ଚାଷୀମାନେ ଯେପରି ସେମାନଙ୍କ ଉତ୍ପାଦିତ ସାମଗ୍ରୀର ଉଚିତ ମୂଲ୍ୟ ପାଇବେ ସେ ଦିଗରେ ସରକାର ସମସ୍ତ ପଦକ୍ଷେପ ନେଉଛନ୍ତି । ଭିଡିଓ କନଫରେନ୍ସ ଜରିଆରେ ଉତ୍ତର ପ୍ରଦେଶର ବଦାଉଁ ନିକଟସ୍ଥ ଦାତାଗଞ୍ଜ କୃଷି ବିଜ୍ଞାନ କେନ୍ଦ୍ରର ପ୍ରଶାସନିକ ଭବନର ଶିଳାନ୍ୟାସ କରିବା ଅବସରରେ ଏହା ପ୍ରକାଶ କରିଛନ୍ତି କେନ୍ଦ୍ର କୃଷି ଓ କୃଷକ କଲ୍ୟାଣ ମନ୍ତ୍ରୀ ଶ୍ରୀ ନରେନ୍ଦ୍ର ସିଂହ ତୋମର । ସେ କହିଛନ୍ତି ଯେ, ଦୁଇଟି ନୂତନ ଅଧ୍ୟାଦେଶ ଓ କୃଷି କ୍ଷେତ୍ରରେ କେତେକ ଆଇନଗତ ସଂସ୍କାର ଯୋଗୁଁ ବର୍ତ୍ତମାନ ଚାଷୀମାନେ ଦେଶର ଯେକୌଣସି ସ୍ଥାନରେ ବିନା ବାଧା ବିଘ୍ନରେ ସେମାନଙ୍କ ଉତ୍ପାଦିତ ସାମଗ୍ରୀ ବିକ୍ରି କରି ତାହାର ଉଚିତ ମୂଲ୍ୟ ପାଇବାର ପଥ ପରିଷ୍କାର ହୋଇଛି । ନିଶ୍ଚିତ ମୂଲ୍ୟ ପାଇବା ପାଇଁ କୃଷକ ସଶକ୍ତିକରଣ ଓ ସୁରକ୍ଷା ରାଜିନାମା ଏବଂ କୃଷି ସେବା ଅଧ୍ୟାଦେଶ 2020 ଯୋଗୁଁ କୃଷକମାନେ ସେମାନଙ୍କର ଉତ୍ପାଦିତ ସାମଗ୍ରୀର ବିକ୍ରିବଟା ପାଇଁ ବ୍ୟବସାୟୀଙ୍କ ସହ ସିଧାସଳଖ ରାଜିନାମା କରିପାରିବେ । ଏଥିଯୋଗୁଁ ସେମାନେ ନିଜର ଉତ୍ପାଦିତ ସାମଗ୍ରୀର ଉଚିତ ମୂଲ୍ୟ ମଧ୍ୟ ପାଇପାରିବେ ।

ଶ୍ରୀ ତୋମର କହିଛନ୍ତି ଯେ, ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ଵରେ କୃଷି ଓ ଅନ୍ୟାନ୍ୟ କ୍ଷେତ୍ର ମଧ୍ୟରେ ଥିବା ତାରତମ୍ୟ ଦୂର କରାଯାଇପାରିଛି । ଦେଶ ବର୍ତ୍ତମାନ କେବଳ ଆତ୍ମନିର୍ଭରଶୀଳ ନୁହଁ ବରଂ ଅଧିକ ଉତ୍ପାଦନ ମଧ୍ୟ କରିପାରୁଛି । ଦେଶରେ ଶତକଡା 86 ଭାଗ କ୍ଷୁଦ୍ର ଓ ନାମମାତ୍ର ଚାଷୀ ଥିବା ବେଳେ ସେମାନେ ବିଭିନ୍ନ ସରକାରୀ ଯୋଜନା ଓ କାର୍ଯ୍ୟକ୍ରମର ସୁବିଧା ପାଇବା ପାଇଁ ହକଦାର ଅଟନ୍ତି । କୃଷି ବିଜ୍ଞାନ କେନ୍ଦ୍ର ଏବଂ କୃଷି ବିଜ୍ଞାନୀମାନେ ଏଦିଗରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବେ । କୃଷି ବିଜ୍ଞାନ କେନ୍ଦ୍ରଗୁଡ଼ିକ ମୃତ୍ତିକା ସ୍ୱାସ୍ଥ୍ୟ ପରୀକ୍ଷା, ଅଧିକ ରାସାୟନିକ ସାର ପ୍ରୟୋଗରୁ ନିଜକୁ ଦୂରେଇ ରଖିବା, ଜଳ ସେଚନରେ ଜଳ ସଞ୍ଚୟ ଓ ଉତ୍ପାଦନ ଦିଗରେ କୃଷି ବିଜ୍ଞାନ କେନ୍ଦ୍ରଗୁଡ଼ିକର ଭୂମିକା ଅତ୍ୟନ୍ତ ଗୁରୁତ୍ଵପୂର୍ଣ୍ଣ ବୋଲି କହିଥିଲେ । ଏହାଛଡା କୋଠଚାଷ ଏବଂ ସ୍ଥାନୀୟ ଜଳବାୟୁକୁ ସୁହାଉଥିବା ଭଳି ଫସଲ ଉତ୍ପାଦନ ଦିଗରେ କୃଷି ବିଜ୍ଞାନ କେନ୍ଦ୍ରଗୁଡ଼ିକର ଯଥେଷ୍ଟ ଭୂମିକା ରହିଛି ବୋଲି ସେ କହିଥିଲେ ।

ଶ୍ରୀ ତୋମର କହିଥିଲେ ଯେ, ଉତ୍ତର ପ୍ରଦେଶରେ ଥିବା 86ଟି କୃଷି ବିଜ୍ଞାନ କେନ୍ଦ୍ର ପ୍ରଶଂସନୀୟ କାର୍ଯ୍ୟ କରୁଛନ୍ତି । 20ଟି ଅଧିକ କୃଷି ବିଜ୍ଞାନ କେନ୍ଦ୍ର ଖୋଲିବା ପାଇଁ ଅନୁମତି ଦିଆଯାଇଥିବା ବେଳେ 17ଟି କାମ ଆରମ୍ଭ କରିସାରିଲେଣି । ଅବଶିଷ୍ଟ 3ଟି ପ୍ରୟାଗରାଜ, ରାଏବରେଲୀ ଓ ଆଜମଗଡରେ ଖୁବ ଶୀଘ୍ର ଖୋଲାଯିବ । ମୁରାଦାବାଦରେ ଆଉ ଏକ କୃଷି ବିଜ୍ଞାନ କେନ୍ଦ୍ର ଖୋଲିବା ପାଇଁ ପ୍ରସ୍ତାବ ରହିଛି ବୋଲି ସେ କହିଥିଲେ ।

କେନ୍ଦ୍ର କୃଷି ରାଷ୍ଟ୍ରମନ୍ତ୍ରୀ ଶ୍ରୀ କୈଳାଶ ଚୌଧୁରୀ, ଉତ୍ତର ପ୍ରଦେଶ ରାଜ୍ୟ ମନ୍ତ୍ରୀ ଓ ବିଧାୟକ, ଭାରତୀୟ କୃଷି ଗବେଷଣା ପରିଷଦର ମହାନିର୍ଦ୍ଦେଶକ ଡଃ ତ୍ରିଲୋଚନ ମହାପାତ୍ର, ନିର୍ଦ୍ଦେଶକ ଡଃ ଏ.କେ.ସିଂହ, ମିରଟ ସର୍ଦ୍ଦାର ପଟେଲ କୃଷି ବିଶ୍ଵବିଦ୍ୟାଳୟର କୁଳପତି ଡଃ ଆର. କେ. ମିତ୍ତଲ ଏବଂ ଅନ୍ୟାନ୍ୟ ଅଧିକାରୀଗଣ ଏହି ଭିଡିଓ କନଫରେନ୍ସରେ ଯୋଗଦେଇଥିଲେ । ଦେଶରେ ମୋଟ 720ଟି କୃଷି ବିଜ୍ଞାନ କେନ୍ଦ୍ର ଥିବା ବେଳେ 151ଟି ଜଳବାୟୁ ଭିତ୍ତିକ ଆଦର୍ଶ ଗ୍ରାମ ରହିଥିବା ସମ୍ମିଳନୀରେ ସୂଚନା ଦିଆଯାଇଥିଲା । ଏଠାରେ ସୂଚନା ଯୋଗ୍ୟ ଯେ, କୃଷି ବିଜ୍ଞାନ କେନ୍ଦ୍ରଗୁଡ଼ିକ ପ୍ରତିବର୍ଷ ଦେଶର 15 ଲକ୍ଷ କୃଷକ ଓ ଯୁବକ ଯୁବତୀମାନଙ୍କୁ ତାଲିମ ଦେଉଛନ୍ତି ।  

**********