প্রধানমন্ত্রীগী লোইশঙ
উপ রাস্ত্রপতিনা অচান-মীরাই খাইদবা মহৈ-মশিং তম্বা ফংহন্নবা দিজিতেলগী ওইবা তোখাইনা তারিবা অসি শমজিন্নহন্নবা হায়খ্রে
উপ রাস্ত্রপতিনা দিজিতেলগী ওইবা অহাংবা লৈরিবা অসিবু মেনশিন্নবা কোম্না লৈবা ঙমগদবা তেক্নোলোজী পুথোরকক্নবা থৌগৎখ্রে
ভারতকী কলচর অমসুং ইথোসশিংবু ময়েক শেংনা উৎপা মহৈ-মশিংগী মোদেল অমা পুথোকপা
Posted On:
27 JUN 2020 12:50PM by PIB Imphal
উপ রাসত্রপতি, শ্রী এম ভেনকায়া নাইদুনা ঙসি য়ুনিভর্সেল প্রাইমরী এজুকেশন অমা ফংবা ঙম্নবা অমসুং অচান-মীরাই খাইদবা সেকেন্দরি অমসুং অৱাংবা থাক্কী মহৈ-মশিং ফংহনবা ঙম্নবা দিজিতেল ওইবা তাখাইনা তারিবা অসি শমজিন্নহন্নবা হায়খ্রে।
‘ফ্যুচর ওফ এজুকেশন-নাইন মেগাত্রেন্দস’ হায়বা লাইরিক অসি ভীদিও কনফরেন্সকী খুত্থাংদা ভর্চুৱল্লী ফোংলদুনা, “তেক্নোলোজীনা অনৌবা ওইথোকপা য়াবা কয়া অমা হাংদোহল্লি অদুবু মসিনা ঐখোয়গী খুনাই অসিদা অচৌবা দিজিতেলগী ওইবা মওংদা তোখাইনা তাহল্লি হায়বসু খঙবা ঙম্মি” হায়না মহাক্না হায়খি। লাইরিক অসি আই.সি.তি. একাদেমীনা পুথোরকপনি, হায়রিবা একাদেমী অসি নন-প্রোফিৎ সোসাইতি অমনি অমসুং মসি ভারত সরকার অমসুং রাজ্য সরকারশিংগী ওইবা নৌনা পাইখৎলকপা খোংথাং অমনি।
তেক্নোলোজীবু ফংহনবা অমসুং কোম্না ফংবা য়াহনবা হায়বসি মথৌ তাই হায়না মরু ওইনা পল্লদুনা, দিজিতেল দিভাইস শিজিন্নবা ফংদবা অঙাং কয়া অমা লৈরি হায়না উপ রাস্ত্রপতিনা খঙহল্লকখি। “মসিদা লৈরিবা চাউরবা খেৎনবা অসিগী মতাংদা ঐখোয়না য়েংশিনগদবনি” হায়না উপ রাস্ত্রপতিনা মখা তাখি।
লোকদাউন অসিনা মরম ওইরগা মশিং য়াম্লবা মহৈরোই কয়া অমা শোকহল্লি মরমদি মখোয়না ওনলাইনদা মহৈ-মশিং তম্বদা অৱাবা ময়োক্নৈ। মখোয়শিং অসিদা অয়াম্বনা ওফলাইনদগী ওনলাইনা ওন্থরকপা মতমদা খুৎ পাইদুনা লমজিংবীবগী মথৌ তাই অমসুং ওনলাইনগী খুত্থাংদা মহৈ-মশিং তম্নবা হোৎনবদা মতিকচাবা ত্রেনিংগী মথৌ তাই হায়না শ্রী নাইদুনা হায়খি।
