ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ
ରେଭରେଣ୍ଡ ଡକ୍ଟର ଯୋଶେଫ ମାର ଥୋମା ମେଟ୍ରୋପୋଲିଟାନଙ୍କ 90ତମ ଜୟନ୍ତୀ ପାଳନ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉଦ୍ବୋଧନ
• କରୋନା ଯୋଦ୍ଧାଙ୍କ ଦ୍ୱାରା ସଶକ୍ତ ହୋଇ, ଭାରତ କୋଭିଡ଼–19 ବିରୋଧରେ ଦୃଢ଼ତାର ସହ ଲଢ଼ୁଛି : ପ୍ରଧାନମନ୍ତ୍ରୀ
• ଆତ୍ମନିର୍ଭର ଭାରତ ପ୍ରତ୍ୟେକ ଭାରତୀୟଙ୍କ ଆର୍ଥିକ ସାମର୍ଥ୍ୟ ଓ ସମୃଦ୍ଧିକୁ ସୁନିଶ୍ଚିତ କରିବ : ପ୍ରଧାନମନ୍ତ୍ରୀ
• “ସ୍ଥାନୀୟ ଭାବେ ଉତ୍ପାଦନ କର ଏବଂ ସ୍ଥାନୀୟ ଉତ୍ପାଦ କିଣ”ଆହ୍ୱାନ ଅନେକଙ୍କ ଘରେ ସମୃଦ୍ଧିର ପ୍ରଦୀପ ପ୍ରଜ୍ୱଳନ କରିବ : ପ୍ରଧାନମନ୍ତ୍ରୀ
Posted On:
27 JUN 2020 12:50PM by PIB Bhubaneshwar
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ରେଭରେଣ୍ଡ ଡକ୍ଟର ଯୋଶେଫ ମାର ଥୋମା ମେଟ୍ରୋପୋଲିଟାନଙ୍କ 90ତମ ଜୟନ୍ତୀ ପାଳନ ଅବସରରେ ଉଦ୍ବୋଧନ ଦେଇଛନ୍ତି । ଏହି ଅବସରରେ ସେ ରେଭରେଣ୍ଡ ମେଟ୍ରେପୋଲିଟାନଙ୍କୁ ଶୁଭେଚ୍ଛା ଜ୍ଞାପନ କରିବା ସହ ତାଙ୍କର ଦୀର୍ଘ ଓ ନିରାମୟ ଜୀବନ କାମନା କରିଛନ୍ତି ।
ଏହି ଅବସରରେ ଉଦ୍ବୋଧନ ନେଦଇ ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଲେ ଯେ ଡକ୍ଟର ଯୋଶେଫ ମାର ଥୋମା ଆମ ସମାଜ ତଥା ଦେଶର ଉନ୍ନତି ନିମନ୍ତେ ତାଙ୍କର ସମଗ୍ର ଜୀବନ ଉତ୍ସର୍ଗ କରି ଦେଇଛନ୍ତି । ମାର୍ ଥୋବା ଚର୍ଚ୍ଚ ଅତି ଘନିଷ୍ଠ ଭାବେ ସନ୍ଥ ଥୋମା, ଯିଏ କି ପ୍ରଭୁ ଯୀଶୁଖ୍ରୀଷ୍ଟଙ୍କ ଅବତାର ତାଙ୍କରି ଆଦର୍ଶ ସହ ଜଡ଼ିତ ।
