ঐগী নুংশিরবা ইরৈচাশিংবু খুরুমজরি!

কোরোনা লাইচৎ অসিদা ঐখোয় হৌজিক অনীশুবা অনলোক্তা চঙশিনলক্লে। ঐখোয়না হৌঞ্জিক লোক খুবা, লোক থুংবা অমসুং লাইহৌ তোইনা তৌবগী কুমসু নকশিল্লক্লি। মরম অসিনা, ঐহাক্না মীয়াম পুম্নমক্তা ইশাবু চেকশিন্না নাহন্দনা লৈনবা হায়জরি।

মরূপশিং, কোরোনানা লৈখিদবগী চাং অসি য়েংবদা ভারত অসি মালেমগী অতোপ্পা লৈবাকশিংগা চাংদম্নবদা শাফরি। মতম চানা লোকদাউন তৌহৌবা অমসুং অতোপ্পা ৱারেপ কয়া লৌহৌবনা মীওই কয়াগী পুন্সি কনবা ঙম্লিবনি। অদুবু অহানবা অনলোক্তগী হৌদুনা ঐখোয়না ইশাগী অমসুং মীয়াম মরক্তা চৎকদবা চৎন-কাংলোনশিঙ থওইদবা থেংনরে। মমাঙদা, মাস্ক উপ্পা, সোসিএল দিস্তেন্সিং ঙাকপা অমসুং সেকেন্দ ২০ চঙনা খুৎ হাম্ববু চেকশিন্না ইল্লম্মি। অদুবু ঙসিদি, ঐখোয়না হেন্না চেকশিনগদবা মতম অসিদদি থওইদবনা ঐখোয়দা অৱাবা পোকহন্নবা মচাক অমা ওইরে।

মরূপশিং, লোকদাউনগী মতমদা চৎন-কাংলোনশিং মতীক চানা ইল্লমই। হৌজিক্তি, সরাক্র, লোকেল বোদীশিং, নাগরিকশিংনা অদুগুম্বা মমাঙদা চেকশিন্না চৎখিবা লিচৎ অদু উৎপা মতম ওইরে। মরুওইনা, কন্তেন্মেন্ত জোনশিংদনা হেন্না ইনবা তঙাই ফদে। চৎন-কাংলোনশিং ইন্দবা মীওইশিংসু লেপ্পা তঙাইফদে অমসুং চেকশিনগদবনি। অদোম্না পাউদা লৈবাক অমগী প্রধান মন্ত্রী অমা মীয়াম তিনবা মফমদা মাস্ক উপ্তবগীদমক লুপা ১৩,০০০ থিহনখিবদু উরম্লনি। ভারত্তসু, লোকেল এদমিনিস্ত্রেসন্না অসিগুম্বা থৌনাগা লোইননা মথৌ তৌবা তাই। মসি ইরৈচা কোতি ১৩০গী পুন্সি কন্ননবগী খোংথাং অমনি। খুঙ্গংগী প্রধান নত্ত্রগা প্রধান মন্ত্রীবু ওইরো, ভারত্তা কনা অমত্তনা আইনগী মথক্তা লৈতে।

মরূপশিং, লৈবাক অসিনা লোকদাউনগী তৌগদবা খ্বাইদগী হানবা থবক অসি, কনা অমত্তনা চাক লাম্না খাঙহন্দবনি। কেন্দ্র সরকার, রাজ্য সরকার, সিবিল সোসাইতী, পুম্নমকনা মখোয়গী ঙমজবা হোৎনদুনা কনা অমত্তনা চাক লাম্না ফমুং চঙহনখিদ্রে। লৈবাক নত্ত্রগা মীওই অমহেক্তা ওইজসনু, মতম চানা অমসুং মরম চানা লৌহৌবা ঐখোয়গী ৱারেপনা ঐখোয়না খুদোংথীবা অমহেক্তা থেংনবদা পাঙ্গল পীরিবনি। অসুম্না, লোকদাউনগী হেক মতুংদা, সরকারনা প্রধান মন্ত্রী গরীব কল্যান য়োজনা পুথোকখ্রে। মসিগী স্কিম অসিগী মখাদা, লাইরবশিংগীদমক কোতি লাখ ১.৭৫কী পেকেজ পীখ্রে।