ভারত্তা হৌজিক ফাওবা দিজিতেল দিভাইসশিং লৈবা ঙমজদবা মমা-মপা কয়া অমা লৈরি হায়না পল্লদুনা, দিজিতেলগী ওইবা, তৌখাইনা তাদুনা লৈরিবশিং শমজিন্নহনবগী থবক অসি মপুং ফাহনবা হায়বসি সরকার খক্তগীদমক্তদি য়াম্না চাউবা অমসুং য়াম্না লু্ই হায়না মহাক্না হায়খি অমসুং লনাইগী ওইবা সেক্তর, মরু ওইনা মহৈ-মশিংগী ওইবা তেক্নোলোজীগী ফর্মশিংদা লার্নরশিংগী মথৌ তারিবা অদুগী মতুং ইন্না লৈবা ঙমগদবা মমলদা মখোয়গী প্রোদক্তশিং অদু কন্তেক্সচুৱেলাইজ তৌনবা থৌগৎলকখ্রে। “লৈবাক অসি শেম্বদা মশক নাইবা থৌদাং লৌদুনা শরুক য়াবগী অমসুং ঐখোয়গী অঙাংশিংগীদমক্তা অফবা তুংগী পুন্সি অমা থম্বীরম্নবা হৌজিক্তি নখোয়গী মতম ওইরে” হায়না মহাক্না মখা তাখি।
প্রধান মন্ত্রীনা হায়খিবা ৱাফম অদু পল্লদুনা, উপ রাস্ত্রপতিনা হায়খি মদুদি তুংদা লাক্কদৌরিবা মতমশিংদা “ওনলাইনা অসিনা মরু ওইবা লাইন ওইহনগদবনি, মসিনা মরম ওইরগা অতোপ্পা লাইন অমত্তগী মথৌ তাররোই”। হেন্না ফবা তুংগী মতম অমা শেম্নবা, পি.এম.গী ৱাহৈ অহুমগী মন্ত্র, রিফোর্ম, পর্ফোর্ম অমসুং ত্রান্সফোর্ম হায়রিবা অসি ঙাক্না চৎনবা স্তেকহোলদর্শিংদা মহাক্না আপীল তৌখি।
লাইচৎ অসিগী ফিভম য়েংলগা মহৈ-মশিংগী ইন্সতিত্যুশনশিংনা দিজিতেল ওইরকপসিদা, মহৈরোইশিং অমসুং ওজাশিংনা ই-পাউ ফাওননবা, থবকশিং শিয়র তৌনবা অমসুং প্রোজেক্তশিং লোইশিন্নবা ক্লাউদ-বেজদ প্লেৎফোর্মশিংগী খুত্থাংদা কনেক্ত তৌরিহায়না উপ রাস্ত্রপতিনা হায়খি। “পরিখাশিংসু ওনলাইনদা পাংথোক্লি”, হায়না মহাক্না মখা তাখি।
আর্তিফিসিয়েল ইন্তিলিজেন্স, ভর্চুৱল রিয়েলিতি, অমসুং ওগমেন্তেদ রিয়েলিতী অসি ক্লাসরুমশিংদা য়াম্না থুনা চংলগনি হায়বসি উবা ফংলদুনা, মসিনা ওজাশিংনা তাকপগী মওং অমসুং মহৈরোইশিংনা তম্বগী মওংদা অওনবা অমা লাক্লগনি হায়না শ্রী নাইদু হায়খি।
অহোংবা অসিগী মথৌ তারিবশিং অসিগী মতুং ইন্না চুনগদবা মওংদা মহৈ-মশিং তাকপী-তম্বীনবা ওজাশিংদা তকশিল্লদুনা, উপ রাস্ত্রপতিনা হায়খি মদুদি ওনলাইন লেবোরেতরীশিং হৌদোরকপনা মরম ওইরগা মফম অমহেক্তদগী মতম অমহেক্তদা মেছিনশিং অসিবু মহৈরোইশিংনা এক্সেস তৌবা য়াগনি। “ওজাশিংনা হৌজিক্তি ফেসিলিতেতর, গাইদ, কাউন্সেলর, কোচ অমসুং মহৈরোই অদুদা অনম্বা মতমদা মরুপ-মপাং অমগুম্না থৌদাং লৌরি” হায়না মহাক্না মখা তাখি।