ପ୍ରଧାନମନ୍ତ୍ରୀ କହିଲେ ଯେ ଭାରତ ସଦାବେଳେ ବିଭିଧ ଉତ୍ସରୁ ଆଧ୍ୟାତ୍ମିକ ପ୍ରଭାବ ଗ୍ରହଣ କରିବା ସକାଶେ ତା’ର ଦ୍ୱାରକୁ ଉନ୍ମୁକ୍ତ ରଖିଆସିଛି । ଡକ୍ଟର ଯୋଶେଫ ମାର ଥୋମାଙ୍କ ଉକ୍ତିକୁ ଉଦ୍ଧାର କରି ଶ୍ରୀ ମୋଦୀ କହିଲେ ଯେ “ବିନମୟପଣ ହେଉଛି ଏକ ଆଶୀର୍ବାଦ ଏବଂ ତାହା ଉତ୍ତମ କାର୍ଯ୍ୟ ସଂପାଦନ ଓ ସେଥିରେ ସଫଳ ହେବା ସକାଶେ ପ୍ରେରଣା ଯୋଗାଇଥାଏ”। ପ୍ରଧାନମନ୍ତ୍ରୀ କହିଲେ ଯେ ଏହି ବିନମ୍ର ମନୋଭାବର ସହ ମାର୍ ଥୋମା ର୍ଚ୍ଚ ଅନେକ ଭାରତୀୟଙ୍କ ଜୀବନରେ ସକାରାତ୍ମକ ପରିବର୍ତ୍ତନ ଓ ଉନ୍ନତି ଘଟାଇବା ଦିଗରେ କାର୍ଯ୍ୟ କରିଆସୁଛି । ବିଶେଷ କରି ସ୍ୱାସ୍ଥ୍ୟସେବା ଓ ଶିକ୍ଷା କ୍ଷେତ୍ରରେ । ସେ କହିଲେ ଯେ ମାର ଥୋମା ଚର୍ଚ୍ଚ ଭାରତୀୟ ସ୍ୱାଧୀନତା ସଂଗ୍ରାମରେ ମଧ୍ୟ ବିଶେଷ ଭୂମିକା ଗ୍ରହଣ କରିଥିଲା ଏବଂ ଜାତୀୟ ସମନ୍ୱୟ ରକ୍ଷା ଦିଗରେ ଅଗ୍ରଣୀ ତଥା ମହତ୍ତ୍ୱପୂର୍ଣ୍ଣ କାର୍ଯ୍ୟ କରିଆସୁଛି ।
ପ୍ରଧାନମନ୍ତ୍ରୀ କହିଲେ ଯେ କୋଭିଡ଼-19 କେବଳ ଏକ ଶାରୀରିକ ଅସୁସ୍ଥତା ନୁହେଁ, ଏହା ଜନନସାଧାରଣଙ୍କ ଜୀବନ ପାଇଁ ଏକ ମହା ବିପଦ । ଏହା ଆମେ ବଞ୍ଚୁଥିବା ଅସ୍ୱାସ୍ଥ୍ୟକର ଜୀବନ ଶୈଳୀ ସଂପର୍କରେ ଆମମାନଙ୍କୁ ସତର୍କ କରାଇ ଦେଇଛି । ସେ କହିଲେ ଯେ ଏହି ବୈଶ୍ୱିକ ମହାମାରୀ ସମଗ୍ର ମାନବସମାଜକୁ ସତର୍କ କରାଇ ଦେଇଛି ଯେ ସାମଗ୍ରିକ ଭାବେ ଏହାର ମୁକାବିଲା କରିବା ଦ୍ୱାରା ହିଁ ଏଥିରୁ ଉପଶମ ମିଳିପାରିବ । ତେଣୁ ସାମାଜିକ ସଦ୍ଭାବନା ରକ୍ଷା ଓ ଶାନ୍ତିର ସହ ବିଶ୍ୱରେ ବସବାସ କରିବା ସକାଶେ ସଭିଏଁ ସକଳ ପ୍ରକାର ପ୍ରୟାସ କରିବାକୁ ପ୍ରଧାନମନ୍ତ୍ରୀ ଶ୍ରୀ ମୋଦୀ ଆହ୍ୱାନ ଜଣାଇଥିଲେ । ସେ କହିଛନ୍ତି ଯେ କରୋନା ଯୋଦ୍ଧାମାନଙ୍କ ଦ୍ୱାରା ପ୍ରଭାବିତ ଓ ସଶକ୍ତ ହୋଇ ଭାରତ କୋଭିଡ଼-19 ବିରୋଧରେ ସଂଗ୍ରାମ ଜାରି ରଖିଛି ।
ପ୍ରଧାନମନ୍ତ୍ରୀ କହିଲେ ଯେ ଲକଡାଉନ ଯୋଗୁ , ସରକାରଙ୍କ ଅନେକ କାର୍ଯ୍ୟକ୍ରମ ଲୋକମାନଙ୍କ ଦ୍ୱାରା ପରିଚାରିତ ହେଉଛି ଏବଂ କରୋନା ବିରୋଧରେ ସଂଗ୍ରାମ ଜାରି ରହିଛି । ସେଇଥିପାଇଁ ବିଶ୍ୱର ଅନେକ ରାଷ୍ଟ୍ରଙ୍କ ତୁଳନାରେ ଭାରତ ବେଶ ସନ୍ତୋଷଜନକ ସ୍ଥିତିରେ ରହିଛି ଓ ଭାରତରେ ଆରୋଗ୍ୟ ହାର ବୃଦ୍ଧି ପାଉଛି । ଏହି ମହାମାରୀର ଭୂତାଣୁର ଭୟାବହତା କେତେ ବ୍ୟାପକ ତାହା ପୂର୍ବାନୁମାନ ଅପେକ୍ଷା ଢ଼େର୍ ବେଶୀ ବୋଲି ଜଣାପଡ଼ିଛି । ପ୍ରଧାନମନ୍ତ୍ରୀ ଗୁରୁତ୍ୱ ଆରୋପ କରି କହିଥିଲେ ଯେ ଭାରତରେ ପ୍ରତି ନିୟୁତ କୋଭିଡ଼ ସଂକ୍ରମଣରେ 12 ଜଣ ମୃତ୍ୟୁ ବରଣ କରୁଥବବପା ବେଳେ ଇଟାଲିଯେ ଏହି ହାର ନିୟୁତ ପିଛା 574 । ଆମେରିକା, ବ୍ରିଟେନ, ସ୍ପେନ ଓ ଫ୍ରାନ୍ସର ମାତ୍ରା ମଧ୍ୟ ଭାରତ ଠାରୁ ଢ଼େର୍ ଉଚ୍ଚରେ ରହିଛି । ପ୍ରଧାନମନ୍ତ୍ରୀ କହିଲେ ଯେ ଦେଶର ଲକ୍ଷ ଲକ୍ଷ ଗ୍ରାମରେ ଯେଉଁଠାରେ କି 85 କୋଟି ଲୋକ ବସବାସ କରନ୍ତି, ଏପର୍ଯ୍ୟନ୍ତ ତାହା କରୋନା ଭୂତାଣୁ ମୁକ୍ତ ରହିପାରିଛି ।
ପ୍ରଧାନମନ୍ତ୍ରୀ କହିଲେ ଯେ ଭାରତରେ କୋଭିଡ଼-19 ବିରୋଧରେ ଜନତାଙ୍କ ଦ୍ୱାରା ହିଁ ଏହି ସଂଗ୍ରାମ ପରିଚାଳିତ ହେଉଛି ଏବଂ ସେଥିରୁ ଏପର୍ଯ୍ୟନ୍ତ ଉତ୍ତମ ସୁଫଳ ମିଳିଛି । ଏହି ସଂଗ୍ରାମକୁ କଦାପି ଶିଥିଳ ନକରିବା ପାଇଁ ସେ ଗୁରୁତ୍ୱ ଆରୋପ କରିଥିଲେ । ବରଂ ଆମକୁ ଆଗାମୀ ଦିନରେ ଅଧିକ ସତର୍କ ହେବାକୁ ପଡ଼ିବ ଏବଂ ମାସ୍କ ପିନ୍ଧିବା, ସାମାଜିକ ଦୂରତା ରକ୍ଷା “ଦୁଇ ଗଜ ଦୂରତା ରକ୍ଷା”କୁ ନିଷ୍ଠାର ସହ ମାନିବାକୁ ହେବ । ସେହିଭଳି ଜନଗହଳିପୂର୍ଣ୍ଣ ସ୍ଥାନକୁ ନଯିବା ଏକାନ୍ତ ଜରୁରି ବୋଲି ପ୍ରଧାନମନ୍ତ୍ରୀ ପରାମର୍ଶ ଦେଇଥିଲେ ।
ପ୍ରଧାନମନ୍ତ୍ରୀ କହିଲେ ଯେ ଗତ କେଇ ସପ୍ତାହ ମଧ୍ୟରେ ଭାରତ ସରକାର ଦେଶର ଅର୍ଥ ବ୍ୟବସ୍ଥା ସଂପର୍କୀତ ଉଭୟ ଦୀର୍ଘକାଳୀନ ତଥା ସ୍ୱଳ୍ପକାଳନୀ ବିଭିନ୍ନ ପ୍ରସଙ୍ଗର ମୁକାବିକା ଦିଗରେ କାର୍ଯ୍ୟପନ୍ଥା ଉଠାଇଛନ୍ତି । ସେ କହିଲେ ଯେ ଜନସାଧାରଣଙ୍କ ନିମନ୍ତେ ସହଜସାଧ୍ୟ ହୋଇପାରୁଥିବା ତଥା ବିକାଶ ପ୍ରକ୍ରିୟାକୁ ସହାୟକ ହେଉଥିବା ଭଳି ନିଷ୍ପତ୍ତିମାନ ବିଭିନ୍ନ ସେକ୍ଟରରେ ନିଆଯାଇଛି । ତାହା ସମୁଦ୍ର ଠାରୁ ମହାକାଶ ପର୍ଯ୍ୟନ୍ତ ବ୍ୟାପ୍ତ । କୃଷି କ୍ଷେତ୍ର ଠାରୁ ଆରମ୍ଭ କରି କଳକାରଖାନା ପର୍ଯ୍ୟନ୍ତ ତାହା ଲମ୍ବିଛି । ଆତ୍ମ ନିର୍ଭର ଭାରତ ପାଇଁ ଦିଆଯାଇଥବବା ଆହ୍ୱାନ ଆର୍ଥିକ ସ୍ଥିତିକୁ ମଜଭୁତ କରିବା ସହ ପ୍ରତ୍ୟେକ ଭାରତୀୟଙ୍କ ସମୃଦ୍ଧିରେ ସହାୟକ ହୋଇପାରିବ ବୋଲି ସେ କହିଥିଲେ ।
ପ୍ରଧାନମନ୍ତ୍ରୀ ମତ୍ସ୍ୟ ସଂପଦ ଯୋଜନା ସଂପର୍କରେ ନିଜର ବକ୍ତବ୍ୟ ରଖି ପ୍ରଧାନମନ୍ତ୍ରୀ କହିଲେ ଯେ ଏହି ଯୋଜନା ପାଇଁ ସରକାର କୋଡ଼ିଏ ହଜାର କୋଟିରୁ ଅଧିକ ଟଙ୍କା ବିନିଯୋଗ କରୁଛନ୍ତି । ଏହା ମତ୍ସ୍ୟଜୀବୀମାନଙ୍କ ଜୀବନରେ ତଥା ମତ୍ସ୍ୟଚାଷ କ୍ଷେତ୍ରରେ ବ୍ୟାପକ ପରିବର୍ତ୍ତନ ଆଣିବାକୁ ଯାଉଛି । ଏହା ଦ୍ୱାରା ଦେଶରୁ ମାଛ ରପ୍ତାନୀ ବୃଦ୍ଧି ପାଇବ ଏବଂ ତାହା ଉପାର୍ଜନ ବୃଦ୍ଧି କରିବ ଓ ପ୍ରାୟ ପଞ୍ଚାବନ ଲକ୍ଷ ଲୋକ ସେଥିରେ ନିଯୁକ୍ତି ପାଇପାରିବେ । ସେ ଆହୁରି କହିଲେ ଯେ ଉତ୍ତର ପ୍ରଯୁକ୍ତି ଏବଂ ଭିତ୍ତିଭୂମି ଦ୍ୱାରା ହିଁ ଆମର ଭାଲ୍ୟୁ ଚେନକୁ ସୁଦୃଢ଼ କରାଯାଇପାରିବ । ସେ ଦୃଢ଼ ଆଶା ପୋଷଣ କରି କହିଥିଲେ ଯେ କେରଳର ମତ୍ସ୍ୟଜୀବୀମାନେ ସରକାରଙ୍କ ଅନେକ ଯୋଜନାରୁ ଉପକୃତ ହୋଇପାରିବେ ।
ପ୍ରଧାନମନ୍ତ୍ରୀ କହିଲେ ଯେ ସରକାର ମହାକାଶ କ୍ଷେତ୍ରରେ ଐତିହାସିକ ସଂସ୍କାର ପ୍ରକ୍ରିୟା କାର୍ଯ୍ୟକାରୀ କରୁଛନ୍ତି । ଏହାଦ୍ୱାରା ମହାକାଶ ଭଳି ସଂପଦର ଅଧିକ ଉପଯୋଗ ହୋଇପାରିବ ଓ କାର୍ଯ୍ୟକଳାପ ତ୍ୱରାନ୍ୱିତ ହେବ । ବିଭିନ୍ନ ପ୍ରକାର ଡାଟା ତଥା ପ୍ରଯୁକ୍ତି ଉନ୍ନତ ହେବ । କେରଳର ଅନେକ ଯୁବକ ଏବଂ ବିଶେଷ କରି ଦକ୍ଷିଣ ଭାରତର ଯୁବଗୋଷ୍ଠୀ ବିଜ୍ଞାନ ଓ ପ୍ରଯୁକ୍ତି ପ୍ରତି ଆଗ୍ରହ ପ୍ରକଟ କରୁଛନ୍ତି ଏବଂ ସେମାନେ ଏହି ସଂସ୍କାର ପ୍ରକ୍ରିୟାରୁ ଉପକୃତ ହେବେ ।
ପ୍ରଧାନମନ୍ତ୍ରୀ କହିଲେ ଯେ ସରକାର ସକଳ ପ୍ରକାର ସମ୍ବେଦନା ଏବଂ ଦୀର୍ଘକାଳୀନ ପରିକଳ୍ପନାକୁ ଦୃଷ୍ଟିରେ ରଖି କାର୍ଯ୍ୟ କରୁଛନ୍ତି ଏବଂ ଏହା ଭାରତର ବିକାଶ ଇଞ୍ଜିନକୁ ତ୍ୱରାନ୍ୱିତ କରିବ । ଏଭଳି ନିଷ୍ପତ୍ତି ସରକାର ଦିଲ୍ଲୀରେ କାର୍ଯ୍ୟାଳୟରେ ଆରାମରେ ବସି ନେଉନାହାନ୍ତି ବରଂ ଲୋକମାନଙ୍କ ଠାରୁ ତୃଣମୂଳ ସ୍ତରରୁ ମିଳୁଥିବା ମତାମତ ଆଧାରରେ ଏଭଳି ନିଷ୍ପତ୍ତିମାନ ଗ୍ରହଣ କରାଯାଉଛି । ଏହା ପ୍ରତ୍ୟେକ ଭାରତୀୟଙ୍କୁ ଗୋଟିଏ ବ୍ୟାଙ୍କ ଜମାଖାତାର ଅଧିକାରୀ ହେବାକୁ ସୁଯୋଗ ଦେଇଛି, ଆଠ କୋଟିରୁ ଅଧିକ ପରିବାରଙ୍କୁ ମାଗଣାରେ ଧୂମହୀନ ରୋଷେଇଶାଳରେ କାମ କରିବାର ଅବସର ମିଳିଛି । 1.5 କୋଟି ବାସହୀନଙ୍କ ବାସଗୃହ ଯୋଗାଇ ଦିଆଯାଇଛି ଏବଂ ଆୟୁଷ୍ମାନ ଭାରତ ଯୋଜନା ବିଶ୍ୱର ସର୍ବବୃହତ୍ ସ୍ୱାସ୍ଥ୍ୟସେବା ଯୋଜନା ଭାବେ ଏବେ ଲୋକମାନଙ୍କ ହିତ ସାଧାନ କରିପାରୁଛି ।
ପ୍ରଧାନମନ୍ତ୍ରୀ କହିଲେ ଯେ ଗରିବ ଲୋକମାନଙ୍କ ସକାଶେ, ଏକ ରାଷ୍ଟ୍ର, ଏକ ରାସନ କାର୍ଡ଼ ଯୋଜନା ଆଣି ସେମାନଙ୍କୁ ଦେଶର ଯେକୌଣସି ସ୍ଥାନରେ ରାସନ ଉପଲବ୍ଧ କରାଯିବା ସୁନିଶ୍ଚିତ କରାଯାଇପାରିଛି । ମଧ୍ୟବିତ୍ତ ବର୍ଗଙ୍କ ସକାଶେ, ସରକାର ଅନେକ ଗୁଡ଼ିଏ କାର୍ଯ୍ୟକ୍ରମ ଗ୍ରହଣ କରିଛନ୍ତି । ଇଜ୍ ଅଫ୍ ଲିଭିଂ କୁ ପ୍ରୋତ୍ସାହନ ଯୋଗାଇ ଦିଆଯାଇଛି । କୃଷକମାନଙ୍କ ସକାଶେ, ସର୍ବନିମମ୍ନ ସହାୟକ ମୂଲ୍ୟ (ଏମଏସପି) କୁ ବୃଦ୍ଧି କରାଯାଇଛି ଏବଂ ଏକଥା ସୁନିଶ୍ଚିତ କରାଯାଇଛି ଯେ ସେମାନେ ଯେଭଳି ନିଜର ଉତ୍ପାଦର ଉଚିତ ମୂଲ୍ୟ ପାଇପାରନ୍ତି । ମହିଳାମାନଙ୍କ ନିମନ୍ତେ, ଏକଥା ସୁନିଶ୍ଚିତ କରାଯାଇଛି ଯେ ସେମାନଙ୍କ ସ୍ୱାସ୍ଥ୍ର୍ୟର ଯେଭଳି ଉପଯୁକ୍ତ ଯତ୍ନ ନିଆଯିବ ଏବଂ ବିଭିନ୍ନ ଯୋଜନା ମାଧ୍ୟମରେ ସେଥିପ୍ରତି ଆବଶ୍ୟକ ଦୃଷ୍ଟି ପ୍ରଦାନ କରାଯିବ । ଏହା ଫଳରେ ସେମାନଙ୍କ କ୍ୟାରିଅର ମାର୍ଗ ମଧ୍ୟ ସୁରକ୍ଷିତ ରହିବ । ସେଥିପାଇଁ ପ୍ରସବକାଳୀନ ଛୁଟି ଅବଧିକୁ ମଧ୍ୟ ବଢ଼ାଇ ଦିଆଯାଇଛି । ପ୍ରଧାନମନ୍ତ୍ରୀ କହିଲେ ଯେ ଭାରତ ସରକାର କୌଣସି ଆସ୍ଥା, ଲିଙ୍ଗ, ଜାତି, ଭାବନା କିମ୍ବା ଭାଷା ମଧ୍ୟରେ ଭେଦଭାବ ଦେଖନ୍ତିନାହିଁ କିମ୍ବା କରନ୍ତିନାହିଁ । ସରକାର 130 କୋଟି ଦେଶବାସୀଙ୍କୁ ସଶକ୍ତ କରିବା ଉଦ୍ଦେଶ୍ୟରେ କାର୍ଯ୍ୟରତ ଏବଂ ଭାରତର ସମ୍ବିଧାନ ହେଲା ଆମର ମାର୍ଗ ଦର୍ଶକ ।
ପ୍ରଧାନମନ୍ତ୍ରୀ ସୂଚୀତ କରାଇଥିଲେ ଯେ ସରକାରଙ୍କ ନିଲାମୀ ପ୍ରକ୍ରିୟା କିଭଳି ଭାବେ ଜାତୀୟ ବିକାଶ କ୍ଷେତ୍ରରେ ସହାୟକ ହୋଇପାରିଛି । ସେ କହିଥିଲେ ଯେ ଆଜି ଭାରତ କହୁଛି- ଆମେ ସ୍ଥାନୀୟ ଭାବେ ଉତ୍ପାଦନ କରିବ ଏବଂ ସ୍ଥାନୀୟ ଦ୍ରବ୍ୟ ହିଁ କ୍ରୟ କରିବୁ । ଏହା ଦେଶର ଅନେକ ଲୋକଙ୍କ ଘରେ ସମୃଦ୍ଧିର ଦୀପ ପ୍ରଜ୍ୱଳନ କରିବ ବୋଲି ପ୍ରଧାନମନ୍ତ୍ରୀ କହିଥିଲେ ।
ପୃଷ୍ଠଭୂମି:
ଉଲାଙ୍କାରା ମାର ଥୋମା ସିରିଆନ୍ ଚର୍ଚ୍ଚ ଯାହାକି ମାର ଥୋମା ଚର୍ଚ୍ଚ ଭାବେ ସୁପରିଚିତ, ଏହା ଏକ ପ୍ରାଚୀନ ତଥା କେରଳର ନିଜସ୍ୱ ଚର୍ଚ୍ଚ । ପାରମ୍ପରିକ ଭାବେ ଏହା ବିଶ୍ୱାସ କରାଯାଏ ଯେ ସନ୍ଥ ଥୋମାସ ଯୀଶୁଖ୍ରୀଷ୍ଟଙ୍କର ଜଣେ ଶିଷ୍ୟ ଥିଲେ ଯିଏ 52 ଖ୍ରୀଷ୍ଟାବ୍ଦରେ ଭାରତ ଆସିଥିଲେ ଏବଂ ସେଠାରେ ଏକ ଚର୍ଚ୍ଚ ସ୍ଥାପନ କରିଥିଲେ । ଏହି ଚର୍ଚ୍ଚ ଅଧୁନା ସେମାନଙ୍କର 21ତମ ମାଲାଙ୍କାର ମେଟ୍ରୋପୋଲିଟାନ, ରେଭରେଣ୍ଡ ଡକ୍ଟର ଯୋଶେଫ ମାର ଥୋମାଙ୍କ ଦ୍ୱାରା ପରିଚାଳିତ । ସେ ହେଉଛନ୍ତି ଏହି ଚର୍ଚ୍ଚର ମୁଖ୍ୟ । ରେଭରେଣ୍ଡ ଯୋଶେଫ ଥୋମା ବିଗତ ତେର ବର୍ଷ ଧରି ଏହି ଚର୍ଚ୍ଚର ମୁଖ୍ୟ ଭାବେ ରହି ଆସିଛନ୍ତି । ମାର ଥୋମା ଚର୍ଚ୍ଚ ଗଣତାନ୍ତ୍ରିକ ମୂଲ୍ୟବୋଧର ରକ୍ଷା କରିବା ସହ ଜାତୀୟତାର ମନୋଭାବର ସହ ଭାରତର ସ୍ୱାଧୀନତା ସଂଗ୍ରାମରେ ସାମିଲ ହୋଇଥିଲା । ଏହା ପରେ ଜରୁରି ପରିସ୍ଥିତି ବେଳେ ମଧ୍ୟ ଗଣତାନ୍ତ୍ରିକ ମୂଲ୍ୟବୋଧ ସପକ୍ଷରେ ସ୍ୱର ଉତ୍ତୋଳନ କରିଥିଲା । ଏହି ଚର୍ଚ୍ଚ ମାନବସମାଜର ସେବା ପାଇଁ ସମର୍ପିତ ଏବଂ ଅନେକ ସାମାଜିକ କଲ୍ୟାଣ ଅନୁଷ୍ଠାନ ପରିଚାଳନ କରିଆସୁଛି । ଅନାଥାଶ୍ରମ, ହସପିଟାଲ, କଲେଜ, ସ୍କୁଲ ଓ ବୈଷୟିକ ଶିକ୍ଷାନୁଷ୍ଠାନ ଏହି ଚର୍ଚ୍ଚ ଦ୍ୱାରା ପରିଚାଳିତ । ବିଭିନ୍ନ ରାଜ୍ୟରେ ଭୂମିକମ୍ପ, ବନ୍ୟା, ସୁନାମୀ ଭଳି ପ୍ରାକୃତିକ ଆପଦା ବେଳେ ଏହି ସର୍ଚ୍ଚ ଦୁର୍ଗତ ଲୋକମାନଙ୍କୁ ରିଲିଫ୍ ଯୋଗାଇ ଦେବା ସହ ସେମାନଙ୍କ ଥଇଥାନ କାର୍ଯ୍ୟ ମଧ୍ୟ କରିଥାଏ ।
**********
(Release ID: 1634977)
Visitor Counter : 293
Read this release in:
English
,
Urdu
,
Marathi
,
Hindi
,
Manipuri
,
Assamese
,
Bengali
,
Punjabi
,
Gujarati
,
Tamil
,
Telugu
,
Kannada
,
Malayalam