অদুগী মনা পীয়ু হায়দে !

প্রধান মন্ত্রীনা হায়খি লৈবাক অসিগী মীশিং য়াম্বা অমসুং অতৈ খুদোংচাদবা কয়া অসিনা মরম ওইদুনা অখঙ-অহৈ কয়ানা কমদৌনা ভারতনা লাইচৎ থেংনগদগে হায়বগী মতাংদা ৱাহং হংখি। অপুনবা মীশিং করোর ২৩-২৪ লৈবা উত্তর প্রদেসনা লাইচৎ অসি লাকশিনবা ঙম্লোই হায়বগী অকিবা লৈরম্বা অদু রাজ্য অদুগী মীয়াম্না মতেং পাংবা অমসুং কন্না হোৎনবগী কোকহনবা ঙম্লে। উত্তর প্রদেসতা লায়না শন্দোকপা লাকশিনবা ঙম্বা খক নত্তনা কোরোনা নারিবা মীওইশিং য়াংনা ফগৎলক্লে।

প্রধান মন্ত্রীনা হায়খি লায়রবা মীওইশিংদা কেন্দ্র সরকারনা তোঙান-তোঙানবা খুদোংচাবা কয়া পীরি অমসুং লেম্না চীঞ্জাক অমসুং লেম্না সিলিন্দরশিং পীবা য়াওনা মীওই করোর ৮০ রোম স্কিমশিংগী কান্নবা ফংলি। অমেরিকাগী অপুনবা মীশিংগী শরুক অনি লৈরিবা ভারত্তা মখোয়দগী শিকি অমা ফাওবা লৌদনা মখোয় পীজরি। হৌজিক মসিগী থবক অসি নবেম্বর অরোইবা হায়বদি দিপাৱালি অমসুং ছথ পুজা ফাওবা শাংদোক্লে।

প্রধান মন্ত্রীনা হায়খি বরানাসীদা লৈরিবা তোঙান-তোঙানবা খুৎহৈবশিং, ফিশাবশিং অমসুং ললোন-ইতিক তৌরিবশিংনা থেংনরিবা অৱাবশিং কোকহন্নবা থবকশিং পায়খৎলে। লুপা করোর ৮০০০রোমগী প্রোজেক্তশিং অথুবদা পায়খৎলগনি।

***