য়াম্না চাউরবা দেমোগ্রাফিক্কী ওইবা খুদোংচাবা অসি দেমোগ্রাফিক দিভিদেন্দতা ওন্থোক্নবা ঙাইরি হায়বা উরদুনা, শ্রী নাইদুনা হায়খি মদুদি “ঐখোয়না মসিগী খুদোংচাবা অসি নান্থোহল্লোইদবনি। ঐখোয়না অঙাংশিংদা লৌশিং অমসুং স্কিলশিং ফংহনবা হেনগৎহনগদবনি মসিনা মখোয় খুদিংমক্না মখোয়গী ইন্নেৎ পোতেন্সিয়েল অদু খঙহনগনি”।
ভেল্যুদা য়ুমফম ওইবা মহৈ-মশিং তম্বীবগী মরু ওইবা অদু পল্লদুনা, উপ রাস্ত্রপতিনা ভারতকী কলচর অমসুং ইথোস ময়েক শেংনা মশক তাক্কদবা মহৈ-মশিং তম্বগী মোদেল অমা পুথোক্নবা হায়খ্রে। “ঐখোয়না অঙাংশিংদা কলচরগী ওইবা, মোরেল, এথিকেল অমসুং স্পিরিচুৱলগী ওইবা ভেল্যুশিং শাগোন্নহনবা মথৌ তাই”, হায়না মহাক্না মখা তাখি।
মখাগী অসি ৱা ঙাংখিবা অদুগী মপুং ফাবা ৱারেংগী ৱাহৈ-ৱাতাশিং অদুনি-
“ফ্যুচর ওফ এজুকেশন – নাইন মেগা ত্রেন্দস” হায়বা লাইরিক অসি ফোংনবা ঙসি নখোয় ময়ামগী মরক্তা য়াওবা ফংবা অমসুং নখোয়দা ৱা ঙাংবা ফংবা অসি ঐহাক্না য়াম্না হারাওই।
নখোয়গা হকথেংননা উনরম্মদি খ্বাইদগী হেন্না ফগদবনি অদুবু হৌজিক লৈরিবা ফিভম অসিনা মসি ওইথোকপা ঙমহন্দ্রে। মরম অদুনা ঐহাক্না উপ- রাস্ত্রপতি নিৱাসতগী মসিগী ভোল্যুম অসি ভর্চুৱল্লী ফোংবা তারে অমসুং মীয়ামদা ৱা ঙাংবা তারে।
ঙসি, ঐখোয়না অচৌবা হেল্থ ইমর্জেন্সী অসিগী মরক্সিদা লৈরবসু। ঐখোয় পুম্নমক্না মাইপাক্নবা পুন্না থবক তৌমিন্নরি।
মসিগী লুরবা মতম অসিদা, ঐখোয়গী পুন্সিগী মায়কৈ কয়া অমদা অহোংবা কয়া অমা লৈরি। মহৈ-মশিংদসু মসি থোক্তবা নত্তে।
তেক্নোলোজীনা মরু ওইবা থৌদাং লৌরি অমসুং মহৈ-মশিংগী ওইবা অয়াম্বা থৌওংশিং অদু ওনলাইনদা পাংথোক্লি।
ঐহাক্না খঙবদা চাউথোকচৈ মদুদি আই.সি.তি. একাদেমী, ভারত সরকার অমসুং রাজ্যগী সরকারশিংনা অপুনবা ওইনা পাইখৎলিবা অনৌবা খোংথাং অসিনা স্কিলশিং তাকপীবদা তেক্নোলোজী শক্তি শিজিন্নরি।
ঐহাক্না য়াম্না হরাওই মদুদি মসিনা ইন্দস্ত্রী অমসুং একাদেমিয়াবু নকশিন্ননা পুশিল্লকই।
ঐহাক্না খঙবদা য়াম্না অপেনবা ফাওই মদুদি মসিনা “স্কাই কেমপস”গুম্বা অনৌবা খোংথাংশিংগী খুত্থাংদা একাদেমিক কম্যুনিতীগী লেপ্তনা মতেং পাংলি। ঐহাক্না আই.সি.তি. একাদেমীবু মখোয়না হোৎনরিবশিং অদুগীদমক থাগৎপা ফোংদোক্লি।
ঐগী নুংশিজরবা ইচে-ইচলশিং অমসুং ইচিল-ইনাওশিং,
