এম. এস. এম. ই. অমদি রোদ ত্রান্সপোর্ত এন্দ হায়ৱেজগী কেন্দ্র মন্ত্রী, শ্রী নিতিন গারকরিনা ঙরা ভিদিও কন্ফরেন্সিংগী খুত্থাঙদা ইঞ্জিনিয়রিং এক্সপোর্ত প্রমোসন কাউন্সিল (ই. ই. পি. সি.)গী মীহুৎশিংগা লাইচৎ অসিগী মতুংদা সেক্তর অসিদা চাউখৎপা পুরক্নবা ৱাফমশিং খন্ননবগীদমক মীফম পাঙথোকখ্রে‍।

মহাক্না পেনেল অদুবু পূক্নীং থৌগৎলদুনা লোকদাউন মনুংসিদা শেন্মিৎলোনগী সেক্তর খুদিংমক্না অতেনবা মতমগী ওইবা খুদোংথিবা ফীভম কয়া থেংনরবসু, ‘পুক্নীং মাঙদবা অমদি ঈশাদা থাজবা থমবা’ অসিনা খুদক্কী ওইবা অপনবশিং অসিবু লান্থোকপদা মতেং ওইগনি‍ হায়না ফোঙদোকখি‍। শেন্মিৎলোনসিগী স্তেকহোল্দর পুম্নমক্কী মরক্তা মওং চুম্না খুৎশম্ননা চৎপা অমদি তেংবাংনবনা লাইচৎ অসিদগী লান্থোকপা ঙমগনি হায়বা ৱাফম মহাক্না থমখি‍।

ৱারী ৱাতাই শানবা অদুদা কেন্দ্র মন্ত্রীনা এম. এস. এম. ই.গী মরুওইবশিং থমখি অমদি লৈবাকসিগী জি. দি. পি. এক্সপোর্ত অমদি থবক পীবগী লমদা সেক্তর অসিনা লৌরিবা থৌদাংবু থাগৎপা ফোঙদোকখি‍। মহাক্না হায়খিবদা এম. এস. এম. ই. সেক্তরনা লৈবাকসিগী এক্সপোর্তকী চাদা ৪৮গী শরুক ওইরি অমদি মসি তেক্নোলোজী হেনগৎহনবা অমদি পোত্থোক ফগৎহনবা হায়রিবশিংসিগী মতেংনা হেনগৎহনগদবনি‍। মসিগীসু মথক্তা লোজিস্তিক, ত্রান্সপোর্ত অমদি খুৎশুমল মশক থোক্না হন্থহনবনা লৈবাকসিগী মেনুফেকচরিং ইন্দস্ত্রী চাওখৎহনবদা মতেং ওইগনি হায়না মহাক্না মখা তাখি‍। মালেমসিনা তপ্না তপ্না কোবিদ-লাইচৎসিবু লাকশিনবা ঙম্লকপগা ইরোয়ননা – লৈকসিদগী মপান লমদা পোত্থোক থাদোকবদা মতেং ওইনবগীদমক হেন্না ফগৎহনবা মথৌ তারিবা অতোপ্পা ফেক্তর অমদি পেকেজিং অমদি স্তেন্দর্দাইজেসন ফেসিলিতীশিংসিনি‍ হায়নসু মহাক্না ফোঙদোকখি ।

মহাক্না হায়, এম. এস. এম. ই. মন্ত্রালয়না ভারতকী এম. এস. এম. ই.শিংদা ইকুইতী ঙাক্লৌ পীননবা ফন্দশিংগী ফন্দ অমা শেমগৎখ্রে‍। শেন নীংথিনা লাকপা, জি. এস. তি. রেকোর্দ অমদি ইনকম তেক্স রেকোর্দ ফজবা এম. এস. এম. ই.শিং অমুক হন্না য়েংশিন্দুনা রেতিং অমা পীগনি অমদি লৈঙাক্কী মায়কৈদগী চাদা ১৫গী ইকুইতী ঙাক্লৌ পীগনি‍। মসিনা মখোয়বু কেপিতেল মার্কেত্তগী শেন তপ্না তপ্না খোমগৎপা ঙমহন্দুনা মখোয়বু নৌনা হৌদোক্নবা পান্দম থম্লিবা এম. এস. এম. ই. স্তোক এক্সচেঞ্জদা মমিং পন্দুনা মপান লৈবাকশিংদগী শেন থাদবদা পুক্নীং চিংশিনবা ঙমহনগনি‍।

লৈবাকসিদা চাওখৎপা পুরক্নবগীদমক্তা লৌশিংবু লন ওন্থোকপগী মরুওইবা ৱাফম ফোঙদোক্লদুনা ইন্দস্ত্রীশিংদা মখোয়গী চহীগী শেন্দোংগী চাদা ২-৩গী চাংদা থিজিনবদা থাদনবা ৱাফমসু মহাক্না মখা তানা থমখি‍।

মহাক্না পেনেল অদুদা মখোয়গী ওইবা সজেসনশিং থারক্নবা হায়রদুনা অমদি লৈঙাক্কী মায়কৈদগী মতেং পুম্নমক পাংগনি হায়না থাজবা পীখি‍।

*****