মরূপশিং, হৌখিবা থা অহুম অসিদা, লাইরবা কোতি ২০গী ইমুংনা লুপা কোতি ৩১,০০০গী দাইরেক্ত বেনিফিৎ ত্রান্সফর ফংহনখ্রে। মসিগী মতম অসিগী মনুংদা, লৌমী কোতি ৯গী বেঙ্ক একাউন্ততা লুপা কোতি ১৮,০০০ হাপখ্রে। মসিগা মতম অমত্তদা খুঙ্গংগী মফমশিংদা শ্রামিক্কী থবক পীননবগীদমক প্রধান মন্ত্রী গরীব কল্যান য়োজনাসু অথুবদা হৌদোকখি। মসিগীদমক সরকারদগী লুপা কোতি ৫০,০০০ কাইথোকখি।

মরূপশিং, মালেম্বু অঙকপা পোকহনখিবা অচৌবা থবক অনী অমগসু লৈরি। ভারত্তা, মীওই কোতি ৮০ হেনবদা থা অহুমগী রাসন লেম্না ফংহনখি। ইমুং খুদিংমক্কী মীওই খুদিংমক্তা লেম্না চেঙ নত্ত্রগা গেহু কিলো ৫ পীরে হায়বসি মসিনা তাক্লে। মসিগীসু মথক্তা, ইমুং খুদিংমক্না থা খুদিংগী হৱাই চেঙৱাই কিলো ১ ফংলি। অতোপ্পা মাইকৈদনা, য়ুনাইতেদ স্তীৎকী মী মশীংগী শরুক ২.৫ ওইরি, য়ুনাইতেদ কিংদমগীনা শরুক ১২ অমসুং য়ুরোপিয়ন য়ুনিয়নগী অপুনবা মীশিংগী শরুক অনী ঐখোয়গী সরকার অসিনা লেম্না রাসন পীখ্রে।

মরূপশিং, ঙসিদি ঐহাক্না মসিগা মরী লৈননা অচৌবা পাউজেল অমখক লাউথোকচরি। মরূপশিং, ঐখোয়গী লৈবাক অসিদা, নোংজু থাগী মনুংদা অমসুং মতুংদা লৌউ-শিংউগা মরী লৈনবা থবক কয়া অমা লৈরি। অতোপ্পা সেক্তরদদি থবক কয়া হেন্না লৈতে। জুলাইসু কুমহৈ হরাউগী থবকশিংনা অয়াম্ননি। জুলাই ৫না গুরু পুর্নিমানি, অদুগা সাৱানগী থাসু হৌরক্লগনি। অদুদগীদি ওগস্ত ১৫সু লাক্লে, রকশা বন্ধন, শ্রী কৃষ্ণ পোকপা নুমিৎ, গনেশ চতুর্থী, ওনম্না মতুংদা লৈরি। মখা তানা, কাতি বিহু, নবরাত্রি, দুর্গা পুজাসু লাক্লে, অদুদগীদি দুসেরা, দিপাবলি অমসুং ছাথ। মসিগী কুমহৈ হরাউগী কুম অসিদা তঙাইফদবশিং অমসুং শেল হেন্না চৎলগনি। ৱাফমশিং অসি ৱাখলদা থম্লদুনা, প্রধান মন্ত্রী গরীব কল্যান অন্না য়োজনাসু দিপাবলি অমসুং ছথ পুজা ফাওবা, নবেম্বর লোইবফাওবা শাংদোক্নবা ৱারেপ লৌরে।

মসিনা তাক্লিবদি, হায়রিবা স্কিম অসিনা মীওই কোতি ৮০দা লেম্না পীবা স্কিম অসি জুলাই, ওগস্ত, সেপ্তেম্বর, ওক্তোবর, নবেম্বরফাওবা মখা তারগনি, সরকার অসিনা লাইরবা ইচিল-ইনাও কোতি ৮০দা থা মঙাগী লেম্না ফংলগনি। ইমুং অমগী মীওই খুদিংমক্না গেহু নত্ত্রগা চেঙ কিলো ৫ ফংলগনি। মসিগী মথক্তা, ইমুং খুদিংমক্না চনা কিলো অমা থা খুদিংগী লেম্না ফংহল্লগনি।