ঐনা হৌজিক্তা ফোংখ্রিবা লাইরিক অসিদা তুংগী মহৈ-মশিং তম্বাগী লমদা মরু ওইবা চৎনবী অমসুং ৱাফম কয়া পল্লি। ঐখোয়না মদু খঙজিনগদবনি।
করিগুম্বা হৌখিবা মতম, ভারতকী থায়নগী মতমদা, ঐখোয়গী গুরুকুলাগী সীস্তেম অমা লৈরম্মি মসিদা শিশ্য অদু গুরুজিগী ময়ুমদা লৈনবা থারম্মি। শিশ্য অদুগী মগুনগী মতুং ইন্না গুরু অদুনা মহাক্কীদমক্তা ওইবা তোঙানবা তমগদবা হীরম ময়াম অমা তাক্কনি। মহাক্না, তাকখ্রবশিং অদুবু মহৈরোই অদুনা নীংথিজনা খঙলব্রা হায়না খঙবা ঙম্নবা চাংয়েং কয়া অমা শেম্মি।
হায়রিবা অসি মীওই অমত্তগী ওইবা তাকপী-তম্বীবগী খ্বাইদগী হেন্না ফবা মওংনি।
মদুদগী চাউরাক্না ১০০০ বি.সি.দা, তাকশাশিলা য়ুনিভর্সিতি অসি লিংখৎখি অমসুং অৱাংবা থাক্কী মহৈ-মশিং তম্বগী অচৌবা মরু ওইবা সেন্তর অমা ওইরকখি। য়ুনিভর্সিতী অসিদা মহৈরোইশিংনা মখোয়গী অপাম্বা অদুগী মতুং ইন্না মহৈ-মশিং তম্লম্মি। ওজাশিংদা কোর্সশিং অদু শেম্বগী মপুং ফানা নীংখা তম্লম্মি। কোর্সশিং অদুগী মতম অদু য়াম্না কোমলম্মি।
চাউরাক্না ৫সুবা চহি চাদা, হৌজিক্কী বিহারদা নালন্দা অসি ফাওরম্মি। ইন্সতিত্যুশন অসি হৌজিক্কী মতমগী য়ুনিভর্সিতীগা য়াম্না মান্নরম্মি অমসুং মসিদা লেকচর ওলশিং অমসুং লৈফম ক্বার্তরশিং অমসুং লাইব্ররিশিং লৈরম্মি।
ঐগী নুংশিজরবা ইচে-ইচলশিং অমসুং ইচিল-ইনাওশিং,
২১সুবা চহি চাদা মহৈ-মশিং তম্বা অসি গুরুকুলাগী মতমশিং অমসুং তাকশাশিলা অমসুং নালন্দাদা মহৈ-মশিং অসিবু করম্না তাকপীরম্বগে হায়বা অদুগা য়াম্না খেৎনৈ
মহৈ-মশিংগী সেক্তর অসি হৌখিবা দিকেদ খরা অসিদা য়াম্না য়াংনা অহোংবা ওল্লক্লি। ঐখোয়না খুদোংচাবা কয়া অমা অমুক্তা থোকখিদ্রিবা মওংদা চাউথোরকপা উখ্রে। দিজিতেলগী ওইবা খঙচাউ-চাউথোরকপা অমসুং নোলেদজকী ওইবা অওনবা পুরকপা উখ্রে। স্কুলশিং অমসুং য়ুনিভর্সিতীশিংদা হান্নদগী হেন্না অঙাংশিং লৈরে। মালেমদা অহোংবা পুরক্নবগীদমক্তা মথৌ তাবা স্কিলশিংদা লেপ্তনা ওল্লক্লি।
অওনবা অসিগী মরক্সিদা, ঐখোয়না হৌজিক লাইচৎ অসিগী শিংননীংঙাই ওইবা ফি্যম অসি থেংনরি।
মসিনা ঐখোয় খুদিংমক্তা চহি কয়াদগী তৌদুনা লাক্লিবা অসিদা অনৌবা লম্বি অমা থীনবা নম্দুনা তৌহল্লি।
অনৌবা মালেম অসিদা হিংনবা, মহৈ-মশিংগী ইন্সতিত্যুশনশিংনা দিজিতেলদা ওন্থোরক্লি।
