লৌউ-শিংউ অমসুং লৌমীগী য়াইফনবগী কেন্দ্র মন্ত্রী শ্রী নরেন্দ্র সিংহ তোমারনা লৌমীশিংগী পোত্থোক্তা অপনবা লৈত্রবা লল্লোন-ইতিক অমদি কান্নবা মমল শোয়দনা ফংহন্নবা পায়খৎপা য়াবা থৌরাংশিং পুম্নমক পায়খৎলি হায়না ফোংদোকখ্রে। উত্তর প্রদেশকী বদায়ুগী (কৃশি বিজ্ঞান কেন্দ্র)কে.ভি.কে. দাতাগঞ্জগী এদমিনিস্ত্রেতিব শঙলেন শানবগীদমক ভিদিও কনফরেন্সকী থোংদা উরেপ-উয়ুং য়ুংলদুনা শ্রী তোমার সিংহনা লৌউ-শিংউগী সেক্তরদা অনৌবা ওর্দিনান্স অনি অমসুং অতোপ্পা ৱায়েলনা য়াবা নৌনা শেমদোকপশিংদা থবক চত্থদুনা লৌমীশিংনা মখোয়গী পোত্থোকশিং অদু মফম অমদা হেক্তা অতোংবা মমলদা য়োনবা য়ারগনি অমসুং লৈরম্বা অখিংবা পুম্নমক লৌথোকখ্রে।

মমলগী থাজবা লৈহনবদা লৌমীশিং(মপাঙ্গল হেনগৎহনবা অমদি ঙাকথোকপা)গী য়ান্নবা অমসুং ফার্ম সর্ভিসকী ওর্দিনেন্স ২০২০দগী লৌউ-শিংউগী পোত্থোক অসি লৈনবদা লল্লোন-ইতিক তৌবশিংগা য়াশিন্নখিবগা লোয়ন-লোয়ননা লৌমীশিংগীদমক্তা মাগী পোত্থোক্কী মমলশিংদা চৎনগদবা গরেন্তী হন্দোকপদসু নিংথিজনা লেপথোক্কি।

কেন্দ্রগী লৌউ-শিংউগী মন্ত্রীনা প্রধান মন্ত্রী শ্রী নরেন্দ্র মোদীগী লিচিং মখাদা লৌউ-শিংউ অমসুং অতোপ্পা সেক্তরশিংগী মরক্তা লৈনরম্বা লাপ্নবশিং অদুগী শমজিন্ননবা হোৎনখি হায়না ফোংদোকখি। লৈবাক অসি চানবা পোত্থোকশিংগী মতাংদা মরোমদোম লেপচবা ঙম্বদা নত্তনা অতৈ পোত্থোকশিংসু পুথোক্লি। লৈবাক অসিদা সরকারগী স্কীমশিং, থৌরাংসিং অমসুং খুদোংচাবশিং ফংহনগদবা চাদা ৮৬কী অপিকপা অমসুং লায়রবগী পনখৈদা লৈবা লৌমীশিং লৈ। কেন্দ্রগী মন্ত্রীনা লৌমীশিংদা মসি নিংথিজনা শেম্নবগীদমক্তা কে.বি.কে. অমসুং সাইন্তিস্তশিংনা অথোইবা থৌদাং লৌরি। মন্ত্রীনা লৌমীশিংনা লৈবাক-লৈহাও ফবা-ফত্তবগী য়েংদুনা তীলহাৎ হীদাকশিং কা হেন্না শিজিন্নদবগী কন্নবা, ঈথৈ-লৌখোংদা ঈশিং খাকচিনবগা লোয়ননা মহৈ-মরোংশিংগী পোত্থোক হেনগৎহন্নবগী অপীল তৌখি, মায়কৈ অসিদা কে.ভি.কে.গী অচৌবা থৌদাংদা মরুওইবা মীৎয়েং থমখি। শ্রী তোমারনা ক্লস্তরগী লৌউ-শিংউ হেনগৎহন্দুনা অমসুং মহৈ-মরোংশিং হেনগৎহনবদা কে.ভি.কে.নসু মাংজিল থাবা থৌদাং অমা লৌগদবনি অমসুং লমদুগী অকোয়বা ফীভম অসি চুনবা মহৈ-মরোংশিং হেনগৎহনগদবনি অমদি কে.ভি.কে.গী অনৌবা থৌদাং অসিনা লম খুদিংমক্তা কান্নবা ফংহনগনি হায়না মহাক্না থাজবা পীখি।

শ্রী তোমারনা য়ু.পি.দা কে.ভি.কে. ৮৬না থবক নিংথিনা পাংথোক্লি হায়না ফোংদোকখি। উত্তর প্রদেশতা অনৌবা কে.ভি.কে.২০ হাংদোক্নবগী অয়াবা পীখিবা অদুদগী ১৭ তি হাংদোকখ্রে। লেমহৌরিবা কে.ভি.কে. অহুম অদু প্রয়াগরাজ, রায়বরেলী অমদি অজমগরদা থুনা হোংদোক্লগনি। মুরাদাবাদতা কে.ভি.কে. অমসু হাংবগী ৱাফম থাঙ্গৎখ্রে।

থৌরম অসিদা কেন্দ্রগী লৌউ-শিংউগী রাজ্য মন্ত্রী শ্রী কৈলাশ চৌধরী, উত্তর প্রদেশকী মন্ত্রী কয়া অমা অমসুং লেজিসলেচর, আই.সি.এ.আর.গী দিরেক্তর জেনরেল দা.ত্রিলোকচন মহাপাত্রা, আই.এ.আর.আই.গী দিরেক্তর দা. এ.কে. সিংহ, সরদার পতেল এগ্রীকলচর য়ুনিভর্সিতী, মীরুতকী ভাইস চাঞ্চেলর দা.আর.কে. মিত্তল অমসুং অতৈ ওফিসিএশিং অমসুং সাইন্তিস্তশিংনা ভিদিও কনফরেন্স অসিদা য়াওখি। লৈবাক অসিদা হৌজিক কে.ভি.কে. ৭২০ লৈ অমসুং তোঙান-তোঙানবা ফীভমশিংগীদমক্তা তেক্নিকেল ওইবা মোদেল উৎলিবা ক্লাইমেৎ স্মার্ত ভিলেজ মোদেল ১৫১ শেমখ্রে। কে.ভি.কে.দগী চহি খুদিংগী লৌমী অমসুং নহারোল লাক্ষ ১৫ ত্রেনিং পীরি।

***