স্তীল অমসুং পেত্রোলিয়ম অমসুং নেচরেল গ্যাসকী মন্ত্রী শ্রী ধর্মেন্দ্র প্রধান্না ঙসি "ইস্পতী ইরাদা; শেমগৎ-শাগৎপা অমসুং ইনফ্রাস্ত্রকচরগী সেক্তরদা মীৎয়েং থম্বগা লোইননা স্তীল শীজিন্নবা হেনগৎহনবা" হায়বসিদা পাঙথোকপা ৱেবিনার অমগী ময়াই তাংবল লৌখ্রে। স্তীলগী রাজ্যগী মন্ত্রী শ্রী ফগন সিংহ কুলাস্তে, স্তীলগী সেক্রেতরী, স্তীল মন্ত্রালয়দগী মকোক থোংবা ওফিসরশিং, হীরমসিগী মতাংদা খঙ হৈরবশিং, ইন্দস্ত্রীগী লুচিংবশিং, একাদেমিসিয়নশিং, রিসর্চরশিং, পাক-চাউনা শীজিন্নরিবশিং অমসুং রিগুলেতরশিংসু ৱেবিনার অসিদা শরুক য়াখি।

থৌরম অদুদা ৱা ঙাংলদুনা, শ্রী প্রধান্না হায়খি, স্তীল ইন্দস্ত্রীনা লৈবাক অসিগী শেন্মিৎলোন চাউখৎনবা হোৎনবদা অচৌবা থৌদাং অমা লৌরি। মহাক্না হায়খি, মালেমদা ভারতনা স্তীল খ্বাইদগী য়াম্না পুথোকপদা অনীশুবা লৈবাক ওইরি, অমসুং অফবা পোত্থোক পুথোকপা ঙম্বগী পাঙ্গল লৈ অদুবু লৈবাক অসিগী স্তীল শীজিন্নবগী পর কেপিতাদি মালেমগা চাংদম্নবদা অহুম থোকপগী অমত্তমক ওইরি, অমসুং মসিগী হীরম অসিবুসু ফগৎনবা হোৎনবগী মপাঙ্গল লৈ।

ইস্পাতী ইরাদা গী মতাংদা ঙাংলদুনা মন্ত্রীনা হায়খি, "ইস্পাতী হায়বসি পোৎশক অমখক নত্তে, মসি ৱাখলগী ওইবা মওং অমনি। ভারত্তা অপুনবা ওইনা চাউখৎলবা লৈবাক অমা ওইবগী 'ইস্পাতী ইরাদা' লৈ। মসি ইচম চম্বা খোলাউ অমা নত্তে, মসি সরকার অসিনা লৈবাক অসিগী শেন্মিৎলোন চাউখৎহন্নবা, লাইরবশিংগী ফিবম ফগৎহন্নবা হোৎনরিবা, অকোইবগী ফিবম ফগৎনবা হোৎনরিবা অমসুং ময়ামগী থবক পীনবা হোৎনরিবশিঙ অসিগী খুদম অমনি হায়না মন্ত্রীনা হায়খি। মহাক্না মখা তানা, অপুনবা ওইনা লৌখৎমিন্নরিবা ব্রান্দিং কেম্পেন 'ইস্পাতী ইরাদা' অসিনা লৈবাক অসিদা স্তীল নিংথীজনা শীজিন্নবা হেনগৎহন্নবগী পান্দম লৈ অমসুং স্তীল শীজিন্নবদা লাইহন্নবা, অকোইবদা অকাইবা পীদবা, শেল চঙদবা অমসুং পাঙ্গল পীবা পোৎশক অমা ওইহন্নবগী পান্দম থম্লি হায়না ফোংদোকখি।

মন্ত্রীনা হায়খি মদুদি, স্তীল শীজিন্নবা মতমদা লাকপা খুদোংচাবা অমসুং খুদোংথীবশিং ঐখোয়না থিদোক্কদবনি। মহাক্না হায়খি, স্তীল মন্ত্রালয়না মরুওইবা ইনফ্রাস্ত্রকচর মন্ত্রালয়শিংগা লোইননা স্তীল অহেনবা মওংদা শীজিন্ননবা হোৎননবা হায়দনা তোঙান-তোঙানবা বিভাগশিংগা, রাজ্য সরকারশিংগা অমসুং স্তেকহোল্দরশিংগা খন্নখ্রে অমসুং খন্নরি। মহাক্না স্তীলদা হেন্না থাদবা শাগৎপগী থবকশিংগী খুথাংদা "মেক ইন স্তীল"গী খোলাউ লাউরি। ভারতনা রেলৱে, রোদ, সিবিল এভিএসন, ইনর্জীগুম্বা সেক্তরশিংগী খুথাংদা তুংগী ইনফ্রাস্ত্রকচরশিং শেমগৎপগী তাঞ্জা ফংলি অমসুং মসিনা লৈবাক অসিদা স্তীল শীজিন্নবগী মঙাল অমা পীরগনি। মহাক্না হায়খি মদুদি স্তীল শীজিন্নবগী চাং হেনগৎনবা লৌখৎলিবা থবক থৌরমশিং চাং নাইনা য়েংশিন্নবা কাংবু অমা শেম্লগনি। মহাক্না ৱেবিনার অদুবু শরুক য়ারিবশিংদা মতীক চাবা থবক ওইনা পায়খৎপা য়ারবা রিকমেন্দেসনশিং পীরক্নবা খঙহনখি।

মহাক্কী ৱারোল অদুদা, শ্রী কুলাস্তেনা হায়খি, লৈবাক অসিদা স্তীল পাক শন্না শীজিন্নবা হেনগৎনবগী পান্দম পাক চাউনা লৈ, মরুওইনা খুঙ্গংগী লমশিংদা। খুঙ্গংগী লমদা স্তীল শীজিন্নবগী চাং অসি লৈবাক পুম্বগী চাংচত্তা মরি থোকপগী অমা ওইরি। মাহক্না হায়খি, স্তীল শীজিন্নবা হেনগৎলকপনা শেলথুমগী থবক হেনগৎলক্কনি, অকোইবা ফগৎলক্কনি, থবক পীবগী চাং হেনগৎলক্কনি। মহাক্না হায়খি, সরকারনা ইনফ্রাস্ত্রকচর সেক্তরদা লুপা কোতি লাখ ১০৩গী ওইগদবা নেসনেল ইনফ্রাস্ত্রকচর পাইপ্লাইন অমা লাউথোকখ্রে, অমসুং মসিনা স্তীল দিমান্দ তৌবগী চাং হেনগৎহল্লগনি। স্তীল মন্ত্রালয়না অতোপ্পা বিভাগশিংগা স্তীল শীজিন্নবগী চাং হেনগৎহন্নবা ৱারী শান্নখ্রে। য়ুহা হাগনবা অমসুং স্ত্রকচরদা স্তীলগী চাং ৮০% শীজিন্নরিবা লম জপানগী খুদম্বু পল্লদুনা, শ্রী কালুস্তেনা হায়খি মদুদি, স্তীলনা মপাঙ্গল হাপ্পি অমসুং মতম কুইনা চৎহল্লি। মহাক্না অসিমসু হায়খি, মদুদি স্তীল ইন্দস্ত্রীশিংনা কন্ত্রক্সনগী মমল হন্থনবসু হোৎনগদবনি।

*****