মরূপশিং, প্রধান মন্ত্রী গরীব কল্যান অন্না য়োজনা শাংদোকপদা লুপা কোতি লিশিং ৯০ চৎলগনি। মসিগী স্কিম অসিদা হৌখিবা থা অহুম  অসিদা চৎখিবা এক্সপেন্দিচর হাপচিল্লগদি লুপা কোতি লাখ ১.৫ য়ৌগনি।

ঐখোয়না লৈবাক পুম্বগী মঙলান অমা উরে অমসুং রাজ্য খরদি মপুং ফানা থবক পায়খৎখ্রে। ঐখোয়না অতোপ্পা রাজ্যশিংদসু মাংজিল থানা পায়খৎনবা খঙহঞ্জরি। হায়রিবসি করি ওইরম্বা য়াই? হৌজিক্তি, লৈবাক অমা, রাসন অমগী কার্দসু চৎনবা হৌখ্রে। হায়রিবা স্কিম অসিগী খ্বাইদগী হেন্না খান্নবা ফংগদবা মীওইশিংদি রাজ্য অমদগী অমদা চত্তুনা থবক থিবা মীওইশিংনি।

মরূপশিং, করিগুম্বা সরকার অসিনা লাইরবা অমসুং লৈজদ্রবা মীওইশিংদা লেম্না রাসন পীবা ঙম্ল্বদি মসিগী হোৎনজমল অসি কাংলুপ অনী থোক্না খাইদোক্তুনা পীবা য়াই। অহানবদা- ঐখোয়গী লৈবাক অসিগী হোৎনবা কল্লবা লৌমীশিং। অনীশুবদা- ঐখোয়গী লৈবাক অসিগী মথমোই শেংনা তেক থিরিবা মীওইশিং। অদোম্না কন্না হোৎনজবা অমসুং কত্থোকপা কয়ানা লৈবাক অসিনা পায়খৎপা ঙম্লিবনি। অদোম্না লৈবাক অসিগী অহোবশিং মেনশিনখ্রে, মরম অসিনা, লাইরবা, শিন্মীশিংগী ইমুংদা চানবা পোৎলম লৈরিবনি। অদোম্না থমোইশেংনা তেক্স থিরে, অদোমগী থৌদাং পায়খৎখ্রে। মরম অসিননি, অসিগুম্বা খুদোংথীরবা মতম অসিদা লাইরবশিংনা লিথোকপা ঙম্লিবসি। লৈবাক অসিদা লৈরিবা লাইরবশিংগী মহুৎ শিন্দুনা, ঐহাক্না তেক্সপেয়রশিং অমসুং লৌমীশিংদা থমোই শেংনা থাগৎপা ফোংদোকচরি অমসুং ইকাই খুম্নবা উৎচরি।

মরূপশিং, লাক্কদৌরিবা নুমিৎশিং অসিদা, ঐখোয়না মখা তানা লাইরবশিং, খুদোংচাবা ফংজদ্রবা অমসুং অৱাৎপনা থল্লবা কাংলুপ্পু মপাঙ্গল পীনবা লেপ্পা লৈতনা হোৎনখিগনি। চেকশিন থৌরাং কয়া অমা লৌখৎলিঙৈদা, শেল-থুমগী ওইবা থবক থৌরম কয়াবুসু পাকথোক-চাউথোক্নবা হৎনগনি। আত্মনির্ভর ভারতকীদমক ঐখোয়না লেপ্পা লোইতনা হোৎনখিগনি। ঐখোয় পুম্নমক্না লোকেলগী মহুৎ শিনবশিং ওইগনি। অসিগুম্বা ৱাশক অমসুং অরেপ্পা অসিগা লোইননা, লৈবাক অসিগী মীওই কোতি ১৩০না অমত্তা ওইনা হোৎনমিন্নবা অমসুং মাংজিল থানা চৎমিন্নবা চংই।

অমুক্কা হন্না ঐহাক্না অদোমগীদমক হকচাং ফনা লৈনবা, য়ার্দ অনীগী অথাপ্পা থম্নবা অমসুং 'গমচা' মতম চুপ্পদা শিজিন্নবা, ফেস কোবর অমসুং মাস্ক শিজিন্ননবা হায়জরি। চানবীদুনা চেকশিন্দবা তৌবীগনু।

আপিল অসিগা লোইননা, পুম্নমকপু য়াইফ-মঙ্গল পীজরি।

*****