মহৈরোইশিং অমসুং ওজাশিংনা ক্লাউদ-বেজদ প্লেৎফোর্মশিংগী খুত্থাংদা মরী থম্লি। মখোয়না ই-পাউ ফাওনরি, শিয়রিং তৌরি, থবক তৌরি অমসুং প্রোজেক্তশিং লোইশিল্লি। পরিখাশিংসু ওনলাইনদা পাংথোক্লি।
অনৌবা তেক্নোলোজীশিং শিজিন্নখ্রে। ঐখোয়না মবেক শেংনা উবা ফংঙি মদুদি লাক্কদৌরিবা চহিশিং অসিদা আর্তিফিসিয়েল ইন্তেলিজেন্স, ভর্চুৱল রিয়েলিতী অমসুং ওগমেন্তেদ রিয়েলিতিনা ক্লাসরুমশিংবু ওন্থোক্লগনি।
মসিনা ওজাশিংনা তাকপা অমসুং মহৈরোইশিং তম্বগী মওংদা অওনবা অমা পুরক্লগনি।
মসিগী অহোংবশিং অসিনা মরম ওইরগা ওজাশিংগী ত্রেনিংগী রিওরিবেন্তেশন অমা তৌবগী মথৌ তাগনি।
ওজাশিংনা ওনলাইনা তাকপী-তম্বীবগী অনৌবা স্কিলশিং তম্বা তাই।
মহৈরোইশিংনা অনৌবা স্কিলশিং অসি তম্বা তাই। মখোয়শিং অদু মশা-মথন্তা তমজবা তাই অমসুং কোলাবোরেতিব লার্নরশিং ওইবা তাই।
তেক্নোলোজীনা বাম্না চাউরবা খুদোংচাবা কয়া অমা পী।
কনাগুম্বা অমনা হৌজিক্তি স্মার্তফোন্দা লাইরিক মবাম অমা পুবা ঙম্লে। ওনলাইদা ওদিও অমসুং ভীদিও কয়া অমা লৈ। হায়রিবা তম্নবগী রিসোর্সশিং অসিনা মতম অমসুং মফম পিকশিলহল্লি অমসুং মসিনা মহৈ-মশিং তম্বদা হেন্না কোম্বা অমসুং নুংঙাইবা ওইহল্লি।
ভারতকী থাপ্লবা খুঙ্গং অমদা ফমদুনা য়াম্না থৱায় য়াওজবা স্কোলার অমনা হার্বার্দকী লাইব্ররীদা লৈবা লাইরিক অমা য়েংবা য়ারবদি মদু নুংঙাইরোইদ্রা?
ওনলাইন লেবোরেতরীশিংদা, মহৈরোইশিংনা মফম অমহেক্তদগী মতম অমহেক্তদা মেছিনশিং অদু শিজিন্নবা য়াগনি অমসুং অশেংবা লেবোরেতরীশিং চংদ্রিঙৈগী মমাংদা মদুদা প্রক্তিস তৌবা য়াগনি।
ওজাশিংনা হৌজিক্তি ফেসিলিতেতর, গাইদ, কাউন্সেলর, কোচ অমসুং য়াম্না তৌইনা, মহৈরোইশিংদা মরুপ অমগুম্না লোইনবগী থৌদাং লৌরি।
লাইরিক অসিনা পনবগুম্না, ওজাগী থৌদাং অসি মহৈরোইগী “স্তেজ” মথক্তা লৈবা “সেজ”তগী “সাইদ”তা লৈবা “গাইদ”তা ওইনা হোংলগনি।
মরম অদুনা ওজাশিংনা য়াম্না য়াংনা হোংলক্লিবা ফিভম অসিগী মতুং ইন্না চুনগদবা মওংদা তাকপী-তম্বিবগী খোংথাংশিং অদুগা চুশিন্নগদবনি।
ঐগী নুংশিজরবা ইচে-ইচলশিং অমসুং ইচিল-ইনাওশিং,
তেক্নোলোজীনা অনৌবা ওইথোকপা য়াবা কয়া অমা ঐখোয়দা হাংদোকই অদুবু মসিনা ঐখোয়গী খুনাই অসিদা দিজিতেল ওইবা অচৌবা তোখাইনা তাবগী ফিভম অমা উবা ফংহল্লি।
দিজিতেল দিভাইসশিং অসি শিজিন্নবা ফংদবা অঙাং কয়া অমা লৈরি।
ঐখোয়না করিগুম্বা য়ুনিভর্সেল ক্বালিতীগী পরাইমরী থাক্তা লৈবা মহৈ-মশিংগী মঙলান অদু মঙফাওনহন্নীংলবদি, করিগুম্বা অচান-মীরাই খাইদবা সেকেন্দরী অমসুং অৱাংবা থাক্কী মহৈ-মশিং লৈহন্নীলবদি, ঐখোয়না তেক্নোলোজী শিজিন্নবদা চাউনা খেৎনবা অমা লৈরিবা অসিগী মতাংদা য়েংশিনবা তাই।
তেক্নোলোজী অসি শিজিন্নবা ফংহনবা অমসুং কোম্না ফংবা ঙমহনগদবনি।
লোকদাউননা মরম ওইরগা মশিং য়াম্লবা মহৈরোই কয়া অমা শোকহল্লি মরমদি মখোয়না ওনলাইনদা মহৈ-মশিং তম্বদা অৱাবা ময়োক্নৈ। মখোয়শিং অসিদা অয়াম্বনা ওফলাইনদগী ওনলাইনা ওন্থরকপা মতমদা খুৎ পাইদুনা লমজিংবীবগী মথৌ তাই অমসুং ওনলাইনগী খুত্থাংদা মহৈ-মশিং তম্নবা হোৎনবদা মতিকচাবা ত্রেনিংগী মথৌ তাই
ভারত্তা লৈবা মমা-মপা ওইবা কয়া অমা দিজিতেল দিভাউিসশিং অসি লৈবা ঙমদে।
দিজিতেলগী ওইবা তৌখাইনা তাদুনা লৈরিবশিং শমজিন্নহনবা হায়বসি সরকার খক্তগী ওইনদি মপুং ফাহনবদা য়াম্না চাউবা অমসুং য়াম্না লু্বা থবক অমনি।
ঐনা লনাইগী ওইবা সেক্তর, মরু ওইনা মহৈ-মশিংগী ওইবা তেক্নোলোজীগী ফর্মশিংদা লার্নরশিংগী মথৌ তারিবা অদুগী মতুং ইন্না প্রোদক্তশিং অদু এদাপ্ত তৌবা অমসুং কন্তেক্সচুৱেলাইজ তৌনবা অমসুং লৈবা ঙমগদবা মমলদা পীনবা হায়রি।
লৈবাক অসি শেম্বদা মশক নাইবা থৌদাংদা শরুক য়াদুনা অমসুং ঐখোয়গী অঙাংশিংগীদমক্তা অফবা তুংগী পুন্সি অমা থম্বীরম্নবা মসি নখোয়গী মতম্নি।
ভারত নেৎনা হাই-স্পীদ ব্রোদবেন্দ নেৎৱার্ককা লোননা খুঙ্গং লোইনমক শম্নহল্লি। মসিনা দিজিতেল কনেক্তিভিতীদা য়াম্না হেন্না লাইহল্লে।
রাজ্য সরকারনা লনাইগী ওইবা সেক্তরশিং অমসুং এন.জি.ও.শিংগা খুৎশম্নদুনা থাক খুদিংমক্তা ক্বালিতী লৈবা মহৈ-মশিং তশেংনা ফংহন্নবা আউৎ-ওফ-দ বোক্স সোল্যুশনশিং পুথোক্কদবনি।
মতম অসি কায়বগী মতমনি। ঐখোয়না হিংবা, তম্বা, তানবা, পোত্থাবা অমসুং থবক তৌবগী মওং-মতৌদা অহোংবা লাক্লি।
ঐখোয় ময়াম্না অহোংবা অসি খঙসি অমসুং অনৌবা ওইরক্লিবা ফিভম অসিদা য়াম্না হৈ-শিংনা চুশনসি।
ঐখোয় ময়াম লাইবক থিবা অসিবু খুদোংচাবদা ওন্থোক্তুনা তুংদা লাক্কদবা মতমগীদমক্তা শেম-শানবা অমসুং শেমসি।
ঐখোয়গী য়াম্না চাউরবা দেমোগ্রাফিক্কী ওইবা খুদোংচাবা অমা দেমোগ্রাফিক দিভিদেন্দতা ওন্থোক্নবা ঙাইরি। ঐখোয়না মসিগী খুদোংচাবা অসি নান্থোহল্লোইদবনি।
ঐখোয়না অঙাংশিংদা লৌশিং অমসুং স্কিলশিং ফংহনবা হেনগৎহনগদবনি মসিনা মখোয় খুদিংমক্না মখোয়গী ইন্নেৎ পোতেন্সিয়েল অদু খঙহনগনি।
ঐগী নুংশিজরবা ইচে-ইচলশিং অমসুং ইচিল-ইনাওশিং,
ঐখোয়না খুমাং চাউশিন্নবা অমসুং চাউখৎনবা মহৈ-মশিংগী মথৌ তাই। লমচৎ-শাজৎ শেম্বদসু মহৈ-মশিংগী থৌদাং অসি চপ মান্ননা মরু ওই।
মহৈ-মশিং তম্বা হায়বসি ভেল্যুদা য়ুমফম ওইগদবনি অমসুং মহৈরোইশিংবু মহৈ ফংহনবদা নত্তনা লৌশিং লৈহনগদবনি।
করিক্যুলমদা ঐখোয়গী ফজরবা কলচর অমসুং হেরিতেজকী এসপেক্তশিং পুম্নমক য়াওগদবনি অমসুং মহৌশাবু ঙাক্তুনা থম্বগী মরু ওইবসু উৎকদবনি।
মহৌশা ঙাক্তুনা থম্মু অমসুং অফবা তুংগীদমক্তা কলচরবু ঙাক-শেন্দুনা থমগদবনি।
ওজাশিংনা মমা-মপা ওইবশিংগী হেক মথংদা অঙাংশিংগী লমচৎ-শাজৎ শেম্বদা মরু ওইবা থৌদাং লৌরিবনি। মরম অদুনা ওজাশিংনা খুনাইগী ফনবগী ৱাখল্লোন চেনগদবনি।
ঐখোয়না ভারতকী কলচর অমসুং ইথোসপু ময়েক শেংনা মশক তাক্কদবা মহৈ-মশিং তম্বগী মোদেল অমা পুথোক্কদবনি। ঐখোয়না অঙাংশিং মরক্তা কলচর, মোরেল, এথিকেল অমসুং স্পিরিচুৱলগী ওইবা ভেল্যুশিং শাগোন্নহনবা মথৌ তাই।
ঐহাক্না আই.সি.তি. একাদেমিগী সি.ই.ও. শ্রী এম. সিবকুমার অমসুং “ফ্যুচর ওদ এজুকেশন – নাইন মেগা ত্রেন্দস” হায়রিবা ৱাখল খলহনগদবা য়াম্না কুপ্পা অদুগুম্বা লাইরিক অমা পুথোরকপা লাইরিক অদুগী অইবা শ্রী ভি.পত্তাভি রামবু অখন্ননা থাগৎপা ফোংদোক্লি।
মসিগী লাইরিক অসিনা খন্থনবগী অমসুং থবক অমা পাংথোকপগী থৌওংগীদমক্তা অহৌবা ওইবা য়াগনি। মসিনা হয়েংগী ওইগদবা লারিক-লাইসু তম্বগী থৌওংদা অওনবা অমা পুরকপদা মখাতানা থবক পাইখৎনবগী অফবা য়ুমফম অমা পীরি।
অরোইবা ওইনা, ঐহাক্না আই.সি.তি. একাদেমীবু লৈবাক শেমগৎপদা শরুক য়ারিবা মখোয়না পাইখৎলিবা থবক-থৌরম পুম্বদা মাইপাকপা ওইরসনু।
থাগৎচরি।
জয় হিন্দ!”
*****
(Release ID: 1634782)
Visitor Counter : 236
Read this release in:
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam